San Mateo 23:23 - Nuevo Testamento Tzeltal de Amatenango

²³ “Ay pe jal jaꞌex, te maestroex yuꞌun te mantaliletike sok jaꞌex te fariseoexe, jaꞌex te ma tsaꞌamuk awoꞌtanike. Jich te jaꞌexe ya awaꞌbeyik smajtanin Dios jun ta slajunebal te atulpimil sok te ajoꞌoxe sok te akulantue. Yan te tut tulan skꞌoplal ta pasel te ya yal te mantaliletike, jaꞌ ma tulanuk skꞌoplal ta awoꞌtanik stukel. Jich tutꞌil ya skꞌan pasel te tut leke sok te ya xkꞌuxutaywanotike. Sok te ben jun koꞌtantik ya jchꞌuuntik te Diose. Jaꞌ to jaꞌ ya skꞌan ya apasik sok euk te yan te yipalex ta spasele.

Bible in Tzeltal Bachajón

²³ ¡Ay me awocolic, escribanohetic, fariseohetic, jchebal-o'tanex! como yac aloq'ues jun ta slajunebal te menta, anís, soc comino, pero yac awihquitayic te bin tulan sc'oblal ta Ley: ha te bin toj ta pasel, te c'uxultaywanej soc te sch'uhunel-o'tanil. Ha ya sc'an pasel soc nix te yane.

Bible in Tzeltal de Oxchuc y Tenejapa

²³ ¡Ya me awil awocolic jts'ibojometic, fariseoetic te cha'lam awo'tanique! Melel ja' nax ya awac'beyic smajt'anin Dios jun ta slajunebal te yerbabuena, soc te eneldo soc te comino. Yan te bila muc' sc'oplal ta pasel te ya yal te mandalile, ja' ma'yuc sc'oplal ta awo'tanic stuquel, jich bit'il in to: ja' te bila toj ta pasele, te c'uxul-o'tanile, soc te xch'uunjel-o'tanile. Ja' ya sc'an pasel awu'unic, soc uuc te yan te yacalex ta pasele.

San Mateo 23:23 Referans Kwoze

San Lucas 11:42

“Te jaꞌex fariseoexe, oꞌol me abaik, porke ya awaꞌbeyik smajtanin Dios jun ta slajunebal te atulpimilike, sok te alutaike, y spisil ta jkaj te abokike. Yan te tutik lek ta pasel ta stojol te yane, sok te ya skꞌan te kꞌux ya kaꞌitik ta koꞌtantik te Diose, chꞌayem ta awoꞌtanik stukel. Jaꞌ to jaꞌ ya skꞌan ya apasik, sok euk te tut yipalex ta spasele.

San Mateo 9:13

Baan, nopaik te tut ya yal te Sjun Diose: “Jaꞌ ya jkꞌan te ya xkꞌuxutaywanexe. Ma jaꞌuk ya jkꞌan te milbil jmajtane”, te xchie. Ma jaꞌuk a tal kikꞌ te machꞌatik lek ta winikil ta skꞌopike. Jaꞌ a tal kikꞌ te jmulawiletike, jich me ya sujtes yoꞌtanik yuꞌun te smulike —xchi te Jesuse.

San Lucas 18:12

Te joꞌone ya jkom jweꞌel chaꞌmel ta semana, sok ya kaꞌbeyat jun ta slajunebal te tut ya jtae”, xchi.

San Mateo 12:7

Te jaꞌexe ma anaꞌojbeyikuk sluwaril te tut tsꞌibabil ta Sjun te Diose: “Jaꞌ ya jkꞌan te ya xkꞌuxutaywanexe. Ma jaꞌuk ya jkꞌan te milbil majtane”, xchi me. Te yuꞌunuk ya anaꞌbeyik sluwarile, makꞌ ya alebeyik smul te machꞌatik maꞌyuk smulik te jichuke.

San Mateo 23:13

“Ay pe jal jaꞌex, te maestroex yuꞌun te mantaliletike sok jaꞌex te fariseoexe, jaꞌex te ma tsaꞌamuk awoꞌtanike. Yuꞌun te jaꞌexe atsꞌusojikix ta yawe kꞌoem ta stojol te genteetik te spuertaul te ba ay ta mantal te Diose. Ni makꞌ xꞌochex teꞌa te jaꞌexe, sok ma xꞌawakꞌik te ay machꞌa ya skꞌan ya xꞌochik teꞌae.