Piˇliˇpiˆ 1:27 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

²⁷ Aqjox-aer law khawf, nawmaf, Kali-euq guiqlanq dawq-anr geuxni yawdaef daef-awq. Khoerlof-aer daef nar-aq, ngar oekeuv-awr nawmaf-anr ya’mawr ngae maqaer, nawmaf naeq-aer maqjawr ngae maqkaq, nawmaf nuima tiqsiq taef-aer taq-awr, nuinoeq tiqjeq taef-aer taq-eu uqtaf, guiqlanq dawq-anr taf-eu jan-eu jeq-euq gharduq, tiqkawv lof-aer laejae duidui-eu garkawv-anr ngar yagaq taef-a.

Akha

²⁷ Huiˬ-eu tiˬ jeˬ-aˬ, ngaˇ naw maꞈ-ahˇ haw keuˆ laˇ-eu maˬ kaˬ, maˬ haw keuˆ laˇ-eu maˬ kaˬ, naw maꞈ nui ma tiˬ siˬ tehꞈ-ehˇ taˬ-awˇ ziꞈ dah ni jawˇ luꞈ-eu gaˇ kawˆ hawˇ-eu, La kʼaˬ cehˇ-eu Guiˬ lahˬ dawˬ-ahˇ taꞈ-eu jah-eu jeˬ gʼaˇ duˬ naw maꞈ nui ma gm-awˇ deuˆ ceh ceh luꞈ-eu gaˇ kawˆ-ahˇ ngaˇ ya gaˬ ni, Ka li-euˬ Laˬ kʼaˬ cehˇ-eu Guiˬ lahˬ dawˬ-ahˇ tsaˬ ni dehꞈ gʼeh jawˇ gʼeh-awˬ.

Piˇliˇpiˆ 1:27 Referans Kwoze

Eˇpeˇsu 4:1

Sanqpaq Yeqsur-euq gharduq kuv-anr urluf-eu ngar, nawmaf-anr heulof-aer shar-eu ma. Miqyaer, nawmaf-anr kur-euq lof-aer, kur-euq gar geuxni daef-awq.

1 Gawˇliˬtu 1:10

Aqyuif aqnyir deuq-or! Ngar, aqdui-euq Sanqpaq Yeqsur Kali-euq tsawrmyanr-euq uqmov nawmaf-anr heulof-aer shar-eu ma. Nawmaf dawqtawvluf tsaqler dzoerler-eu dawq ngaeq-awr, nawmaf-euq yawkaq armaf taq birpav. Nawmaf yawmuiq-aer gawfler gmler nya’ni, nuima tiqsiq taef-aer taq-awr nuinoeq tiqgar taef-aer tsaq-awq.

2 Beˬtuˆluˆ 3:14

Khoermirnae, ngar zawr gaq-eu cawqdeuq-or! Nawmaf khoerdeuq-anr noeqtmq-awr dawq-awq. Aqyawf-euq maeqshi, nawmaf nuisar of-eu lafkhoer, marbyawf maqbaw-aer aerkhar maqza nga laer aqyawf mawrni laejae-awq.

Gawˇlawˇsehˇ 1:10

Khoernar-aq, nawmaf, Sanqpaq Miqyaer-anr geuxni daefnya lar-awr, yawqjeq navluf-euq lafkhoer aqyawf, nawmaf-anr nuikhanr shir-eu uqtaf, nawmaf yawmuiq yawqjeq navluf mr-awr shar-eu lafkhoer arsiq siqle-awr, Miqyaer-anr siqnya-eu tsawrganr myaqlar taef-a.

Yuˇdaˆ 1:3

Ngar zawr gaq-eu cawqdeuq-or! Aqdui kakhof-eu jeq tiqkawv lof-aer za-eu garkawv, ngar nuima keuv-awr nawmaf-anr bofanr naeqlefmawf mir-a. Aerkhawf, Miqyaer nae tsawrshawr deuq-anr tiq pov bif-euq nar-aq luiv-eu jan-eu jeq-euq gharduq, nuima keuv duidui-eu lafkhoer deuv-awq laer, ghaq bif-eu tsaq nga laer noeq-awr bofanr lef-euq ma.

1 Teˇsaˬloˇni 4:1

Aqyuif aqnyir deuq-or! Ngar heulof-aer arsaq saqmawf mir-a. Nga’maf, Sanqpaq Yeqsur-anr ghoeghoe-aer, nawmaf-anr heulof-aer sharshar-aer ghaq bifmawf nya siq. Nawmaf, Miqyaer nuikhanr shirni yawdaef aqjox-aer yadaef-eu garkawv, nga’maf, nawmaf-anr maeqnaeq-euq ma. Nawmaf khoer-euq maeqnan cantae luf-eu lof-aer, maeqhu paw khawf khoernav maqtser laejae laejae-aer cantae ghae-awq.

Piˇliˇpiˆ 2:12

Khoermirnae, ngar zawr gaq-eu cawqdeuq-or! Ngar, nawmaf naeq-aer jawr ngae, nawmaf aqmyanluf ngaq-euq dawq narhaq geuf-euq lof-aer, khoernav maqtser, nymq-mr ngar, nawmaf naeq-aer maqjawr ngae khawf ngaq-euq dawq narhaq geuf-awq. Nawmaf, yawqha-euq kakhof-eu jeq za’nya paq-aer, guv-awr yawdzuq dzuq-eu lafkhoer laejae duidui-awq.

Piˇliˇpiˆ 3:18

Aqjeq mirnae aernar-aq, dzeurlaf ngae, khoerdeuq-euq garkawv, ngar, nawmaf-anr ghawqmya pov aernaeq-euq ma. Nymq-mr khawf myavbir dovdov-aer tiq pov par aernaeq nyar. Aqyawf maf-aq, Kali-euq lafyaq-anr muir-eu tsawrhaq mae.

2 Gawˇliˬtu 13:11

Aqyuif aqnyir deuq-or! Ghawqdawq ngaeq-awr arsaqsaq ma. Nawmaf byanlar-awr, nuima sarlar-awr, nuinoeq tiqjeq taef-aer taq-eu uqtaf, tiqghaq tirghaq tsaqler dzoerler-awq. Khoerlof-aer janr nar-aq, gaq-eu jeq bif-awr nuisar bif-eu Miqyaer, nawmaf naeq-aer jawr taef-a.

Gʼaˬkʼehˇ 4:32

Kali-anr jan-eu tsawrhaq baqmaf myaq-eu khawf, nuima tiqsiq taef-aer taq-awr, nuinoeq tiqgar taef-aer tsaq-eu mae. Aqgeu ghaq maqkaq, yawqha jav-eu myawqdeuq, yawqha-euq le laer tiqghaq-iq maqaerni, kharjav-eu myawq dawqtawvluf tiqkawv lof-aer zmq-eu mae.

Jaceuq 133:1

Hawsher-eq, maernmr deuq nuima gm-awr tiqgar taef-aer jawrtaf-eu, Arnavni muiq-awr arnavni nuikhanr shirlar paq-aer ghae-eu nga!

2 Beˬtuˆluˆ 3:11

Yawqjeq navluf khoerlof-aer yabi guirbyovjir mae laer siqnya-eu mirnae, nawmaf yawshawr shawr-aer daef-awr, Miqyaer-anr yawzeu baw-eu shaevdzeuf anr-eu tsawrhaq pyeuf-eu tsaq mae.

1 Gawˇliˬtu 15:58

Khoermirnae, ngar zawr gaq-eu aqyuif aqnyir deuq-or! Nuima zifdanni ghae-awr maqpov maq parlarni, aqmyanluf Sanqpaq Miqyaer-euq gar laejae-awr mr-eu tsawrhaq pyeuf-awq. Aqjeq mirnae aernar-aq, nawmaf nae Sanqpaq Miqyaer-euq gharduq mr-awr shar-eu jeq-aq, yawqngaef maqngeur-a laer siqnya-awq.

Lormav 1:16

Ngar, Kali-euq guiqlanqdawq gharduq maq shafdawr. Aqjeq mirnae aernar-aq, guiqlanq dawq-aq, jan-eu tsawrhaq yawqghaq navluf-anr bibuq-ir nya-eu Miqyaer-euq baoq pyeuf-eu mae. Yurdav tsawrhaq-anr nae bae-awr, Heqlaqsar tsawrhaq-anr khawf bibuq-ir-eu mae.

Yaˬkoˆ 3:18

Tsaqler dzoerlerni mr-eu tsawrhaq-aq, tsaqler dzoerler-eu siqyoeq saeq-awr, tsaq-awr dawr-eu jeq yayaeq-eu mae.

Piˇleˇmoˬ 1:5

Aqjeq mirnae aernar-aq, nawr, Sanqpaq Yeqsur-anr hawr-eu tsawrshawr yawqghaq navluf-anr jan-awr gaq-eu mae laer, ngar yagaq-euq ma.

Tiˇtuˆ 2:10

Myawq maqkhoeq-aer, yawqjeq navluf-euq lafkhoer sarjax zif-awq laer khawf maeqnaeq-awq. Khoerlof-aer janr nar-aq, yawqjeq navluf-euq lafkhoer aqdui-euq Kakhof-eu ghaq pyeuf-eu Miqyaer-euq dawqmaeq dawqtsov-anr ciqpoeq ciqgor taef-a.

2 Tiˆmoˇseˬ 4:7

Ngar guirdeuv yawmuiq-aer deuv-awr, ngar caev paq-aer ghae-eu garma caevli-euq ma. Ngar jan-eu jeq-anr zifdanni nyaeftaeq laf-euq ma.

1 Tiˆmoˇseˬ 1:19

Guirdeuvdeuv ngae, jan-eu jeq-anr hawr-eu muiq-eu zaqsiq nuisiq-anr nyaeftaeq taq-awq. Tsawrhaq tiqpavnav deuq-aq, heudeuq byaerdzae yaf-euq mirnae, lawq cawv-ir-euq lof-aer, aqyawf maf-euq jan-eu jeq cawv-ir-euq mae.

1 Tiˆmoˇseˬ 1:11

Tsaq-awr tsanr-eu jan-eu jeq khoer-aq, ngaq-anr a’naeq laf-euq guiqlanq byan-eu Miqyaer-euq yawshaef khanqsaer huiq-eu guiqlanq dawq-anr tsaqler-eu mae.

Gʼaˬkʼehˇ 2:46

Aqyawfmaf nan-anr nae nuima gm-awr, uqduq tanqnymr nymrma-anr davler-eu uqtaf, kaqmur ngawqpyaeq-awr, laqkhaq tiqcaer nuima jerloni, tiqnymr sair tiqnymr dzaqtaf dawrtaf-eu mae.

Maꞈtehˬ 12:25

Yeqsur, aqyawf maf-euq nuinoeq-anr siqnya-eu mirnae heulof-aer aernaeq-euq mae: “Armur birpav-awr muir-eu mirkhanq yawqkhanq navluf, mirkhanq khanqtsoeq tsoeq-ir taef-a. Armur birpav-awr muir-eu meuq yawqmeuq navluf hawr-eu nymrkhanq yawqkhanq navluf khawf maqzif-ar.

Dawqdaq 22:23

Aqjeq mirnae aernar-aq, Ya’we Miqyaer, aqyawf maf-euq gharduq yarkhaq jadan naeq-awr, Aqyawf maf-anr yurgeuf naeq-euq deuq-euq daefzir-anr yur taef-a.

1 Teˇsaˬloˇni 3:6

Aerkhawf, nymq-mr Tivmorseq, nawmaf jawr-eu gar nae ghofkeuv le-awr, nawmaf janluf-eu garkawv hawr-eu gaqluf-eu garkawv, laqkhaq caerlar paq-aer nga’maf-anr dzawrnaeq laf-euq mae. Nawmaf, aqmyanluf nga’maf-anr noeqkeuv luf-awr, nga’maf, nawmaf-anr mawrmawf-eu lof-aer, nawmaf khawf, nga’maf-anr mawrmawf duidui-eu garkawv khawf dzawrnaeq laf-euq mae.

Gawˇlawˇsehˇ 1:4

Aqjeq mirnae aernar-aq, nawmaf, Yeqsur Kali-anr janluf-awr, tsawrshawr dawqtawv luf-anr gaqluf-eu garkawv nga’maf yagaq-euq ma.

Piˇliˇpiˆ 2:24

Ngar khawf ghawqmyanr maqghae-aer nawmaf jawr-eu gar ya’oe taef-a laer, Sanqpaq Yeqsur-euq lafkhoer yawduqbaw ma.

Eˇpeˇsu 1:15

Khoermirnae, nawmaf, Sanqpaq Yeqsur-anr nuijan anr-awr, tsawrshawr dawqtawv luf-anr gaq-eu garkawv ngar yagaq-awr,

Eˇpeˇsu 1:13

Nawmaf-anr kakhof nya-eu yawtsaq yawdawr-euq guiqlanq dawq-anr yagaq ngae, nawmaf, Kali-anr ghoelar-euq mae. Khoermirnae, jan-eu lafkhoer sarjax biftaq-euq lof-aer, Yawshawr Saflar-anr ghoe-awr nawmaf-anr jmq diqtaq-euq mae.

Gaˬlaˬtiˆ 1:7

Aqdir aernar-aq, guiqlanqdawq yawqdawqyawq maqjav-a. Aerkhawf, tsawrhaq tiqghaqnav, nawmaf-anr yawbanq yawlanr-aer bipyeuf-ir-awr, Kali-euq guiqlanq dawq-anr yurpyawv mawf-eu mae.

2 Gawˇliˬtu 9:13

Nawmaf, Kali-euq guiqlanq dawq-euq uqmov jawr-eu ma laer sarkir kamq-awr, aqyawf maf-anr khawf, tsawrhaq dawqtawv luf-anr khawf, nuima jerloni bifnaeq-eu guiqlanq-euq gar heu-anr aqcawq ya’mawr-awr, Miqyaer-anr ciqhuiq ciqmanr taef-a.

2 Gawˇliˬtu 4:4

Maqjan-eu tsawrhaq-anr Miqyaer-euq shaevdzeuf pyeuf-eu Kali-euq yawshaef khanqsaer byadov lef-eu guiqlanqdawq, maqbi bya’naeq-eu gharduq, heuzir-euq miqyaer, aqyawf maf-euq nuima-euq myavnuiv bibaef-ir taq-euq mae.

Lormav 15:29

Ngar, nawmaf jawr-eu gar lar ngae, Kali-euq guiqlanq dawq-euq guiqlanq deuq tiqbyanni anr-eu lafkhoer lar-eu ma laer siqnya ma.

Lormav 15:16

ngar, aqcawq tsawrjeuq tsawrca-euq gharduq Yeqsur Kali-euq gar mrzaq geuf-awr, Miqyaer-euq guiqlanq dawq-euq gar mrluf-eu ma. Yawshawr Saflar nae aqcawq tsawrjeuq tsawrca-anr lavshawr-euq nar-aq, aqyawf maf-anr yur-awr lawrnaeq-eu jeq lof-aer lawrnaeq ngae, Miqyaer hageuf paq-aer ngar mrluf-eu ma.

Lormav 10:8

Jan-eu jeq-anr taf-eu tsaq-awr dawr-eu jeq aqjox-aer aermawf-eu nga laer aernar-aq, “Dawq heudawq-aq, nawq-euq dawqpae javluf-eu mae. Nawq-euq khaqmae-euq lafkhoer anr-awr, nawq-euq nuima-euq lafkhoer khawf anr-eu mae.” (Dm 30:12-14) (Dawq heudawq-aq, nga’maf maeqluf-eu jan-eu jeq-anr taf-eu dawqdeuq-anr aermawf-eu ma.)

Lormav 1:9

Ngar, nawmaf-euq gharduq maq naqlerni aqmyanluf guiqlanq shar-eu gar Miqyaer, ngaq-euq gharduq sarkir kamqnya mae. Ngar-aq, ngaq-euq nuima saflar nae aqyawf-euq gharduq mr-awr, aqyawf-euq Zaqyo-euq garkawv guiqlanqdawq maeqluf-eu ma.

Lormav 1:5

Nga’maf, aqyawf-euq baqda’nae, guiqlanq yawdzanr za-awr ghaqkhaer yageuf-euq ma. Khoer-aq, aqyawf-euq tsawrmyanr gharduq hawr-eu mirkhanq-euq tsawrjeuq dawqtawv luf-euq ghanrcae nae, jan-awr narhaq geuf-eu tsawrhaq bi dovlar-eu gharduq mae.

Gʼaˬkʼehˇ 24:24

Heumyav nan dzeur-euq nar-aq, Peqlir, aqyawf-euq miqzaq Dursirleq naeq-aer lar-euq mae. Dursirleq-aq, Yurdavma mae. Khoernar-aq, Pawrluv-anr bi kurlaq-ir-awr, Kali-anr jan-eu garkawv Pawrluv ja-eu gar narhaq-euq mae.

Jaceuq 122:3

Yeqlursaqlaeq-aq, tiqgar taef-aer tsanrdzeufni tsovtaq-euq meuq tiq meuq lof-aer dur-eu mae.

Piˇliˇpiˆ 1:5

Aqjeq mirnae aernar-aq, ardanqbae ngae nan-anr nae iqnan keuvni, nawmaf khawf guiqlanq dawq-anr tafler-awr nae gar cawmr luf-eu mae.

Piˇliˇpiˆ 3:20

Aerkhawf, aqdui-aq, mqtav-euq mirkhanqzaq pyeuf-awr, Kakhof-eu ghaq Sanqpaq Yeqsur Kali-anr nuima keuv duidui-eu lafkhoer dawqluf-eu ma.

Piˇliˇpiˆ 4:1

Khoermirnae, ngar zawr gaq-awr, mawrmawf duidui-eu aqyuif aqnyir deuq-or! Nawmaf-aq, ngaq-euq laqkhaq caerduq hawr-eu ngaq-euq shuir uqkhov ma. Ngar gaq-eu cawqdeuq-or! Nawmaf, Sanqpaq Miqyaer-euq lafkhoer zifdanni yawf-awq.