1 Timoti 1:5 - Bro Nkifrarhu Mrokfot

⁵ Na kanga rpat nayak marnyahato rpat watohko. Mirahko nd yimaroh dukef yuhamn ahiknom. Kraisrhu mrokfom yakitoh kihhato yima yuhum wutham rhurahm. Inji rhurahko, tuko Kristenko nayak marnyahato rpat tohrahko.

1 Timoti 1:5 Referans Kwoze

1 Timoti 1:19

Mirahn Jisasr afrtrohanr. Jisasr yakitoh kihhato tu dborioh yima dukefrpno nd yahrt watohtwant. Yima yuhur mwofnnitwor tamoh nefroh naneft o fitoko yinyeft, ee btn sinyakfot. Yima yuhur kurhiwur, sinya duha. Tamoh tamoh nefm be sinya fura bofuraknihato na fura bofuraknirahnm to be tunn yoh raforahnt tunhu yiyuk yihotat.

Galesia 5:22

Yimar Bro Nkifrarhu Yafothat ruhetr htirahnr: Wom yimam hti dukarahrm. Yindhor rifhurpno rhurahr. Wommpno hifa hifa nayak marnyahato rhu marnyarahr. Tamoh mrokfom wanyneft nhai be bmbri kaht kanjo wakuryakhato huttakniruhatr. Hifa hifa yima yuhur womm hmbrerahrm. Wom yimam yak marnya bomar-nyarahrm. Rorhu wiyauyau nmbuhat hifa yau marnyahato kmi thofroh dukefm rorrpar bro dukeft htarahm.

2 Timoti 2:22

Ndnettn ni Timotin, ni damiag yimam hatohwa yima yuhu sinyaneft, yo womroh tamohroh hti yuhur hanyeft, nd nd nefm yakitoh duha. Yafho thuhato afo tfit dborioh toh nmbuham, yo Bro Nkifrarhu yakitoh kihneft, yo wommpno rpat tohhato nayak marnyanefm, afo tfit nd nd nefmn tfit yakitohwontwa. Nini yo Bro Nkifrar hti wuthahato ror lotuta yimam, niko buga afo nd na kfiwa nefm yakitoh bugawontwakomm.

2 Timoti 1:5

Na tuka htitann ni Bro Nkifrarhu mrokfom hikwa hikeft to bi tunhu bapem Loisi tunhu mmem Yunis Bro Nkifrar yakitohhato hikmoa kanjo bi inji Bro Nkifrar yakitohhato hikwonr.

2 Timoti 1:3

Nanhu nkifram Bro Nkifrarhu hingrneft yakitohmoahat, tu wutha yima yuhumpno Bro Nkifrarhu hingr-neft fakitohmoumt. Na ndar aposer hingrneft yakitohwohat na tuka yima yuhur kak nhtewanr na nhai wom tamoh nefm o yima yuhu bebm rhukahma na ndar hingrneft yakitoh-wohat. Yiha yiha yifung marm na kfo bruttnaneft na nhai yak trohnikahann ninhu yufat yutaneft Bro Nkifrar kfo yindhorwanr.

1 Pita 3:21

Nd tekt be kfo nhombra mrokfoyet. Bro Nkifrar ndar yiha hingrnewa hingr-nefthu kfo nhombra mrokfoyet. Ariha yimam baftais yekwohat, nd yiha Bro Nkifrar yekwarm rorpno rim tohwom. Baftais yekwohat nhai yima kifthu yukthuneftn yukkahm. Nhai. Yimam Jisasr Kraisr hikhato rorhu dborioh nefm hiketm, baftais neftpno wom womm kak nuhaswotm ror Jisas Kraisr hikwa yuhat. Ndt nhai be sfno nd hingrneft rhukaht nhai. Nd baftais hingrneft mnetet. Jisas Kraisr nohhato yopt tohmohat Bro Nkifrarn kasinya-morr. Ndnettn yimam Kraisr frtkaf-hato baftais yekwohat Bro Nkifrar kasinyewarm rorpno rim tohwom. Jisasr nohmohat Bro Nkifrar kasinyak-nimorr hefenr hamuhmorr. Hefenr hamuhhato bro yufat hemorr. Bro yufat hemotrr nd yufet mounmotm, bbuket mounmotm rorhu yinhirpat tohwom.

1 Pita 3:16

To mrokfom kfo ptha nuhasheneft, mrokfom be duka marnyahato dborioh yima yuhurn kfo nuhas marnya bomarnyakfot. Mrokfom faso faso kforahkomm, tfit tuko yima yuhum krhorahmko. Mrokfom hifa kforahkomm, nd yimam niko Jisasr hikwa nmbuhatpno faso kfoyukm niko pthayuk mrokfom wanyruhamn tfit tum yimtnarahm.

1 Pita 1:22

Jisas Kraisrhu gutnius mrokfom, yafothayet mrokfomn wanyhato hikmokomm. Hikhato nd fasoh fasoh nefm fafho thumokomm. Yafho thuhato yima rifhumio wutham rhumom. Yima rifhumio wuthamn dborioh dukefmn yakhato niko tuko Jisasr hikwa tuhan yindariko najohfi yagnr tohhato tuko nayak marnyewuko. Nd neftn yakitoh hany yakitoh hanykfot.

2 Pita 1:7

Bro Nkifrarhu dukefr hikhato tuko Jisasr hikwako nayak marnyahato tuko nayakitohkfot. Tuko Jisasr hiketko nayak marnyiwa kanjo wom yima furam inji yak marnyakfot.

Rom thofroh gontwat Porr dwandfakhato htafmot 10:4

Wawanyko, Mosesr yakmo kfo boririfhu mrokfom bi be. Yimam Kraisrpar yakitoh kihwa yuhatn Bro Nkifrar kak wus bowusworm.

Taitus 1:15

Yimam Bro Nkifrarpno bi rim tohniyetm, rroh yima yuhum bi wuthamn tamoh tamoh hnaru yeshrim be ke fura bofurewumm. Yimam fasoh fasoh nefm tohhato tafi Bro Nkifrarpno rim tohnihato Kraisr rroh yima yuhum yak wus bowus duham, nd yimam kakrmitm tamoh tamoh yeshrim ye fura bofuraneft. Yo tamoh tamoh nefm nhai mhtiyak hany mikahm art fasoh nefet o art dborioh nefet. Nhai inji mhtiyak hanykahm. Tamoh tamoh nefm rom be na fura bofurewum. Nhai yimtna hanykahm.

1 Timoti 3:9

Wutha yima yuhumpno nd tafont yak nriyafmo tu yafothet mrokfot, nd yimam yakitoh-kfot.

2 Korin 1:12

Nanhu toh nmbuhat yo nanhu nefm nikompno tohhato niwam ridukak thombat, nanhu yima yuhur nhai finji duka yimtnakahr o duka krhokahr. Nhai. Bro Nkifrar yak hta bohtamotra nanhu toh nmbuhat be yi marnya mifmot. Nhai wom beb nmbuhat nikompno htarmoyant. Bro Nkifrar yuhuwafhato hemora ndhtet ruhefthu rhuyuk rhu dukeft. Nhai ndar bbinysofthu yimaroh rhu dukeft hikrmoya. Nd Bro Nkifrar heyuk nefmpno nikompno yo ndar bbinysofthu yimampno toh hnamoya. Ndnetann nanhu yima yuhur nhai finji duka yimtnakahr o duka krhokahr. Nhai. Nanhu yima yuhur be yindhorwor.

1 Pita 4:8

Tu bro nmbuhat niko Jisasr hikwa yimako tuko nayakitohhato rpat toh marnyakfot. Inji narahko be nhai wom tamoh nefm rhuruhatmko. Tamoh tamoh nefm rhuneft nhai be krhoni-ruhatm. Yudbat yak dbhofnarahkomm.

Jems 4:8

Bro Nkifrarpno brbo waiko. Rorpno brbo waikahtko ror inji htiruharn nikompno brbo yirahr. Nd fasoh fasoh nefm niko yakitohwam be tmifko wayafhokahkomm dborioh nefm wahikko. Nd hus bok yima yuhum niko harhuwam, wayafhokahkomm rpa yima yuhur wahikko.

Aposer 23:1

Porr kaunserm yukatohhato kfo memorm, “Bar yimako, na Bro Nkifrarpno rim tohnihato toh hnamo yiham na nhai wom fasoh nefm na hnarmoya. Nanhu yima yuhur nhai krho ba inji nakahr. Nanhu yima yuhur be yindhorwor.”

1 Jon 3:3

Yimam Kraisr yukatoh darwon hasiwam, nd yimaroh yima yuhum yak marnya bomarnyahato wutham korhm tu Kraisr kanjo.

Hibru 10:22

Bi Jisasrn nohhato nd nom hta rafomoa nefm bi rorhu kkutn frwus bowus thumotm. Frwus bowus thumottm bi mong troh bugamonomm. Mong trohhato baftaismonom. Ndnettn nom Bro Nkifrarpno yinyeft be rorrparn duka duka yikfot. Nom Bro Nkifrarpno yinyeft duka kinyaki hany juha. Bro Nkifrarpno brbo ainyom.

1 Korin 13:1

Na ndar bbinysof thofm kfo bruttniwa wom nndoh nndoh yarmumatn o mounmotm kfo bruttniwa yarmumatn Bro Nkifrar akfo bruttnayanr, to nd na kfo bruttnayuk yimaya, nanhu tu yiro yima yuhurio nhai wom yima fura bofuram htihato yak marnya bomarnyakahanm, nanhu kfo bruttneft fipa duhatet. Nrwir frdbrango fura bofuriwa kanjo inji dbrango fura bofuriwa.

Rom thofroh gontwat Porr dwandfakhato htafmot 14:15

Ndnettn niko tuko Jisasr hiket tuhan yindariko tuko nahti dukakfot. Womm tamoh tamoh yemrom yuhre ke hik hanitmm, rompno niko womko ye fura bofura duha. Niko htiyakhato womm ye fura bofurarahm, kto tfit yima yuhum krho hmbrirahmm. Jisasr nohmohat nmoh nefm rpat minoh nhehafhemornom. Ndnettn ni womn mirahn womrhu yima yuhur inji anakahann yima yuhur faso arhurr.

Rom thofroh gontwat Porr dwandfakhato htafmot 9:1

Na tu Kraisrpno toh tkafwa yimaya, ndnetann na nhai wom mrokfom kfo furakaha. Tu Bro Nkifrarhu Yafothatn nanhu yima toh rawofr yorhwatta nanhu yima yuhur kfo kangr na kfiwa mrokfom kfo mifwanm.

Aposer 24:16

Ndnatn yiha yiham be toh marnya hna twanhoroya. Na nhai wofnkaha Bro Nkifrar yo kmi thofm nanhu toh nmbuhat faso htineft.

Aposer 15:9

Nhai yak nhtahato marimor, ‘Tukanhu ttha kmimn ndar neft naruhanm, tfit ndur wom yima tangimn nd neft naruhanm.’ Nhai inji dukarmor. Rorhu mrokfothu wany yakiohato hik nmbuhatn htimor. Nd wom yima tangim wany yakiohato fak hikmotmt ndt htihato rroh fasoh fasoh nefm fak thumorm.

Matyu 12:35

Yimar, tu hifa dborioh yima rifuhetr, tu hifa mrokfo rifhur, tu hifa dborioh nefm mfrfnahnewumr. Fasoh yima yuhetr fasoh fasoh nefm mfrfnahnewumr.

Matyu 5:8

Fitoh yimam, rroh yima yuhum wutham ruhetm, ayindhortwam. Bro Nkifrar htirahmr.

1 Jon 3:23

Bro Nkifrar kfo kangr, “Nanhu yon Jisas Kraisrn yakitohhato wom Kristen yimatmpno nayak marnyahato rpat toh marnya-kfot.”

Hibru 13:18

Nmoh toh nmbuham wakfo bruttnatwakmnom. Nom tunmoh rhu nmbuham nhai wom fasoh rhu nmbuham htikahnom ndm htihato btn Bro Nkifrarpno brbo yinyeft yimtnakahnom.

Hibru 9:14

Nd boririfhut, bingot Bro Nkifrar hingrnamo barkof yihotarhu boririfhut hikwom. Arihat bi Kraisrn tfit tu dborioh yihotar htakmorr. Kraisr nohhato nd nfri yihotar htakmorr. Nhai wom tamoh nefmpno nohrmor. Nhai. Mgogra yimar be noh furamor. Tu Bro Nkifrarhu Yafothatn thu bmtamottr kku bebt hatohmohat nhai marimor, “Yakrmiruha.” Ror hatohmo kkut Bro Nkifrar htihato nd yimam yak bebwa fasoh nefm fak thumorm. Arihat Bro Nkifrarpno yinyeft nhai tfit wom duka kinyaki hanykfot. Be yi furakfot. Ndnatn ror kfiwa yuhatn hikkfot.

Galesia 5:6

Bro Nkifrar yimam yukatoh thoft nhai tha puket yimam o tha puk duhat yimamn htikahr. Nhai. Yimam Kraisrpno rim tohhato womm hti dukewam, tom ndhtet yimam Bro Nkifrar kukatohworm.

Rom thofroh gontwat Porr dwandfakhato htafmot 12:9

Womm hifa hifa yima yuhumpno yuhuwafwanme, mirahko tngrpaye akfo haddo yindhor furanomm. Fasoh nefm mong trohhato dborioh nefm yakitohkfot.

1 Timoti 1:18

Nanhu yon Timotiye, wom kfo duka mrokfom kahukwann. Bi bingot ninhu nmbuhat bi profetm pthamomt. Na kfiwann nd profetm pthamo mrokfom ndm wayakitohtwanm yahrt tohyuk kfra inyarut kanjo. Giaman tisam niehato finji kfiwumn nd ni yakitohyuk kfra inyarum yakhato tawo tukfot. Nd kfra inyarut yakitohhato giaman tisampno yahrt watohtwant.

1 Jon 3:10

Finji hti nhtahato kfo miruhanom, ndr Bro Nkifrarhu yoner, ndrne Satanrhu yoner? Wanukko. Inji htikfot, fitoh yimar nhai dborioh nefm nakahr yo Bro Nkifrar hikwa yimam nhai yak marnyakahrm, tor nd yimarn nhai Bro Nkifrarhu yonr rhukahr.