Gálatas 6:14 - Nuevo Testamento Tzeltal de Amatenango

¹⁴ Yan te joꞌone, ni ma xjuꞌ ya jtoy jba yuꞌun. Jaꞌ nax mukꞌ ya kaꞌiy jba yuꞌun te cham ta krus te Kajwaltik Jesucristoe. Yuꞌun ta skuenta nax te cham ta krus te Cristoe, te tutik ay ta balmilale chamenix jilel kuꞌun, y te joꞌone chamenonix yuꞌun te tutik skuenta balmilale.

Bible in Tzeltal Bachajón

¹⁴ Pero ma jaymehluc te ay bin ya cal yutsil jc'oblal yu'une, ha nax ya calbe yutsil sc'oblal te cruz yu'un te Cajwaltic Jesucristo, te ha ta scuenta te laj sc'oblal ta co'tan te bahlumilal soc te ha nix hichon lajon ta stojol te bahlumilale.

Bible in Tzeltal de Oxchuc y Tenejapa

¹⁴ Yan te jo'one, ma'yuc bi yan te toyol q'uinal ya caiy yu'une, ja' nax toyol q'uinal ya caiy yu'un stuquel te scruz te Cajwaltic Jesucristoe. Ja' ta swenta stuquel, te lajemix sc'oplal cu'un te balumilale, soc jich lajemonix ta stojol uuc te balumilale.

Gálatas 6:14 Referans Kwoze

Romanos 6:6

Jnaꞌojtik te tutꞌil ayotik te nail toe jojkꞌaj ta krus sok Cristo, yuꞌun teꞌ jimix jilel a te spoder te jkꞌaꞌ kuxlejaltik te puru mulil aye, y ma ba ya smosoinotik xan te mulile.

Gálatas 2:20

Sok te Cristoe pajal jojkꞌajemon sok ta krus. Y ma joꞌukon xanix ta jkuenta kuxulon, jaꞌix ta skuenta Cristo te kuxulone. Y ta ora to te tutꞌil kuxulon sok te jtiꞌbalule, jaꞌ kuxulonix ta xchꞌuunel koꞌtan ta skuenta te Xnichꞌan Diose. Jaꞌ la xkꞌuxutayon y la yakꞌ sba entregal ta milel ta joꞌon ta jkaj.

1 Corintios 2:2

Te kꞌalal la joyinexe, la jnop ta koꞌtan te jaꞌ nax ya kalbeyex skꞌoplal te Jesucristoe, sok te tutꞌil a cham ta kruse.

Filipenses 3:3

Porke te machꞌatik batsꞌi yichꞌojik sirkunsisione joꞌotik abi, yuꞌun jchꞌuunejtik te Diose ta skuenta te Espíritu, y ben jun koꞌtantik te ayotikix ta skuenta te Cristo Jesuse. Ma jaꞌuk ya kichꞌtik ta jkuenta te tutik ya spasbot te jtiꞌbalultike.

Romanos 1:16

Makꞌ xkꞌexawon yuꞌun te lek achꞌ kꞌope. Porke jaꞌ spoder Dios yuꞌun ya staik te kolele spisil te machꞌatik ya xchꞌuune. Jaꞌ nail te juriyoetike, y sok te machꞌatik ma juriyouke.

Gálatas 5:24

Y te machꞌatik ayix ta skuenta te Jesucristoe yakꞌojikix ta lajel ta krus kꞌoem te stiꞌbalulike. Lajix ta pasel yuꞌunik te tut ma tsaꞌamuk ya skꞌupin spasel te stiꞌbalulike y sok te sbikꞌtal yoꞌtanike.

1 Corintios 3:21

Jaꞌ yuꞌun ma me ayuk machꞌa lom bujtsꞌan kꞌinal ya yaꞌiy yuꞌun ta skuenta jtul winik te jaꞌ ya stsꞌakliye. Yuꞌun spisil te tutik aye, jaꞌex awuꞌunik.

1 Corintios 15:58

Jich yuꞌun, kermanotak, te ben kꞌuxex ta koꞌtane, sigue junuk awoꞌtanik y ma me xtal-xbajtuk awoꞌtanik. Aꞌtejanik sil tiempo ta mas y ta mas ta yaꞌtel te Kajwaltike. Porke te jaꞌexe ya anaꞌik te ma jowilik te aꞌtel ya apasik te jun nax sok te Kajwaltike.

Gálatas 1:4

Te Jesucristoe la yakꞌ sba ta lajel yuꞌun te jmultike, yuꞌun ya skoltayotik te ayotik ta balmilal te ma tsaꞌamuke. Jich tutꞌil la skꞌan yoꞌtan te Tatik Dios kuꞌuntike.

1 Corintios 1:23

Pero te joꞌotike jaꞌ ya kaltik te tutꞌil a milot ta krus te Cristoe. Jaꞌ to jaꞌ nax xcheꞌbantesel yoꞌtanik yuꞌun te juriyoetike, y te machꞌatik ma juriyouke, jowil nax kꞌoem ta yoꞌtanik.

Romanos 6:2

¡Ma jichuk! Joꞌotik te lajemotikix yuꞌun te mulile. ¿Tut me kꞌan kuxuyinukotik xan teme puru mulil ayotike?

2 Corintios 11:12

Pero sigue ya jpas bael te tut ya jpase, yuꞌun jich me makꞌ ya kaꞌbe permiso a te machꞌatik yipalik ta sleel te tut ya staik bujtsꞌan kꞌinal yuꞌun, jich tutꞌil joꞌotike.

San Lucas 20:16

Ya me xtal smil jilel te jꞌaꞌteletike, y ya me yakꞌ ta kanantayel ta yan te ubailtik yuꞌune —xchi te Jesuse. Te machꞌatik la yaꞌiyike la yalik: —Ma wan jichuk ya skꞌan te Diose —xchiik.

Gálatas 2:17

Pero teme jaꞌ libre ya xkꞌootik yuꞌun jmultik ta skuenta nax te Cristoe, tey ya xchiknaj a te pajal jmulawilotik sok te yanetike, ¿Me yuꞌun jich ya yakꞌ xmulawotik te Cristoe? Ma jichuk.

Gálatas 2:19

Porke te joꞌone ta skuenta te mantaliletike chamenonix yuꞌun te mantaliletike, yuꞌun jaꞌix kuxulon ta skuenta te Diose.

Gálatas 3:21

¿Me jaꞌ ya skꞌan xyal te mantaliletik yuꞌun jMoises te jaꞌ skontrainej te tutik sjapoj te Diose? Ma jichuk. Porke te mantaliletik te yauk yakꞌ kuxlejale, jich ya xjuꞌ te libre ay yuꞌun smul te machꞌa jich ya spas te tut ya yal te mantaliletike.

Filipenses 3:18

Bayal buelta a kalbeyexix, y te ora to ya jchaꞌalonbeyex xan sok kokꞌel, te ben bayal machꞌatik skontrainej te tutꞌil a cham ta krus te Cristoe,

Colosenses 2:20

Te jaꞌexe chamenex sok te Cristoe, y ma jaꞌukix ya achꞌuunik te jowil pꞌijutesel yuꞌun te balmilale. ¿Tut yuꞌun te jich to ya xꞌanex tutꞌil te machꞌatik ayik to ta skuenta te balmilale? ¿Tut yuꞌun te ya to achꞌuunik te mantalil yuꞌunike,