1 Pita 1:19 - Tataroha Diana

¹⁹ !Haꞌike! E holi eelihoꞌi eemiu aana tohungana apune a Kraes, aana a Kraes e mae honotamiu urihana nga kele kalei sipu aana uunu-olanga. Na mala kire ko lio hilisie nga kele kalei sipu e kaꞌa toꞌo aana ike nga mei ola ke aaela aana hunie uunu-olanga, nge e urine noꞌone aana a God e lio hilisie a Kraes.

1 Pita 1:19 Referans Kwoze

1 Jon 1:7

Taꞌe mala uri kie ko iiꞌo i laona raa-raa mala a God noꞌone ko iiꞌo i laona raa-raa, nge kie ke iiꞌo ruru peꞌikie hailiu, na apune Kalena, a Jisas, ke si haꞌarereꞌakie mwaanie ahutana oorahaꞌaa.

Tataroha Diana I Sulie A Jisas Kraes Nge A Jon E Uusue 1:29

Oto hai dinge loꞌu mola i purine, a Jon e leesie a Jisas ko lae mai saana, oto ko si teꞌuri, “!Lio kaꞌu! A mwane ngeena, ingeie oto Kalei Sipu a God, aena aana ingeie ni ko taꞌaasie oorahaꞌaa aana walumalau.

Haataꞌinge 5:9

na kire suluꞌie kana haalu nana a Kalei Sipu uuri, “Iꞌoe nge o adona o ke toolea uusu-uusu hio-hio na o ke taꞌaasie mo hui edi aana, aena aana horoꞌilemu e lae kaꞌu oto, na aana apumu o toolea mai mo iinoni takoie a God mwaanie taꞌena nga komu na taꞌena nga erenga na taꞌena nga aapoloa na taꞌena nga mala-malau.

Tataroha Diana I Sulie A Jisas Kraes Nge A Jon E Uusue 1:36

Maholo e leesie a Jisas ko tapaliu oto ko teꞌuri hunie e ro mwaena, “!Lio kaꞌu! Kalei Sipu a God, kaꞌu oto waune.”

Epesas 1:7

Na i tehulaꞌana a Kraes e tapa oolisikie aana maelana, nge a God e taꞌaasie noꞌone mo oorahaꞌaanga ikie. A Kraes e tohungei haꞌadianaꞌakie aana mo hahuꞌei niinge diana ingeie

Kolosi 1:14

Na ingeie oto e holikie aana maelana, na i tehulaꞌana ingeie mone a God e si saeꞌaasie mo oorahaꞌaa ikie.

Haataꞌinge 1:5

na kire uure noꞌone mwaanie a Jisas Kraes. A Jisas oto ko haꞌawalaimoliꞌaa walana God, na ingeie oto naꞌohai mwane e taꞌelaꞌi mwaanie maenga, na ingeie oto inemauri haahie ahutana mo aalaha mai welumalau. Ingeie oto iini nge e manata diana hunikie, na ingeie oto e luhesikie mwaanie mo oorahaꞌaa ikie aana apune.

Matiu 20:28

Mala oto ineu a Kale Ni Iinoni nou kaꞌa lae ike mai hunie uri mwala ke asu nekue, taꞌe nou lae mai huni neꞌi koni-konihe nana mwala, na huni niie maurihaꞌaku i tehulaꞌana mwala hunge, na huni holi eelihoꞌi aana mwala hunge.”

1 Jon 2:2

Aana ingeie oto e neꞌi uunu-olanga i saana Mamaꞌa, nge e sai haꞌa-oodohie mo oorahaꞌaa ikie. Na e kaꞌa ike taꞌe mo oorahaꞌaa ikie hahaiteli, taꞌe ahutana mo oorahaꞌaa mo iinoni aana walumalau oto noꞌone.

Haataꞌinge 7:14

Oto nou aalamie uuri, “Nou kaꞌa saie ike, poro paine ineu, taꞌe iꞌoe haꞌalaa o saie.” Oto rato ni mwane ngeena e si teꞌuri hunieu, “Mwala ngeena, ikire nge kire uure maꞌutaꞌa aana maholo taungeꞌinilada e lae na kire iiꞌo i laona siꞌohaꞌanga paine. Kire hoda rereꞌa oto aana mo toꞌoni ikire aana apune a Kalei Sipu.

Palonga 20:28

“Oto omu ke kinetaꞌiniꞌomu, na omu ke kinetaꞌinie noꞌone amaa ni sipu nge a Liꞌoa Maaꞌi e niie huniꞌomu hunie omu ke lio i sulie. Na omu ke iiꞌo mala kira kakakali sipu, aana amaa ni sipu ngeena oto soihaadaꞌinge a God, ahutana mwala nge Kalena e holi mangora aana apune maholo e mae mala nga uunu-olanga.

1 Pita 3:18

Aamasitoꞌo kaꞌu aana uri a Kraes e sapesalu na hule aana e mae. Ingeie, e kaꞌa mae ike i tehulaꞌana nga mei ola aaela e asuie, aana ingeie iini oodotaꞌi a God, taꞌe e mae mola honotaka mo iinoni kie kaꞌa oodotaꞌi. E mae hautaꞌai hunie ke toolekie aalihoꞌi loꞌu mei i saana God, taꞌe Liꞌoa Maaꞌi a God e taꞌe aalihoꞌi loꞌu aana hunie maurihe huu, na e saꞌa roroꞌa ni mae loꞌu.

Matiu 26:28

aana apuku ni ienini nge ko haꞌa-oaie haiholotaꞌinge haalu a God ko esuie peꞌie mo iinoni ingeie. Apuku haꞌa-aahesilana ko lae i tehulaꞌana mo iini hunge huni saeꞌaasie mo oorahaꞌaa ikire.

Haataꞌinge 14:1

Oto nou heꞌi lio loꞌu na no ko leesie a Kalei Sipu e uure i lengine toloi henue i Saeon. Na tangalau peꞌie hai aawalai sinolai iinoni mwana hai kire uure noꞌone peꞌie. Kire mani uusue satana a Kalei Sipu i naꞌona darada, na kire uusue noꞌone satana Aamana a Kalei Sipu.

Haataꞌinge 5:6

Oto i matolana mo rato ni mwane na e hai ola mauri ngeena, nou leesie loꞌu Kalei Sipu e uure i naꞌona naunekume ni aalaha ngeena. Na Kalei Sipu ngeena, e lio mala horoꞌilana e lae oto. E toꞌo aana e hiu rarangoi ola, na mo rarangoi ola ngeena mo tolimaa aana hahuꞌana nanamanga ingeie. E toꞌo aana loꞌu e hiu uꞌumaai ola, na ikire nge e hiu liꞌoa a God, nge e haꞌatolara aana taꞌena nga leu i laona walumalau.

Uusu-uusu A Pol Hurula'aa Hunie Mo Rom 3:25

A God e toliꞌaasie a Jisas hunie ke mae mala nga uunu-olanga hunie ke toolea haꞌaloinge haahie mo oorahaꞌaanga ikie na hunie ke haꞌamangoa saewasunge ingeie aani. Oto ie kie iiꞌo oodotaꞌi oto i maana God aana kie hiiwalaimoli uri a Jisas e mae honotaka. A God e asuie leune urine huni haataꞌinie uri leinge ingeie e tohungei oodotaꞌi. Aana maꞌalana a God e kaꞌa sai haꞌaloie ike mwala lau-leu haahie mo oorahaꞌaanga ikire oto wau i naꞌo,

1 Pita 1:2

A God Aamaka e lio hilisiꞌomu oto uure mai naꞌo i sulie oalaꞌinge ingeie. Na Liꞌoa Maaꞌi e lae peꞌi haꞌamaaꞌiꞌomu oto mai hunie omu ke iiꞌo maaꞌi, hunie omu ke lulu i sulie a Jisas Kraes. Lotohilemiu e lae aana apune, aena aana maenga ingeie oto uuraaꞌinge nge ko da omu iiꞌo rereꞌa mwaanie oorahaꞌaa. No ko eitanaie a God uri hahuꞌana manata-diananga na hanuelamanga ingeie ke iiꞌo peꞌiꞌomu taraureꞌi.

Haataꞌinge 14:5

Kire kaꞌa dau wala aaela ike aani eeronga, taꞌe kire tohungei iiꞌo oodotaꞌi taꞌingelu mola.