Yawˇshuˆ 24:26 - Akha

²⁶ Zahˇ dawˬ kʼoꞈ dawˬ kʼoeˇ deuˬ-ahˇ, Miˬyehˇ-euˬ Zahˇ dawˬ kʼoꞈ dawˬ sahˬ boꞈ laꞈ kʼoeˇ aˬ yawꞈ boꞈ ahˇ-euˬ meh. Kʼoeˇ naˇ, huiˬ dui dui-eu kʼaˬ lo tiˬ siˬ yuˇ-awˇ, Sahˬpaˬ Miˬyehˇ-euˬ muiˬ-eu shawˇ-eu jawˇ duˬ-ahˇ, tsuiꞈ kaˆ aˇ bawˇ dawˬ pehˬ-ahˇ ka tuˇ-euˬ meh.

Yawˇshuˆ 24:26 Referans Kwoze

Yaˇ kʼaˬ daˇ 9:6

Kʼoeˇ naˇ, Sheˬkmˬ meuˬ hawˇ-eu Behˬmiˇloˬ meuˬ-ahˇ jawˇ-eu tsawˇ haˬ dawˬ tawˆ luꞈ, Sheˬkmˬ meuˬ-ahˇ jaˆ-eu muiˬ-eu shawˇ-eu tsuiꞈ kaˆ aˇ bawˇ-ahˇ tiˬ kawˆ loꞈ-ehˇ iˇ-awˇ, Aˬbiˇmaˬlehˆ-ahˇ kʼoeˇ gaˇ sahˬ paˬka nehˬ-euˬ meh.

Aˇ dahˬ 35:4

Kʼoeˇ ngeh, tahˬ pahˬ aˬ ma mawˇ kawˇ dawˬ tawˆ luꞈ hawˇ-eu, aˬ yawꞈ maꞈ-euˬ naˬ bawˇ naˬ yoˆ deuˬ, Yaˬkoˆ-ahˇ aˬ yawꞈ maꞈ biꞈ nehˬ-euˬ meh. Myawˬ kʼoeˇ deuˬ-ahˇ Yaˬkoˆ yuˇ-awˇ, Sheˬkmˬ meuˬ dawˬ peh bawˇ-eu tsuiꞈ kaˆ aˇ bawˇ dawˬ pehˬ-ahˇ duˬ pahˬ yaꞈ-euˬ meh.

Doˆ-iˇ 24:4

Kʼoeˇ naˇ, Sahˬpaˬ Miˬyehˇ neh kʼaˇ ngehˬ kʼaˇ tmˇ-euˬ zahˇ sahˇ kʼoꞈ dawˬ tawˆ luꞈ, Moˇseˬ boꞈ-euˬ meh. Yawˬ nah yawˬ uˬ shawˬ yaw naꞈ-ehˇ, gawˬ jawˬ dawˬ dahˬ-ahˇ lawˇ duˬ tiˬ tsahˇ aˬ yawꞈ tsoˆ-awˇ, Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ dah zaˇ, kʼaˬ lo tseˇ nyiꞈ siˬ kʼahˬ tuˇ-euˬ meh.

Aˇ dahˬ 35:8

Leˬbehˇkaꞈ-ahˇ bo saˆ-eu gʼaˬ pyeuꞈ-eu Diˬboˇlaˬ shiˇ-awˇ, Beˬdeˬlaˇ meuˬ-euˬ laꞈ oˆ paw pyawˬ-ahˇ jaˆ-eu tsuiꞈ kaˆ aˇ bawˇ dawˬ pehˬ-ahˇ duˬ pahˬ nehˬ-euˬ meh. Kʼoeˇ miˇ neh, jawˇ duˬ kʼoeˇ tsahˇ-ahˇ, “Tsawˇ ngoeˇ ngoeˇ-euˬ tsuiꞈ kaˆ aˇ bawˇ” lehˇ kuˇ-euˬ meh.

Aˇ dahˬ 31:45

Kʼoeˇ ngeh, Yaˬkoˆ kʼaˬ lo yaw huiˬ tiˬ siˬ yuˇ-awˇ, noeˬ keuˆ-eu gʼaˇ duˬ kʼahˬ tuˇ-euˬ meh.

1 Saˬmeuˬlaˆ 7:12

Kʼoeˇ naˇ, Saˬmeuˬlaˆ kʼaˬ lo tiˬ siˬ yuˇ-awˇ, Miˇzaˬpaˬ meuˬ hawˇ-eu Yeˬshaˬnahˬ meuˬ yaw kaˬ-ahˇ ka tuˇ-awˇ, “Sahˬpaˬ Miˬyehˇ iˬ nah keuˆ ni aˬ dui-ahˇ caw ba luꞈ meh” lehˇ ehˇ-awˇ, kʼaˬ lo kʼoeˇ siˬ-ahˇ Eˇbaˬneˬzaˬ lehˇ myahˇ nehˬ-euˬ meh.