Rom thofroh gontwat Porr dwandfakhato htafmot 12:7 - Bro Nkifrarhu Mrokfot

⁷ Ni womn fahurn wom Kristenroh hingrnanefm o sios hingrnefm hingrnanho fura bofuraneft to be ni ndhtet neft na hanykfot. O ni womn Bro Nkifrarhu mrokforoh kfo nuhas bonuhasneft hingrna tafs marnyewunt, to be ninn nd hingrneft hingrna hanykfot.

Rom thofroh gontwat Porr dwandfakhato htafmot 12:7 Referans Kwoze

Efesus 4:11

Rorrparn ndar bbinysofthu yimam hingrna yafothar yo mrokfo ptha yafothar o tamoh tamoh nefm hi hanitrm. Womm aposer hingrnefthu hingrna yafothat hi hanitrm, womm profet hingrneft hingrnayuk hingrna yafothar hi hanitrm, womm gutnius mrokfothu ptha htfasyuk mrokfo rifhur hi hanitrm, wommne pasto hingrnefthu hingrnayuk hingrna yafothar hihato nd hingrneft tohhato Bro Nkifrarhu rfa borngt kfiwa mrokfefm kfo hta bohtewumm.

2 Timoti 4:2

Bro Nkifrarhu mrokfot wakfo ptha hanyswant. Dborioh yihar o yiha bebr, mrokfot kfo pthakfot. Yimam tamoh nefm newum kfo nyinga fnahnihato tfit hifa yima yuhurpno tfit kfo yirmoh mro-kfom hekfot.

1 Timoti 5:17

Eldam tu bro hingrneft kakitoh-wom. Romn tohhato Bro Nkifrarhu mrokfot kfo pthiwatmt tuhant yindars wanukmt yo romn yimampno rhuhato kfo hta bohta mrokfom kahukwomm. Ndhtet yimamn tu yura wuhtahato bro yufati marufat hekfot.

Aposer 13:1

Antiok tohmo sios, rroh womm profet hingrneft kakitohmoum. Wommn Bro Nkifrarhu mrokfot kmi thofm kfo hta bohta nuhasmoumm. Nd hus bro hingrneff yakitohmoa yimaroh yufam Barnabasr, Simeonr wom yufat futamoumr Niger yo Sairini korhof yima Lusiusr yo Manainr, gafana Herotrpno myewarho fnahmo yimar ee womr Sorr.

2 Timoti 2:24

Ni tu dukaf hanykfot. Ni mirahn wom yimampno nnakfo hamuh nnakfo hamuhnom. Ni dborioh yima yuhur yak nuhaskfot. Ninn Bro Nkifrarhu mrokfom miyaknihato kfo nuhas bonuhaskfot. Bro Nkifrarhu mrokfom kfo nuhas hi hanyhato womm hanyjbornewumm, o hamuh tfa thuwomm to ni mirahn anambura.

2 Timoti 2:2

Bok tuhan yindariroh nyinga riharpno kfo yirmoh mrokfom kfo yirmoh nuhas bonuhasmoyann. Nd kfo yirmoh mrokfomn wakfo nuhashitwanm Bro Nkifrarhu mrokfom yakitoh kihet yimam. Rom wakfo nuhaskahtnm tfit romn myaknihato womm kfo nuhas hi hanyrahmm.

1 Timoti 4:16

Ni tunhu toh nmbuhat htiyafo hany yo wom Kristenm yak hta bohtiwa yuham htiyafo hany inji nakfot. Inji na hanyrahn, nini ninhu mrokfom wanyuk yimam Bro Nkifrar toh raforahrko bro kotkfot tohruha yihart.

1 Timoti 3:2

Nd sios toh yukatohyukrhu yau nmbuham, toh nmbuham be yak teh marnyakfot. Nhai rorhu wom fasoh nmbuhat yimam wahti nkriyafokfot. Nd yimar be rpa metrpatpno tohkfot. Nd yimarhu yima yuhur yak hta bohtahato rorhu wiyauyau nmbuhat dukefmpno yaukfot. Womm yakhato hifa rika bukr yak htakfot. Rorn Bro Nkifrarhu mrokfom womm kfo nuhas bonuhasetr rhukfot.

1 Timoti 2:7

Na to nd ror suh nanyormo yuhathu mrokfothu kfo ptha nuhas htfasneftn nd aposer hingrneft fak htamora. Memor, rorn rirhu arhuyuk yima tangim kfohi hanyrahrm. Yima tangim wanyhato Jisasr hikruhamn tu yafothet mrokfot yakitohrahm. Na kfiwa mrokfom tu mrokfom kfiwanko.

Kolosi 4:17

Arkipusruhet ndar mrokfo nmbuhat. “Ni Arkipuse, ni Brorpno yakmo hingrnafat mirahn amyafhoniyant. Nd hingrnafat wayakitoh marnyakahnt wahingrna marnyetwant.”

Galesia 6:6

Fitoh yimarn Bro Nkifrarhu mrokfeft kak nuhasworko niko tawo maruham o wuskam o yeshrim ndm yakhato hekfot.

1 Korin 12:28

Bro Nkifrar nndohtet nndohtet hingrnefm yakitohet met yindarim sios hta nhombramorm. Barkofm aposerm htamor. Yo tfit rompno Bro Nkifrar hayuk mrokfom kfo pthayukm htamorm. Yo tfit rompnonwe Bro Nkifrarhu mrokfo mna yuharoh kfo nuhas hik bohik marnyayuk yimam htamorm. Ee btn miraker hingrnayuk yimam htamorm. Yo dbohnefroh yak marnyayuk yimam, yo wom yimaroh hti dukayuk yimam, sios hingrnefroh yak nhtahato kfo hta bohtayuk yimam, yo nndohtet nndohtet yarmumaye kfo bruttnayuk yimam htamorm.

Aposer 20:28

Niko tukmoh toh nmbuham hti yukatoh marnyafo hanykfot. Yo Jisasrhu sios rpat yukatohaf hanykfot. Bro Nkifrarhu Yafothatn bi nd yimam nikmoh tirtn htamotm. Bro Nkifrarhu sios bi turhu Yonrn bi noh wiknamorm. Ndnettn niko toh yukatoh marnyafo hanyhekfot.

Aposer 20:20

Na nhai Judam namoa nefm hti yakrmermoa. Nanhu yima yuhur yakitoh dbkaf marnyahato Brorhu hingrneft hingrnamoant. Fitoh bro rifiny swirm o tukmoh kunymn na yihato mrokfom hemoanko. Finji finji tohneft o mrokfo hikneft nd ndm kfo hta bohtamoanko.

Aposer 6:1

Barkof yimam Jisasr hikmoam nhai bokm rhurmom. Kto hingrna hanyspno rifinysamom. Rifinysahato tfit tuhan dhirroh maruha yak nhta marnya he duha nmbuhatpno wom Judam, Grik yarmumat pthetm, duka marimoum, “Barenko, ndar aposerm yekwa marut nmoh tuhan dhirpam nhai hekahmm. Be Aram kfetroh tuhan dhirrpam kahukm.”

Jonr dwandfamo gutnius mrokfot 3:2

Nd yimar turpathato Jisasrpno yifung yimorn mkfo memorr, “Tisaye, nom wom Judanom htitwonomn ni Bro Nkifrar kfo tkrurafoyuk tisaye. Bro Nkifrarhu Yafothat mthu nawoh duha yimar nhai ndar ni hingrnewa kanjohot mirakerkfot hingrnakfot.”

Matyu 28:19

Ndnettn kanganko, kmiyakmim wayau fnahkahkomn nanhu disaiperm wayak hta fnahtwako. Yak hta hanyhato Bro Yifemri yinem Jisasr ee Bro Nkifrarhu Yafotharoh yufampno baftaisim tany hanykfot.

1 Korin 12:5

Yo nd nndohtet nndohtet hingrnefm yimam yakitoh hakutam, nhaf rpa Bro Nungothetrhu hingrnefrpat hingrna hakutm.

1 Korin 14:26

Bar yimako, ndnettn niko lotu yiha rifinyhato lotuneft inji nakfot. Womr windoheter, rorhu windoht windohkfot. Womr kangr Bro Nkifrarhu mrokfo yimbu yuharoh mrokfom akfo nuhasanm, ror sinyahato kfo pthakfot. Womr Bro Nkifrar wom mrokfom yahutrr kangr nd mrokfom womm akfo nuhasanm, ror nhaf sinyahato rorhu mrokfom kfo pthakfot. O womr wom nndoh yarmumatn kangr akfo bruttnaya, ror sinyahato kfo bruttnakfot. Yo womr Bro Nkifrar nd kfo bruttna mrokforoh kfo kekutyuk yafothar yahutrr kangr apthaya, be tfit rorn sinyahato nd womr wom yarmumatn kfo bruttnayuk mrokfom rorn tfit kfo kekutkfot. Nd tamoh tamoh nefm niko nayukm, sioshu met yindarim htiruhamn yo wanyruhamn tpi yakrahm. Ndnettn lotu yiham rifinyhato loturahnom, inji inji hingrna hikkfot.