Yeˬlaˬmiˇ 31:3 - Akha

³ Gaˇ mahˇ kaˬ-eu jawˇ duˬ-ahˇ neh Sahˬpaˬ Miˬyehˇ oe-awˇ, nga maꞈ-ahˇ heu loꞈ-ehˇ ehˇ le-euˬ meh. “Mˬ maˬ maˬ byaˆ zaˇ ziˇ ziꞈ-eu gʼoeˇ-eu gaˬ-eu jeˬ neh, naw maꞈ-ahˇ ngaˇ gaˬ-awˇ, naw maꞈ-ahˇ gʼawˬ shaˬ gaˬ-eu jeˬ laꞈ kʼoeˇ, iˬ nah keuˆ ni ngaˇ saˇ jaˇ ziꞈ luꞈ ma.

Yeˬlaˬmiˇ 31:3 Referans Kwoze

Jaceuq 103:17

Ehˇ kʼawꞈ, Sahˬpaˬ Miˬyehˇ-ahˇ taˬ huiˬ taˬ mahˇ-eu deuˬ-ahˇ, aˬ yawꞈ gaˬ-eu jeˬ maˬ byoˆ-iˇ-ehˇ, aˬ yawꞈ-euˬ muiˬ-eu guiˬ lahˬ mˬ maˬ maˬ byaˆ zaˇ ziˇ bi keuˆ le-eu meh.

Hawˇseˬ 11:4

Nui gaˬ shaˬ coeˇ byah-eu laꞈ kʼoeˇ, aˬ yawꞈ maꞈ-ahˇ ngaˇ tsahˇ-euˬ ma. Aˬ yawꞈ maꞈ-ahˇ ciˬ cuˇ cuˇ-awˇ, baˬ ba tiˬ gaˇ ciˬ tawꞈ-euˬ ma. Ngaˬ-euˬ gʼawˇ mawˇ awˆ kʼoꞈ nehˬ-awˇ, aˬ yawꞈ maꞈ-ahˇ bi dzaˬ-euˬ ma.

Dawˬmehˬ 33:3

Aˬ yawꞈ-euˬ tsawˇ haˬ heu deuˬ-ahˇ, Sahˬpaˬ Miˬyehˇ gaˬ-eu miˇ neh, ngehˬ gʼeh dah teˬ haw piˇ-eu meh. Aˬ kuiˇ uˬ moˆ tah uˇ leˇ-awˇ, yawꞈ-euˬ ehˇ dawˬ aˬ dui geuꞈ ma.

1 Yoˇhaˬ 4:19

Miˬyehˇ aˬ dui-ahˇ jeˬ hu gaˬ-euˬ miˇ neh, aˬ dui aˬ yawꞈ-ahˇ gaˬ-awˇ, tiˬ gʼaˬ tiˇ gʼaˬ gaˬ-eu ma.

2 Tiˆmoˇseˬ 1:9

Aˬ dui neh mˇ-euˬ shaˇ-euˬ jeˬ baˬ da neh, aˬ yawꞈ aˬ dui-ahˇ ka kʼoꞈ-awˇ aˬ yawꞈ-euˬ zaˬ bi pyeuꞈ laˇ-euˬ maˬ ngeuˇ-a. Aˬ yawꞈ neh noeˬ taˬ-euˬ jeˬ hawˇ-eu aˬ yawꞈ-euˬ guiˬ lahˬ yaw dzahˇ baˬ da neh bi pyeuꞈ laˇ-euˬ meh. Mˬ hawˇ-eu miˇ maˬ seu le mi naˆ-ehˇ, Yeˬsuˇ Ka li-ahˇ gʼoe-awˇ guiˬ lahˬ yaw dzahˇ kʼoeˇ biꞈ taˬ leꞈ-euˬ meh.

Lormav 8:30

Aˬ yawꞈ neh sheuˬ ceuˆ doˆ taˬ-euˬ tsawˇ haˬ deuˬ-ahˇ aˬ yawꞈ kuˇ-euˬ meh. Aˬ yawꞈ neh kuˇ-euˬ tsawˇ haˬ deuˬ aˬ yawꞈ-ahˇ tsaˬ leˇ tsahˇ leˇ nya ni aˬ yawꞈ jahˇ-euˬ meh. Aˬ yawꞈ-ahˇ tsaˬ leˇ tsahˇ leˇ gʼaˬ-euˬ tsawˇ haˬ deuˬ-ahˇ aˬ yawꞈ-euˬ yaw shehꞈ kʼahˬ sehˇ biꞈ nehˬ-euˬ meh.

Iˇsaˬyaˇ 45:17

Ehˇ kʼawꞈ, Iˇsaˬleˬlaˆ-ahˇ Sahˬpaˬ Miˬyehˇ ka kʼoꞈ-awˇ, mˬ maˬ maˬ byaˆ zaˇ ziˇ gʼaˬ leˇ-eu gʼaˬ pyeuꞈ-awˇ, shaꞈ dawˇ-eu jeˬ maˬ keuˆ le-ehˇ daˬ maˬ ga-a.’

Maˬlaˬkiˇ 1:2

“Naw maꞈ-ahˇ ngaˇ aˬ myah luꞈ gaˬ-euˬ ma” lehˇ, Sahˬpaˬ Miˬyehˇ ehˇ ngeh, “Nawˇ nga maꞈ-ahˇ gaˬ-eu aˬ joˆ-ehˇ bi siˬ laꞈ teˬ” lehˇ, aˬ yawꞈ-euˬ tsawˇ haˬ deuˬ ehˇ-eu meh. Sahˬpaˬ Miˬyehˇ ehˇ-eu, “Iˇsawˇ hawˇ-eu Yaˬkoˆ aˬ nyaꞈ tiˬ mehˇ nmˇ meh. Ehˇ kʼawꞈ, Yaˬkoˆ hawˇ-eu aˬ yawꞈ-euˬ zaˬ deuˬ uˆ deuˬ-ahˇ ngaˇ gaˬ-euˬ ma.

Dawˬmehˬ 10:15

Ehˇ kʼawꞈ, naw maꞈ-euˬ aˬ poeˬ aˬ bawˇ deuˬ-ahˇ Sahˬpaˬ Miˬyehˇ gaˬ dui dui-eu miˇ neh, tsawˇ jeuˬ heu myaˆ ni gʼeh-eu laꞈ kʼoeˇ, naw maꞈ-ahˇ aˬ yawꞈ tseˇ doˆ-euˬ meh. Naw maꞈ-aˬ, iˬ nah keuˆ ni aˬ yawꞈ neh tseˇ doˆ-euˬ tsawˇ haˬ pyeuꞈ luꞈ-eu meh.

1 Beˬtuˆluˆ 1:3

Sahˬpaˬ Yeˬsuˇ Ka li-euˬ Aˬda pyeuꞈ-eu Miˬyehˇ-euˬ guiˬ lahˬ-ahˇ ja ceuˬ kaˇ-euˇ. Aˬ yawꞈ-euˬ huiˬ dui dui-eu gʼawˬ shaˬ gaˬ-eu jeˬ baˬ da neh, Yeˬsuˇ Ka li-ahˇ shiˇ-euˬ gaˇ bi gʼoꞈ dehꞈ laˇ-eu laꞈ kʼoeˇ aˬ dui-ahˇ yaw shuiꞈ bi dehꞈ paˇ laꞈ-euˬ meh. Kʼoeˇ-aˬ, aˬ dui-euˬ laꞈ kʼoeˇ dehꞈ luꞈ-eu noeˬ tmˬ duˬ bi byah laˇ-euˬ meh.

Dawˬ caˇ 1:4

Ngaˬ-ahˇ sheuˬ-awˬ. Nawˬ nehˬ-ehˇ ngaˇ cehˆ kʼoeˬ ma. Ngaˬ-euˬ sahˬ paˬ geuꞈ-awˇ, nawˬ-euˬ kuˆ lawˆ-ahˇ sheuˬ ahˇ nehˬ laꞈ-awˬ. Nawˬ nehˬ-ehˇ nga maꞈ laˬ kʼaˬ cehˇ-awˇ, aˬ gaꞈ dzaˇ uiˇ naˆ maˬ tseˇ nawˬ-euˬ nui gaˬ-ahˇ ja ceuˬ-eu ma. Zaˬ miˬ zaˬ dawˬ tawˆ luꞈ nawˬ-ahˇ gaˬ-eu zahˬ leˇ duˬ maˬ jaˆ-a.

Hawˇseˬ 11:1

Sahˬpaˬ Miˬyehˇ ehˇ-eu dawˬ-aˬ, “Iˇsaˬleˬlaˆ yaw nyiˇ gʼeh ngeh, aˬ yawꞈ-ahˇ ngaˇ gaˬ dui dui-awˇ, ngaˬ-euˬ aˬ li tiˬ gʼaˬ loꞈ-ehˇ, Iˇjiˇtuˆ miˇ kʼahˬ laꞈ kʼoeˇ neh, ngaˬ neh sheuˬ kʼoꞈ doˆ laꞈ-euˬ ma.

Dawˬmehˬ 33:26

Iˇsaˬleˬlaˆ tsawˇ haˬ deuˬ-oˇ, mˬ taˆ mˬ dmˇ mahˬ dziˬ dziˬ-awˇ, caw ba-eu lehˇ ga keuˆ le-eu, naw maꞈ-euˬ Miˬyehˇ-ahˇ duˇ-eu, Miˬyehˇ nui gʼaˬ aˬ gaˇ jawˇ ta.

Dawˬmehˬ 4:37

Naw maꞈ-euˬ aˬ poeˬ aˬ bawˇ deuˬ-ahˇ aˬ yawꞈ gaˬ-eu miˇ neh, naw maꞈ-ahˇ aˬ yawꞈ tseˇ doˆ-awˇ, aˬ yawꞈ-euˬ huiˬ-eu baoˬ-ahˇ gʼoe-eu laꞈ kʼoeˇ, Iˇjiˇtuˆ miˇ kʼahˬ laꞈ kʼoeˇ neh naw maꞈ-ahˇ aˬ yawꞈ sheuˬ doˆ laꞈ-euˬ meh.

Yaˬkoˆ 1:18

Kʼaˇ beh dehꞈ taˬ-euˬ jeˬ dawˬ tawˆ luꞈ laꞈ kʼoeˇ aˬ dui aˬ cawˬ jeˬ hu hu saˬ ya jawˇ ni, aˬ yawꞈ nui ma kʼaˇ tsaˬ-eu loꞈ-ehˇ yaw tsaˬ yaw dawˇ dawˬ-ahˇ gʼoe-awˇ aˬ dui-ahˇ beh dehꞈ taˬ-euˬ meh.

Lormav 9:13

“Yaˬkoˆ-ahˇ ngaˇ noeˬ dzoeˇ-awˇ, Iˇsawˇ-ahˇ maˬ noeˬ dzoeˇ nya” lehˇ, Jaˇliꞈ laꞈ kʼoeˇ ehˇ taˬ-euˬ meh.

Jaceuq 25:6

SahˬpaˬMiˬyehˇngaˬ-euˬkʼoeˇtaˆ, aˇ hu ba neh bi jaˆtaˬ-euˬ, nawˇgʼawˬshaˬgaˬ-eu jeˬhawˇ-eu, nawˬ-euˬgʼoeˇ-eu gaˬ-eu jeˬ-ahˇ, maˬtsehˆleˇni noeˬkeuˆnehˬlaꞈ.

1 Sahˬpaˬ 10:9

Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ ja ceuˬ-awˬ. Iˇsaˬleˬlaˆ miˇ kʼahˬ kʼoeˇ taˆ nawˬ-ahˇ sahˬ paˬ bi geuꞈ-eu laꞈ kʼoeˇ, aˬ yawꞈ nawˬ-ahˇ aˇ naˆ ni nui kʼahˇ shiˇ-eu gaˇ kawˆ bi siˬ bi mawˇ-euˬ meh. Iˇsaˬleˬlaˆ tsawˇ jeuˬ-ahˇ aˬ yawꞈ gaˬ-eu jeˬ mˬ maˬ maˬ byaˆ zaˇ ziˇ ziꞈ-eu miˇ neh, yaw tsaˬ yaw dawˇ laꞈ kʼoeˇ zahˇ dawˬ kʼoꞈ dawˬ-ahˇ tsaˬ ni aˬ yawꞈ maꞈ kʼoeˇ taˆ bi uˆ lahˇ-eu gʼaˇ duˬ, aˬ yawꞈ nawˬ-ahˇ sahˬ paˬ bi pyeuꞈ laˇ-euˬ nga.”

Iˇsaˬyaˇ 43:4

Ngaˬ-euˬ mehˬ shi nawˇ aˇ poeˬ kʼaˆ-eu miˇ neh, nawˬ-euˬ saꞈ laˇ ka kʼoꞈ geuꞈ-eu gʼaˇ duˬ, tsawˇ jeuˬ dawˬ tawˆ luꞈ biꞈ dah coeˇ ma.

Iˇsaˬyaˇ 49:14

Ehˇ kʼawꞈ, Yeˬluˇsaˬlehˬ tsawˇ haˬ ehˇ-eu, “Sahˬpaˬ Miˬyehˇ nga maꞈ-ahˇ byehˇ dzeh laꞈ-euˬ meh. Nga maꞈ-ahˇ aˬ yawꞈ ngehˇ-euˬ meh.”