Yawˇshuˆ 14:8 - Akha

⁸ Ngaˬ nehˬ-ehˇ tiˬ kawˆ loꞈ-ehˇ kʼoeˬ sho haw laˇ-euˬ tsawˇ haˬ deuˬ-aˬ, aˬ dui-euˬ tsawˇ haˬ deuˬ guˆ ni, ja guˆ-euˬ meh. Ehˇ kʼawꞈ, ngaˇ gʼaˬ-aˬ, ngaˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ dawˬ-ahˇ saˇ jaˇ ziꞈ-awˇ, aˬ yawꞈ-euˬ dawˬ-ahˇ naˇ haˬ geuꞈ-euˬ ma.

Yawˇshuˆ 14:8 Referans Kwoze

Bawˇtsahˬ 14:24

Ehˇ kʼawꞈ, ngaˬ-euˬ zaˬ kʼaˆ Gaˬlehˆ nui ma taˬ-eu aˬ cawˬ-ahˇ beu gaˇ-awˇ, ngaˬ-ahˇ saˇ jaˇ ziꞈ-eu miˇ neh, aˬ yawꞈ pyehˆ tseˇ haw leˇ-euˬ miˇ kʼahˬ kʼoeˇ kʼahˬ laꞈ kʼoeˇ, aˬ yawꞈ-ahˇ ngaˇ sheuˬ keuˆ nehˬ-awˇ, aˬ yawꞈ-euˬ zaˬ deuˬ uˆ deuˬ miˇ kʼahˬ kʼoeˇ kʼahˬ ya geuꞈ tehꞈ-a.

Dawˬmehˬ 1:36

Yeˬpuˬnehˇ-euˬ aˬ li Gaˬlehˆ tiˬ gʼaˬ tehꞈ-ehˇ ya le uˇ meh. Aˬ yawꞈ ngaˬ-ahˇ saˇ jaˇ ziꞈ-eu miˇ neh, aˬ yawꞈ neh kʼoeˬ sho haw leˇ-euˬ miˇ kʼahˬ kʼoeˇ kʼahˬ, aˬ yawꞈ hawˇ-eu aˬ yawꞈ-euˬ zaˬ deuˬ uˆ deuˬ-ahˇ ngaˇ biꞈ ma’ lehˇ ehˇ-eu meh.

Yawˇshuˆ 14:14

Heˬbyoˬ meuˬ-aˬ, iˬ nah keuˆ ni, Gaˬnaˆ aˇ jeuˬ Yeˬpuˬnehˇ-euˬ aˬ li Gaˬlehˆ-euˬ zaˬ deuˬ uˆ deuˬ-euˬ meuˬ pyeuꞈ-eu meh. Aˬ jeˬ miˇ neh ehˇ naˇ, Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Sahˬpaˬ Miˬyehˇ-euˬ ehˇ dawˬ-ahˇ aˬ yawꞈ saˇ jaˇ ziꞈ-eu laꞈ kʼoeˇ naˇ haˬ geuꞈ-euˬ meh.

Bawˇtsahˬ 13:31

Ehˇ kʼawꞈ, Gaˬlehˆ nehˬ-ehˇ le-euˬ tsawˇ haˬ deuˬ ehˇ-eu, “Maˬ ngeuˇ-a. Aˬ yawꞈ maꞈ-ahˇ aˬ dui guiˇ maˬ deuˆ gʼaˬ nya-a. Kʼoeˇ gaˇ jawˇ-eu tsawˇ haˬ kʼoeˇ deuˬ, aˬ dui naˆ maˬ tseˇ gʼaˬ kʼaˆ dzehˬ-eu meh.”

Panmaeq 14:4

Aˬ yawꞈ maꞈ-aˬ, zaˬ miˬ zaˬ nehˬ-ehˇ maˬ yuꞈ taꞈ-eu tsawˇ shawˇ deuˬ meh. Yawˇ zaˬ kʼaˇ iˇ-eu mehˬ nah aˬ yawꞈ maꞈ caw teh-eu meh. Tsawˇ haˬ zaˬ dawˬ tawˆ luꞈ laꞈ kʼoeˇ aˬ yawꞈ maꞈ-ahˇ ka kʼoꞈ-awˇ, Miˬyehˇ hawˇ-eu Yawˇzaˬ-ahˇ damˬ nehˬ beh beh-euˬ deuˬ pyeuꞈ-eu meh.

Bawˇtsahˬ 32:12

Sahˬpaˬ Miˬyehˇ-ahˇ saˇ jaˇ maˬ puiˬ-euˬ Gaˬnaˆ aˇ jeuˬ Yeˬpuˬnehˇ-euˬ aˬ li Gaˬlehˆ hawˇ-eu Nuˬ-euˬ aˬ li Yawˇshuˆ maˬ ngeuˇ naˇ, tiˬ gʼaˬ-iˬ maˬ ya le keuˆ-a lehˇ ehˇ taˬ-euˬ meh.

Bawˇtsahˬ 14:1

Iˇsaˬleˬlaˆ tsawˇ haˬ deuˬ nui ma cawˆ-eu laꞈ kʼoeˇ, uˬ ciꞈ miˇ lah-ehˇ guˇ guˇ-ehˇ ngoeˇ-euˬ meh.

Dawˬmehˬ 1:28

Aˬ jeˬ miˇ neh kʼoeˇ gaˇ le-eu ehˇ te. Nga maꞈ guˆ dui dui nya. Kʼoeˇ gaˇ jawˇ-eu tsawˇ haˬ deuˬ-aˬ, aˬ dui maꞈ naˆ maˬ tseˇ goˇ dzehˬ-awˇ, gʼaˬ kʼaˆ dzehˬ-eu uˬ taꞈ, mˬ-ahˇ tuˆ ni meuˬ meuˬ lahˇ gawˬ taˬ-euˬ meuˬ deuˬ laꞈ kʼoeˇ jawˇ-eu meh lehˇ, aˬ dui maꞈ neh bi kʼoeˬ sho haw leˇ-euˬ tsawˇ haˬ deuˬ tsaꞈ gaˬ le-euˬ maˬ ngeuˇ-a loˇ. Huiˬ dui goˇ dui dui-eu tsawˇ haˬ deuˬ-ahˇ aˬ yawꞈ maꞈ mawˇ yaꞈ-euˬ ma lehˇ ehˇ-eu maˬ ngeuˇ-a loˇ’ lehˇ naw maꞈ ehˇ-eu meh.