1 Pita 4:14 - Tataroha Diana

¹⁴ Oto mala uri mwala ko haꞌasapesaluꞌaꞌomu i tehulaꞌana omu ko lulu i sulie a Kraes, omu ke ile-ilenimwaꞌe mola haahie. Omu ke ilenimwaꞌe mola aena aana mei tolahai sapesalunge i tehulaꞌana a Kraes nge ko haataꞌinie uri Liꞌoa Maaꞌi a God e iiꞌo oto aamiu toꞌohuu na kei haro niie manikuluꞌanga huniꞌomu.

1 Pita 4:14 Referans Kwoze

1 Pita 3:14

Taꞌe maꞌalana uri omu ko sapesalu i tehulaꞌana oodotaꞌinge, omu ke ile-ilenimwaꞌe mola aana a God kei haro haꞌadianaꞌaꞌomu taane. Oto omu ke suꞌuri tolahiꞌe i sulie mei sapesalunge, na omu ke suꞌuri meꞌuteꞌinie nga iini.

Tataroha Diana I Sulie A Jisas Kraes Nge A Luk E Uusue 6:22

Deidehiꞌomu mo iini nge mwala ko maalelediꞌomu, na kire ko teungeꞌiniꞌomu, na kire ko ere aaelasiꞌomu uri iꞌomu mo iinoni aaela aana omu ko lulu i sulieu a Kale Ni Iinoni.

Jemes 1:12

Mala uri nga iini nge oohongilana ko lae na ko uure maꞌutaꞌa mola, nge ke ilenimwaꞌe mola. Aena aana i purine oohongilana hiiwalaimolinge ingeie ko lae urine, nge a God kei waaie aana rorodara ni meurihe huu, nge e haiholotaꞌinie hunie mo iini nge kire manata diana hunie.

Matiu 5:11

“Oto iꞌomu na mwala kei teungeꞌiniꞌomu noꞌone urine, na kire kei ere aaelasiꞌomu, na kire kei pwelu wala eero-eero noꞌone i lengimiu urine, aena aana omu ko lulu i sulieu, taꞌe maꞌalana e urine omu ke ile-ilenimwaꞌe mola.

1 Pita 3:16

Taꞌe omu ke aalamire aani sae maneko peꞌi haꞌamaꞌunge aada. Omu ke iiꞌo oodotaꞌi taraureꞌi hunie manatamiu ke taha mola. Urine mo iinoni nge kire ko ere-ere aaelasiꞌomu kire kei masa i sulie nga taa kire ko unu-unue ngeena, aena aana ahutana mwala kei leesie mo ola diana omu ko esuiꞌi aana omu ko lulu i sulie a Kraes.

2 Korinit 12:10

Aena mei olana nge nou ilenimwaꞌe mola haahie mamaelaꞌanga, na maaleledinge, na mo aasanga, na haꞌamotaahinge, na taꞌena nga ola urine no ko lae oodoiꞌi i tehulaꞌana a Kraes. Iau, no ko ilenimwaꞌe mola aena aana maholo no ko mamaelaꞌa, nge no ko si aꞌailaꞌa loꞌu hiitoꞌo aana nanamanga a God.

Tataroha Diana I Sulie A Jisas Kraes Nge A Jon E Uusue 15:21

Taꞌe kire kei teungeꞌiniꞌomu mola aena aana omu ko norutoꞌo aaku, na aana kire kaꞌa saie ike iini e uusungeꞌinieu mei.

Jemes 5:11

Kolu unue uri kire iiꞌo ni saediananga, sulie kire kaꞌa mamalo ike mwaanie asunge a God. Omu rongoa kaꞌu uri a Job e maaꞌoohi susutoꞌo, na omu saie taane uri a God e nii sapeie loꞌu hunie aana toꞌo-toꞌonga ingeie i puri. Oto omu meni saie oto uri a God e honu aana aamasinge na manata-diananga.

Palonga 13:45

Taꞌe maholo mo rato ni mwane ni Jiu kire leesie uri mwala hunge kire loko, kire ko tohungei heotaꞌinirerue, na kire ko ere aaelasirerue na kire ko neꞌi-neꞌie mola walana Pol aaopa.

1 Pita 2:12

Oto omu ke lio-lio talamiu i matolana mo iinoni ni welumalau aana kire ko sare haꞌa-haꞌapeliꞌomu haahie mo ola hunge. Taꞌe omu ke iiꞌo oodotaꞌi mola tarau hunie kire ke leesie tolahamiu e oodotaꞌi. Omu ke teteꞌurine hunie maholo aasanga kei hite aada, ikire noꞌone kire ke si hiiwalaimoli, na kire ke soi haꞌamanikuluꞌaa a God haahiꞌomu.

Hibru 11:26

A Mosis e loꞌongaꞌinie mola uri maꞌalana mwala ko teungeꞌinie i tehulaꞌana a Kraes nge ko lae mai, taꞌe leune e diana loꞌu liutaa aana mo ola diana hunge i Ijip. Na ko loꞌo-loꞌongaꞌi mola urine, aena aana ko toꞌo-toꞌomaaie oto nga taa a God kei niie hunie aana waaitana mai puri.

Kalesia 1:24

Na kire ko si soi haꞌamanikuluꞌaa God haahie nga taa nge e asuie aaku aana e huꞌisie tolahaku urine.

Tataroha Diana I Sulie A Jisas Kraes Nge A Jon E Uusue 9:34

Oto kire aalamie na kire ko teꞌuri hunie, “!Iꞌoe o hute, na o oorahaꞌaa oto! ?Uri o ko sare haꞌa-uusuliꞌemeelu?” Oto kire si aasie i sinaha mwaanie nume ni palo-palo.

Tataroha Diana I Sulie A Jisas Kraes Nge A Jon E Uusue 9:28

Oto kire ko si tohungei ere aaelasie na kire ko unue loꞌu uuri, “Iꞌoe oto ngaeta pwaarongoisuli a mwane aaela ngeena, taꞌe iꞌemeelu, melu ko lulu i sulie a Mosis, propet paine iꞌemeelu.

Tataroha Diana I Sulie A Jisas Kraes Nge A Jon E Uusue 8:48

Oto mo naꞌohai mwane mo Jiu ngeena, kire ko unue hunie a Jisas uuri, “!Aaii! Siꞌue, melu ere toꞌohuu oto, aana melu unue uri iꞌoe mwane aaela ni Samaria, na uri liꞌoa aaela nge aamu.”

Matiu 5:16

Oto iꞌomu, omu ke urine noꞌone. Raa-raa iꞌomu ke raangie ahutana mwala, hunie kire ke lio saie mo ola diana nge omu ko esuiꞌi na kire ke soi haꞌamanikuluꞌaa Aamamiu i Lengi i tehulaꞌani.”

2 Pita 2:2

Maꞌalana e urine, taꞌe mo iini hunge kei lulu i sulie mo tolahai ola aaela ikire ngeena, na mwala kei aehota ere aaelasie loꞌu mola Tataroha Diana toꞌohuu ngeena.

Palonga 18:6

Taꞌe maholo mwala ni Jiu kire ko leledie na kire ko ere aaelasie, a Pol e si tataaꞌinie mola mo wasa-wasa aana toꞌoni ingeie mala nga tolimaa uri tolahada e tohungei aaela liutaa. Oto ko haꞌapasulire ko teꞌuri, “Mala uri a God ko haꞌaloiꞌomu, na roroꞌanga iꞌomu oto maraamiu eena. Nga roroꞌanga ineu haꞌike aana leune. Uure siꞌiri pwau weu ne kei lai tarohaꞌinie Tataroha Diana oto hunie mo Aapoloa Aaopa.”

Palonga 5:41

Mo hurulaꞌaa kire lae mwaanie pulitaa ni lei-lei, kire ko tohungei ilenimwaꞌe oto liutaa, aena aana a Jisas e haataꞌinie uri kire ado taane huni sapesalu i tehulaꞌana satana.

Palonga 28:22

Na melu ko tohungei sare rongoa loꞌongaꞌinge iꞌoe sulie mwala aana taꞌena nga leu kire ko tohungei ere aaelasie hiiwalaimolinge aaopa ngeena.”

2 Korinit 4:10

Sapemeelu ko deu oodoie sapesalunge oto noꞌone tarau mala a Jisas e dau oodoie kaꞌu na hule aana e maesie oto. Taꞌe maꞌalana melu ko sapesalu urine, melu meuri taane mola ue, na aena leune ahutana mwala kire ko si lio saie uri a Jisas e mauri taane ue, aana ingeie oto ni ko lio i sulie sapemeelu.

2 Korinit 4:16

Aena urinena melu saꞌa mou-mou ike aani tarohaꞌinilana a Jisas. Maꞌalana uri sapemeelu ke lae peꞌi aaela loꞌu, taꞌe maurihaꞌameelu poꞌo i lalo ko lae peꞌi haꞌahaalu taane tarau suli dinge.

1 Pita 4:16

Taꞌe mala uri nga iini ko sapesalu i tehulaꞌana ko lulu i sulie a Kraes, nge ke suꞌuri masa haahie leune, taꞌe ke paalahea mola a God aena aana mwala kire lio saie oto uri ingeie ngaeta iini a Kraes.