Miˇkaˬ 2:11 - Akha

¹¹ “Naw maꞈ gʼaˇ duˬ aˬ gaꞈ dzaˇ uiˇ hawˇ-eu jiˇ baˬ yoeˇ le tehꞈ-a lehˇ jaˬ myawꞈ myawꞈ myawꞈ-ehˇ cah-eu Miˬyehˇ gʼaˇ duˬ ngehˬ dah-eu deuˬ-ahˇ tsawˇ haˬ heu deuˬ mawꞈ-eu meh.

Miˇkaˬ 2:11 Referans Kwoze

Yeˬlaˬmiˇ 5:31

Miˬyehˇ gʼaˇ duˬ ngehˬ dah-eu deuˬ jaˬ myawꞈ myawꞈ-awˇ, aˬ yawꞈ maꞈ neh ehˇ-euˬ loꞈ-ehˇ piˇ ma deuˬ mˇ byah-eu, ngaˬ-euˬ tsawˇ haˬ deuˬ nui kʼahˇ shiˇ-eu meh. Ehˇ kʼawꞈ aˇ saˬ saˬ-eu aˇ yamˬ keuˆ le ngeh jawˇ, aˬ yawꞈ maꞈ aˬ joˆ-ehˇ jahˇ nmˇ.

Yeˬlaˬmiˇ 28:15

Kʼoeˇ naˇ, Haˬnaˬniˇyaˆ-ahˇ ngaˇ heu loꞈ-ehˇ paˇ ehˇ nehˬ-euˬ ma. “Haˬnaˬniˇyaˆ-oˇ, naˇ haˬ sheˇ. Sahˬpaˬ Miˬyehˇ neh nawˬ-ahˇ kʼehˇ gʼeh leꞈ-euˬ maˬ ngeuˇ gaˇ, nawˬ neh jaˬ myawꞈ myawꞈ-euˬ dawˬ-ahˇ tsawˇ haˬ heu deuˬ jah laˇ ni nawˇ jahˇ luꞈ-eu meh.

Yeˬlaˬmiˇ 23:32

Naˇ haˬ-awˬ. Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ-eu ma. Jaˬ myawꞈ mehˇ shuiˇ tiˬ byah ni ahˇ-eu, yawˬ ha neh yuꞈ maˆ maˆ mawˇ-euˬ gaˇ kawˆ ja-eu Miˬyehˇ gʼaˇ duˬ ngehˬ dah-eu tsawˇ haˬ kʼoeˇ deuˬ-ahˇ ngaˇ muiˇ-eu ma. Aˬ yawꞈ maꞈ yuꞈ maˆ maˆ mawˇ-euˬ gaˇ kawˆ ja-awˇ, jaˬ myawꞈ mehˇ shuiˇ shuiˇ-awˇ, kʼahˬ sehˇ jehˆ-eu laꞈ kʼoeˇ ngaˬ-euˬ tsawˇ haˬ deuˬ-ahˇ gaˇ ma sheuˬ bahˬ-eu meh. Aˬ yawꞈ maꞈ-ahˇ ngaˇ dawˬ biꞈ-awˇ kʼehˇ gʼeh leꞈ-euˬ maˬ ngeuˇ. Aˬ yawꞈ maꞈ-aˬ, ngaˬ-euˬ tsawˇ haˬ deuˬ gʼaˇ duˬ tiˬ pawꞈ-iˬ gaˇ dahˇ maˬ tsoeˬ-a lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Yeˬlaˬmiˇ 23:25

Yuꞈ maˆ maˆ-eu laꞈ kʼoeˇ aˬ yawꞈ maꞈ-ahˇ ngaˇ dawˬ biꞈ le-euˬ meh lehˇ ehˇ-awˇ, ngaˬ-euˬ tsawˇ myahˇ pi-awˇ jaˬ myawꞈ myawꞈ-eu Miˬyehˇ gʼaˇ duˬ ngehˬ dah-eu tsawˇ haˬ kʼoeˇ deuˬ neh kʼaˇ ngehˬ-euˬ dawˬ deuˬ, ngaˇ siˬ nya jiˇ ma.

Yeˬlaˬmiˇ 23:17

Ngaˬ-euˬ ehˇ dawˬ maˬ naˇ haˬ-eu tsawˇ haˬ deuˬ-ahˇ, nui saˇ oꞈ tehꞈ-a lehˇ aˬ yawꞈ maꞈ gʼaˬ biꞈ-awˇ, nui ma gʼahˇ dui dui-eu tsawˇ haˬ yawˬ gʼaˬ na luꞈ-ahˇ, shaˬ zahˬ maˬ puˬ le-aˇ lehˇ aˬ yawꞈ maꞈ gʼaˬ baꞈ baꞈ-eu meh.”

Yeˬlaˬmiˇ 23:14

Ehˇ kʼawꞈ Yeˬluˇsaˬlehˬ meuˬ-ahˇ ngaˬ-euˬ gʼaˇ duˬ ngehˬ dah-eu deuˬ, kʼoeˇ naˆ maˬ tseˇ doeˇ gaˇ ngaˇ mawˇ-euˬ ma. Aˬ cawˬ-euˬ miˬ zaˬ-ahˇ aˬ yawꞈ maꞈ bahˬ gʼa muˆ gʼa-awˇ, jaˬ myawꞈ mehˇ shuiˇ dawˬ ngehˬ-eu meh. Tsawˇ haˬ yawˬ gʼaˬ na luꞈ yaw haiˬ jeˬ maˬ byehˇ ni mˇ-eu gʼaˇ duˬ, yaw lehˬ mˇ gaˇ aˬ yawꞈ maꞈ gʼaˬ baꞈ baꞈ-eu meh. Aˬ yawꞈ maꞈ dawˬ tawˆ luꞈ ngaˬ-euˬ mehˬ shi, Sawˇdoˬ hawˇ-eu Gawˇmawˇlaˆ meuˬ loꞈ-ehˇ, doeˇ dui dui-eu tsawˇ haˬ deuˬ pyeuꞈ-eu meh.”

Yeˬlaˬmiˇ 14:14

Ehˇ kʼawꞈ, Sahˬpaˬ Miˬyehˇ ehˇ-eu, “Miˬyehˇ gʼaˇ duˬ ngehˬ dah-eu deuˬ-aˬ, ngaˬ-euˬ tsawˇ myahˇ-ahˇ gʼoe-awˇ jaˬ myawꞈ myawꞈ luꞈ meh. Aˬ yawꞈ maꞈ-ahˇ ngaˬ neh pyehˬ leꞈ-euˬ maˬ ngeuˇ. Ngaˬ-euˬ dah zaˇ dawˬ tiˬ dawˬ-iˬ bi ngehˬ le-euˬ maˬ ngeuˇ. Yaw sahˇ laꞈ kʼoeˇ aˬ yawꞈ maꞈ kʼaˇ ya siˬ kʼaˇ ya mawˇ-euˬ loꞈ-ehˇ ngehˬ-eu tmˇ-eu ma lehˇ aˬ yawꞈ maꞈ ehˇ kʼawꞈ, aˬ yawꞈ maꞈ ngehˬ-eu dawˬ kʼoeˇ deuˬ ngaˬ-euˬ dawˬ maˬ ngeuˇ. Mehˬ hu paw pyeuꞈ laˇ-eu gaˇ kawˆ aˬ yawꞈ maꞈ ehˇ-eu kʼoeˇ-aˬ, aˬ yawꞈ maꞈ neh kʼaˇ noeˬ doˆ-euˬ loꞈ-ehˇ ehˇ-eu jeˬ pyeuꞈ-awˇ, gaˇ dahˇ maˬ tsoeˬ-aˬ.

1 Sahˬpaˬ 22:6

Kʼoeˇ naˇ, Miˬyehˇ gʼaˇ duˬ ngehˬ dah-eu tsawˇ haˬ oeˬ yaˇ gʼaˬ-ahˇ Aˬhaˆ kuˇ uiˬ-awˇ ehˇ nehˬ-eu, “Giˇlaˆ miˇ kʼahˬ Laˬmoˆ meuˬ-ahˇ ngaˇ guiˇ deuˆ leˇ-eu tsaˬ nga loˇ, maˬ tsaˬ nga loˇ lehˇ ehˇ nehˬ laꞈ sheˇ.” Aˬ yawꞈ maꞈ ehˇ-eu, “Deuˆ leˇ-awˬ. Sahˬpaˬ Miˬyehˇ nawˬ-ahˇ bi gʼaˬ leˇ nehˬ laꞈ tehꞈ-a.”

1 Yoˇhaˬ 4:1

Ngaˇ gaˬ dui dui-eu cawˬ deuˬ-oˇ, Yaw sahˇ Miˬyehˇ za-euˬ tsawˇ haˬ ma lehˇ kʼaˇ ehˇ laˇ gaˇ naw maꞈ maˬ jah ni, aˬ yawꞈ maꞈ za-euˬ yaw sahˇ kʼoeˇ Miˬyehˇ jawˇ gaˇ neh oe-euˬ nga loˇ lehˇ jeˬ huˬ lawˬ haw-awˬ. Aˬ jeˬ miˇ neh ehˇ naˇ, Miˬyehˇ gʼaˇ duˬ ngehˬ dah-eu maˬ ngeuˇ-eu tsawˇ haˬ deuˬ miˇ tsaˬ doe ni iˇ byah taˬ-euˬ meh.

Piˇliˇpiˆ 3:19

Aˬ yawꞈ maꞈ-aˬ, shiˬ buiˇ lah ma-ahˇ aˇ saˬ ya saˬ-iˇ meh. Aˬ jeˬ miˇ neh ehˇ naˇ, aˬ yawꞈ maꞈ-euˬ shiˬ shaˬ jiˇ nui kʼahˇ-aˬ, aˬ yawꞈ maꞈ-euˬ miˬyehˇ meh. Aˬ yawꞈ maꞈ-aˬ, yawˬ ha shaꞈ dawˇ paˬ-ehˇ gʼeh-eu jeˬ-ahˇ maˬ shaꞈ dawˇ ni jahˇ gʼeh haw-awˇ, miˇ tsaˬ shiˬ shaˬ jiˇ-ahˇ taꞈ-eu jeˬ tehꞈ-ehˇ shaˇ noeˬ luꞈ-eu meh.

Lormav 16:18

Aˬ jeˬ miˇ neh ehˇ naˇ, kʼoeˇ loꞈ-ehˇ mˇ-eu tsawˇ haˬ deuˬ-aˬ, aˬ dui-euˬ Sahˬpaˬ Yeˬsuˇ Ka li-euˬ gaˇ mˇ-eu maˬ ngeuˇ-a. Yawˬ ha-euˬ uˬ maˆ gʼaˇ duˬ shaˇ noeˬ-awˇ mehˇ shuiˇ shuiˇ-eu laꞈ kʼoeˇ iˬ baˇ maˬ ahˇ-eu tsawˇ haˬ deuˬ-ahˇ sheuˬ bahˬ-eu meh.

Miˇkaˬ 3:11

Meuˬ-ahˇ uˆ lahˇ-eu deuˬ, laꞈ nmꞈ nmꞈ nehˬ gaˇ haw-awˇ uˆ lahˇ luꞈ meh. Piˇ ma deuˬ-aˬ, aˇ poeˬ za gaˇ haw-awˇ zahˇ dawˬ kʼoꞈ dawˬ-euˬ dawˬ tsuiꞈ yuˇ doˆ nehˬ luꞈ-awˇ, Miˬyehˇ gʼaˇ duˬ ngehˬ dah-eu deuˬ kʼawꞈ, pyuˇ myaˆ pyawˬ-ahˇ haw-awˇ ngehˬ dah luꞈ-eu meh. Ehˇ kʼawꞈ, aˬ yawꞈ maꞈ dawˬ tawˆ luꞈ Sahˬpaˬ Miˬyehˇ aˬ yawꞈ maꞈ nehˬ-ehˇ jawˇ meh lehˇ ehˇ-eu meh. “Luˬ-iˇ seˇ-iˇ-eu jeˬ nga maꞈ kʼoeˇ taˆ maˬ keuˆ le-aˇ. Sahˬpaˬ Miˬyehˇ nga maꞈ nehˬ-ehˇ jawˇ ma” lehˇ aˬ yawꞈ maꞈ ehˇ-eu meh.

Miˇkaˬ 3:5

Aˇ poeˬ biꞈ nya-eu tsawˇ haˬ deuˬ-ahˇ “Naw maꞈ-ahˇ Miˬyehˇ guiˬ lahˬ biꞈ-eu laꞈ kʼoeˇ yaw saˇ saˇ-ehˇ ya dehꞈ tehꞈ-a” lehˇ ehˇ nehˬ-awˇ, aˇ poeˬ maˬ biꞈ-eu tsawˇ haˬ deuˬ-ahˇ, “Naw maꞈ-ahˇ Miˬyehˇ laˆ cawˆ tehꞈ-a” lehˇ ehˇ-eu Miˬyehˇ gʼaˇ duˬ ngehˬ dah-eu deuˬ neh, ngaˬ-euˬ tsawˇ haˬ deuˬ gaˇ ma bi sheuˬ bahˬ-euˬ meh. Kʼoeˇ loꞈ-ehˇ Miˬyehˇ gʼaˇ duˬ ngehˬ dah-eu tsawˇ haˬ kʼoeˇ deuˬ-ahˇ Sahˬpaˬ Miˬyehˇ heu loꞈ-ehˇ ehˇ-eu meh.

Yeˬsaˬgeˬlaˇ 13:22

“Ngaˇ maˬ bi mˇ coeˬ mawꞈ-eu tsawˇ muiˬ deuˬ-ahˇ, naw maꞈ jaˬ myawꞈ mehˇ shuiˇ neh guˆ tsiˬ nyehꞈ-euˬ meh. Haiˬ-eu tsawˇ haˬ deuˬ yaw haiˬ jeˬ byehˇ dzeh-awˇ, saꞈ laˇ buˬ-iˇ ni maˬ bi mˇ-eu gʼaˇ duˬ, naw maꞈ laˆ tsoeˬ-euˬ meh.

Iˇsaˬyaˇ 9:15

Uˬ duˬ-aˬ, aˬ yuiꞈ aˬ tsu deuˬ meh. Dawˬ miˬ-aˬ, Miˬyehˇ gʼaˇ duˬ ngehˬ dah-eu deuˬ meh. Aˬ yawꞈ maꞈ mehˬ-eu jeˬ jaˬ myawꞈ myawꞈ luꞈ-eu meh.

1 Sahˬpaˬ 13:18

Beˬdeˬlaˇ meuˬ-ahˇ jawˇ-eu Miˬyehˇ gʼaˇ duˬ ngehˬ dah-eu tsawˇ haˬ kʼoeˇ gʼaˬ ehˇ-eu, , “Ngaˇ kʼawꞈ, nawˇ loꞈ-ehˇ Miˬyehˇ gʼaˇ duˬ ngehˬ dah-eu tsawˇ haˬ tiˬ gʼaˬ ma. Mˬ taˆ gʼaˬ kʼehˇ tiˬ gʼaˬ-ahˇ Sahˬpaˬ Miˬyehˇ kʼehˇ gʼeh leꞈ-awˇ, nawˬ-ahˇ sheuˬ kʼoꞈ laˬ-iˇ-awˇ bi dzaˬ bi dawˇ-awˬ lehˇ ehˇ le-euˬ meh.” Maˇ maˇ ni ehˇ naˇ, Miˬyehˇ gʼaˇ duˬ ngehˬ dah-eu tsawˇ haˬ kʼoeˇ gʼaˬ jaˬ myawꞈ myawꞈ luꞈ-eu meh.

Yawˇbaˆ 31:5

Ngaˇ yaw haiˬ jeˬ tiˬ jawˇ-iˬ maˬ mˇ haw-ehˇ, aˬ cawˬ-ahˇ jaˬ myawꞈ maˬ myawꞈ haw-aˬ lehˇ kamˬ peuˬ ma.

Dawqdaq 25:14

Yawˬ ha maˬ mˇ keuˆ nya gaˇ keuˆ ni saˇ jaˇ dzaˬ-eu tsawˇ haˬ-aˬ, uˬ yehˇ maˬ ahˇ-eu mˬ dmˇ hawˇ-eu jaˬ lehˇ-ahˇ duˇ-eu meh.

Iˇsaˬyaˇ 28:7

Miˬyehˇ gʼaˇ duˬ ngehˬ dah-eu deuˬ hawˇ-eu piˇ ma deuˬ, jiˇ baˬ yehꞈ-awˇ yawꞈ lawꞈ gʼaˇ laˇ-ehˇ cah-eu meh. Aˬ yawꞈ maꞈ jiˇ baˬ yehꞈ dui dui-eu miˇ neh, tiˬ jeˬ-iˬ maˬ duˬ maˬ ciˇ-a. Miˬyehˇ gʼaˇ duˬ ngehˬ dah-eu deuˬ jiˇ baˬ yehꞈ-eu miˇ neh, Miˬyehˇ pah mehˬ-eu jeˬ-ahˇ maˬ mawˇ duˬ nya-a. Piˇ ma deuˬ jiˇ baˬ yehꞈ-eu baˬ da neh, yaw tsaˬ yaw dawˇ dawˇ-ehˇ yaˇ kʼaˬ maˬ daˇ nya-a.

Hawˇseˬ 7:14

Aˬ yawꞈ maꞈ guˇ-awˇ shaˇ-eu dawˬ, nui ma keuˆ-eu dawˬ maˬ ngeuˇ-ehˇ, lawˇ ciꞈ zaˬ deuˬ jahˇ-eu loꞈ-ehˇ, coˬ lah coˬ lah-ehˇ guˇ-eu meh. Aˬ gaꞈ dzaˇ uiˇ hawˇ-eu cehˇ-ahˇ, aˬ yawꞈ maꞈ za ni shaˇ laˇ ngeh, lawˇ ciꞈ zaˬ deuˬ jahˇ-eu loꞈ-ehˇ, yawˬ ha gʼawˇ mawˇ-ahˇ laˆ naˇ-eu, ngaˬ-ahˇ puiˬ-eu tsawˇ haˬ deuˬ meh.

Ngoeˇ dawˬ 2:14

Miˬyehˇ gʼaˇ duˬ ngehˬ dah-eu deuˬ, nawˬ-ahˇ jaˬ myawꞈ myawꞈ nehˬ-euˬ meh. Nawˬ-ahˇ aˬ cawˬ maˬ bi nyehꞈ ni, nawˬ-euˬ yaw lehˬ iˬ baˇ deuˬ-ahˇ, aˬ yawꞈ maꞈ maˬ pah doˆ nehˬ-a. Aˬ yawꞈ maꞈ ngehˬ-euˬ tmˇ-euˬ jeˬ, nawˬ-ahˇ gaˇ ma sheuˬ bahˬ-euˬ meh.