San Mateo 6:5 - Nuevo Testamento Tzeltal de Amatenango

⁵ “Te kꞌalal tut ora ya akꞌoponik Dios te jaꞌexe, ma me jichuk xꞌapasik te tutꞌil ya spasik te machꞌa chaꞌlam yoꞌtanike. Ya skꞌupinik te ya stejkan sbaik ta skꞌoponel Dios ta sinagogaetik sok ta eskinyailtik yuꞌun te plasae, yuꞌun ya skꞌanik kꞌupinel yuꞌun genteetike. Jamal ya kalbeyex, jip me smajtan la staik abi.

Bible in Tzeltal Bachajón

⁵ Te c'alal yac ac'oponic Dios, ma me hichuc xapasic te bin ut'il ya spasic te jchebal-o'tanetic, como ha ya smulanic te ya stehc'an sbahic ta sc'oponel Dios ta sinagogahetic soc ta jujun xuhc calle scuenta yu'un ya x'ilotic yu'un ants-winiquetic. Jamal ya calbeyex te yich'ojiquix te smahtanique.

Bible in Tzeltal de Oxchuc y Tenejapa

⁵ “Te c'alal ya ac'oponic te Diose, ma me jichuc xapasic te bit'il ya spasic te mach'atic cha'lam yo'tanique. Ya smulanic te ya stejc'an sbaic ta sc'oponel Dios ta sinagogaetic soc ta xchiquin calleetic, swenta yu'un jich ya x'ilotic yu'un te ants-winiquetique. Jamal ya calbeyex, la staix smajt'anic yu'un a.

San Mateo 6:5 Referans Kwoze

San Mateo 6:2

“Jich teme ay tut ya akꞌebenbeyik te meꞌbaetike, ma me xꞌapukibe skꞌoplal ta bayuk. Jich tutꞌil ya spasik te machꞌatik chaꞌlam yoꞌtanike ya yalbeyik skꞌoplal ta sinagogaetik sok ta kayaetik yuꞌun ya skꞌanik kꞌupinel yuꞌun te genteetike. Jamal ya kalbeyex, jip me smajtan la staik abi.

San Lucas 18:13

“Pero te jkꞌan-tojemale jakal tekꞌel jilel stukel. La snijan sba ta stojol Dios. Ma skꞌan a xjach moel sit stukel. La smajulan stiꞌ yoꞌtan ta ajtal oꞌtan, y jich a yal: “Dios kuꞌun, pasbon perdon te jmulawilon ta atojole”, xchi.

San Marcos 11:25

Te tut ora ya akꞌoponik te Diose, pasbeyaik perdon nailuk te machꞌa ay sla awoꞌtanik soke. Yuꞌun jich me ya spasbeyex perdon yuꞌun amulik euk te jTatik te ay ta chꞌulchane.

San Lucas 20:47

Sok ya spojbeyik sna sok stutik yuꞌun te meꞌbaꞌ antstike. Y lom jal ya skꞌoponik Dios ta sitik komon yuꞌun ya skꞌanik kꞌupinel. Jaꞌ me mas tulan kastigo ya xꞌakꞌtalanbot —xchi te Jesuse.

Santiago 4:6

Pero Dios ya skoltayotik ta mas sok te slekil yoꞌtane. Yuꞌun jich ya yal te Sjun Diose: “Dios skontrainej te machꞌatik ya stoy sbaike, pero te machꞌatik chꞌunulike, ya skoltay ta slekil yoꞌtan”, xchi me.

San Lucas 18:1

Te Jesuse la yaltalanbe jun seña-kꞌop yuꞌun jich aꞌ snopelan te ya skꞌopon Dios sil tiempoe, sok te makꞌ xcheꞌbaj yoꞌtanike.

Efesios 6:18

Siluk me tiempo kꞌoponaik te Diose. Wokoletanik y kꞌanbeyaik Dios te siluk tiempo ya stojutesex te Espiritue. Kuxuluk me awoꞌtanik. Ma me cheban awoꞌtanik, y kꞌoponbeyaik Dios spisil te machꞌatik xchꞌuunejik Diose.

San Lucas 11:43

Te jaꞌex fariseoexe, oꞌol me abaik, porke jaꞌ ben anujtsojik te primero naktajibale yuꞌun te sinagogaetike, yuꞌun jaꞌ ya akꞌanik te ya yakꞌelex ta jkuenta ae. Sok ben sniꞌ xꞌawaꞌiyik te ya yujtsꞌibelex akꞌabik ta sitil komon te ba parkee.

San Mateo 21:22

Spisil te tut ya akꞌanbeyik te Diose ya yaꞌbelex teme jich xchꞌuunej awoꞌtanike —xchi te Jesuse.

1 Tesalonicenses 5:17

Ma me xꞌakom abaik ta skꞌoponel te Diose.

San Juan 16:24

Te ora to te jaꞌexe ma to ayuk tuti kꞌanojik ta joꞌon jkuenta. Kꞌanaik te tut ya akꞌanike, ya me yaꞌbelex. Jich me ya xjunub lek awoꞌtanik yuꞌun.

San Marcos 12:38

Te kꞌalal yipal ta pꞌijuteswanej te Jesuse la yal: —Ila me abaik sok te maestroetik yuꞌun te mantaliletike. Ya skꞌupin yoꞌtanik yuꞌun te ya slapik ta beel te snajtꞌil skꞌuꞌ-spakꞌike sok ya skꞌupin yoꞌtanik yuꞌun te ya xpatbot yoꞌtanik ta komonsitil te ba yolil jtejklum.

San Mateo 9:38

Jaꞌ yuꞌun kꞌanbeyaik te yajwal kꞌajoje aꞌ stikon ta aꞌtel te jkꞌajojetike —xchi te Jesuse.

San Mateo 23:13

“Ay pe jal jaꞌex, te maestroex yuꞌun te mantaliletike sok jaꞌex te fariseoexe, jaꞌex te ma tsaꞌamuk awoꞌtanike. Yuꞌun te jaꞌexe atsꞌusojikix ta yawe kꞌoem ta stojol te genteetik te spuertaul te ba ay ta mantal te Diose. Ni makꞌ xꞌochex teꞌa te jaꞌexe, sok ma xꞌawakꞌik te ay machꞌa ya skꞌan ya xꞌochik teꞌae.

San Mateo 23:6

Sok ya me smakik ta ora te primero naktajibaletik yuꞌun te ba ya xweꞌike, sok te naktajibaletik ta sinagogaetik yuꞌun ya skꞌanik akꞌel ta jkuenta teꞌa.

San Mateo 6:16

“Te tut ora ya akom aweꞌelike, ma me xꞌawakꞌ chiknajuk te triste ay te asite, jich tutꞌil ya spasik te machꞌa chaꞌlam yoꞌtanike. Jich ya yakꞌik ta ilel ta stojol genteetik te triste ay sitik yuꞌun skꞌomoj sweꞌelike. Jamal ya kalbeyex, jip me smajtan la staik abi.

San Mateo 6:1

“Ila me abaik te kꞌalal yipalex ta spasel te tut lek yoꞌtan yuꞌun te Diose, ma me xꞌawal ta awoꞌtanik te ya skꞌupinex ta sit te genteetike. Teme jich ay ta awoꞌtanik, ma me ayuk amajtanik yuꞌun te jTatik te ay ta chꞌulchane.

San Mateo 23:5

Spisil te tut ya spasike jaꞌ nax ya yakꞌ sbaik ta akꞌel ta jkuenta a yuꞌun te genteetike. Yuꞌun ya skꞌupinik yichꞌel ta yelawik sok ta skꞌabik te chꞌin yawil Sjun Dios te tsꞌibabile, sok ya skꞌupinik te ben najt stsijtsomal te skꞌuꞌ-spakꞌ ya slapike.

San Lucas 6:24

Yan te jaꞌex te jkꞌulejexe oꞌol me abaik yuꞌun ben butsꞌan kꞌinal ya awaꞌiyik ta atukelik nax.