Yeˬsaˬgeˬlaˇ 20:9 - Akha

⁹ Ehˇ kʼawꞈ, ngaˬ-euˬ tsawˇ myahˇ cawˆ-iˇ gaˇ yahˇ-eu miˇ neh, aˬ yawꞈ maꞈ-ahˇ ngaˇ kʼoeˇ loꞈ-ehˇ maˬ jahˇ nehˬ-aˬ. Aˬ jeˬ miˇ neh ehˇ naˇ, aˬ yawꞈ maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh ngaˇ sheuˬ doˆ nehˬ-eu lehˇ gʼeh-eu gaˇ kawˆ, aˬ yawꞈ maꞈ nehˬ-ehˇ jawˇ luꞈ-eu aˬ cawˬ tsawˇ jeuˬ kʼoeˇ myaˆ ni gʼeh-eu mehˬ shi, aˬ yawꞈ maꞈ-ahˇ ngaˬ neh ehˇ gaˬ taˬ-euˬ jaˆ-eu ma.

Yeˬsaˬgeˬlaˇ 20:9 Referans Kwoze

Yeˬsaˬgeˬlaˇ 39:7

Ngaˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ ngaˬ-euˬ muiˬ-eu shawˇ-eu tsawˇ myahˇ-ahˇ siˬ nya-eu gaˇ kawˆ duˬ laˇ ni ngaˇ jahˇ-awˇ, ngaˬ-euˬ tsawˇ myahˇ tiˬ jawˇ-iˬ maˬ paˇ bi cawˆ-iˇ ma. Kʼoeˇ ngeh jawˇ, Sahˬpaˬ Miˬyehˇ pyeuꞈ-eu ngaˇ-aˬ, Iˇsaˬleˬlaˆ-euˬ muiˬ-eu shawˇ-eu Miˬyehˇ ngaˇ lehˇ, tsawˇ jeuˬ dawˬ tawˆ luꞈ-ahˇ siˬ duˬ leˇ tehꞈ-a.”

Yeˬsaˬgeˬlaˇ 20:22

Ehˇ kʼawꞈ, Iˇsaˬleˬlaˆ tsawˇ jeuˬ-ahˇ Iˇjiˇtuˆ miˇ kʼahˬ laꞈ kʼoeˇ neh ngaˇ sheuˬ doˆ nehˬ-euˬ gaˇ ya mawˇ-euˬ tsawˇ jeuˬ deuˬ-euˬ mehˬ shi, ngaˬ-euˬ tsawˇ myahˇ cawˆ laˇ gaˇ yahˇ-eu miˇ neh, ngaˇ kʼoeˇ loꞈ-ehˇ maˬ jahˇ-aˬ.

Yeˬsaˬgeˬlaˇ 20:14

Ehˇ kʼawꞈ, kʼoeˇ loꞈ-ehˇ maˬ jahˇ nehˬ-aˬ. Aˬ jeˬ miˇ neh ehˇ naˇ, kʼoeˇ loꞈ-ehˇ jahˇ-eu baˬ da neh, ngaˬ neh Iˇsaˬleˬlaˆ tsawˇ jeuˬ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-euˬ gaˇ kʼaˇ ya mawˇ-euˬ tsawˇ jeuˬ deuˬ mehˬ shi, ngaˬ-euˬ tsawˇ myahˇ cawˆ laˇ gaˇ ngaˇ yahˇ-euˬ ma.

Doˆ-iˇ 32:12

Nawˇ-aˬ, nawˬ-euˬ tsawˇ haˬ deuˬ-ahˇ, gawˬ jawˬ gawˬ duˇ kʼoeˇ taˆ sehꞈ dzeh jiˇ-awˇ, laˆ piˬ laˆ byoˆ jiˇ mawꞈ-eu miˇ neh, Iˇjiˇtuˆ miˇ kʼahˬ laꞈ kʼoeˇ neh sheuˬ doˆ gʼeh-euˬ nga lehˇ Iˇjiˇtuˆ tsawˇ haˬ deuˬ bi ehˇ-eu loˇ. Nui ma pehˇ-eu taˬ leˇ-awˬ. Luˬ-iˇ seˇ-iˇ-eu heu nawˬ-euˬ tsawˇ haˬ deuˬ kʼoeˇ taˆ maˬ ya bi keuˆ le ni, nawˬ-euˬ nui ma noeˬ paˇ-awˬ.

1 Saˬmeuˬlaˆ 12:22

Sahˬpaˬ Miˬyehˇ-aˬ, naꞈ dui dui-eu saˇ jaˇ dzaˬ taˬ-awˇ, naw maꞈ-ahˇ aˬ yawꞈ-euˬ tsawˇ jeuˬ bi pyeuꞈ laˇ ma lehˇ noeˬ tsehˆ taˬ-euˬ miˇ neh, naw maꞈ-ahˇ maˬ byehˇ dzeh nehˬ laꞈ-a.

1 Saˬmeuˬlaˆ 4:8

Baoˬ huiˬ-eu miˬ yehˇ kʼoeˇ deuˬ-euˬ aˬ laꞈ laꞈ kʼoeˇ, aˬ dui-ahˇ aˬ suˇ gʼaˬ ka kʼoꞈ nehˬ laꞈ nmˇ. Miˬ yehˇ kʼoeˇ deuˬ-aˬ, bawˇ tsahˬ bawˇ dahˇ laꞈ kʼoeˇ Iˇjiˇtuˆ tsawˇ haˬ deuˬ-ahˇ sehꞈ-euˬ miˬ yehˇ deuˬ ngeuˇ-eu jeˬ nga.

Dawˬmehˬ 9:28

Kʼoeˇ loꞈ-ehˇ maˬ ngeuˇ naˇ, nawˬ-euˬ tsawˇ haˬ deuˬ-ahˇ, nawˬ neh saˇ jaˇ dzaˬ taˬ-euˬ miˇ kʼahˬ-ahˇ nawˇ maˬ sheuˬ uˇ gʼeh nehˬ nya nga lehˇ, Iˇjiˇtuˆ tsawˇ haˬ deuˬ ehˇ tehꞈ-a. Nawˬ-euˬ tsawˇ haˬ deuˬ-ahˇ nawˇ bye-eu miˇ neh, bawˇ tsahˬ bawˇ dahˇ-ahˇ sheuˬ gʼeh-awˇ sehꞈ-euˬ ngaˇ lehˇ, aˬ yawꞈ maꞈ ehˇ tehꞈ-a.

Yawˇshuˆ 7:9

Kaˬnaˬ tsawˇ jeuˬ hawˇ-eu miˇ kʼahˬ heu kʼahˬ laꞈ kʼoeˇ kʼaˇ jawˇ-eu tsawˇ jeuˬ yawˬ jeuˬ na luꞈ gaˇ kawˆ heu ya gaˬ tehꞈ-a. Aˬ yawꞈ maꞈ nga maꞈ-ahˇ jawˬ lahˇ-awˇ, nga maꞈ yawˬ gʼaˬ na luꞈ-ahˇ sehꞈ tehꞈ-a. Kʼoeˇ ngeh, nawˬ-euˬ tsawˇ myahˇ maˬ ya cawˆ-iˇ ni nawˇ aˬ joˆ-ehˇ jahˇ nmˇ.”

Yawˇshuˆ 2:10

Iˇjiˇtuˆ miˇ kʼahˬ laꞈ kʼoeˇ neh naw maꞈ doˆ laˇ luꞈ ngeh, naw maꞈ-euˬ mehˬ shi, Sahˬpaˬ Miˬyehˇ neh iˬ ma laˆ shaˆ yaw neˇ iˇ cuꞈ bi gui-iˇ-euˬ gaˇ kawˆ nga maꞈ ya gaˬ-euˬ ma. Yawˇdaˬ lawˇ baˬ nahˇ ma doˆ kʼehˬ paw jawˇ-eu Aˬmawˇliˆ sahˬ paˬ nyiˬ gʼaˬ pyeuꞈ-eu Siˇhoˬ hawˇ-eu Awˇgaˆ-ahˇ naw maꞈ aˬ joˆ-ehˇ sehꞈ-euˬ gaˇ kawˆ kʼawꞈ, nga maꞈ siˬ nya ma.

Doˆ-iˇ 32:11

Ehˇ kʼawꞈ, Moˇseˬ-aˬ, aˬ yawꞈ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ shaˇ-eu laꞈ kʼoeˇ, heu loꞈ-ehˇ ehˇ-eu meh. “Sahˬpaˬ Miˬyehˇ-oˇ, huiˬ dui dui-eu nawˬ-euˬ baoˬ-ahˇ gʼoe-awˇ, Iˇjiˇtuˆ miˇ kʼahˬ laꞈ kʼoeˇ nawˬ neh ka kʼoꞈ doˆ laꞈ-euˬ nawˬ-eu tsawˇ haˬ deuˬ-ahˇ aˬ jeˬ miˇ neh nawˇ teu naˆ naˆ-ehˇ nui ma pehˇ te.

Jaceuq 106:8

Ehˇ kʼawꞈ aˬ yawꞈ neh saˇ jaˇ dzaˬ taˬ-euˬ loꞈ-ehˇ, aˬ yawꞈ maꞈ-ahˇ ka kʼoꞈ nehˬ-awˇ, aˬ yawꞈ-euˬ huiˬ-eu baoˬ pah mehˬ-euˬ meh.

Iˇsaˬyaˇ 48:11

Ngaˬ neh mˇ-euˬ jeˬ ngaˬ-euˬ gʼaˇ duˬ ma. Ngaˬ-euˬ tsawˇ myahˇ cawˆ-eu jeˬ ngaˇ maˬ mˇ. Ngaˬ-euˬ yaw shehꞈ kʼahˬ sehˇ-ahˇ nui gʼaˬ maˬ bi taꞈ. Maˇ maˇ ni ngaˇ tiˬ gʼaˬ gʼaˇ duˬ tehꞈ ma.”