Jaceuq 69:21 - Akha

²¹ Ngaˇ hawˬ mehꞈ ngeh aˬ yawꞈ maꞈ dzaˇ doꞈ biꞈ laꞈ-awˇ, ngaˇ iˇ cuꞈ mehꞈ ngeh doꞈ ahˇ-eu iˇ cuꞈ ciˬ nehˬ laꞈ-eu meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

²¹ Ngar dzaq-eu gharduq, aqyawfmaf, ngaq-anr pyaqkuir bidzaq naeqlaf-awr, Ngar ircuf maef ngae, aqyawfmaf, ngaq-anr caermyawvni ghae-eu ircuf bidawr naeqlaf-euq mae.

Jaceuq 69:21 Referans Kwoze

Maꞈtehˬ 27:34

Kʼoeˇ gaˇ le keuˆ ngeh, aˬ yawꞈ maꞈ aˬ yawꞈ-ahˇ yaw kʼaˬ jeˬ keuˬ taˬ-euˬ aˬ gaꞈ dzaˇ uiˇ ciˬ nehˬ-awˇ bi dawˇ-euˬ meh. Ehˇ kʼawꞈ, aˬ yawꞈ ui cuiˆ myeuꞈ haw-awˇ, maˬ dawˇ ni byehˇ-euˬ meh.

Luˇkaꞈ 23:36

Yehˇ deuˬ kʼawꞈ, aˬ yawꞈ-ahˇ yehˬ bawˬ sehˇ lu-ehˇ ehˇ niˇ gʼa-eu meh. Aˬ yawꞈ maꞈ aˬ yawꞈ jawˇ gaˇ le-awˇ, cehˇ myawˆ ni gʼeh-eu aˬ gaꞈ dzaˇ uiˇ ciˬ nehˬ-awˇ ehˇ-eu,

Maˬkuˆ 15:23

Aˬ yawꞈ maꞈ aˬ yawꞈ-ahˇ muˇlaˬ lehˇ kuˇ-eu jaˆ gʼaˬ yaw saw jeˬ keuˬ taˬ-euˬ aˬ gaꞈ dzaˇ uiˇ bi dawˇ-euˬ meh. Ehˇ kʼawꞈ, aˬ yawꞈ maˬ dawˇ-a.

Maꞈtehˬ 27:48

Aˬ yawꞈ maꞈ tiˬ gʼaˬ coeˬ daˆ gʼeh-awˇ, behˇ baˆ laꞈ daˬ-ahˇ duˇ-eu laˆ shaˆ iˇ jaˬ caˆ luˆ tiˬ luˆ yuˇ-awˇ, aˬ gaꞈ dzaˇ uiˇ uiˇ cehˇ-ahˇ laˆ duiˆ-awˇ, aˇ toꞈ aˇ kahˬ mehˬ dzaˬ-ahˇ gʼoˆ tehˬ-awˇ, Yeˬsuˇ-ahˇ cawˬ miˇ nehˬ-awˇ bi cuˆ dawˇ-eu lehˇ gʼeh-eu meh.

Maˬkuˆ 15:36

Aˬ yawꞈ maꞈ laꞈ kʼoeˇ tiˬ gʼaˬ, behˇ baˆ laꞈ daˬ-ahˇ duˇ-eu laˆ shaˆ iˇ jaˬ caˆ luˆ tiˬ luˆ yuˇ-awˇ coeˬ daˆ gʼeh-awˇ, aˬ gaꞈ dzaˇ uiˇ yaw byawˬ-ahˇ laˆ duiˆ-awˇ, aˇ toꞈ aˇ kahˬ-euˬ mehˬ dzaˬ-ahˇ gʼoˆ tehˬ-awˇ, Yeˬsuˇ bi cuˆ dawˇ-eu lehˇ cawˬ miˇ nehˬ-awˇ ehˇ-eu, “Taˬ tehˬ lawˬ siˬ. Eˇliˇya oe-awˇ aˬ yawꞈ-ahˇ laꞈ yaꞈ kʼoeˇ taˆ neh ciˬ ka nehˬ le nga loˇ lehˇ tiˬ kʼehˬ dawˬ haw kaˇ-euˇ.”

Yeˬlaˬmiˇ 9:15

Teu baˬ da neh Iˇsaˬleˬlaˆ-euˬ Miˬyehˇ, Baoˬ huiˬ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ gaˇ naˇ haˬ sheˇ. Ngaˇ heu loꞈ-ehˇ jahˇ ma. Ngaˬ-euˬ tsawˇ haˬ deuˬ-ahˇ kʼaˬ jehꞈ ni gʼeh-eu aˇ bawˇ bi teuꞈ-awˇ, dzaˇ doꞈ bi dawˇ ma.

Yeˬlaˬmiˇ 8:14

Miˬyehˇ-euˬ tsawˇ haˬ deuˬ ehˇ-eu, “Aˬ jeˬ miˇ neh aˬ dui maꞈ dzuˇ dzuˇ-ehˇ jawˇ te. Ziꞈ dah ni gʼeh-eu meuˬ deuˬ-ahˇ cehˆ-awˇ, kʼoeˇ gaˇ shiˇ leˇ kaˇ-euˇ. Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, aˬ dui kʼoeˇ taˆ shiˇ-eu jeˬ bi keuˆ le-euˬ meh. Aˬ dui aˬ yawꞈ-ahˇ mˇ lehˬ-euˬ miˇ neh, aˬ dui-ahˇ dzaˇ doꞈ bi dawˇ laꞈ-euˬ meh.

Dawˬmehˬ 29:18

Iˬ nah heu gaˇ yawꞈ luꞈ-eu kʼaˬ dzeˇ zaˬ hawˇ-eu zaˬ miˬ zaˬ aˬ geu gʼaˬ maˬ kaˬ, nymˇ jiˇ aˬ geu jiˇ maˬ kaˬ, tsawˇ jeuˬ aˬ geu jeuˬ maˬ kaˬ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ byehˇ dzeh-awˇ, aˬ cawˬ tsawˇ jeuˬ-euˬ miˬyehˇ deuˬ-ahˇ uˬ duˬ maˬ ya tahˬ ni, yaw kʼaˆ kʼaˆ-ehˇ yahˇ-awˬ. Kʼoeˇ loꞈ-ehˇ mˇ-eu jeˬ-aˬ, kʼaˬ jehꞈ ni gʼeh-awˇ doꞈ kʼaˆ dui dui-eu aˇ bawˇ bi bawˇ laˇ-eu duˬ ciˇ-ahˇ duˇ-eu meh.

Yeˬlaˬmiˇ 23:15

Kʼoeˇ miˇ neh Yeˬluˇsaˬlehˬ-ahˇ jawˇ-eu Miˬyehˇ gʼaˇ duˬ ngehˬ dah-eu tsawˇ haˬ deuˬ gaˇ kawˆ, Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Aˬ yawꞈ maꞈ-ahˇ ngaˇ doꞈ yawˇ bi dzaˬ-awˇ, doꞈ dawˆ-euˬ iˇ cuꞈ bi dawˇ ma. Aˬ jeˬ miˇ neh ehˇ naˇ, miˇ kʼahˬ heu kʼahˬ doe ni, Miˬyehˇ nui ma maˬ tsaˬ-eu jeˬ, aˬ yawꞈ maꞈ mˇ byah taˬ-euˬ meh.”

Dawˬ tsoˆ 4:1

Nahˇ ma heu siˬ uˬ moˆ kʼehˬ-eu kʼaˆ-eu jeˬ dawˬ tawˆ luꞈ-ahˇ ngaˇ paˇ ya mawˇ-euˬ ma. Kʼehˬ-eu kʼaˆ-eu jeˬ-ahˇ ya daˬ luꞈ-eu tsawˇ haˬ deuˬ myaˆ biˇ yoeˇ luꞈ-awˇ, ngehˬ gʼeh nehˬ-eu gʼaˬ maˬ jawˇ-a. Aˬ yawꞈ maꞈ-ahˇ kʼehˬ luꞈ-eu deuˬ jawˇ paw gʼaˬ kʼaˆ-eu miˇ neh, tiˬ gʼaˬ-iˬ ngehˬ maˬ gʼeh nehˬ peuˬ-a.

Ngoeˇ dawˬ 1:2

Uˬ ciꞈ miˇ lah-ehˇ ngoeˇ bya-awˇ, baˬ ba myaˆ biˇ lawˇ gawˆ yoeˇ kʼawꞈ, aˬ yawꞈ-ahˇ gaˬ-euˬ tsawˇ haˬ deuˬ, haw cawˬ le-eu gʼaˬ maˬ jawˇ-a. Cawˬ deuˬ yawꞈ-ahˇ saˇ jaˇ puiˬ-awˇ, muiˇ-eu tsawˇ haˬ pyeuꞈ jiˇ-euˬ meh.

Ngoeˇ dawˬ 1:9

Pi di yaw jawꞈ mawˇ jiˇ laˇ-awˇ, yawˬ ha-euˬ daˬ maˬ shaˇ noeˬ-a. Coˬ dzeh-iˇ-euˬ naˇ dui dui-awˇ, haw cawˬ nehˬ-eu gʼaˬ maˬ jawˇ-a. “Sahˬpaˬ Miˬyehˇ ngaˬ-ahˇ haw sheˇ. Muiˇ-eu deuˬ ngaˬ-ahˇ gʼaˬ leˇ-awˇ, ngaˇ ya daˬ luꞈ gaˇ haw le sheˇ.”