Iˇsaˬyaˇ 53:11 - Akha

¹¹ Shaˬ-eu zahˬ-euˬ jeˬ-ahˇ aˬ yawꞈ dehꞈ dzeuˇ gʼaˬ ngeh, nui saˇ oꞈ-eu laꞈ kʼoeˇ paˇ ya dehꞈ-awˇ, shaˬ-eu zahˬ-eu jeˬ-ahˇ ya daˬ-euˬ kʼoeˇ, yawˬ ngehꞈ maˬ ngeuˇ-a lehˇ ya siˬ tehꞈ-a. Ngaˇ nui kʼahˇ shiˇ-eu ngaˬ-euˬ zaˬ kʼaˆ-aˬ, tsawˇ haˬ gʼawˬ mya gʼaˇ duˬ kʼehˬ-eu kʼaˆ-eu jeˬ-ahˇ daˬ-awˇ, aˬ yawꞈ baˬ da neh tsawˇ haˬ kʼoeˇ deuˬ-ahˇ ngaˇ iˬ baˇ pyehˬ ma.

Iˇsaˬyaˇ 53:11 Referans Kwoze

1 Beˬtuˆluˆ 2:24

Iˬ baˇ laꞈ kʼoeˇ aˬ dui maˬ paˇ dehꞈ ni shiˇ tsehˆ yaꞈ-awˇ, yaw tsaˬ yaw dawˇ jeˬ gʼaˇ duˬ yaw dehˬ dehꞈ nya ni aˬ dui-euˬ iˬ baˇ-ahˇ Ka li aˬ yawꞈ-euˬ gʼawˇ mawˇ laꞈ kʼoeˇ pi-awˇ, laꞈ yaꞈ kʼoeˇ taˆ kamˇ shiˇ-euˬ meh. Aˬ yawꞈ ya daˬ-euˬ maˇ kʼehˬ maˇ naˇ baˬ da neh naw maꞈ-euˬ naˇ gawˇ taˬ leˇ-euˬ meh.

Lormav 4:24

Sahˬpaˬ Yeˬsuˇ-ahˇ shiˇ-euˬ gaˇ paˇ bi gʼoꞈ dehꞈ laˇ-euˬ Miˬyehˇ-ahˇ jah-awˇ, yaw tsaˬ yaw dawˇ tsawˇ haˬ lehˇ bi sawˇ-eu lehˇ gʼeh-eu aˬ dui-euˬ gʼaˇ duˬ kʼawꞈ boꞈ taˬ-euˬ jeˬ pyeuꞈ-eu meh.

Yoˇhaˬ 17:3

Nawˇ tiˬ gʼaˬ tehꞈ-ehˇ maˇ maˇ ni Miˬyehˇ meh lehˇ siˬ nya-awˇ, nawˬ neh kʼehˇ gʼeh leꞈ-euˬ Yeˬsuˇ Ka li-ahˇ siˬ nya-eu kʼoeˇ-aˬ, mˬ maˬ maˬ byaˆ zaˇ ziˇ dehꞈ-eu jeˬ pyeuꞈ-eu meh.

Iˇsaˬyaˇ 53:12

Kʼoeˇ miˇ neh aˬ yawꞈ-ahˇ ngaˇ taˬ huiˬ taˬ mahˇ nehˬ-awˇ, baoˬ huiˬ-eu deuˬ-euˬ jawˇ duˬ-ahˇ bi jawˇ ma. Haiˬ-eu tsawˇ haˬ deuˬ ya daˬ-eu yaw doeˇ aˬ yawꞈ daˬ-awˇ, nui ma keuˆ-eu laꞈ kʼoeˇ shiˇ dah-euˬ meh. Tsawˇ haˬ gʼawˬ mya ni-euˬ iˬ baˇ aˬ yawꞈ pi-awˇ, aˬ yawꞈ maꞈ iˬ baˇ ya buˬ ni mˇ dah-euˬ meh.”

1 Beˬtuˆluˆ 3:18

Tsawˇ haˬ zaˬ-euˬ iˬ baˇ gʼaˇ duˬ Ka li tiˬ poˆ tehꞈ-ehˇ kamˇ shiˇ-euˬ meh. Aˬ yawꞈ kamˇ shiˇ-euˬ kʼoeˇ-aˬ, iˬ baˇ zaˬ deuˬ-ahˇ Miˬyehˇ jawˇ gaˇ sheuˬ gʼeh-eu gʼaˇ duˬ, iˬ baˇ maˬ ahˇ-eu tsawˇ haˬ tiˬ gʼaˬ iˬ baˇ zaˬ deuˬ-euˬ dah zaˇ kamˇ shiˇ-euˬ jeˬ pyeuꞈ-awˇ, mˬ maˬ maˬ byaˆ zaˇ ziˇ gʼaˇ duˬ tiˬ poˆ tehꞈ-ehˇ kamˇ shiˇ-euˬ jeˬ pyeuꞈ-eu meh. Shiˬ shaˬ jiˇ paw taꞈ leˇ-awˇ aˬ yawꞈ-ahˇ sehꞈ-euˬ kʼawꞈ, saꞈ laˇ paw taꞈ leˇ-awˇ Miˬyehˇ neh aˬ yawꞈ-ahˇ bi dehꞈ-euˬ meh.

HeˬByehˇ 12:2

Aˬ dui-euˬ myaˆ nuiˆ Yeˬsuˇ-ahˇ haw tsoˆ taˬ kaˇ-euˇ. Aˬ dui Miˬyehˇ-ahˇ aˇ dahˬ beh ngeh neh aˇ saˬ saˬ ngeh keuˆ ni jah-euˬ-aˬ, aˬ yawꞈ baˬ da neh ma. Laꞈ yaꞈ baˬ da neh aˬ yawꞈ nui ma maˬ cawˆ-a. Aˬ yawꞈ-euˬ mehˬ shi jaˆ luꞈ-eu laˬ kʼaˬ cehˇ-eu jeˬ baˬ da neh, laꞈ yaꞈ kʼoeˇ taˆ ya shiˇ-eu daˬ ga dui dui-eu jeˬ-ahˇ aˬ yawꞈ kʼahˬ maˬ lahˇ-a. Nymˬ-mˇ aˬ yawꞈ Miˬyehˇ-euˬ dzoeˬ dzaˬ nuiˇ mahˬ-euˬ aˇ maˇ paw nuiˇ luꞈ-eu meh.

1 Yoˇhaˬ 2:1

Ngaˇ gaˬ dui dui-eu zaˬ deuˬ-oˇ, naw maꞈ iˬ baˇ maˬ bi mˇ-eu gʼaˇ duˬ, gaˇ kawˆ heu deuˬ naw maꞈ jawˇ gaˇ ngaˇ boꞈ ahˇ laꞈ-eu jeˬ pyeuꞈ-eu ma. Ehˇ kʼawꞈ, tsawˇ haˬ tiˬ gʼaˬ na iˬ baˇ mˇ lawˬ naˇ, aˬ dui-euˬ dah zaˇ Aˬda Miˬyehˇ-ahˇ tahˬ shaˇ leˇ-eu gʼaˬ jawˇ ma. Kʼoeˇ-aˬ, yaw tsaˬ yaw dawˇ tsawˇ haˬ pyeuꞈ-eu Yeˬsuˇ Ka li meh.

HeˬByehˇ 9:28

Kʼoeˇ gaˇ duˇ ni, tsawˇ haˬ gʼawˬ mya ni-euˬ iˬ baˇ yuˇ dzeh-eu gʼaˇ duˬ, Ka li-euˬ gʼawˇ mawˇ tiˬ poˆ lawˇ dah-euˬ meh. Aˬ yawꞈ tiˬ poˆ paˇ doˆ le tehꞈ-a. Ehˇ kʼawꞈ, iˬ baˇ shawˇ-eu gʼaˇ duˬ oe-euˬ maˬ ngeuˇ-a. Aˬ yawꞈ-ahˇ loꞈ luꞈ-eu tsawˇ haˬ deuˬ-ahˇ ka kʼoꞈ-eu gʼaˇ duˬ oe-euˬ jeˬ pyeuꞈ-eu meh.

1 Gawˇliˬtu 6:11

Naw maꞈ laꞈ kʼoeˇ tiˬ paˆ na deuˬ kʼoeˇ loꞈ-ehˇ dehꞈ dzeuˇ yaꞈ-euˬ meh. Ehˇ kʼawꞈ, naw maꞈ-ahˇ iˬ baˇ tsiˬ shawˇ nehˬ gʼaˬ-euˬ meh. Naw maꞈ-ahˇ Miˬyehˇ-euˬ aˬ laꞈ laꞈ kʼoeˇ a nehˬ gʼaˬ-euˬ meh. Naw maꞈ Miˬyehˇ-ahˇ tsaˬ leˇ tsahˇ leˇ ni, Sahˬpaˬ Yeˬsuˇ ka li hawˇ-eu Miˬyehˇ-euˬ Yaw sahˇ neh mˇ gʼaˬ-euˬ meh.

Yoˇhaˬ 16:21

Zaˬ miˬ zaˬ tiˬ gʼaˬ zaˬ baw-eu lehˇ gʼeh ngeh, shaˬ zahˬ ya mˇ-eu aˇ yamˬ keuˆ le-euˬ miˇ neh noeˬ shaˬ-eu meh. Ehˇ kʼawꞈ, zaˬ ciˬ doˆ leꞈ gʼaˬ ngeh, shaˬ zahˬ naꞈ-eu jeˬ-ahˇ ngehˇ jiˇ-eu meh. Aˬ jeˬ miˇ neh ehˇ naˇ, zaˬ tiˬ gʼaˬ miˇ tsaˬ kʼoeˇ taˆ dehꞈ doˆ le-euˬ miˇ neh, aˬ yawꞈ laˬ kʼaꞈ cehˇ-eu meh.

Maꞈtehˬ 20:28

Tsawˇhaˬ-euˬ Zaˬmaˇ kʼawꞈ, aˬ cawˬ neh bi mˇ cu-eu gʼaˇ duˬ oe-euˬ maˬ ngeuˇ-a. Aˬ cawˬ gʼaˇ duˬ mˇ le-euˬ uˬ taꞈ, tsawˇ haˬ gʼawˬ mya ni-ahˇ ka kʼoꞈ-eu gʼaˇ duˬ shiˇ dah le-eu lehˇ oe-euˬ meh.”

Iˇsaˬyaˇ 53:8

Aˬ yawꞈ-ahˇ nyehꞈ-awˇ yaˇ kʼaˬ daˇ nehˬ-awˇ, tsawˇ haˬ sehꞈ duˬ-ahˇ bi sheuˬ gʼeh-euˬ meh. Aˬ yawꞈ-euˬ guiˬ lahˬ kʼoeˇ naˆ ni doeˇ kʼawꞈ, aˬ yawˬ-ahˇ gʼawˬ shaˬ gaˬ-eu maˬ jawˇ-a. Aˬ dui-euˬ tsawˇ jeuˬ neh mˇ-euˬ iˬ baˇ aˇ poeˬ, aˬ yawꞈ ya shiˇ dah-eu jeˬ pyeuꞈ-eu ma.

Iˇsaˬyaˇ 45:25

Yaˬkoˆ-euˬ zaˬ deuˬ uˆ deuˬ dawˬ tawˆ-ahˇ, ngaˇ Sahˬpaˬ Miˬyehˇ ka kʼoꞈ-awˇ, aˬ yawꞈ maꞈ ngaˬ-ahˇ ya ja ceuˬ tehꞈ-a.

Iˇsaˬyaˇ 42:1

Sahˬpaˬ Miˬyehˇ ehˇ-eu, “Heu-aˬ, ngaˬ-euˬ zaˬ kʼaˆ ma. Ngaˇ hehˇ tehˇ nehˬ luꞈ-eu gʼaˬ ma. Aˬ yawꞈ-ahˇ ngaˇ tseˇ doˆ-awˇ, nui kʼahˇ shiˇ luꞈ-eu gʼaˬ ma. Aˬ yawꞈ kʼoeˇ taˆ ngaˬ-euˬ Yaw sahˇ jawˇ-awˇ, tsawˇ jeuˬ yawˬ jeuˬ na luꞈ kʼoeˇ taˆ, yaw tsaˬ yaw dawˇ jeˬ aˬ yawꞈ bi keuˆ le tehꞈ-a.

2 Yoˇhaˬ 1:3

Aˬda Miˬyehˇ hawˇ-eu Aˬda Miˬyehˇ-euˬ Zaˬmaˇ Yeˬsuˇ Ka li neh biꞈ leꞈ-euˬ guiˬ lahˬ yaw dzahˇ maˬ ehˇ, gʼawˬ shaˬ gaˬ nehˬ laꞈ-eu jeˬ maˬ ehˇ, nui saˇ oꞈ-eu jeˬ maˬ ehˇ, aˬ dui kʼoeˇ taˆ jaˆ-awˇ, kʼoeˇ smˇ jeˬ luꞈ, yaw tsaˬ yaw dawˇ jeˬ hawˇ-eu gʼoeˇ-eu gaˬ-eu jeˬ laꞈ kʼoeˇ aˬ dui-ahˇ oꞈ luꞈ-uˇ.

2 Yoˇhaˬ 1:1

Tsawˇ mawˬ tsawˇ kʼaˆ pyeuꞈ-eu ngaˇ, Ngaˇ maˇ maˇ ni gaˬ dui dui-eu Miˬyehˇ neh tseˇ doˆ-euˬ zaˬ miˬ zaˬ hawˇ-eu aˬ yawꞈ-euˬ zaˬ deuˬ jawˇ gaˇ sahˬ boꞈ heu taꞈ boꞈ ahˇ laꞈ-eu ma. Ngaˇ tehꞈ-ehˇ maˬ ngeuˇ ni, yaw tsaˬ yaw dawˇ jeˬ-ahˇ kʼaˇ siˬ nya-eu tsawˇ haˬ dawˬ tawˆ luꞈ naw maꞈ-ahˇ gaˬ-eu meh.

2 Beˬtuˆluˆ 3:18

Ehˇ kʼawꞈ, ka kʼoꞈ-eu gʼaˬ pyeuꞈ-eu aˬ dui-euˬ Sahˬpaˬ Yeˬsuˇ Ka li-euˬ guiˬ lahˬ yaw dzahˇ laꞈ kʼoeˇ hawˇ-eu aˬ yawꞈ-ahˇ siˬ nya-eu jeˬ laꞈ kʼoeˇ huiˬ laˇ mahˇ laˇ luꞈ-eu jeˬ taˬ bi tsehˆ-iˇ. Nymˬ-mˇ hawˇ-eu mˬ maˬ maˬ byaˆ zaˇ ziˇ aˬ yawꞈ yaw shehꞈ kʼahˬ sehˇ huiˬ luꞈ-uˇ. Aˬ miˬ

Gaˬlaˬtiˆ 4:19

Ngaˇ gaˬ-eu ngaˬ-euˬ zaˬ deuˬ-oˇ, Ka li-euˬ aˇ gʼehˇ naw maꞈ laꞈ kʼoeˇ ahˇ laˇ ni, zaˬ baw luꞈ-eu aˬ ma tiˬ gʼaˬ uˬ maˆ naˇ-eu shaˬ-eu loꞈ-ehˇ naw maꞈ gʼaˇ duˬ ngaˇ shaˬ zahˬ mˇ-eu maˬ tsehˆ leˇ nya.

2 Gawˇliˬtu 4:6

“Yaw zahˇ laꞈ kʼoeˇ yaw shehꞈ bya tehꞈ-a” lehˇ ehˇ-eu Miˬyehˇ hawˇ-eu Ka li-euˬ myaˆ pyawˬ kʼoeˇ taˆ bya doˆ le-euˬ Miˬyehˇ-euˬ yaw shehꞈ kʼahˬ sehˇ-ahˇ nga maꞈ siˬ nya laˇ ni nga maꞈ-euˬ nui ma laꞈ kʼoeˇ yaw shehꞈ bi bya laꞈ-euˬ Miˬyehˇ-aˬ, aˬ yawꞈ tiˬ gʼaˬ tehꞈ meh.

Lormav 5:9

Miˬyehˇ-ahˇ aˬ dui tsaˬ leˇ tsahˇ leˇ nya ni aˬ yawꞈ shiˇ dah coeˇ gaˇ keuˆ-eu-aˬ, kʼoeˇ naˆ maˬ tseˇ, Miˬyehˇ nui ma pehˇ-eu jeˬ-ahˇ aˬ dui maˬ ya daˬ ni aˬ yawꞈ maˬ ka kʼoꞈ nehˬ laꞈ-aˇ loˇ.

Yoˇhaˬ 12:24

Ngaˇ naw nyaꞈ-ahˇ maˇ jawˆ ni ehˇ-eu ma. Cehˇ cehˇ nuiˆ tiˬ nuiˆ-aˬ, miˇ tsaˬ-ahˇ ga-iˇ-awˇ maˬ shiˇ kʼoeˇ keuˆ ni, cehˇ cehˇ nuiˆ tiˬ nuiˆ tehꞈ meh. Ehˇ kʼawꞈ, cehˇ cehˇ nuiˆ kʼoeˇ nuiˆ shiˇ ngeh, cehˇ cehˇ nuiˆ gʼawˬ mya ni paˇ myaˬ laˇ-eu meh.

Luˇkaꞈ 22:44

Aˬ yawꞈ nui ma shaˬ zahˬ mˇ dui dui-eu laꞈ kʼoeˇ, yaw beh naˆ maˬ tseˇ guiˬ lahˬ paˇ shaˇ dui dui-euˬ meh. Shiˬ miˇ tsa dzaˆ ka-eu loꞈ-ehˇ, aˬ yawꞈ kuˬ pyuˇ yoeˇ le-euˬ meh.

Iˇsaˬyaˇ 49:3

Aˬ yawꞈ ngaˬ-ahˇ heu loꞈ-ehˇ ehˇ-eu meh. “Iˇsaˬleˬlaˆ-oˇ, nawˇ ngaˬ-euˬ zaˬ kʼaˆ ma. Nawˇ baˬ da neh miˇ tsaˬ zaˬ deuˬ ngaˬ-ahˇ ja ceuˬ tehꞈ-a.”

Iˇsaˬyaˇ 52:13

Sahˬpaˬ Miˬyehˇ ehˇ-eu, “Ngaˬ-euˬ zaˬ kʼaˆ aˬ yawꞈ-ahˇ doˇ-eu gaˇ mˇ jiˇ tehꞈ-a. Ciˬ huiˬ ciˬ mahˇ nehˬ-eu guiˬ lahˬ-ahˇ aˬ yawꞈ za tehꞈ-a.

Daˬyeˬlaˇ 12:3

Zaˬ siˬ tsawˇ gahˇ byah-euˬ aˬ yuiꞈ aˬ tsu deuˬ mˬ loꞈ-ehˇ yaw shehꞈ bya-awˇ, tsawˇ haˬ gʼawˬ mya ni-ahˇ yaw tsaˬ yaw dawˇ jeˬ mˇ ni mehˬ nehˬ-euˬ deuˬ-aˬ, mˬ maˬ maˬ byaˆ zaˇ ziˇ aˬ guiˇ loꞈ-ehˇ yaw shehꞈ bya tehꞈ-a.”

Daˬyeˬlaˇ 9:24

“Shiꞈ tseˇ kʼoꞈ, shiꞈ poˆ lehˇ ehˇ-euˬ-aˬ, nawˬ-euˬ tsawˇ jeuˬ hawˇ-eu naw maꞈ-euˬ muiˬ-eu shawˇ-eu meuˬ-ahˇ iˬ baˇ hawˇ-eu yaw haiˬ jeˬ laꞈ kʼoeˇ ka kʼoꞈ nehˬ-eu gʼaˇ duˬ, Miˬyehˇ neh dza taˬ-euˬ aˇ yamˬ-ahˇ ehˇ-eu meh. Yaw sahˇ laꞈ kʼoeˇ kʼaˇ ya siˬ kʼaˇ ya mawˇ-euˬ loꞈ-ehˇ aˬ diˇ aˬ maˇ keuˆ le-awˇ, muiˬ-eu shawˇ-eu Uˬ duˬ tahˬ nymˇ nymˇ ma paˇ ya a nehˬ-eu aˇ nah bi keuˆ le-eu gʼaˇ duˬ, iˬ baˇ mˇ-eu jeˬ aˇ saˬ bi saˬ le-awˇ, mˬ maˬ maˬ byaˆ zaˇ ziˇ ziꞈ-eu yaw tsaˬ yaw dawˇ jeˬ ziꞈ dah ni bi jaˆ le tehꞈ-a.