San Mateo 7:15 - Nuevo Testamento Tzeltal de Amatenango

¹⁵ “Ila me abaik yuꞌun te machꞌatik lotil jꞌalwanejetike. Skuyoj sbaik ta karneraetik yilel, pero pajal yoꞌtanik sok te weꞌawal teꞌtikil tsꞌiꞌ.

Bible in Tzeltal Bachajón

¹⁵ Tsahtaya me abahic ta stojol te lotil jalwanejetic te sc'u'inejic snuhculel tuminchijetic, pero ta yutil ha ti'awal chojetic.

Bible in Tzeltal de Oxchuc y Tenejapa

¹⁵ “Tsajtaya me abaic yu'un te mach'atic lotil j'alwanejetique. Scuyoj sbaic ta chijetic yilel, ja'uc me to, pajalic soc jti'awal ja'mal ts'i'etic.

San Mateo 7:15 Referans Kwoze

1 Juan 4:1

Kermanotak te kꞌuxex ta koꞌtane, ma me achꞌuunik ta spisil te machꞌatik ya yalik te yikꞌojik te Espíritu yuꞌun te Diose. Aꞌiya awaꞌiyik nailuk teme jaꞌ te Espíritu yuꞌun Dios te ay ta stojolike o ma jaꞌuk. Porke nojel te balmilale te jloꞌlawanejetik te ya yalik te jaꞌ ta skuenta Dios te tut ya yalike.

San Mateo 24:11

Sok ya me xchiknaj bayal jlot-alwanejetik y ya me sloꞌlay bayal genteetik.

Colosenses 2:8

Ila me abaik yuꞌun te machꞌatik ya skꞌan sloꞌlayex yuꞌun te tut snopoj te jowil naxe. Yuꞌun te stukelike ma yakꞌojuk ta jkuenta te Cristoe. Jaꞌ nax yakꞌojik ta jkuenta te skostumbre gentee y sok te jowil pꞌijutesel yuꞌun te balmilale te ma jaꞌuk ta skuenta Cristoe.

Apocalipsis 19:20

Te chanbalam te xiꞌbentik sbae la yichꞌ tsakel, jun nax sok te palso alwanejetik te la yakꞌik ta ilel seña milagroetik ta stojole. Ta skuenta te señailetik abi, te palso jꞌalwanejetik juꞌ yuꞌun sloꞌlayel te machꞌatik la skꞌan a yichꞌbeyik te smarka te chanbalam te xiꞌbentik sbae y te la yichꞌbeyik ta mukꞌ te slokꞌole. Jich te chanbalam te xiꞌbentik sbae y sok te palso alwanejetike kuxul a chꞌojtalanot ochel ta kꞌajkꞌ te yipal ta tilel sok asufree.

Judas 1:4

Yuꞌun ay mukul la yochintayex jtul cheb genteetik te ya sloꞌlayexe. Jaꞌ te machꞌatik namey ay jilel skꞌoplal ta Sjun Dios yuꞌun te chꞌayel ya xlaj bajte. Jaꞌ genteetik te ma lekikuke. Syanutesejik te tutꞌil ay slekil yoꞌtan te Kajwaltik Dios, yuꞌun ya yalik te jich ay ta pasel spisil te tut ma tsaꞌamuke. Sok ma xyakꞌik ta jkuenta te úniko Ajwalil kuꞌuntik, ja te Kajwaltik Jesucristoe.

2 Pedro 3:17

Jaꞌ yuꞌun, kermanotak te kꞌuxex ta koꞌtane, ya ke nail to ya anaꞌik te tutik to, ila me abaik, yuꞌun ma me sjochex bael ta loꞌlayel te machꞌatik ma lekikuke, ni ma me chꞌayanik te jun awoꞌtanike.

San Lucas 6:26

Oꞌol me abaik jaꞌex te lek akꞌoplalik yuꞌun spisil te genteetike, yuꞌun te antibo smeꞌstatik te genteetik to jich lek skꞌoplal a yalbeyik euk te jlot-alwanejetike.

2 Timoteo 3:13

Pero te machꞌatik ma lekikuke y sok te jloꞌlawanejetike yanyan ta ixtaꞌajel stukelik. Ya xloꞌlawanik y ya xloꞌlalanot euk.

2 Timoteo 4:3

Porke ya sta stiempo te genteetike ma me skꞌan xyaꞌiyik te lekil nojpesele. Yuꞌun te tut ya skꞌan yoꞌtanike, ya sleik bayal maestroetik te jaꞌ nax ya snojpeslanot te tut ya skꞌan yaꞌiyik stukelike.

Filipenses 3:2

Ila me abaik yuꞌun te gente te jachik tutꞌil tsꞌiꞌetik te ma tsaꞌamuk yaꞌtelike. Ila me abaik yuꞌun te machꞌa ya sbojbeyex ta atiꞌbalulike.

Efesios 4:14

Ma me jichukotikix tutꞌil untik te jtsꞌin nax ya xyanej sok te bayuk nax ya xꞌikꞌot bael jich tutꞌil ikꞌ ta xchꞌuunel achꞌ nojpesele. Asta ya xloꞌlayot bael yuꞌun gente te ya xloꞌlaywan te ya xbeenik te ba sbelel te chꞌayele.

Gálatas 2:4

Pero ay jtul cheb palso hermanoetik te ochik tal liꞌ ba ayotik, te mukul nax aylane, yuꞌun talemik ta ilawane te tutꞌil libre ayotikix ta skuenta te Cristo Jesuse. Yuꞌun ya skꞌan yakꞌotik xan ta mosoil yuꞌun te mantaliletike.

San Lucas 12:15

Sok la yaltalanbe: —Ila me abaik te jaꞌexe, ma me xbikꞌta awoꞌtanik yuꞌun te kꞌulejalile. Porke ma jaꞌuk ya xkuxuyinat yuꞌun teme ay bayal tut ay awuꞌune —xchi te Jesuse.

Apocalipsis 16:13

La kil te ta stiꞌ te chanbalam te xiꞌbentik sbae sok ta stiꞌ te chanbalam te lom yane y sok ta stiꞌ te palso jꞌalwanejetike, yipal ta lokꞌel oxeb espirituetik te ma lekuke te pajal yilel sok chꞌuchꞌetike.

Efesios 5:6

Ma me machꞌa wakꞌ sloꞌlayex te kꞌopetik te jowil naxe. Porke ta skaj te muliletik to te ya xtal te kastigo yuꞌun Dios ta skuenta te machꞌatik ma xchꞌuunbeyik te smantale.

Hechos 13:40

Kuidado me xꞌawakꞌ abaik, ma me jaꞌukex ya xkꞌot ta akuentaik te tuti stsꞌibayik jilel te jꞌalwanejetik yuꞌun te Diose te la yale:

San Juan 10:12

Yan te machꞌa jle-aꞌtel naxe, te kꞌalal ya yil xtal te teꞌtikil tsꞌiꞌe, ya xchꞌoj jilel te karnerae ya xlokꞌ ta anel, porke ma jaꞌuk te jkanane y ma yuꞌunuk te karnerae. Jich te teꞌtikil tsꞌiꞌe ya sitꞌes bael te karneraetike, y ya xpujke bael ta bayuk nax yuꞌun.

San Mateo 16:11

¿Tuꞌun te ma xkꞌot ta awoꞌtanike te ma jaꞌuk waj te la kalbeyex skꞌoplale? Ila me abaik yuꞌun te slevadura te fariseoetike sok te saduseoetike —xchi te Jesuse.

San Mateo 16:6

Te Jesuse la yaltalanbe: —Ila me abaik yuꞌun te levadura yuꞌun te fariseoetike sok te saduseoetike —xchi.

San Mateo 10:17

Ila me abaik yuꞌun te genteetike, yuꞌun ya me yakꞌex ta skꞌab te juꞌeletike, sok ya me awichꞌik majel ta sinagogaetik,

Apocalipsis 17:6

Te nax a la jnaꞌ te yakubenix te antse. Jaꞌ yakuben yuꞌun te xchꞌichꞌel te machꞌatik yuꞌunik te Diose y sok te xchꞌichꞌel te machꞌatik miltalanot yuꞌun te la yalik ta jamal te skꞌoplal te Jesuse. Te kꞌalal la kile, lom cham a kaꞌiy yuꞌun.

Hechos 13:6

La yokliyik spisil te slum Chipre te joybil ta mare, asta laj kꞌot ta jtejklum Pafos. Teꞌ staik jtul jꞌakꞌ-chamel te jBarJesus xꞌalbote, te jaꞌ jloꞌlawanej te ya yal te jꞌalwanej yuꞌun Dios ta skꞌope.

San Mateo 7:14

Pero te puerta yuꞌun kuxuyinele yub nax te stiꞌile y wokol te sbelele. Ajtabil nax te machꞌatik ya xꞌochik teꞌae.

Apocalipsis 20:10

Y te pukuje, te loꞌlaylanbil yuꞌune, chꞌojot ochel te ba yipal ta tilel kꞌajkꞌ sok asufree, teꞌ ba chꞌojtalanbil ochel euk te chanbalam te xiꞌbentik sbae y sok te palso jꞌalwanejetike. Teꞌ me ya yilik swokolik a kꞌajkꞌal ajkꞌubal ta sbajtel kꞌinal.