Maꞈtehˬ 9:6 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁶ Tsawrhaq-euq Zaqyo-aq, mirtsaq-euq khoertav iqbax pyaeqnya-eu aryaq jav-eu ngar-a laer nawmaf-anr bisiq-eu ma.” Khoernar-aq, Yeqsur, kuirshir lafshir shir-eu khoerghaq-anr aernaeq-eu, “Tur-awr, nawq-euq yufzar baf-awr irkanr ghof-ir-awq.”

Akha

⁶ Tsawˇ haˬ-euˬ Zaˬmaˇ -aˬ, miˇ tsaˬ heu kʼoeˇ taˆ iˬ baˇ pyehˬ nehˬ nya-eu baoˬ ahˇ-eu gaˇ kawˆ, naw maꞈ-ahˇ ngaˇ bi mawˇ duˬ nyaˇ.” Kʼoeˇ naˇ, kuiˇ shiˇ laꞈ shiˇ shiˇ-eu tsawˇ haˬ kʼoeˇ gʼaˬ-ahˇ Yeˬsuˇ ehˇ nehˬ-eu, “Tuˇ-awˇ, nawˬ-euˬ yuꞈ zaˇ baꞈ-awˇ gʼoꞈ-iˇ-awˬ.”

Maꞈtehˬ 9:6 Referans Kwoze

Maꞈtehˬ 9:5

‘Nawq-euq iqbax pyaeq-euq ma’ laer aer-eu hawr-eu, ‘Tur-awr can-awq’ laer aer-eu dawq heu nyiq dawq, aqgeu dawq awqdzaeq-eu la?

2 Gawˇliˬtu 2:10

Nawmaf, tsawrhaq tiqghaq nav-euq iqbax-anr pyaeqnaeq nar-aq, ngar khawf khoerghaq-euq iqbax-anr pyaeqnaeq ma. Ngar iqbax tiqjeqnav pyaeqnaeq-eu-aq, nawmaf-euq gharduq Kali-euq maeqshi pyaeqnaeq-eu ma.

Gawˇlawˇsehˇ 3:13

Tiqghaq tirghaq oror-aer daef-awq. Tiqghaq-euq khoertav tiqghaq iqbax taqkharza nar-aq, tiqghaq tirghaq iqbax pyaeq-awq. Kali, nawmaf-euq iqbax-anr pyaeq-euq lof-aer, nawmaf khawf tiqghaq tirghaq iqbax yapyaeq-eu mae.

Eˇpeˇsu 4:32

Kali-euq lafkhoer, Miqyaer, nawmaf-anr iqbax pyaeqnaeq-euq lof-aer, nawmaf khawf tiqghaq tirghaq iqbax pyaeq-awr, nuima nanqyuni ghae-eu lafkhoer, tiqghaq tirghaq ghawqshaq gaq-awq.

2 Gawˇliˬtu 5:20

Khoermirnae, nga’maf-aq, Kali-euq danzar geufluf-eu ma. Miqyaer, nga’maf-anr ghoe-awr nawmaf-anr sharluf-eu gar dur-eu mae. Miqyaer-anr tsaqler dzoerler-awq laer nga’maf, Kali-euq danzar geuf-awr, nawmaf-anr tanqshar-eu ma.

Gʼaˬkʼehˇ 9:34

Beqtuvluv, aqyawf-anr aernaeq-eu, “Aerneq-or! Yeqsur Kali, nawq-anr lavtaq luf-eu mae. Tur-awr nawq-euq yufzar lavluiv-awq.” Khoerngae, tiqpov taef-aer aqyawf turlar-euq mae.

Gʼaˬkʼehˇ 5:31

Uvlanr-eu ghaq hawr-eu Kakhof-eu ghaq pyeuf-awr, Irsaqleqlav-anr noeqpov noeqpar-eu jeq hawr-eu, iqbax pyaeq-eu jeq bif-eu gharduq, Miqyaer, aqyawf-anr aqyawf-euq armar paw ciqgor naeq-euq mae.

Yoˇhaˬ 17:2

Nawr, tsawrhaq dawqtawv luf-euq khoertav-euq aryaq aqyawf-anr biftaq-euq lof-aer, aqyawf-anr khar a’naeq taq-euq tsawrhaq dawqtawv luf-anr, aqyawf mqmaq maqbyav yarzir daef-eu jeq bifnaeq nya-eu mae.

Yoˇhaˬ 10:28

Khoeruqtaf, ngar, aqyawf maf-anr mqmaq maqbyav yarzir daef-eu jeq bif-awr, aqyawfmaf tiqjawr-iq maqya cawv-ir-ar. Ngaq-euq aqlaf-anr nae tiqghaq-iq yawr khoerdeuq-anr maq ludov nya-ar.

Luˇkaꞈ 5:21

Khoerngae, zanr maeq-eu deuq hawr-eu Paqliqsaer deuq danqbae-awr jasawx-eu, “Yaeqbawq saerlu-aer ngaeq-eu teughaq aqsur ghaq la? Miqyaer tiq ghaq maqngeur nar-aq, iqbax aqsur ghaq pyaeqnya-eu?”

Maˬkuˆ 2:10

Tsawrhaq-euq Zaqyo-aq, mirtsaq-euq khoertav iqbax pyaeqnya-eu aryaq jav-eu ngar-a laer nawmaf-anr bisiq-eu ma.” Khoerngae, Yeqsur, kuirshir lafshir shir-eu khoerghaq-anr aernaeq-eu,

Maˬkuˆ 2:7

“Tsawrhaq heughaq aqjeq mirnae, yaeqbawq saerlu-aer teulof-aer aer-eu nga? Miqyaer tiq ghaq maqngeur nar-aq, iqbax-anr aqsur ghaq pyaeqnaeq nya-eu la?”

Maꞈtehˬ 8:20

Khoer-anr Yeqsur aernaeq-eu, “Byaqhir-aq, khaeqbanq baw-awr, mqtav zaw-eu arjir khawf banq jav-eu mae. Aerkhawf, Tsawrhaq-euq Zaqyo-aq, uqduq bafdarduq khawf maqjav.”

Maꞈtehˬ 4:24

Aqyawf-euq garkawv Surliv mirkhanq-anr keuvni gaqdoe-ir-euq mae. Khoerngae, nargawr ghawqmya jeq nar-eu tsawrhaq, nargawr yawkhav-aer ya daqluf-eu tsawrhaq, naef ur-eu tsawrhaq, mawrbawq seu-eu tsawrhaq hawr-eu kuirshir lafshir shir-eu tsawrhaq dawqtawv luf-anr, aqcawq, Yeqsur jawr-eu gar sheuqlaf-awr, Yeqsur, aqyawf maf-anr lavtaq naeq-euq mae.

Maꞈtehˬ 9:2

Khoerngae, aqcawq, yufzar-anr galuf-eu kuirshir lafshir shir-eu tiq ghaq-anr, Yeqsur jawr-eu gar baflaf-euq mae. Yeqsur, aqyawfmaf jan-eu gar ya’mawr ngae, kuirshir lafshir shir-eu khoerghaq-anr aernaeq-eu, “Aqli-or! Laqkhaq caer-awq, nawq-euq iqbax pyaeqnaeq ghaq-euq ma.”

Maꞈtehˬ 9:7

Khoerngae, tsawrhaq khoerghaq tsawqtur-awr irkanr ghof-ir-euq mae.

Yoˇhaˬ 5:8

Yeqsur, aqyawf-anr aernaeq-eu, “Tur-awr, nawq-euq yufzar baf-awr can-awq.”

Yoˇhaˬ 5:27

Khoeruqtaf, aqyawf-aq, Tsawrhaq-euq Zaqyo pyeuf-eu mirnae, aqyawf-anr yarkhaq dar-eu aryaq biftaq-euq mae.