Yeˬlaˬmiˇ 51:15 - Akha

¹⁵ Sahˬpaˬ Miˬyehˇ aˬ yawꞈ-euˬ baoˬ hawˇ-eu, aˬ yawꞈ-euˬ zaˬ siˬ tsawˇ gahˇ-ahˇ gʼoe-awˇ, miˇ tsaˬ tahˬ kʼawˇ beh-awˇ mˬ sheu taw taˬ-euˬ meh.

Yeˬlaˬmiˇ 51:15 Referans Kwoze

Panmaeq 4:11

“Nga maꞈ-euˬ Sahˬpaˬ Miˬyehˇ-oˇ, yawˬ jeˬ na luꞈ nawˬ neh beh-awˇ, nawˬ-euˬ nui kʼahˇ baˬ da baˇ neh, jaˆ luꞈ jawˇ luꞈ-eu baˬ da neh, yaw shehꞈ kʼahˬ sehˇ maˬ ehˇ, taˬ huiˬ taˬ mahˇ-eu jeˬ maˬ ehˇ, baoˬ maˬ ehˇ, nawˇ za geuˇ-eu meh.”

Yeˬlaˬmiˇ 32:17

“Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ-oˇ, huiˬ dui dui-eu nawˬ-euˬ baoˬ-ahˇ gʼoe-eu laꞈ kʼoeˇ nawˇ aˬ laꞈ cawˬ ja-awˇ, mˬ hawˇ-eu miˇ-ahˇ beh taˬ-euˬ meh. Nawˇ maˬ mˇ nya-eu tiˬ jeˬ-iˬ maˬ jaˆ-a.

Lormav 1:20

Miˬyehˇ mˬ beh miˇ beh ngeh tiˬ nah neh, maˬ haw mawˇ nya-eu jeˬ pyeuꞈ-eu aˬ yawꞈ-euˬ laꞈ kʼoeˇ ahˇ-eu baoˬ hawˇ-eu, aˬ yawꞈ mˬ maˬ maˬ byaˆ zaˇ ziˇ Miˬyehˇ pyeuꞈ-eu gaˇ kawˆ, bya cehˆ ni siˬ duˬ mawˇ duˬ laˇ-euˬ meh. Aˬ yawꞈ neh mˇ taˬ-euˬ gaˇ-ahˇ haw-awˇ, kʼoeˇ loꞈ-ehˇ siˬ duˬ nya-eu meh. Kʼoeˇ miˇ neh, aˬ yawꞈ maꞈ maˬ pyehˇ dzeuˇ nya-a.

Gʼaˬkʼehˇ 14:15

“Naw maꞈ aˬ jeˬ miˇ neh teu loꞈ-ehˇ jahˇ te. Nga nyaꞈ kʼawꞈ naw maꞈ loꞈ-ehˇ tsawˇ haˬ zaˬ ma. Gaˇ dahˇ maˬ tsoeˬ-eu gaˇ kawˆ heu deuˬ-ahˇ naw maꞈ byehˇ dzeh-awˇ, mˬ, miˇ, iˬ ma laˆ shaˆ hawˇ-eu kʼoeˇ gaˇ kʼaˇ jawˇ kʼaˇ jaˆ-eu yawˬ jeˬ na luꞈ-ahˇ beh-euˬ gʼaˬ pyeuꞈ-eu dehꞈ luꞈ-eu Miˬyehˇ jawˇ paw bi gʼoꞈ pyawˇ laˇ-eu gʼaˇ duˬ, nga nyaꞈ heu gaˇ Laˬ kʼaˬ cehˇ-eu Guiˬ lahˬ dawˬ mehˬ laˇ-euˬ ma.

Dawqdaq 3:19

Sahˬpaˬ Miˬyehˇ aˬ yawꞈ-euˬ zaˬ siˬ tsawˇ gahˇ-ahˇ gʼoe-awˇ, miˇ tsaˬ tahˬ kʼawˇ-ahˇ beh-euˬ meh. Aˬ yawꞈ-euˬ nui siˬ nui gahˇ-ahˇ gʼoe-awˇ, mˬ-ahˇ ciˬ tsaˬ taˬ-euˬ meh.

Yawˇbaˆ 9:8

Miˬyehˇ mˬ sheu taw-awˇ laˆ shaˆ byaˆ yahˬ-euˬ dahˇ teˇ ahˇ tsawˬ nawˬ nawˬ ngeh, tiˬ gʼaˬ-iˬ maˬ caw ba nehˬ-aˬ.

Lormav 11:33

Miˬyehˇ-euˬ guiˬ lahˬ aˇ naˆ ni huiˬ-eu nga. Aˬ yawꞈ-euˬ zaˬ siˬ nui gahˇ aˇ naˆ ni naꞈ-eu nga. Aˬ yawꞈ neh noeˬ tsehˆ-euˬ jeˬ-ahˇ tsawˇ haˬ tiˬ gʼaˬ-iˬ maˬ siˬ nya-ehˇ, aˬ yawꞈ aˬ jeˬ miˇ neh kʼoeˇ loꞈ-ehˇ mˇ-eu gaˇ kawˆ-ahˇ tsawˇ haˬ tiˬ gʼaˬ-iˬ maˬ gʼoˆ shaw nya-a.

Iˇsaˬyaˇ 45:12

Miˇ tsaˬ tahˬ kʼawˇ heu-ahˇ beh-awˇ, tsawˇ haˬ beh-awˇ bi jawˇ-euˬ gʼaˬ ngaˇ ma. Ngaˬ-euˬ baoˬ-ahˇ gʼoe-awˇ, mˬ toˆ pyeh taˬ-euˬ gʼaˬ ngaˇ ma. Nahˇ ma, ba la, aˬ guiˇ dawˬ tawˆ luꞈ-ahˇ, ngaˇ nyehꞈ tehˬ taˬ-euˬ ma.

Iˇsaˬyaˇ 44:24

“Ngaˇ naw maꞈ-ahˇ ka kʼoꞈ-eu Sahˬpaˬ Miˬyehˇ ma. Naw maꞈ-ahˇ beh-euˬ gʼaˬ ngaˇ ma. Ngaˇ-aˬ, yawˬ jeˬ na luꞈ-ahˇ beh-euˬ Sahˬpaˬ Miˬyehˇ ma. Mˬ sheu taw ngeh ngaˇ tehꞈ-ehˇ sheu taw-awˇ, ngaˇ miˇ tsaˬ-ahˇ beh ngeh tiˬ gʼaˬ-iˬ maˬ caw ba le-aˬ.

Iˇsaˬyaˇ 42:5

Mˬ-ahˇ Miˬyehˇ beh-awˇ sheu taw-euˬ meh. Miˇ tsaˬ hawˇ-eu miˇ kʼoeˇ taˆ kʼaˇ jawˇ-eu jeˬ, Beh kuꞈ nehˬ-awˇ pyehˬ byah-euˬ meh. Miˇ kʼoeˇ taˆ jawˇ-eu tsawˇ haˬ dehꞈ-eu saꞈ laˇ za-awˇ, saꞈ gʼawˇ nya ni aˬ yawꞈ beh taˬ-euˬ meh. Nymˬ-mˇ, Sahˬpaˬ Miˬyehˇ pyeuꞈ-eu Miˬyehˇ, aˬ yawꞈ-euˬ zaˬ kʼaˆ-ahˇ heu loꞈ-ehˇ ehˇ-eu meh.

Iˇsaˬyaˇ 40:26

Mˬ-ahˇ gʼawˇ leuˇ haw sheˇ. Aˬ guiˇ kʼoeˇ deuˬ-ahˇ aˬ suˇ gʼaˬ beh taˬ ta. Aˬ yawꞈ maꞈ-ahˇ guiˇ maꞈ loꞈ-ehˇ sheuˬ gʼeh-eu gʼaˬ neh beh-euˬ meh. Aˬ guiˇ dawˬ tawˆ luꞈ aˬ yawꞈ siˬ jiˇ-awˇ, yawˬ siˬ na luꞈ tsawˇ myahˇ biꞈ doe-euˬ meh. Aˬ yawꞈ-euˬ baoˬ huiˬ dui dui-eu miˇ neh, aˬ guiˇ tiˬ siˬ-iˬ maˬ ga teˬ-iˇ-a.

Iˇsaˬyaˇ 40:22

Miˇ tsa haw ka leꞈ ngeh tsawˇ haˬ aˇ ho hui ni tehꞈ-ehˇ mawˇ-eu, mˬ taˆ goˇ dui dui gaˇ jaˆ-eu dzoeˬ dzaˬ nuiˇ mahˬ-ahˇ nuiˇ-eu gʼaˬ, miˇ tsaˬ tahˬ kʼawˇ-ahˇ beh-euˬ meh. Lawˆ kaˬ taw-euˬ loꞈ-ehˇ mˬ-ahˇ aˬ yawꞈ gʼeu taw-awˇ, saˬ paˇ sehˬ gʼawˆ loꞈ-ehˇ sheu joe-euˬ meh.

Jaceuq 136:5

Aˬ yawꞈ-eu zaˬ siˬ tsawˇ gahˇ neh, mˬ-ahˇ aˬ yawꞈ beh-euˬ meh. Aˬ yawꞈ gʼoeˇ-eu gaˬ-eu jeˬ mˬ maˬ maˬ byaˆ zaˇ ziˇ ziꞈ-eu meh.

Jaceuq 104:2

yaw shehꞈ neh tsahˇ lahˇ taˬ-euˬ meh. Mˬ-ahˇ sehˬ gʼawˆ loꞈ-ehˇ nawˇ sheu taw-awˇ,

Gʼaˬkʼehˇ 17:24

Miˇ tsaˬ tahˬ kʼawˇ hawˇ-eu kʼoeˇ-euˬ kʼoeˇ taˆ kʼaˇ jawˇ kʼaˇ jaˆ-eu jeˬ dawˬ tawˆ luꞈ-ahˇ beh-euˬ yaw sahˇ Miˬyehˇ-aˬ, Mˬsahˇ Sahˬpaˬ Miˇsahˇ Sahˬma pyeuꞈ-awˇ, tsawˇ haˬ zaˬ-euˬ aˬ laꞈ neh tsoˆ-euˬ uˬ duˬ tahˬ nymˇ-ahˇ uˇ-eu maˬ ngeuˇ-a.

Iˇsaˬyaˇ 51:13

Mˬ toˆ pyeh-awˇ miˇ tsaˬ dawˬ pehˬ pehˬ-euˬ yaw sahˇ, Sahˬpaˬ Miˬyehˇ-ahˇ naw maꞈ ngehˇ teˬ loˇ. Naw maꞈ-ahˇ laˆ cawˆ-eu gʼaˇ duˬ lehˬ hmˬ luꞈ-eu, naw maꞈ-ahˇ kʼehˬ-eu deuˬ-euˬ nui pehˇ-ahˇ, aˬ jeˬ miˇ neh maˬ tsehˆ leˇ ni guˆ te. Aˬ yawꞈ maꞈ-euˬ nui pehˇ naw maꞈ-ahˇ maˬ laˆ deuˬ nya-a.

Iˇsaˬyaˇ 48:13

Miˇ tsaˬ dawˬ pehˬ-ahˇ ngaˬ-euˬ aˬ laꞈ neh tehˆ-awˇ, mˬ-ahˇ aˇ maˇ laꞈ neh toˆ pyeh-euˬ ma. Mˬ hawˇ-eu miˇ-ahˇ ngaˇ dawˬ biꞈ ngeh, tiˬ poˆ tehꞈ-ehˇ jaˆ le-euˬ meh.

Jaceuq 107:25

Aˬ yawꞈ dawˬ biꞈ-awˇ jaˬ lehˇ lehˇ ma bi baw leꞈ ngeh, laˆ shaˆ iˇ luˆ dzeh laˇ-eu meh.

Jaceuq 104:24

Sahˬpaˬ Miˬyehˇ-oˇ, nawˬ neh mˇ taˬ shaˇ taˬ-euˬ jeˬ myaˬ dui dui-eu meh. Tsawˇ gahˇ ahˇ dui dui-eu laꞈ kʼoeˇ, kʼoeˇ deuˬ dawˬ tawˆ luꞈ-ahˇ nawˇ mˇ taˬ shaˇ taˬ-awˇ, miˇ tsaˬ kʼoeˇ taˆ nawˬ neh beh taˬ-euˬ boeˬ boeˬ luˆ luˆ deuˬ byah luꞈ-eu meh.

Yeˬlaˬmiˇ 27:5

“Huiˬ dui dui-eu ngaˬ-euˬ baoˬ hawˇ-eu gʼaˬ-ahˇ gʼoe-awˇ, miˇ tsaˬ tahˬ kʼawˇ maˬ ehˇ, kʼoeˇ-euˬ kʼoeˇ taˆ jawˇ-eu tsawˇ haˬ zaˬ hawˇ-eu jeˬ zaˬ deuˬ maˬ ehˇ, ngaˇ beh-awˇ, ngaˇ nui ma kʼaˇ tsaˬ-eu gʼaˬ-ahˇ miˇ tsaˬ heu ngaˇ biꞈ-eu ma.

Zaˬkaˬliˇ 12:1

Heu-aˬ, mˬ toˆ pyeh-awˇ, miˇ tsaˬ tahˬ kʼawˇ beh-awˇ, tsawˇ haˬ zaˬ-ahˇ dehꞈ-eu saꞈ laˇ biꞈ-euˬ gʼaˬ pyeuꞈ-eu Sahˬpaˬ Miˬyehˇ-euˬ dawˬ meh. Iˇsaˬleˬlaˆ miˇ kʼahˬ-ahˇ Sahˬpaˬ Miˬyehˇ heu loꞈ-ehˇ ehˇ-eu meh.