1 Pita 2:6 - Tataroha Diana

⁶ Ahutana walu ola ngeena kire mani toꞌohuu oto, aena aana i laona mo Uusu-uusu Maaꞌi, a God e unue uuri, !Lio kaꞌu! Nou lio hilisie oto tohungana ho heu, na no ko haꞌa-uuresie oto i Jerusalem mala poo-pootana nume. Na taꞌena nga iini ko hiiwalaimoli aana, e saꞌa noru dile ike aana. Aesaea 28:16

1 Pita 2:6 Referans Kwoze

1 Pita 2:4

Oto omu ke lae mai saana a Aalaha ikie aana ingeie oto aahuꞌine ahutana maurihe. Ingeie e urihana hau diana hunie poo-pootana nume. Mwala tou-tohu nume kire sereꞌinie hau ngeena, taꞌe a God oto e lio hilisie hunie ke neꞌie poo-pootana nume ingeie, na e tohungei lio diana oto i maana. Oto iꞌomu nge omu ko lae mai i saana Aalaha ikie hunie omu ke toꞌo aana oto tohungei meurihe mala ingeie, nge omu ke toliꞌaasiꞌomu oto taꞌingelu hunie a God.

Epesas 2:20

Iꞌomu, omu urihana oto noꞌone nume a God ko esuie. Nume ngeena, mo hurulaꞌaa na mo propet kire neꞌi poo-poota aana, na a Jisas Kraes oto tohungana haususu aana.

Tataroha Diana I Sulie A Jisas Kraes Nge A Mak E Uusue 12:10

Omu saie kaꞌu oto Uusu-uusu Maaꞌi e unue uuri, Hau nge mwala tou-tohu nume kire leledie kaꞌu, e si neꞌie tohungei heu susu aana nume.

Uusu-uusu A Pol Hurula'aa Hunie Mo Rom 10:11

E toꞌohuu oto, aana mo Uusu-uusu Maaꞌi ko ere loꞌu i sulie a Kraes uuri, Taꞌena nga iini ko norutoꞌo aana e saꞌa roroꞌa norudile ike. Joel 2:32

2 Timoti 3:16

Taꞌe-taꞌena nga ola i laona mo Uusu-uusu Maaꞌi, walana God ni ngeena. Na ingeie ni e unue hunie mwala ke uusu-uusu oto i sulie loꞌongaꞌinge ingeie maraana. Oto Uusu-uusu Maaꞌi e tohungei diana huni haꞌananaukie, na huni haataꞌinie mo oorahaꞌaanga ikie aaka, na huni haꞌa-oodohie tolahaka, na huni haꞌa-uusulikie aana mau-meuringe nge e oodo i maana God.

Tataroha Diana I Sulie A Jisas Kraes Nge A Jon E Uusue 7:38

Mala oto mo Uusu-uusu Maaꞌi e unue uri Iini ko hiiwalaimoli eeku, nge huulaa aani wei nge ko niie maurihe kei hureꞌitaa mai mwaanie saena.”

Matiu 12:18

Koni-konihe ineu ni oto ie, iini nou lio hilisie, na iini nou manata diana hunie, na iini nou tohungei ilenimwaꞌe haahie. Ne kei niie nanamanga ni Liꞌoa ineu hunie, na ingeie ke si haataꞌinie hunie ahutana mwala uri leinge a God ni e oodotaꞌi.

2 Pita 3:16

Na i laona ahutana mo uusu-uusu ingeie e ere urine oto tarau maholo e uusu-uusu i sulie mei ola ngeena. I laona mo uusu-uusu a Pol ngeena, ngaeta mo wala kire kaꞌa tohungei matapwa diana ike huni rongo saiꞌi. Na ngaeta mwala nge kire kaꞌa saenanau na loꞌongaꞌinge ikire kaꞌa oodo, kire ko lae peꞌi oolisie mola loꞌongaꞌinge aana mo wala ngeena na kire ko lae huꞌisiꞌi oto. Na kire ko lae peꞌi teꞌurine noꞌone mola aana taꞌena nga mo wala i laona mo Uusu-uusu Maaꞌi i naꞌo. Taꞌe aana tolahai ola urine, kire ko si tohungei da oto haꞌamotaahinge ikire maraada kei aaela oto liutaa ni ngeena.

2 Pita 1:20

Na e tohungei roroꞌa oto liutaa hunie omu ke lio saie uri nga taꞌa-taꞌa mei wala nge mo propet kire uusue i laona Uusu-uusu Maaꞌi, e kaꞌa uusue ike i sulie nga mei neꞌisaenga ingeie mola maraana.

Epesas 1:4

I naꞌo aana maholo a God e kaꞌa haꞌaholaa ue walumalau, e lio hilisikie oto huni neꞌi iinoni ingeie na huni iiꞌo ruru peꞌie a Kraes uri hunie kie ke iiꞌo maaꞌi na kie ke suꞌuri toꞌo aana nga mei ola aaela i maana.

Palonga 1:16

“Maeni eesiku, mei wala nge Liꞌoa Maaꞌi e niie hunie a Deved Inemauri e unue oto mai i naꞌo i laona Uusu-uusu Maaꞌi e toꞌohuu na ko oa oto, mala kolu ko meni leesie ngeena. Mei wala ngeena e lae i sulie a Jiudas, iini nge e naꞌona mo ramo huni tapolie a Jisas,

Tataroha Diana I Sulie A Jisas Kraes Nge A Luk E Uusue 20:17

Taꞌe a Jisas e toꞌomaaire, ko si teꞌuri, “?Oto nga taa ni loꞌongaꞌinge aana mo wala uusuleni e lae ienini, Hau nge mwala tou-tohu nume kire leledie kaꞌu, e neꞌi tohungei heu susu oto aana nume? Sam 118:22

1 Pita 2:8

Na aana ngaeta leu loꞌu, mo Uusu-uusu Maaꞌi e ere loꞌu i sulie uuri, Hau ngeena oto ola huni haꞌatataroa mwala, na kire sai domu aaela i tehulaꞌana. Aesaea 8:14 Kire ko domu aaela urine, aena aana kire kaꞌa tola ike i sulie walana God. Na mwala hai-heitohe urine kire kei domu aaela oto urine, aana taꞌa-taꞌa tala mola hunie haꞌamangolada.