Yeˬlaˬmiˇ 50:19 - Akha

¹⁹ Ehˇ kʼawꞈ, Iˇsaˬleˬlaˆ tsawˇ haˬ deuˬ-ahˇ-aˬ, aˬ yawꞈ maꞈ-euˬ miˇ kʼahˬ-ahˇ sheuˬ kʼoꞈ gʼeh nehˬ ma. Gaˬlaˬmeˬlaˇ gawˬ jawˬ hawˇ-eu Baˬshaˬ gahˬ kaˬ-ahˇ dehꞈ-eu dzaˇ deuˬ aˬ yawꞈ maꞈ dzaˬ-awˇ, Eˇpaˬleˬ miˇ kʼahˬ hawˇ-eu Giˇlaˆ miˇ kʼahˬ laꞈ kʼoeˇ dehꞈ-eu dzaˬ la gʼo cehˇ deuˬ, aˬ yawꞈ maꞈ kʼaˇ dzaˬ mawꞈ-eu dzaˬ tehꞈ-a.

Yeˬlaˬmiˇ 50:19 Referans Kwoze

Miˇkaˬ 7:14

Sahˬpaˬ Miˬyehˇ-oˇ, yawˇ bo-eu yaw sahˇ yawˇ zaˬ deuˬ-ahˇ haw piˇ-eu loꞈ-ehˇ, nawˬ neh tseˇ doˆ-euˬ nawˬ-euˬ tsawˇ jeuˬ-ahˇ haw piˇ-awˬ. Aˬ yawꞈ maꞈ bawˇ tsahˬ-ahˇ jawˇ ceuˆ taˬ-euˬ kʼawꞈ, aˬ yawꞈ maꞈ-euˬ jawˬ jawˬ-ehˇ miˇ muiˬ muiˬ-eu miˇ tsaˬ jaˆ-eu meh. Aˇ hu ba aˬ yawꞈ maꞈ neh mˇ dzaˬ kʼawꞈ dawˇ yaꞈ-euˬ miˇ tsaˬ miˇ muiˬ muiˬ dui dui-eu Baˬshaˬ hawˇ-eu Giˇlaˆ gahˬ kaˬ-ahˇ, aˬ yawꞈ maꞈ-ahˇ bi mˇ dzaˬ bi kʼawꞈ dawˇ poˆ-iˇ-awˬ.

Yeˬlaˬmiˇ 31:6

Meuˬ-ahˇ loꞈ piˇ-eu tsawˇ haˬ deuˬ, aˬ dui maꞈ-euˬ Miˬyehˇ pyeuꞈ-eu Sahˬpaˬ Miˬyehˇ jawˇ gaˇ, Ziˇoˬ gawˬ jawˬ-ahˇ le beuˇ lehˇ, Eˇpaˬleˬ miˇ kʼahˬ gawˬ jawˬ gawˬ duˇ kʼoeˇ taˆ guˇ tehꞈ-a.”

Miˇkaˬ 7:18

Sahˬpaˬ Miˬyehˇ-oˇ, nawˬ-ahˇ duˇ-eu miˬ yehˇ nui gʼaˬ maˬ jawˇ-a. Luˬ-iˇ seˇ-iˇ-eu jeˬ-ahˇ buˬ-iˇ law-iˇ-euˬ nawˬ-euˬ tsawˇ haˬ deuˬ-euˬ iˬ baˇ-ahˇ nawˇ pyehˬ nehˬ-euˬ meh. Nawˇ-aˬ, aˬ myah luꞈ nui ma pehˇ pehˇ-ehˇ maˬ jawˇ ni, maˬ tsehˆ leˇ nya-eu nawˬ-euˬ gʼoeˇ-eu gaˬ-eu jeˬ nga maꞈ-ahˇ bi mawˇ-eu laꞈ kʼoeˇ nawˇ nui kʼahˇ shiˇ-eu meh.

Yeˬsaˬgeˬlaˇ 38:8

Aˇ nah aˇ yamˬ gʼawˬ myahˇ ni dzeuˇ-iˇ gʼaˬ ngeh jawˇ, aˬ cawˬ miˇ kʼahˬ gʼawˬ mya kʼahˬ-ahˇ neh gʼoꞈ uiˬ laˇ-awˇ jawˇ-eu, guiˇ deuˆ laˇ gaˇ maˬ guˆ ni ya dehꞈ ya jawˇ luꞈ-eu miˇ kʼahˬ tiˬ kʼahˬ-ahˇ, nawˬ-ahˇ ngaˇ guiˇ bi deuˆ-iˇ ma. Dzeuˇ laˇ ngeh aˇ yamˬ gʼawˬ myahˇ ni cawˆ-iˇ-awˇ ciˬ cuˇ ni jaˆ-euˬ kʼawꞈ, nymˬ-mˇ tsawˇ haˬ dawˬ tawˆ luꞈ nui saˇ oꞈ-eu laꞈ kʼoeˇ jawˇ luꞈ-eu miˇ kʼahˬ pyeuꞈ-eu Iˇsaˬleˬlaˆ gawˬ jawˬ deuˬ-ahˇ aˬ yawꞈ guiˇ ya deuˆ-iˇ tehꞈ-a.

Yeˬsaˬgeˬlaˇ 36:33

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Naw maꞈ-euˬ iˬ baˇ dawˬ tawˆ luꞈ ngaˇ tsiˬ shawˇ gʼaˬ ngeh, naw maꞈ-euˬ meuˬ deuˬ laꞈ kʼoeˇ paˇ bi jawˇ-awˇ, kʼaˇ cawˆ-iˇ taˬ-euˬ jeˬ bi gawˬ bi tsoˆ muiˬ ma.

Yeˬsaˬgeˬlaˇ 36:24

Miˇ kʼahˬ yawˬ kʼahˬ na luꞈ laꞈ kʼoeˇ naw maꞈ-ahˇ ngaˇ sheuˬ doˆ-awˇ, naw maꞈ-euˬ miˇ kʼahˬ-ahˇ sheuˬ kʼoꞈ laꞈ nehˬ ma.

Yeˬsaˬgeˬlaˇ 11:17

Kʼoeˇ miˇ neh, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu meh lehˇ aˬ yawꞈ maꞈ-ahˇ ehˇ nehˬ-awˇ, Ngaˬ neh teh byaˆ-awˇ bi jawˇ-euˬ miˇ kʼahˬ deuˬ laꞈ kʼoeˇ neh aˬ yawꞈ maꞈ-ahˇ ngaˇ sheuˬ kʼoꞈ-awˇ, Iˇsaˬleˬlaˆ miˇ kʼahˬ biꞈ kʼoꞈ nehˬ ma.

Yeˬlaˬmiˇ 32:37

Ngaˇ nui ma pehˇ-eu laꞈ kʼoeˇ aˬ cawˬ miˇ kʼahˬ doe ni bi jawˇ byaˆ taˬ-euˬ ngaˬ-euˬ tsawˇ haˬ heu deuˬ-ahˇ paˇ sheuˬ uiˬ-awˇ, jawˇ duˬ heu tsahˇ-ahˇ paˇ sheuˬ kʼoꞈ keuˆ nehˬ-awˇ, nui saˇ oꞈ-eu laꞈ kʼoeˇ bi dehꞈ ma.

Yeˬlaˬmiˇ 31:25

Nui ma shaˬ zahˬ mˇ-euˬ tsawˇ haˬ deuˬ-ahˇ nui saˇ bi za-awˇ, mehꞈ-eu shuꞈ-eu baˬ da neh gʼaˬ baˬ-eu tsawˇ haˬ deuˬ-ahˇ, bi dzaˬ bi dawˇ dehˆ ma.

Yeˬlaˬmiˇ 31:14

Piˇ ma deuˬ-ahˇ dzaˇ muiˬ oꞈ-awˇ, nui kʼahˇ tiˬ shiˇ bi dzaˬ dehˆ ma. Ngaˬ-euˬ tsawˇ haˬ deuˬ dzaˬ tuiˆ dawˇ tuiˆ jaˆ le tehꞈ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Yeˬlaˬmiˇ 30:18

Sahˬpaˬ Miˬyehˇ heu loꞈ-ehˇ ehˇ-eu meh. “Ngaˬ-euˬ tsawˇ haˬ deuˬ yawˬ ha miˇ kʼahˬ-ahˇ paˇ bi gʼoꞈ jawˇ leˇ-awˇ, nymˇ jiˇ yawˬ jiˇ na luꞈ kʼoeˇ taˆ, ngaˇ gʼawˬ shaˬ gaˬ nehˬ ma. Yeˬluˇsaˬlehˬ meuˬ paˇ bi gawˬ muiˬ-awˇ, sahˬ paˬ jawˇ-eu hawˇ nymˇ paˇ bi tsoˆ ziꞈ ma.

Yeˬlaˬmiˇ 30:10

“Ngaˬ-euˬ tsawˇ haˬ deuˬ-oˇ, taˬ guˆ. Iˇsaˬleˬlaˆ tsawˇ haˬ deuˬ-oˇ, nui ma taˬ baˬ. Naw maꞈ-ahˇ nyehꞈ daˆ gʼeh-awˇ bi jawˇ-euˬ, gaˇ mahˇ kaˬ gaˇ jaˆ-eu miˇ kʼahˬ kʼoeˇ kʼahˬ laꞈ kʼoeˇ, naw maꞈ-ahˇ ngaˇ ka kʼoꞈ doˆ ma. Naw maꞈ iˇ kahˇ gʼoꞈ keuˆ laˇ-awˇ, nui saˇ oꞈ-eu laꞈ kʼoeˇ ya dehꞈ tehꞈ-a. naw maꞈ kʼahˬ lahˇ kʼaˇ maˬ za-ehˇ, noeˬ guˆ kʼaˇ maˬ za ni ya dehꞈ tehꞈ-a.

Yeˬlaˬmiˇ 23:3

Dzeˇ luꞈ-eu ngaˬ-euˬ tsawˇ haˬ deuˬ-ahˇ, ngaˬ neh aˬ yawꞈ maꞈ-ahˇ teh byaˆ taˬ-euˬ miˇ kʼahˬ deuˬ laꞈ kʼoeˇ neh paˇ sheuˬ kʼoꞈ doˆ laꞈ-awˇ, aˬ yawꞈ maꞈ-euˬ miˇ kʼahˬ-ahˇ paˇ bi gʼoꞈ jawˇ laˇ ma.

Yeˬlaˬmiˇ 3:18

Iˇsaˬleˬlaˆ hawˇ-eu Yuˇdaˆ tiˬ gaˇ gm leˇ-awˇ, laꞈ taˆ paw jaˆ-eu miˇ kʼahˬ -ahˇ aˬ cawˬ neh bi nyehꞈ byoˆ gʼeh-euˬ gaˇ neh gʼoꞈ ka le-awˇ, naw maꞈ-euˬ aˬ poeˬ aˬ bawˇ deuˬ-ahˇ ngaˬ neh biꞈ tsehˆ taˬ-euˬ miˇ kʼahˬ-ahˇ ya gʼoꞈ jawˇ le tehꞈ-a.”

Iˇsaˬyaˇ 35:2

Kʼaˇ shuiꞈ deh yaˇ caˇ dawˬ caˇ-awˇ, laˬ kʼaˬ cehˇ-awˇ guˇ tehꞈ-a. Kʼaˇ shuiꞈ deh yaˇ kʼoeˇ Leˬbaˬnoˬ gawˬ jawˬ loꞈ-ehˇ, haw muiˬ dui dui laˇ-awˇ, Gaˬlaˬmeˬlaˇ gawˬ jawˬ hawˇ-eu Shaˬloˬ deh kʼawꞈ loꞈ-ehˇ, miˇ tsaˬ miˇ muiˬ muiˬ laˇ tehꞈ-a. Sahˬpaˬ Miˬyehˇ-euˬ yaw shehꞈ kʼahˬ sehˇ, huiˬ-eu mahˇ-eu jeˬ hawˇ-eu baoˬ-ahˇ, yawˬ gʼaˬ na luꞈ ya mawˇ tehꞈ-a.

Iˇsaˬyaˇ 33:9

Miˇ kʼahˬ ngoeˇ doˆ laˇ-awˇ gʼaˬ baˬ-iˇ luꞈ meh. Leˬbaˬnoˬ sahˬ kʼaˆ nyoeˬ-iˇ-awˇ, miˇ muiˬ muiˬ-eu Shaˬloˬ deh kʼawꞈ, kʼaˇ shuiꞈ deh yaˇ pyeuꞈ-iˇ-euˬ meh. Baˬshaˬ miˇ tsaˬ hawˇ-eu Gaˬlaˬmeˬlaˇ gawˬ jawˬ, aˇ bawˇ aˇ paꞈ ga jiˇ-euˬ meh.

Dawˬ caˇ 6:5

Nawˬ-euˬ myaˆ nuiˆ ngaˬ-ahˇ taˬ haw cawˬ nehˬ laꞈ. Ngaˬ-ahˇ paꞈ tawꞈ taˬ gaˇ duˇ nya. Nawˬ-euˬ uˬ duˬ tsehˇ kahˇ-aˬ, Giˇlaˆ gawˬ jawˬ-ahˇ tsawˬ ka leꞈ luꞈ-eu, ciꞈ myehꞈ ciꞈ maꞈ-ahˇ duˇ-eu meh.

Yawˇshuˆ 17:15

Yawˇshuˆ ehˇ-eu, “Naw maꞈ tsawˇ haˬ aˇ dzehˬ-ehˇ myaˬ-eu miˇ neh, Eˇpaˬleˬ gawˬ jawˬ gawˬ duˇ miˇ kʼahˬ kʼoeˇ naw maꞈ gʼaˇ duˬ yaw suꞈ naˇ, Paˬyehˆ tsawˇ jeuˬ hawˇ-eu Leˬpeˬ tsawˇ jeuˬ deuˬ jawˇ-eu miˇ kʼahˬ-ahˇ iˇ-awˇ, aˇ bawˇ sahˬ kʼaˆ tuˇ deˬ-awˇ jawˇ-iˇ-awˬ.”

Bawˇtsahˬ 32:1

Luˇbeˬ tsawˇ jeuˬ hawˇ-eu Gaˆ tsawˇ jeuˬ jeˬ zaˬ myaˬ dui dui-awˇ, Yaˬzeuˬ meuˬ hawˇ-eu Giˇlaˆ meuˬ-aˬ, jeˬ zaˬ jawˇ duˬ muiˬ dui dui gaˇ aˬ yawꞈ maꞈ ya mawˇ-euˬ meh.

Yeˬlaˬmiˇ 30:7

Guˆ laˇ paˬ-ehˇ gʼeh-eu aˇ nah keuˆ le luꞈ meh. Ngaˬ-euˬ tsawˇ haˬ shaˬ zahˬ naꞈ dui dui-eu, aˇ nah kʼoeˇ-ahˇ duˇ-eu yawˬ nah yawˬ maˬ jaˆ-a. Ehˇ kʼawꞈ, aˬ yawꞈ maꞈ ya buˬ-iˇ tehꞈ-a.”

Yeˬlaˬmiˇ 46:27

“Ngaˬ-euˬ tsawˇ jeuˬ-oˇ, taˬ guˆ. Iˇsaˬleˬlaˆ-oˇ, nui ma taˬ cawˆ. Naw maꞈ-ahˇ bi nyehꞈ byoˆ gʼeh-euˬ, gaˇ mahˇ kaˬ-eu miˇ kʼahˬ kʼoeˇ-euˬ laꞈ-ahˇ, naw maꞈ-ahˇ ngaˇ ka kʼoꞈ nehˬ ma. Naw maꞈ iˇ kahˇ gʼoꞈ keuˆ laˇ-awˇ, nui saˇ oꞈ-eu laꞈ kʼoeˇ ya dehꞈ tehꞈ-a. Nawˬ-ahˇ laˆ guˆ-eu tsawˇ haˬ maˬ jawˇ ni, kʼaˬ duˬ ni nawˇ ya dehꞈ tehꞈ-a.

Yeˬlaˬmiˇ 50:6

“Ngaˬ-euˬ tsawˇ haˬ deuˬ-aˬ, yawˇ bo-eu deuˬ neh gawˬ jawˬ gawˬ duˇ doe ni bi byoˆ-iˇ-euˬ yawˇ deuˬ-ahˇ duˇ-eu meh. Gawˬ jawˬ tiˬ jawˬ saˇ-iˬ ti jawˬ iˇ kaˬ gʼeh-awˇ, iˇ kahˇ-ahˇ maˬ gʼoꞈ doˆ laˇ nya-a.

Yeˬsaˬgeˬlaˇ 47:18

“Nahˇ ma doˆ kʼehˬ paw pyawˬ miˇ kaˬ-aˬ, Hawˇlahˬ meuˬ hawˇ-eu Daˬmaˬsehˇ meuˬ yaw kaˬ-ahˇ jaˆ-eu Haˬzaˇeˇnoˬ meuˬ-ahˇ neh, laꞈ oˆ paw pyawˬ-ehˇ Giˇlaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ yaw kaˬ-ahˇ yoeˇ ka-eu Yawˇdaˬ lawˇ baˬ caw caw-ehˇ, Shiˇ-eu iˬ ma laˆ shaˆ dawˬ peh jaˆ-eu Taˬmaˬ meuˬ-ahˇ keuˆ ni meh.

Zaˬkaˬliˇ 10:10

Iˇjiˇtuˆ miˇ kʼahˬ laꞈ kʼoeˇ neh, Aˬshuˇliˆ miˇ kʼahˬ laꞈ kʼoeˇ neh, aˬ yawꞈ maꞈ-ahˇ sheuˬ kʼoꞈ laꞈ-awˇ, yawˬ ha miˇ kʼahˬ-ahˇ bi jawˇ ma. Giˇlaˆ miˇ kʼahˬ laꞈ kʼoeˇ maˬ ehˇ, Leˬbaˬnoˬ miˇ kʼahˬ-ahˇ maˬ ehˇ, miˇ kʼahˬ jawˇ byah jiˇ gaˇ keuˆ ni, aˬ yawꞈ maꞈ-ahˇ ngaˇ bi jawˇ ma.

Bawˇtsahˬ 32:4

Sahˬpaˬ Miˬyehˇ neh Iˇsaˬleˬlaˆ tsawˇ haˬ-ahˇ bi deuˆ za-euˬ miˇ kʼahˬ kʼoeˇ-aˬ, jeˬ zaˬ jawˇ duˬ yaw muiˬ meh. Nga maꞈ-aˬ, jeˬ zaˬ jawˇ myaˬ-eu tsawˇ haˬ pyeuꞈ-eu ma.

Eˇzaˬlaˬ 2:1

Baˬbuˇloˬ miˇ kʼahˬ-ahˇ bi nyehꞈ gʼeh-awˇ jawˇ-euˬ tsawˇ haˬ gʼawˬ mya ni, Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ laꞈ kʼoeˇ jaˆ-eu yawˬ ha-euˬ meuˬ-ahˇ gʼoꞈ laˇ-euˬ meh. Sahˬ paˬ Neˬbuˬkaˬneˬzaˬ neh aˬ yawꞈ maꞈ-ahˇ nyehꞈ gʼeh ngeh neh, Baˬbuˇloˬ miˇ kʼahˬ-ahˇ aˬ yawꞈ maꞈ jawˇ luꞈ-eu meh.