1 Pita 1:22 - Tataroha Diana

²² Oto i tehulaꞌana omu tola i sulie mo wala toꞌohuu aana Tataroha Diana ngeena, omu da oto maurihaꞌamiu e rereꞌa mwaanie oorahaꞌaa eena, na omu sai manata diana oto hunie mo eesimiu maaꞌi. Aena urine, omu ke mana-manata diana oto huniꞌomu heiliu aana ahutana saemiu.

1 Pita 1:22 Referans Kwoze

1 Timoti 1:5

Aena aana nga taa no ko sare haꞌa-uusulire aana ngeena, nge mola hunie kire ke mana-manata diana hunire hailiu aani sae manola, na aani manatanga rereꞌa, na aani hiiwalaimolinge toꞌohuu.

Hibru 13:1

Omu ke mana-manata diana huniꞌomu heiliu oto mala iꞌomu mo mwaasine toꞌohuu i lalo aana a Kraes.

1 Jon 4:12

Maꞌalana nga taꞌa-taꞌa iinoni e kaꞌa leesie ue a God, taꞌe mala uri kie ko manata diana hunikie hailiu, nge a God ke si iiꞌo oto i lalo aaka, na manata-diananga ingeie ko tohungei eehu diana oto i lalo aaka.

1 Jon 4:7

Maeni iinoni maaꞌi ineu, kie ke manata diana hunikie hailiu, aana manata-diananga e uure aana God. Taꞌena nga iini ko mana-manata diana, nge ko haataꞌinie uri ingeie oto kalena a God na e saie a God.

1 Pita 3:8

Leu ooreta no ko unue mola uri omu ke mani toꞌo aana mola taꞌa-taꞌa mei sae, na omu ke aama-aamasiꞌomu heiliu. Omu ke mana-manata diana huniꞌomu heiliu mala mo mwaasine. Omu ke sae-saediana huniꞌomu heiliu, na omu ke haꞌamwai-mweiꞌaꞌomu maraamiu.

Jemes 4:8

Omu ke iiꞌo karaꞌinie a God, nge a God kei iiꞌo karaꞌiniꞌomu. Iꞌomu mo iini nge omu oorahaꞌaa, omu ke loto aasie oorahaꞌaa mwaanie manatamiu. Na iꞌomu mo iini omu ko sare lulu i sulie a God na walumalau aana taꞌa-taꞌa maholo, omu ke asuie neꞌisaenga iꞌomu ke rereꞌa.

1 Jon 3:23

Na mei haꞌatolanga ingeie ni otona, uri hunie kie ke hiiwalaimoli aana Kalena, a Jisas Kraes, na hunie kie ke manata diana hunikie hailiu, mala e unue oto hunikie.

2 Tesalonaeka 1:3

Maeni eesiku maaꞌi, melu ko paalahea God mola tarau haahiꞌomu. Na e diana hunie melu ke asuie urine, aana hiiwalaimolinge iꞌomu ko peine aꞌailaꞌa mola i suli maholo, na manata-diananga nge omu toꞌo aana huniꞌomu heiliu ko lae peꞌi peine noꞌone loꞌu tarau.

1 Tesalonaeka 3:12

Saemeelu uri a Aalaha ke da manata-diananga iꞌomu ngeena ke aꞌailaꞌa huniꞌomu heiliu na hunie taꞌena nga iinoni loꞌu, mala manata-diananga iꞌemeelu huniꞌomu e paine loꞌu liutaa.

1 Jon 4:20

Mala nga iini ko unue uuri, “Nou manata diana hunie a God,” taꞌe ko ngiduupu mola hunie aasine, ingeie ngeena iinoni eero-eero mola. Aana e aasa kei manata diana hunie a God, iini e kaꞌa lee-leesie, mala uri e kaꞌa sai manata diana hunie aasine, iini nge ko lee-leesie tarau.

1 Pita 2:17

Na omu ke haꞌamaꞌu aana taꞌena nga iinoni, na oto liutaa omu ke mana-manata diana hunie mo eesimiu maaꞌi. Iau, mala nou unue kaꞌu, omu ke haꞌamaꞌu aana inemauri peine ni Rom, taꞌe omu ke haꞌamaꞌu aana a God oto liutaa.

Palonga 15:9

E kaꞌa asuie ike nga mei ola ke aaopa i matolakaelu. E taꞌaasie mo oorahaꞌaanga mo Aapoloa Aaopa aena kire hiiwalaimoli mala e asuie kaꞌu aakaelu mo Jiu.

1 Jon 3:11

Uure oto mai aana maholo omu aehota hiiwalaimoli, omu rongoa oto tarau uri kie ke manata diana hunikie hailiu.

2 Pita 1:7

na omu ke sapeie loꞌu manata-diananga hunie mo eesimiu aana hiiwalaimolinge, na omu ke heꞌi sapeie loꞌu noꞌone manata-diananga hunie ahutana mo iinoni.

Pilipae 1:9

Na no ko eitanaie a God talamiu hunie manata-diananga iꞌomu ke paine loꞌu liutaa, na omu ke honu eeni saenanaunge hunie lio sai-olanga diana.

Epesas 4:3

Omu ke asu aꞌailaꞌa aani eriꞌapasilana mola uri omu ke mani neꞌie mola taꞌa-taꞌa mei sae, oto mala Liꞌoa Maaꞌi e asuie kaꞌu eemiu oto aana maholo e niie hanuelamanga huniꞌomu uri hunie omu ke iiꞌo ruru diana.

Kalesia 5:5

Taꞌe Liꞌoa Maaꞌi ko haꞌawalaimoliꞌaa hunikie uri a God ko haꞌa-oodohikie aena aana kie norutoꞌo mola aana a Jisas.

Haataꞌinge 2:4

“Taꞌe nga taa nge nou lio oodoie aamiu na nou kaꞌa saetoꞌo aana mola uri omu kaꞌa manata diana ike oto hunieu mala holaꞌinaꞌo.

1 Pita 4:17

Maholo e hule oto hunie leinge a God kei aehota, na kei aehota oto peꞌie mwala aana uluhe ni iinoni ingeie. Na aana leinge ngeena ko aehota peꞌikie mwala ingeie, nge kie saie oto uri leinge a God kei aaela oto liutaa hunie mo iini nge kire kaꞌa hiiwalaimoli ike aana Tataroha Diana.

1 Pita 4:8

Mei naꞌohai ola e malisine omu ke asuie oto uri omu ke mana-manata diana toꞌohuu huniꞌomu heiliu, sulie tolahai ola urine nge e sai da omu ke saeꞌaasie mo roroꞌanga iꞌomu heiliu noꞌone huniꞌomu.

Hibru 11:8

Aani hiiwalaimolinge mone, nge a Ebraham e tola i sulie a God maholo e soie. A Ebraham e toliꞌaasie hanue ingeie huni lae aana ngaeta hanue nge a God kei niie hunie. E lae mola, maꞌalana uri e kaꞌa saie uri leu nge ko lae takoie.

Hibru 9:14

!Taꞌe apune a Kraes e nanama loꞌu liutaa! Aana nanamanga a Liꞌoa Maaꞌi nge e iiꞌo huu oto tarau, a Kraes e niie maurihaꞌana maraana hunie a God mala nga uunu-olanga e oodotaꞌi. Na apune ko hoda rereꞌa aana manataka, hunie kie ke toliꞌaasie mo tolahai ola aaela nge kie sai maesiꞌi, na hunie kie ke asu nana God Mau-meuriꞌe.

Hibru 6:10

Aana leinge a God e oodo oto taꞌingelu na e kaꞌa sai pulongosie ike asunge iꞌomu na manata-diananga nge omu haataꞌinie hunie mwala i tehulaꞌana a Kraes. E lio saie mola uri omu peꞌi-peꞌi diana aana mo iinoni ingeie, na uri omu ko lae-lae ue aana peꞌinge huniꞌomu heiliu.

2 Korinit 6:6

Na melu haataꞌinie loꞌu uri iꞌemeelu mo koni-konihe a God aana iiꞌonga rereꞌa iꞌemeelu, na aana saenanaunge iꞌemeelu, na aana toli-rakonga iꞌemeelu, na aana saediananga iꞌemeelu hunie ahutana iinoni, na aana nanamanga a Liꞌoa Maaꞌi, na aana melu manata diana toꞌohuu hunie ahutana iinoni.

Tataroha Diana I Sulie A Jisas Kraes Nge A Jon E Uusue 15:17

Oto no ko unue loꞌu huniꞌomu uri omu ke manata diana huniꞌomu heiliu.”

1 Pita 3:1

Na iꞌomu mo huꞌe noꞌone, omu ke tola i sulie mo poro iꞌomu. Urine, maꞌalana poro iꞌoe e kaꞌa hiiwalaimoli ike aana God, taꞌe ohe tolahamu kei haꞌa-aaliꞌue mai takoie hiiwalaimolinge. E kaꞌa ilisie ike uri o ke haro unue loꞌu nga mei ola hunie, taꞌe poro iꞌoe kei hiiwalaimoli mola

Hibru 5:9

Oto urine a God e haataꞌinie uri nga mei ola e kaꞌa aaela ike aana a Jisas, na a Jisas e si neꞌie tala hunie maurihe aana mwala ko tola i sulie.

2 Timoti 1:14

Aana a God e niie oto walaimolinge diana i sulie a Jisas ngeena namue. Oto o ke lio i suli diana aana, na a Liꞌoa Maaꞌi i lalo aaka kei peꞌiꞌo.

1 Timoti 5:2

E urine loꞌu aana mo huꞌe, aena aana ikire oto mo nikemu. Mo keni haalu ikire oto mo eesimu keni, oto aena urinena o ke takuhire tarau aana tolahai iinoni diana.

1 Timoti 4:12

O ke suꞌuri toliꞌaasie nga iini hunie ke loꞌongaꞌinie uri walamu e kaꞌa hiꞌe ike aana o saanau mola. Taꞌe o ke iiꞌo diana oto liutaa hunie kira hiiwalaimoli ke leesie walamu, na asunge iꞌoe, na manata-diananga iꞌoe, na hiiwalaimolinge iꞌoe, na iiꞌonga rereꞌa iꞌoe, hunie kire ke haimaaniꞌo.

1 Timoti 1:3

Mala oto nou unue kaꞌu huniꞌo aana maholo nou lae mai hunie poꞌo ni henue i Masedonia, saeku hunie uri o ke oore kaꞌu mola wau aana huilume i Epesas. O ke iiꞌo oto i leune hunie o ke uure honosie mwala nge kire ko lae peꞌi haꞌa-uusuli mola aana mo ola aaopa mwaanie hiiwalaimolinge toꞌohuu.

2 Tesalonaeka 2:13

Maeni eesiku maaꞌi, e malisine melu ke paalahea God mola tarau haahiꞌomu, aana iꞌomu mo iini a Aalaha e manata diana huniꞌomu. A God e lio hilisiꞌomu uure oto wau i naꞌo huni haꞌa-uuriꞌomu, na e haꞌa-uuriꞌomu aana omu hiiwalaimoli aana mo wala toꞌohuu, na a Liꞌoa Maaꞌi e da omu neꞌi iinoni maaꞌi.

Kalesia 3:1

!Iꞌomu mo mweꞌu-mweꞌule ni Kalesia! Haꞌarongolamiu e lae haadaꞌi kaꞌu taane oto i sulie maelana a Jisas i lengine poꞌu-poꞌu. ?Oto e ue omu ko si aatopuri aana? ?Ohe nga iini e siꞌohiꞌomu hunie pwaumiu ke aaela urine?

Kalesia 5:7

Holaꞌinaꞌo omu lae-lae kohi taane oto peꞌie hiiwalaimolinge aana a Kraes. ?A tei ni e heꞌi da loꞌu omu rohu mwaanie lulu i sulilana mo wala toꞌohuu ngeena?

Uusu-uusu A Pol Hurula'aa Hunie Mo Rom 8:13

Mala uri omu kei iiꞌo oto i sulie mo tolahai ola aaela urine, nge omu kei mae mola. Taꞌe mala uri omu kei iiꞌo oto i sulie tolahana Liꞌoa Maaꞌi na uri omu kei toliꞌaasie oto toꞌohuu mo tolahai ola aaela iꞌomu, nge omu ke si helesie maurihe huu.

Uusu-uusu A Pol Hurula'aa Hunie Mo Rom 2:8

Taꞌe mwala nge saeda e aaela aana kire ko neꞌisae paine mola haahire maraada, na kire kaꞌa saetoꞌo aana ike walaimolinge, taꞌe kire ko lulu i sulie mola mo tolahai ola aaela, ikire ngeena nge a God kei tohungei saewasulire na kei haꞌaletehire oto hiitoꞌo.

Uusu-uusu A Pol Hurula'aa Hunie Mo Rom 1:5

A Jisas e tohungei haataꞌinie hahuꞌana manata-diananga ingeie hunieu aana e lio hilisieu hunie ne ke neꞌi hurulaꞌaa ingeie, uri hunie ne ke naꞌona mwala aana taꞌena nga komu hunie kire ke haꞌapainaꞌaa satana, na hunie kire ke hiiwalaimoli aana, na hunie kire ke tola i sulie walana.

Tataroha Diana I Sulie A Jisas Kraes Nge A Jon E Uusue 17:17

Saeku uri o ke haꞌa-uusulire aana walamu, aena aana walaimolinge ni otona, na walaimolinge ngeena e sai peꞌire hunie kire ke oopara maraada mwaanie oorahaꞌaa, na hunie kire ke iiꞌo maaꞌi mola namue.

Tataroha Diana I Sulie A Jisas Kraes Nge A Jon E Uusue 15:3

Iꞌomu, omu rereꞌa mango oto, aana nga taa nge nou haꞌa-uusuliꞌomu aana.

Palonga 6:7

Oto walana God mone ko lae ahusie oto mo henue hunge, na mo pwaarongoisuli i Jerusalem kire ko hunge loꞌu liutaa, na hungelana mo pris ko lulu i sulie oto a Jisas noꞌone.

Tataroha Diana I Sulie A Jisas Kraes Nge A Jon E Uusue 17:19

Na i tehulaꞌada, nou oopaau oto huni esunge mola namue, hunie ikire noꞌone, kire ke oopara maraada mwaanie taꞌena nga oorahaꞌaa huni esunge noꞌone namue.”

Jemes 1:21

Oto omu ke neꞌi aasie mwaaniꞌomu ahutana mo ola tataꞌala na taꞌena nga ola aaela nge ko peine hailiu. Na omu ke haꞌamwai-mweiꞌaꞌomu hunie omu ke tola i sulie mo haꞌananaunge maaꞌi a God nge hasileni e lae oto i manatamiu, aana kire sai haꞌa-uuriꞌomu.

1 Pita 1:2

A God Aamaka e lio hilisiꞌomu oto uure mai naꞌo i sulie oalaꞌinge ingeie. Na Liꞌoa Maaꞌi e lae peꞌi haꞌamaaꞌiꞌomu oto mai hunie omu ke iiꞌo maaꞌi, hunie omu ke lulu i sulie a Jisas Kraes. Lotohilemiu e lae aana apune, aena aana maenga ingeie oto uuraaꞌinge nge ko da omu iiꞌo rereꞌa mwaanie oorahaꞌaa. No ko eitanaie a God uri hahuꞌana manata-diananga na hanuelamanga ingeie ke iiꞌo peꞌiꞌomu taraureꞌi.