Yeˬlaˬmiˇ 44:17 - Akha

¹⁷ Nga maꞈ neh mˇ ma lehˇ kʼaˇ ehˇ taˬ-euˬ yawˬ jeˬ na luꞈ mˇ jiˇ ma. Nga maꞈ-euˬ aˬ poeˬ aˬ bawˇ deuˬ, nga maꞈ-euˬ sahˬ paˬ hawˇ-eu aˬ yuiꞈ aˬ tsu deuˬ neh, Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ hawˇ-eu , Yeˬluˇsaˬlehˬ meuˬ-euˬ gaˇ ma doe ni jahˇ-euˬ loꞈ-ehˇ, mˬ taˆ miˬ yehˇ ma-ahˇ nga maꞈ lawˇ nehˬ shehˇ nehˬ-awˇ, aˬ gaꞈ dzaˇ uiˇ shehˆ-awˇ lawˇ-eu jeˬ lawˇ ma. Kʼoeˇ ngeh, nga maꞈ maˬ dzaˬ maˬ dawˇ jiˇ coeˇ ni baw le za le-euˬ uˬ taꞈ, shaˬ-eu zahˬ-eu jeˬ maˬ ya tahˬ puˬ haw-aˬ.

Yeˬlaˬmiˇ 44:17 Referans Kwoze

Yeˬlaˬmiˇ 7:18

Mˬ taˆ-euˬ sahˬ ma lehˇ aˬ yawꞈ maꞈ kuˇ-eu miˬ yehˇ ma kʼoeˇ gʼaˬ-ahˇ lawˇ nehˬ-eu kaˬ muˇ jahˇ-eu gʼaˇ duˬ, zaˬ deuˬ miˬ dzaˬ gʼoˆ uiˬ-awˇ, tsawˇ kʼaˆ aˬ da deuˬ miˬ dzaˬ baw doꞈ nehˬ-awˇ, tsawˇ kʼaˆ aˬ ma deuˬ cehˇ meu nyehꞈ keuˬ-eu meh. Ngaˬ-ahˇ bi coeˬ laˇ-eu gʼaˇ duˬ, miˬ yehˇ nui deuˬ-ahˇ kʼawꞈ, aˬ yawꞈ maꞈ aˬ gaꞈ dzaˇ uiˇ shehˆ-awˇ lawˇ nehˬ-euˬ meh.

Neˬhaˬmiˇ 9:34

Nga maꞈ-euˬ aˬ poeˬ aˬ bawˇ deuˬ, sahˬ paˬ deuˬ, aˬ yuiꞈ aˬ tsu deuˬ hawˇ-eu piˇ ma deuˬ, nawˬ-euˬ zahˇ dawˬ kʼoꞈ dawˬ mehˬ nah maˬ caw teh-a. Yahˇ-awˇ dehꞈ-eu gʼaˇ duˬ nawˬ neh mehˬ-euˬ dawˬ-ahˇ aˬ yawꞈ maꞈ maˬ naˇ haˬ geuꞈ-a.

Yeˬsaˬgeˬlaˇ 20:8

Ehˇ kʼawꞈ, aˬ yawꞈ maꞈ ngaˬ-ahˇ puiˬ-awˇ, ngaˬ-euˬ ehˇ dawˬ maˬ naˇ haˬ geuꞈ-a. Nui daˆ daˆ laˇ paˬ-ehˇ gʼeh-eu aˬ yawꞈ maꞈ-euˬ tahˬ pahˬ aˬ ma mawˇ kawˇ kʼoeˇ deuˬ-ahˇ maˬ biˬ dzeh-ehˇ, nui daˆ daˆ laˇ paˬ-ehˇ gʼeh-eu Iˇjiˇtuˆ miˬyehˇ deuˬ-ahˇ kʼawꞈ, aˬ yawꞈ maꞈ maˬ byehˇ coeˇ-a. Kʼoeˇ gaˇ, Iˇjiˇtuˆ miˇ kʼahˬ laꞈ kʼoeˇ, aˬ yawꞈ maꞈ-ahˇ ngaˬ-euˬ nui ma bi mawˇ-eu lehˇ ngaˇ noeˬ tsehˆ-euˬ ma.

Dawˬmehˬ 23:23

Ehˇ kʼawꞈ, yawˬ ha nui ma keuˆ-eu laꞈ kʼoeˇ saˇ jaˇ dzaˬ naˇ, maˬ byehˇ ni ya mˇ byah meh.

Doˆ-iˇ 16:3

Iˇsaˬleˬlaˆ tsawˇ haˬ deuˬ aˬ yawꞈ nyaꞈ-ahˇ ehˇ nehˬ-eu, “Iˇjiˇtuˆ miˇ kʼahˬ laꞈ kʼoeˇ, Sahˬpaˬ Miˬyehˇ nga maꞈ-ahˇ bi shiˇ laꞈ law nmˇ-aˬ, muiˬ dzehˬ tehꞈ-a. Nga maꞈ kʼoeˇ gaˇ jawˇ ngeh, saˇ suˬ ni nuiˇ-awˇ hawˬ ya dzaˬ-euˬ ma. Shaˬ jiˇ hawˇ-eu nui jeˬ nui jeˇ kʼawꞈ, yawˬ ha kʼaˇ dzaˬ mawꞈ-eu loꞈ-ehˇ dzaˬ-euˬ ma. Ehˇ kʼawꞈ, naw nyaꞈ-aˬ, nga maꞈ bi mehꞈ sehꞈ jiˇ-eu lehˇ bawˇ tsahˬ bawˇ dahˇ laꞈ kʼoeˇ sheuˬ ahˇ laꞈ-euˬ ngaˇ.”

Piˇliˇpiˆ 3:19

Aˬ yawꞈ maꞈ-aˬ, shiˬ buiˇ lah ma-ahˇ aˇ saˬ ya saˬ-iˇ meh. Aˬ jeˬ miˇ neh ehˇ naˇ, aˬ yawꞈ maꞈ-euˬ shiˬ shaˬ jiˇ nui kʼahˇ-aˬ, aˬ yawꞈ maꞈ-euˬ miˬyehˇ meh. Aˬ yawꞈ maꞈ-aˬ, yawˬ ha shaꞈ dawˇ paˬ-ehˇ gʼeh-eu jeˬ-ahˇ maˬ shaꞈ dawˇ ni jahˇ gʼeh haw-awˇ, miˇ tsaˬ shiˬ shaˬ jiˇ-ahˇ taꞈ-eu jeˬ tehꞈ-ehˇ shaˇ noeˬ luꞈ-eu meh.

Yeˬlaˬmiˇ 44:25

Iˇsaˬleˬlaˆ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. ‘Naw maꞈ hawˇ-eu naw maꞈ-euˬ miˬ zaˬ deuˬ, mˬ taˆ miˬyehˇ ma-ahˇ lawˇ-eu shehˇ-eu jeˬ mˇ-awˇ, aˬ gaꞈ dzaˇ uiˇ shehˆ-awˇ lawˇ-eu jeˬ lawˇ nehˬ ma lehˇ saˇ jaˇ dzaˬ-euˬ loꞈ-ehˇ, aˬ laꞈ kʼawꞈ mˇ keuˆ-euˬ meh. Muiˬ ngaˇ. Naw maꞈ neh saˇ jaˇ kʼaˇ dzaˬ taˬ-euˬ loꞈ-ehˇ mˇ byah mˇ byah-ehˇ dehꞈ-awˬ.

Yeˬlaˬmiˇ 44:21

“Naw maꞈ hawˇ-eu naw maꞈ-euˬ aˬ poeˬ aˬ bawˇ deuˬ neh maˬ ehˇ, naw maꞈ-euˬ sahˬ paˬ hawˇ-eu aˬ yuiꞈ aˬ tsu deuˬ neh maˬ ehˇ, miˇ kʼahˬ zaˬ deuˬ neh maˬ ehˇ, Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ hawˇ-eu, Yeˬluˇsaˬlehˬ meuˬ-euˬ gaˇ ma doe ni lawˇ-euˬ shehˇ-euˬ jeˬ-ahˇ, Sahˬpaˬ Miˬyehˇ maˬ siˬ nya-aˇ lehˇ noeˬ te loˇ. Maˬ ngeuˇ naˇ, ngehˇ byoˆ nehˬ laꞈ tehꞈ-a lehˇ noeˬ te loˇ.

Yeˬlaˬmiˇ 19:13

Yeˬluˇsaˬlehˬ meuˬ-ahˇ jaˆ-eu nymˇ deuˬ maˬ ehˇ, Yuˇdaˆ sahˬ paˬ deuˬ-euˬ nymˇ deuˬ maˬ ehˇ, nymˇ mˬ kʼoeˇ taˆ aˬ guiˇ deuˬ-ahˇ tsiˇ yaw saw jeˬ doꞈ damˬ-awˇ, miˬ yehˇ nui deuˬ-ahˇ aˬ gaꞈ dzaˇ uiˇ kʼaˇ-awˇ lawˇ nehˬ-euˬ nymˇ yawˬ nymˇ na luꞈ, Tawˇpehˆ lehˇ kuˇ-eu jawˇ duˬ loꞈ-ehˇ, maˬ muiˬ maˬ shawˇ-eu jeˬ pyeuꞈ-iˇ tehꞈ-a.”

2 Sahˬpaˬ 17:16

Aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ zahˇ dawˬ kʼoꞈ dawˬ deuˬ-ahˇ aˬ yawꞈ maꞈ byehˇ dzeh jiˇ-awˇ, aˬ yawꞈ maꞈ uˬ duˬ tahˬ-eu gʼaˇ duˬ, mawˇ neˇ mawˇ kawˇ nyiˬ kawˇ kʼaˇ-euˬ meh. Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ tiˬ kawˇ aˬ yawꞈ maꞈ tehˆ-awˇ, ba la hawˇ-eu aˬ guiˇ deuˬ-ahˇ uˬ duˬ tahˬ-eu uˬ taꞈ, Baˬlaˇ miˬyehˇ-ahˇ kʼawꞈ, uˬ duˬ tahˬ-euˬ meh.

Yaˇ kʼaˬ daˇ 11:36

Aˬ yawꞈ-euˬ aˬ buˇ ehˇ-eu, “Sahˬpaˬ Miˬyehˇ-ahˇ nawˇ saˇ jaˇ dzaˬ taˬ-euˬ jaˆ naˇ, nawˬ neh dzaˬ taˬ-euˬ loꞈ-ehˇ ngaˬ-euˬ kʼoeˇ taˆ bi keuˆ le-awˬ. Aˬ jeˬ miˇ neh ehˇ naˇ, nawˬ-ahˇ muiˇ-eu Aˬmoˬ tsawˇ haˬ deuˬ kʼoeˇ taˆ, Sahˬpaˬ Miˬyehˇ nawˬ-ahˇ laꞈ poˆ bi poˆ gʼaˬ-eu meh.”

Bawˇtsahˬ 30:12

Ehˇ kʼawꞈ, gaˇ kawˆ kʼoeˇ aˬ yawꞈ-euˬ kʼaˬ dzeˇ zaˬ ya gaˬ-awˇ, maˬ bi mˇ ni laˆ tsoeˬ naˇ, saˇ jaˇ dzaˬ taˬ-euˬ loꞈ-ehˇ maˬ mˇ byah ni jawˇ nya meh. Sahˬpaˬ Miˬyehˇ aˬ yawꞈ-ahˇ iˬ baˇ pyehˬ nehˬ tehꞈ-a. Aˬ jeˬ miˇ neh ehˇ naˇ, aˬ yawꞈ-euˬ kʼaˬ dzeˇ zaˬ gʼaˬ aˬ yawꞈ-ahˇ laˆ tsoeˬ-eu miˇ neh meh.

1 Beˬtuˆluˆ 1:18

Aˬ jeˬ miˇ neh ehˇ naˇ, naw maꞈ-euˬ aˬ poeˬ aˬ bawˇ deuˬ-euˬ ziˇ-ahˇ neh dehꞈ ka leꞈ-euˬ poeˬ sawˇ lawˬ maˬ baw-eu yaw dehꞈ dehꞈ-eu jeˬ laꞈ kʼoeˇ naw maꞈ-ahˇ bi buˬ bi law-iˇ-eu gʼaˇ duˬ, aˬ geu jeˬ aˇ poeˬ biꞈ-awˇ zeuˇ kʼoꞈ taˬ-euˬ naw maꞈ siˬ nya meh. Pyuˇ hawˇ-eu shuiˇ loꞈ-ehˇ gʼeh-eu piˬ-iˇ byoˆ-iˇ nya-eu jeˬ biꞈ-awˇ zeuˇ kʼoꞈ taˬ-euˬ maˬ ngeuˇ-a.

Maˬkuˆ 6:26

Dawˬ kʼoeˇ dawˬ baˬ da neh sahˬ paˬ Heˬloˆ noeˬ shaˬ dui dui-eu meh. Ehˇ kʼawꞈ, daˬ yah kʼoeˇ myaˆ ni gʼeh-eu mehˬ shi aˬ yawꞈ kamˬ tsehˆ gʼaˬ-euˬ miˇ neh, aˬ buˇ kʼoeˇ buˇ kʼaˇ ehˇ-eu loꞈ-ehˇ maˬ jahˇ nehˬ-ehˇ maˬ gʼeh nya-a.

Yeˬlaˬmiˇ 44:9

Naw maꞈ-euˬ aˬ poeˬ aˬ bawˇ deuˬ, Yuˇdaˆ sahˬ paˬ deuˬ hawˇ-eu aˬ yawꞈ maꞈ-euˬ miˬ zaˬ deuˬ, naw maꞈ hawˇ-eu naw maꞈ-euˬ miˬ zaˬ deuˬ neh, Yuˇdaˆ meuˬ deuˬ hawˇ-eu Yeˬluˇsaˬlehˬ meuˬ-euˬ gaˇ ma doe ni yaw haiˬ jeˬ mˇ byah yaꞈ-euˬ gaˇ naw maꞈ ngehˇ shaw teˬ loˇ.

Iˇsaˬyaˇ 48:5

Nawˬ-euˬ mehˬ shi kʼaˇ pyeuꞈ laˇ-euˬ dawˬ tawˆ, aˇ hu ba neh ngaˬ neh ehˇ tsehˆ taˬ jiˇ-euˬ ma. Nawˬ-euˬ tahˬ pahˬ aˬ ma mawˇ kawˇ deuˬ neh, kʼoeˇ loꞈ-ehˇ bi pyeuꞈ laˇ-eu meh lehˇ nawˇ maˬ ehˇ nya ni, kʼaˇ pyeuꞈ dzeuˇ yaꞈ-euˬ jeˬ maˬ pyeuꞈ laˇ mi naˆ-ehˇ, ngaˬ neh ehˇ kʼmˬ jiˇ taˬ-euˬ ma.

Jaceuq 106:6

Nga maꞈ-euˬ aˬ poeˬ aˬ bawˇ deuˬ loꞈ-ehˇ nga maꞈ iˬ baˇ mˇ-awˇ, yaw haiˬ jeˬ laꞈ kʼoeˇ dehꞈ-euˬ ma.

Jaceuq 12:4

“Kʼaˇmawꞈ-eu jeˬja geuꞈnya ma. Kʼaˇngehˬmawꞈ-eu jeˬngehˬ-eu ma. aˬsuˇgʼaˬlaˆtsoeˬnya ta” lehˇ, aˬyawꞈmaꞈnui ma huiˬ-eu meh.

2 Sahˬpaˬ 22:17

Aˬ yawꞈ maꞈ ngaˬ-ahˇ byehˇ dzeh-awˇ, miˬ yehˇ nui deuˬ-ahˇ lawˇ-eu shehˇ-eu laꞈ kʼoeˇ, aˬ yawꞈ maꞈ neh kʼaˇ mˇ kʼaˇ shaˇ-euˬ jeˬ dawˬ tawˆ luꞈ baˬ da neh, ngaˬ-ahˇ nui ma bi pehˇ laꞈ-euˬ meh. Yeˬluˇsaˬlehˬ meuˬ-ahˇ ngaˇ nui ma pehˇ laˇ-awˇ, ngaˬ-euˬ nui pehˇ tiˬ jawˇ-iˬ maˬ paˇ shuꞈ-iˇ nya miˇ-a.

Bawˇtsahˬ 30:2

Tsawˇ haˬ tiˬ gʼaˬ na tiˬ jeˬ paˬ mˇ-eu gʼaˇ duˬ maˬ ehˇ, tiˬ jeˬ paˬ-ahˇ maˬ mˇ ni yahˇ-awˇ dehꞈ-eu gʼaˇ duˬ maˬ ehˇ, Sahˬpaˬ Miˬyehˇ-ahˇ saˇ jaˇ dzaˬ naˇ, saˇ jaˇ maˬ puiˬ ni yawˬ ha neh kʼaˇ ehˇ taˬ-euˬ loꞈ-ehˇ ya mˇ byah meh.

2 Laˬsaˬbaˬ 28:23

Aˬ yawꞈ-ahˇ guiˇ deuˆ gʼaˬ-euˬ Suˇliˆ tsawˇ haˬ deuˬ-euˬ miˬ yehˇ deuˬ-ahˇ aˬ yawꞈ lawˇ-eu shehˇ-eu jeˬ mˇ-euˬ meh. “Suˇliˆ miˬ yehˇ deuˬ Suˇliˆ sahˬ paˬ deuˬ-ahˇ caw ba nehˬ-eu loꞈ-ehˇ, ngaˇ kʼawꞈ aˬ yawꞈ maꞈ-ahˇ lawˇ nehˬ shehˇ nehˬ naˇ, ngaˬ-ahˇ kʼawꞈ caw ba nehˬ laꞈ-eu duˇ” lehˇ aˬ yawꞈ noeˬ-euˬ meh. Ehˇ kʼawꞈ, aˬ yawꞈ-euˬ nui noeˬ kʼoeˇ aˬ yawꞈ kʼoeˇ taˆ hawˇ-eu aˬ yawꞈ-euˬ miˇ kʼahˬ kʼoeˇ taˆ, luˬ-iˇ seˇ-iˇ-eu jeˬ bi keuˆ le-euˬ meh.

Yeˬlaˬmiˇ 1:16

Ngaˬ-euˬ tsawˇ jeuˬ iˬ baˇ mˇ-euˬ miˇ neh ngaˇ kʼehˬ nehˬ ma. Aˬ yawꞈ maꞈ ngaˬ-ahˇ byehˇ dzeh-awˇ, tahˬ pahˬ aˬ ma mawˇ kawˇ tehˆ-awˇ lawˇ-eu shehˇ-eu laꞈ kʼoeˇ uˬ duˬ tahˬ-euˬ meh.

Yeˬlaˬmiˇ 11:12

Kʼoeˇ naˇ, Yuˇdaˆ miˇ kʼahˬ-euˬ Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ, aˬ yawꞈ maꞈ lawˇ nehˬ shehˇ nehˬ luꞈ-eu miˬ yehˇ deuˬ jawˇ gaˇ iˇ-awˇ, caw ba nehˬ laꞈ lehˇ shaˇ-iˇ tehꞈ-a. Ehˇ kʼawꞈ, luˬ-iˇ seˇ-iˇ-eu jeˬ keuˆ le ngeh, miˬ yehˇ kʼoeˇ deuˬ aˬ yawꞈ maꞈ-ahˇ maˬ ka kʼoꞈ nehˬ nya-a.

Yeˬlaˬmiˇ 18:15

Ehˇ kʼawꞈ, ngaˬ-euˬ tsawˇ haˬ ngaˬ-ahˇ ngehˇ-awˇ, tahˬ pahˬ aˬ ma-ahˇ tsiˇ yaw saw doꞈ damˬ-euˬ meh. Aˬ yawꞈ maꞈ iˇ-eu gaˇ ma-ahˇ sahˬ tiꞈ tiꞈ-awˇ, gaˇ ma yaw oeˇ kahˇ-ahˇ maˬ paˇ cah-ehˇ, maˬ dzehꞈ dahˇ-euˬ gaˇ ma-ahˇcah-eu meh.

Yeˬsaˬgeˬlaˇ 8:16

Kʼoeˇ naˇ, Uˬ duˬ tahˬ nymˇ nymˇ ma-euˬ laꞈ kʼoeˇ lahˇ-ahˇ aˬ yawꞈ ngaˬ-ahˇ paˇ sheuˬ ahˇ gʼeh nehˬ laꞈ-euˬ meh. Muiˬ-eu shawˇ-eu jawˇ duˬ-ahˇ uˇ leˇ-eu gʼoˆ kʼehˬ dawˬ peh, lawˇ duˬ hawˇ-eu gaˇ ma yaw kaˬ-ahˇ, tsawˇ haˬ nyiˬ tseˇ ngaˬ gʼaˬ jawˇ luꞈ gaˇ ya mawˇ-euˬ ma. Muiˬ-eu shawˇ-eu jawˇ duˬ-ahˇ aˬ yawꞈ maꞈ naˇ kʼah pyawˇ-awˇ, nahˇ ma doˆ kʼehˬ paw mehˬ shi pyawˇ-awˇ awˆ byaˆ-eu laꞈ kʼoeˇ, nahˇ ma doˆ laˇ gaˇ uˬ duˬ tahˬ luꞈ-eu meh.

Yeˬsaˬgeˬlaˇ 20:32

Aˇ bawˇ hawˇ-eu lo guˇ doe ni uˬ duˬ tahˬ-eu aˬ cawˬ miˇ kʼahˬ-ahˇ jawˇ-eu tsawˇ jeuˬ deuˬ-ahˇ dehꞈ duˇ ma lehˇ, naw maꞈ noeˬ tsehˆ taˬ-euˬ meh. Kʼoeˇ loꞈ-ehˇ tiˬ jawˇ-iˬ maˬ dehꞈ pyeuꞈ nya-a.

Yeˬsaˬgeˬlaˇ 23:41

Muiˬ dui dui-eu ja ciˬ kʼoeˇ taˆ aˬ yawꞈ nyaꞈ nuiˇ-awˇ, aˬ yawꞈ nyaꞈ-euˬ mehˬ shi hawˬ jeh ciˬ taˬ-awˇ, ngaˬ neh biꞈ taˬ-euˬ tsiˇ yaw saw jeˬ hawˇ-eu saˬ loˬ tsiˇ ciˬ daˆ-awˇ yaw muiˬ jeˬ gʼawˬ mya ni ciˬ daˆ taˬ-euˬ meh.

Haˬbaˬkuˆ 1:16

Za baˬ da neh smˇ muiˬ muiˬ-awˇ, yaw kuiˇ ya dzaˬ dehˆ-eu miˇ neh, za-ahˇ aˬ yawꞈ uˬ duˬ tahˬ-awˇ, lawˇ-eu shehˇ-eu jeˬ mˇ-euˬ meh.

Yeˬlaˬmiˇ 7:17

Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ hawˇ-eu Yeˬluˇsaˬlehˬ meuˬ laꞈ kʼoeˇ, aˬ yawꞈ maꞈ mˇ luꞈ shaˇ luꞈ-eu jeˬ-ahˇ nawˇ maˬ mawˇ teˬ loˇ.