Maꞈtehˬ 6:24 - Akha

²⁴ “Tsawˇ haˬ tiˬ gʼaˬ-iˬ sahˬ paˬ nyiˬ gʼaˬ-euˬ zaˬ kʼaˆ maˬ geuꞈ nya-a. Tiˬ gʼaˬ-ahˇ bye naˇ, tiˬ gʼaˬ-ahˇ gaˬ tehꞈ-a. Tiˬ gʼaˬ-ahˇ yaw zeu baw naˇ, tiˬ gʼaˬ-ahˇ yaw zeu maˬ baw-aˇ. Naw maꞈ-aˬ, Miˬyehˇ-euˬ zaˬ kʼaˆ hawˇ-eu pyuˇ shuiˇ myawˬ gahˬ-euˬ zaˬ kʼaˆ, nyiˬ jeˬ luꞈ tiˬ kawˆ loꞈ-ehˇ maˬ geuꞈ nya-a.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

²⁴ “Tsawrhaq tiqghaq-iq yawsanr nyiq ghaq-euq zaqkhav maqgeuf nya-ar. Tiq ghaq-anr byae nar-aq, tiq ghaq-anr gaq-eu mae. Maqngeur nar-aq, tiq ghaq-anr yawzeu baw-awr, tiq ghaq-anr yaeqbawq-aer ghae-eu mae. Nawmaf, tiqyamq-euq lafkhoer, Miqyaer-euq hawr-eu pyurshuir myawqganq-euq kuirlaf zaqkhav maq geufnya-a.

Maꞈtehˬ 6:24 Referans Kwoze

Luˇkaꞈ 16:13

“Tsawˇ haˬ tiˬ gʼaˬ-iˬ baw leˬ nyiˬ gʼaˬ-euˬ zaˬ kʼaˆ maˬ geuꞈ nya-a. Tiˬ gʼaˬ-ahˇ bye naˇ, tiˬ gʼaˬ-ahˇ gaˬ tehꞈ-a. Tiˬ gʼaˬ-ahˇ yaw zeu baw naˇ, tiˬ gʼaˬ-ahˇ yaw zeu maˬ baw-aˇ. Naw maꞈ, Miˬyehˇ-euˬ zaˬ kʼaˆ hawˇ-eu pyuˇ shuiˇ myawˬ gahˬ-euˬ zaˬ kʼaˆ, nyiˬ jeˬ luꞈ tiˬ kawˆ loꞈ-ehˇ maˬ geuꞈ nya-a.”

Yaˬkoˆ 4:4

Miˬyehˇ-ahˇ saˇ jaˇ maˬ ziꞈ-eu tsawˇ haˬ deuˬ-oˇ, miˇ tsaˬ heu-ahˇ cawˬ cawˬ taꞈ-eu jeˬ-aˬ, Miˬyehˇ-ahˇ muiˇ-eu jeˬ pyeuꞈ-eu meh lehˇ naw maꞈ maˬ siˬ nya te loˇ. Miˇ tsaˬ heu-ahˇ cawˬ kʼaˇ cawˬ taꞈ mawꞈ-eu tsawˇ haˬ-aˬ, Miˬyehˇ-ahˇ muiˇ-eu tsawˇ haˬ pyeuꞈ laˇ ni mˇ gaˇ duˇ-eu meh.

Gaˬlaˬtiˆ 1:10

Tsawˇ haˬ zaˬ ngaˬ-ahˇ nui ma tsaˬ ni ngaˇ mˇ luꞈ-eu nga loˇ. Maˬ ngeuˇ. Miˬyehˇ nui ma tsaˬ-eu jeˬ-ahˇ ngaˇ mawꞈ-eu ma. Tsawˇ haˬ zaˬ nui kʼahˇ shiˇ-eu jeˬ-ahˇ ngaˇ leh jeh luꞈ-eu nga loˇ. Kʼoeˇ loꞈ-ehˇ mˇ naˇ, ngaˇ Ka li-euˬ zaˬ kʼaˆ maˬ paˇ ngeuˇ-aˇ.

Yawˇshuˆ 24:15

Aˬ yawꞈ-ahˇ naw maꞈ uˬ duˬ maˬ tahˬ mawꞈ te lehˇ ngeuˇ naˇ, aˬ geu gʼaˬ-ahˇ uˬ duˬ tahˬ nmˇ lehˇ iˬ nah noeˬ tsehˆ-awˬ. Maˬsoˬpoˬtaˬmiˇ miˇ kʼahˬ-ahˇ naw maꞈ-euˬ aˬ poeˬ aˬ bawˇ deuˬ uˬ duˬ tahˬ-euˬ miˬ yehˇ deuˬ-ahˇ uˬ duˬ tahˬ nmˇ loˇ. Maˬ ngeuˇ naˇ, iˬ nah naw maꞈ jawˇ luꞈ-eu miˇ kʼahˬ-ahˇ jawˇ-eu Aˬ mawˇ liˆ tsawˇ haˬ deuˬ-euˬ miˬ yehˇ deuˬ-ahˇ uˬ duˬ tahˬ nmˇ loˇ lehˇ noeˬ tsehˆ-awˬ. Ngaˇ hawˇ-eu ngaˬ-eu miˬ sawˇ zaˬ deuˬ law nmˇ-aˬ, Sahˬpaˬ Miˬyehˇ-ahˇ uˬ duˬ tahˬ ma.”

Maꞈtehˬ 4:10

Kʼoeˇ ngeh jawˇ, Yeˬsuˇ ehˇ-eu, “Saˬdaˬ-oˇ, doˆ-iˇ-awˬ. ‘Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ tehꞈ-ehˇ nawˇ uˬ duˬ ya tahˬ-awˇ, aˬ yawꞈ-euˬ nui kʼahˇ tehꞈ-ehˇ ya mˇ meh’ lehˇ, Jaˇ liꞈ laꞈ kʼoeˇ boꞈ taˬ-euˬ meh.”

Luˇkaꞈ 16:11

Miˇ tsaˬ pyuˇ shuiˇ myawˬ gahˬ-ahˇ naw maꞈ tuˆ tehˬ ngeh, saˇ jaˇ maˬ ziꞈ naˇ, maˇ maˇ ni gʼeh-eu pyuˇ shuiˇ myawˬ gahˬ-ahˇ bi tuˆ tehˬ-eu gʼaˇ duˬ naw maꞈ-ahˇ aˬ suˇ gʼaˬ jah coeˇ nmˇ.

1 Sahˬpaˬ 18:21

Tsawˇ haˬ kʼoeˇ deuˬ jawˇ gaˇ Eˇliˇyaˆ le-awˇ, “Naw maꞈ-euˬ nui ma laꞈ kʼoeˇ nyiˬ jeˬ noeˬ noeˬ-ehˇ aˇ myah keuˆ ni jawˇ-eu gʼeh te. Sahˬpaˬ Miˬyehˇ-aˬ, Miˬyehˇ pyeuꞈ-eu meh lehˇ ngeuˇ naˇ, aˬ yawꞈ-ahˇ uˬ duˬ tahˬ-awˬ. Ehˇ kʼawꞈ, Baˬlaˇ miˬ yehˇ-aˬ, Miˬyehˇ pyeuꞈ-eu meh lehˇ ngeuˇ naˇ kʼawꞈ, aˬ yawꞈ-ahˇ uˬ duˬ tahˬ-awˬ” lehˇ ehˇ kʼawꞈ, tsawˇ haˬ kʼoeˇ deuˬ dawˬ tiˬ dawˬ-iˬ maˬ ngehˬ-a.

1 Tiˆmoˇseˬ 6:17

Miˇ tsaˬ heu kʼoeˇ taˆ dehꞈ ngeh smˇ muiˬ muiˬ-eu tsawˇ haˬ deuˬ-ahˇ nui ma taˬ huiˬ lehˇ ehˇ nehˬ-awˬ. Yaw duˬ maˬ baw-eu pyuˇ shuiˇ myawˬ gahˬ deuˬ-ahˇ maˬ noeˬ tmˬ-ehˇ, aˬ dui laˬ kʼaˬ ya cehˇ ni yawˬ jeˬ na luꞈ tiˬ byah tiˬ loꞈ biꞈ laˬ-eu gʼaˬ pyeuꞈ-eu Miˬyehˇ-ahˇ noeˬ tmˬ-awˬ lehˇ mehˬ nehˬ-awˬ.

1 Saˬmeuˬlaˆ 7:3

Iˇsaˬleˬlaˆ tsawˇ haˬ deuˬ-ahˇ Saˬmeuˬlaˆ laˇ ehˇ nehˬ-eu, “Naw maꞈ-euˬ nui ma gʼawˇ mawˇ dawˬ tawˆ luꞈ Sahˬpaˬ Miˬyehˇ jawˇ gaˇ gʼoꞈ laˇ ma lehˇ ngeuˇ naˇ, aˬ cawˬ tsawˇ jeuˬ-euˬ miˬ yehˇ dawˬ tawˆ luꞈ hawˇ-eu Aˬshaˇtaˬyoˇ miˬ yehˇ ma-euˬ tahˬ pahˬ aˬ ma mawˇ kawˇ-ahˇ naw maꞈ ya byehˇ dzeh yaꞈ meh. Naw maꞈ-euˬ nui ma gʼawˇ mawˇ dawˬ tawˆ luꞈ Sahˬpaˬ Miˬyehˇ-ahˇ aˬ diˇ aˬ maˇ a nehˬ-awˇ, aˬ yawꞈ-ahˇ tehꞈ-ehˇ uˬ duˬ tahˬ-awˬ. Piˇliˇtiˆ tsawˇ haˬ-euˬ aˬ laꞈ laꞈ kʼoeˇ, naw maꞈ-ahˇ aˬ yawꞈ ka kʼoꞈ nehˬ laꞈ tehꞈ-a.”

2 Sahˬpaˬ 17:41

Tsawˇ haˬ kʼoeˇ deuˬ Sahˬpaˬ Miˬyehˇ-ahˇ uˬ duˬ tahˬ-euˬ kʼawꞈ, aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ-ahˇ kʼawꞈ, uˬ duˬ tahˬ-euˬ meh. aˬ yawꞈ maꞈ-euˬ zaˬ deuˬ uˆ deuˬ iˬ nah keuˆ ni, kʼoeˇ loꞈ-ehˇ mˇ luꞈ shaˇ luꞈ-eu meh.

Luˇkaꞈ 16:9

“Ngaˇ naw maꞈ-ahˇ ehˇ nehˬ nyaˇ. Miˇ tsaˬ pyuˇ shuiˇ myawˬ gahˬ-ahˇ gʼoe-awˇ, aˬ cawˬ-ahˇ cawˬ cawˬ taꞈ-awˬ. Kʼoeˇ loꞈ-ehˇ jahˇ naˇ, pyuˇ shuiˇ myawˬ gahˬ kʼoeˇ deuˬ byoˆ-iˇ jiˇ ngeh, mˬ maˬ maˬ byaˆ zaˇ ziˇ ziꞈ-eu jawˇ duˬ laꞈ kʼoeˇ, naw maꞈ-ahˇ ha geuꞈ nehˬ laꞈ tehꞈ-a.

Yeˬsaˬgeˬlaˇ 20:39

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ehˇ-eu “Iˇsaˬleˬlaˆ tsawˇ haˬ deuˬ-oˇ, nymˬ-mˇ naw maꞈ-euˬ nui kʼahˇ mˇ-awˬ. Tahˬ pahˬ aˬ ma mawˇ kawˇ deuˬ-ahˇ uˬ duˬ tahˬ tahˬ-ehˇ jawˇ tawˬ-awˬ. Tahˬ pahˬ aˬ ma mawˇ kawˇ deuˬ-ahˇ damˬ nehˬ-eu laꞈ kʼoeˇ ngaˬ-euˬ muiˬ-eu shawˇ-eu tsawˇ myahˇ-ahˇ yehˬ bawˬ-ehˇ maˬ gʼeh nya-eu aˇ yamˬ keuˆ le tehꞈ-a lehˇ, naw maꞈ-ahˇ ngaˇ yaw kʼaˆ kʼaˆ-ehˇ ehˇ-eu ma.

2 Tiˆmoˇseˬ 4:10

Deˬmaˆ-aˬ, heu ziˇ-ahˇ taꞈ-eu miˇ tsaˬ heu-ahˇ gaˬ-eu miˇ neh, ngaˬ-ahˇ byehˇ dzeh yaꞈ-awˇ Teˇsaˬloˇni meuˬ-ahˇ iˇ-euˬ meh. Gaˬleˬgeˬ gʼaˬ-aˬ, Gaˬlaˬtiˆ miˇ kʼahˬ-ahˇ iˇ-awˇ, Tiˇtuˆ gʼaˬ-aˬ, Daˬlaˬmaˬdiˇ miˇ kʼahˬ-ahˇ iˇ-euˬ meh.

Zeˬpaˬniˇ 1:5

Nymˇ mˬ kʼoeˇ taˆ pawˬ dmˬ dmˬ-awˇ, nahˇ ma ba la aˬ guiˇ deuˬ-ahˇ, uˬ duˬ kʼaˇ tahˬ-eu tsawˇ haˬ deuˬ, ngaˇ laˆ cawˆ gaˇ ya daˬ tehꞈ-a. Ngaˬ-ahˇ uˬ duˬ tahˬ-eu geuꞈ-awˇ, Miˇlaˬkoˬ-ahˇ kʼaˇ gʼoe-euˬ deuˬ, laˆ cawˆ nehˬ gaˇ ya daˬ tehꞈ-a.

Aˇ dahˬ 47:17

Kʼoeˇ naˇ, miˇ kʼahˬ zaˬ deuˬ yawˬ ha-euˬ mahˬ, yawˇ, ciꞈ myehꞈ, mawˇ neˇ, mahˬ tahˬ laˆ deuˬ teh leꞈ-awˇ, Yoˇsehˆ jawˇ gaˇ cehˇ paˇ dzaˬ le-euˬ meh. Aˬ yawꞈ maꞈ-euˬ jeˬ zaˬ kʼoeˇ deuˬ-ahˇ cehˇ neh paˇ nehˬ-awˇ, kʼoeˇ ngeh kʼoꞈ, kʼoꞈ bi dehꞈ doˆ-euˬ meh.