Tiˇtuˆ 2:3 - Akha

³ Kʼoeˇ loꞈ-ehˇ duˇ ni, tsawˇ kʼaˆ kʼaˆ laˇ-euˬ zaˬ miˬ zaˬ deuˬ-ahˇ kʼawꞈ, muiˬ-eu shawˇ-eu zaˬ miˬ zaˬ deuˬ loꞈ-ehˇ dehꞈ nya jawˇ nya ni mehˬ nehˬ-awˬ. A cawˬ gaˇ kawˆ ja bu ja doeˇ-eu tsawˇ haˬ hawˇ-eu aˬ gaꞈ dzaˇ uiˇ-euˬ zaˬ kʼaˆ maˬ ya bi pyeuꞈ ni, yaw muiˬ jeˬ mehˬ-eu tsoˆ-eu tsawˇ haˬ ya bi pyeuꞈ meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

³ Khoerlof-aer durni, aqpiq tsawrmawq deuq-anr khawf, mr-awr shar-eu, ngaeq-awr tmr-eu lafkhoer, aqcawq yawzeu bawni daef-awr, aqcawq-anr taq jabu taq jadoer, jirbaq-euq zaqkhav taqgeuf. Yawmuiq jeq maeqnaeq tsovnaeq nya-eu tsawrhaq pyeuflarni maeqnaeq-awq.

Tiˇtuˆ 2:3 Referans Kwoze

Tiˇtuˆ 2:4

Aˬ yawꞈ maꞈ-aˬ, aˇ kʼoꞈ maˬ kʼawˆ laˇ-euˬ zaˬ miˬ zaˬ deuˬ yawˬ ha-euˬ kʼaˬ dzeˇ zaˬ hawˇ-eu zaˬ deuˬ-ahˇ gaˬ nya laˇ ni mehˬ-eu tsoˆ-eu tsawˇ haˬ ya bi pyeuꞈ meh.

1 Tiˆmoˇseˬ 3:11

Zaˬ miˬ zaˬ deuˬ kʼawꞈ, aˬ cawˬ yaw zeu baw-eu tsawˇ haˬ ya bi pyeuꞈ meh. Aˬ cawˬ-euˬ gaˇ kawˆ ja ja-ehˇ cah-eu tsawˇ haˬ maˬ ya bi pyeuꞈ-a. Noeˬ dahˇ doe-awˇ, yawˬ jeˬ na luꞈ laꞈ kʼoeˇ saˇ jaˇ jawˇ-eu tsawˇ haˬ ya bi pyeuꞈ meh.

Tiˇtuˆ 1:7

Ka li zaˬ aˇ muˇ-ahˇ sheuˬ gʼeh-eu tsawˇ haˬ deuˬ-aˬ, Miˬyehˇ-euˬ gaˇ-ahˇ haw-eu pyaˆ-eu tsawˇ haˬ pyeuꞈ-eu miˇ neh, iˬ baˇ taˬ kʼaˇ maˬ ya bi za-a. Yawˬ ha-euˬ nui noeˬ geuꞈ-eu, nui ma nymˇ-eu, aˬ gaꞈ dzaˇ uiˇ dawˇ yehꞈ-eu, aˬ cawˬ-ahˇ dawꞈ-eu ceh-eu, pyuˇ-ahˇ mehˇ juiˇ juiˇ-eu, heu loꞈ-ehˇ gʼeh-eu tsawˇ haˬ maˬ ya bi pyeuꞈ-a.

1 Tiˆmoˇseˬ 3:8

Ka li zaˬ aˇ muˇ-euˬ gaˇ-ahˇ caw ba-eu tsawˇ haˬ deuˬ kʼawꞈ, aˬ cawˬ yaw zeu baw-awˇ nui ma dawˇ-eu tsawˇ haˬ ya bi pyeuꞈ meh. Aˬ gaꞈ dzaˇ uiˇ aˇ dzehˬ maˬ dawˇ dzeuˇ-ehˇ, pyuˇ-ahˇ mehˇ juiˇ maˬ juiˇ-eu tsawˇ haˬ ya bi pyeuꞈ meh.

Lormav 16:2

Miˬyehˇ-euˬ tsawˇ haˬ deuˬ ya mˇ-eu loꞈ-ehˇ Sahˬpaˬ Miˬyehˇ-euˬ tsawˇ myahˇ uˬ moˆ aˬ yawꞈ-ahˇ ha geuꞈ-awˇ, aˬ yawꞈ kʼaˇ loˬ-eu jeˬ tiˬ poˆ caw ba nehˬ-awˬ. Aˬ jeˬ miˇ neh ehˇ naˇ, aˬ yawꞈ-aˬ, aˬ cawˬ-ahˇ caw ba nehˬ nya dui dui-awˇ, ngaˬ-ahˇ kʼawꞈ caw ba nehˬ laꞈ-euˬ meh.

Eˇpeˇsu 5:3

Naw maꞈ-aˬ, Miˬyehˇ-euˬ tsawˇ haˬ pyeuꞈ-eu miˇ neh, maˬ tsaˬ maˬ dawˇ-eu jeˬ laꞈ kʼoeˇ kʼaˬ miˬ sheu-eu, jawꞈ dui dui-eu jeˬ mˇ-eu, aˬ cawˬ-euˬ myawˬ-ahˇ mehˇ juiˇ juiˇ-eu, heu loꞈ-ehˇ gʼeh-eu gaˇ kawˆ deuˬ-ahˇ mˇ-eu taˬ ehˇ siˬ. Ja-eu kʼawꞈ maˬ tsaˬ-a.

Panmaeq 2:20

Ehˇ kʼawꞈ, ngaˇ nawˬ-ahˇ heu loꞈ-ehˇ iˬ baˇ taˬ kʼaˇ za-eu ma. Yawˬ haˇ yawˬ ha Miˬyehˇ gʼaˇ duˬ ngehˬ dah-eu tsawˇ haˬ ma lehˇ ehˇ-eu zaˬ miˬ zaˬ tiˬ gʼaˬ pyeuꞈ-eu Yeˬsaˬbeˬlaˇ-ahˇ nawˇ tiˬ jeˬ-iˬ maˬ jahˇ ni kʼoeˇ loꞈ-ehˇ pyehˬ taˬ-euˬ meh. Aˬ yawꞈ mehˬ-eu tsoˆ-eu kʼoeˇ-aˬ, ngaˬ-euˬ zaˬ kʼaˆ deuˬ maˬ tsaˬ maˬ dawˇ-eu laꞈ kʼoeˇ kʼaˬ miˬ sheu-awˇ, tahˬ pahˬ aˬ ma mawˇ kawˇ-ahˇ lawˇ nehˬ-euˬ lawˇ dzaˇ dzaˬ ni sheuˬ bahˬ-euˬ meh.

HeˬByehˇ 5:12

Aˇ yamˬ myahˇ laˇ-euˬ gaˇ shaˇ sawˇ naˇ, naw maꞈ-aˬ, aˬ cawˬ-ahˇ mehˬ nya tsoˆ nya deˇ laˇ-euˬ meh. Ehˇ kʼawꞈ, Miˬyehˇ-euˬ dawˬ-ahˇ taꞈ leˇ-awˇ dzaw dahˬ ya beh-eu gaˇ kawˆ deuˬ-ahˇ keuˆ ni, naw maꞈ-ahˇ paˇ mehˬ poˆ nehˬ paˬ-ehˇ gʼeh-eu meh. Naw maꞈ dzaˇ yaw gʼahˇ dzaˬ nya deˇ laˇ-euˬ kʼawꞈ, aˬ coeˇ dawˇ zaˬ-euˬ aˇ tiˆ-ahˇ dehꞈ luꞈ-a siˬ.

1 Tiˆmoˇseˬ 5:23

Nawˇ tiˬ kʼehˬ maˬ taˬ ni jawˇ saˇ maˬ doˆ-eu miˇ neh nawˬ-euˬ uˬ maˆ naˇ-eu maˬ gaˇ laˇ ni, iˇ cuꞈ tehꞈ-ehˇ maˬ dawˇ-ehˇ aˬ gaꞈ dzaˇ uiˇ kʼawꞈ ui cuiˆ na dawˇ-eu tsaˬ meh.

Lormav 1:29

Aˬ yawꞈ maꞈ laꞈ kʼoeˇ maˬ muiˬ maˬ jaˬ-eu jeˬ, yaw haiˬ jeˬ, mehˇ juiˇ juiˇ-eu jeˬ, yaw doeˇ jahˇ-eu jeˬ, heu deuˬ tiˬ byah ni ahˇ-eu meh. Aˬ yawꞈ maꞈ laꞈ kʼoeˇ, myaˆ naˆ-eu, sehꞈ mawꞈ-eu, diˬ mawꞈ ceh mawꞈ-eu, mehˇ shuiˇ shuiˇ-eu, aˬ cawˬ-ahˇ noeˬ doeˇ-eu, heu deuˬ tiˬ byah ni ahˇ-eu meh. Aˬ cawˬ gaˇ kawˆ maˬ ngeuˇ-eu jeˬ ja kʼoeˬ-eu meh.