Gawˇlawˇsehˇ 2:18 - Akha

¹⁸ Tsawˇ haˬ tiˬ paˆ na deuˬ yawˬ ha aˬ cawˬ-ahˇ maˬ duˇ-eu yaw sahˇ laꞈ kʼoeˇ ya siˬ ya mawˇ-eu jeˬ za taˬ-euˬ miˇ neh, aˬ cawˬ naˆ maˬ tseˇ huiˬ dzehˬ mahˇ dzehˬ ma lehˇ ehˇ-awˇ, yawˬ ha-euˬ gʼawˇ mawˇ-ahˇ taˬ nyiˇ-eu gaˇ kawˆ maˬ tsaˬ-eu jeˬ-ehˇ mehˬ-awˇ, mˬ taˆ gʼaˬ kʼehˇ-ahˇ uˬ duˬ ya tahˬ meh lehˇ ehˇ-eu meh. Kʼoeˇ loꞈ-ehˇ gʼeh-eu tsawˇ haˬ deuˬ neh naw maꞈ za paˬ-ehˇ gʼeh-eu laꞈ sawˬ deuˬ maˬ ya bi yuˇ doˆ geuꞈ ni yahˇ-awˬ. Kʼoeˇ loꞈ-ehˇ gʼeh-eu tsawˇ haˬ-aˬ, miˇ tsaˬ zaˬ deuˬ noeˬ-eu loꞈ-ehˇ noeˬ-awˇ, hawˬ haˇ yawˬ ha nui ma huiˬ luꞈ meh. Ehˇ kʼawꞈ, aˬ yawꞈ maꞈ kʼoeˇ loꞈ-ehˇ nui ma huiˬ-eu-aˬ, yawꞈ ngehꞈ meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹⁸ Gardanr maqtsoeq-eu gar shiqshaq nuilov-euq lafkhoer nuima huiq-awr, yawqha nae maq mawrhaw-euq jeq-anr banqgha-eu uqtaf, nuinanq nuiyu jaqmyawf anr-awr, mqtav ghaqkhaer-anr uqduq tanq-eu heudeuq-anr nuikhanr shir-eu tsawrhaq tiqghaq nae-iq, nawmaf-euq mrpoeq lafsawq maqbi shuirdovni yanr-awq.

Gawˇlawˇsehˇ 2:18 Referans Kwoze

Gawˇlawˇsehˇ 2:8

Tsawˇ haˬ zaˬ-euˬ zaˬ siˬ tsawˇ gahˇ-ahˇ gʼoe-awˇ mehˇ shuiˇ shuiˇ luꞈ-eu gaˇ dahˇ maˬ tsoeˬ-eu jaˬ myawꞈ kʼoeˇ deuˬ-euˬ zaˬ kʼaˆ maˬ ya geuꞈ ni yahˇ-awˬ. Kʼoeˇ-aˬ, Yeˬsuˇ Ka li laꞈ kʼoeˇ doˆ le-euˬ jeˬ maˬ ngeuˇ-a. Mˬ hawˇ-eu miˇ yaw kaˬ-ahˇ uˆ lahˇ-eu yaw sahˇ deuˬ-euˬ laꞈ-ahˇ neh, tsawˇ haˬ zaˬ neh tiˬ ziˇ saˇ-iˬ tiˬ ziˇ tawˬ ka leꞈ-euˬ mehˬ-eu tsoˆ-eu jeˬ pyeuꞈ-eu meh.

1 Tiˆmoˇseˬ 1:7

Aˬ yawꞈ maꞈ-aˬ, Miˬyehˇ-euˬ zahˇ dawˬ kʼoꞈ dawˬ gaˇ kawˆ mehˬ-eu tsoˆ-eu saˬ laˬ deuˬ geuꞈ mawꞈ-eu meh. Ehˇ kʼawꞈ, yawˬ ha aˬ jeˬ ngehˬ luꞈ-eu gaˇ kawˆ maˬ ehˇ, yawˬ ha nui ma huiˬ huiˬ-ehˇ ja luꞈ-eu gaˇ kawˆ-ahˇ maˬ ehˇ, yawˬ haˇ yawˬ ha siˬ duˬ-eu tsawˇ haˬ maˬ ngeuˇ-a.

Gawˇlawˇsehˇ 2:23

Tsawˇ haˬ zaˬ deuˬ mˬ taˆ gʼaˬ kʼehˇ-ahˇ uˬ duˬ ya tahˬ meh lehˇ aˬ yawꞈ maꞈ ehˇ-eu, yawˬ haˇ yawˬ ha taˬ nyiˇ-eu jahˇ geuꞈ-eu, guiˬ lahˬ saꞈ laˇ paw nui ma keuˆ dui dui-eu jahˇ geuꞈ-eu, yawˬ ha-euˬ gʼawˇ mawˇ-ahˇ yawˬ ha kʼehˬ-eu, heu deuˬ-ahˇ haw naˇ, zahˇ sahˇ kʼoꞈ kʼoeˇ deuˬ taˬ-euˬ tsawˇ haˬ deuˬ zaˬ siˬ tsawˇ gahˇ ahˇ ngaˇ lehˇ noeˬ paˬ-ehˇ gʼeh-eu meh. Ehˇ kʼawꞈ, zahˇ sahˇ Kʼoꞈ kʼoeˇ deuˬ-aˬ, shiˬ shaˬ jiˇ-euˬ nui kʼahˇ-ahˇ zuiˆ gʼaˬ nya-eu zahˇ sahˇ kʼoꞈ maˬ ngeuˇ-a.

1 Tiˆmoˇseˬ 4:1

Aˇ nah aˇ nah-ehˇ, tsawˇ haˬ tiˬ paˆ na deuˬ jah-eu jeˬ-ahˇ byehˇ dzeh tehꞈ-a lehˇ Yaw sahˇ Miˬyehˇ ehˇ-eu meh. Jaˬ myawꞈ myawꞈ-eu yaw sahˇ deuˬ-euˬ dawˬ-ahˇ aˬ yawꞈ maꞈ naˇ haˬ-awˇ, nehꞈ mehˬ-eu tsoˆ-eu mehˬ nah caw teh gʼeh tehꞈ-a.

2 Gawˇliˬtu 11:3

Eˇbaˆ-ahˇ aˇ lawˇ neh mehˇ shuiˇ bi shuiˇ tawˆ-euˬ loꞈ-ehˇ, Ka li-ahˇ maˇ maˇ ni shawˇ jehˆ ni gaˬ-eu naw maꞈ-euˬ nui ma bi tsahˇ pyawˇ gaˇ ngaˇ kʼahˬ lahˇ dui dui nya.

Lormav 1:25

Miˬyehˇ-euˬ gaˇ kawˆ tsaˬ-eu dawˇ-eu jeˬ yuˇ-awˇ, maˬ tsaˬ maˬ dawˇ-eu jaˬ myawꞈ myawꞈ-eu jeˬ-ahˇ paˇ geuꞈ-euˬ meh. Beh-euˬ yaw sahˇ gʼaˬ pyeuꞈ-eu Miˬyehˇ-ahˇ uˬ duˬ maˬ tahˬ ni, aˬ yawꞈ neh beh taˬ-euˬ jeˬ-ahˇ uˬ duˬ tahˬ-eu meh. Beh-euˬ yaw sahˇ gʼaˬ-ahˇ mˬ maˬ maˬ byaˆ zaˇ ziˇ ja ceuˬ luꞈ-uˇ. Aˬ miˬ.

Maꞈtehˬ 24:24

Aˬ jeˬ miˇ neh ehˇ naˇ, Ka li jaˬ myawꞈ deuˬ hawˇ-eu, Miˬyehˇ gʼaˇ duˬ ngehˬ dah-eu jaˬ myawꞈ deuˬ doˆ le tehꞈ-a. Aˬ yawꞈ maꞈ zahˬ dui dui leˇ paˬ-ehˇ gʼeh-eu jeˬ hawˇ-eu, kʼaˆ jeˬ-ehˇ gʼeh-eu jeˬ mˇ mehˬ-eu laꞈ kʼoeˇ, gʼeh nya naˇ, Miˬyehˇ neh tseˇ doˆ-euˬ tsawˇ haˬ deuˬ-ahˇ kʼawꞈ mehˇ shuiˇ shuiˇ tawˆ-awˇ, gaˇ ma sheuˬ bahˬ gʼeh tehꞈ-a.

Panmaeq 3:11

Ngaˇ yaw kawˇ-ehˇ oe ma. Naw maꞈ-euˬ gʼaˬ leˇ-eu laꞈ sawˬ-ahˇ tsawˇ haˬ tiˬ gʼaˬ-iˬ maˬ bi lu doˆ geuꞈ-eu gʼaˇ duˬ, naw maꞈ jaˆ luꞈ-eu jeˬ-ahˇ yaw muiˬ paˬ-ehˇ jeˬ hmˬ taˬ-awˬ.

1 Yoˇhaˬ 2:26

Naw maꞈ-ahˇ mehˇ shuiˇ shuiˇ geuꞈ-eu lehˇ leh jeh luꞈ-eu tsawˇ haˬ deuˬ gaˇ kawˆ ngaˇ naw maꞈ-ahˇ boꞈ ahˇ laꞈ-eu jeˬ pyeuꞈ-eu ma.

Piˇliˇpiˆ 3:14

Kʼoeˇ miˇ neh, laꞈ sawˬ za nya-eu gʼaˇ duˬ cehˆ keuˆ duˬ-ahˇ dawˇ coe ni cehˆ gʼeh luꞈ-eu ma. Cehˆ keuˆ duˬ kʼoeˇ-aˬ, mˬ kʼoeˇ taˆ ya jawˇ ni Yeˬsuˇ Ka li-ahˇ gʼoe-eu laꞈ kʼoeˇ Miˬyehˇ aˬ dui-ahˇ kuˇ luꞈ-eu kʼoeˇ meh.

Eˇpeˇsu 5:6

Gaˇ dahˇ maˬ tsoeˬ-eu dawˬ neh tsawˇ haˬ tiˬ gʼaˬ-iˬ naw maꞈ-ahˇ mehˇ shuiˇ taˬ bi shuiˇ tawˆ. Aˬ jeˬ miˇ neh ehˇ naˇ, kʼoeˇ loꞈ-ehˇ gʼeh-eu jeˬ baˬ da neh Miˬyehˇ ehˇ dawˬ maˬ naˇ haˬ-eu deuˬ kʼoeˇtaˆ Miˬyehˇ nui ma pehˇ-eu jeˬ keuˆ le tehꞈ-a.

1 Gawˇliˬtu 8:1

Naw maꞈ neh ngaˬ-ahˇ boꞈ naˇ haˬ laꞈ-euˬ tahˬ pahˬ aˬ ma mawˇ kawˇ-ahˇ lawˇ-euˬ dzaˇ gaˇ kawˆ-ahˇ taꞈ leˇ-awˇ, ngaˇ heu loꞈ-ehˇ ehˇ-eu ma. “Aˬ dui yawˬ gʼaˬ na luꞈ zaˬ siˬ tsawˇ gahˇ ahˇ ma” leˇ siˬ nya ma. Ehˇ kʼawꞈ, zaˬ siˬ tsawˇ gahˇ-aˬ tsawˇ haˬ zaˬ-ahˇ nui ma bi huiˬ laˇ-awˇ, gʼoeˇ-eu gaˬ-eu jeˬ-aˬ, tsawˇ haˬ zaˬ-ahˇ bi huiˬ bi mahˇ laˇ-eu meh.

Daˬyeˬlaˇ 11:38

Ehˇ kʼawꞈ, ziꞈ dah ni gʼeh-eu taˆ deuˬ-ahˇ haw piˇ-eu miˬ yehˇ-ahˇ aˬ yawꞈ yaw zeu baw tehꞈ-a. Aˬ yawꞈ-euˬ aˬ poeˬ aˬ bawˇ deuˬ tiˬ jawˇ-iˬ uˬ duˬ maˬ tahˬ haw-euˬ miˬ yehˇ-ahˇ, shuiˇ, pyuˇ, aˇ poeˬ kʼaˆ-eu kʼaˬ lo sehˇ hawˇ-eu, muiˬ dui dui-eu aˇ poeˬ kʼaˆ-eu laꞈ sawˬ deuˬ aˬ yawꞈ damˬ nehˬ tehꞈ-a.

Yeˬsaˬgeˬlaˇ 13:3

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Miˬyehˇ gʼaˇ duˬ ngehˬ dah-eu aˬ dzawˬ aˇ gah heu deuˬ shaˬ zahˬ naꞈ dui dui tehꞈ-a. Aˬ yawꞈ maꞈ yawˬ ha neh kʼaˇ noeˬ doˆ-euˬ jeˬ ngehˬ dah-eu meh.

Bawˇtsahˬ 25:18

Aˬ jeˬ miˇ neh ehˇ naˇ, Peˬoˇ lehˇ kuˇ-eu jawˇ duˬ laꞈ kʼoeˇ aˬ yawꞈ maꞈ naw maꞈ-ahˇ mehˇ shuiˇ shuiˇ-awˇ yaw doeˇ jeˬ mˇ nehˬ laꞈ-euˬ uˬ taꞈ, Peˬoˇ lehˇ kuˇ-eu jawˇ duˬ-ahˇ naw maꞈ kʼoeˇ taˆ luˬ-iˇ seˇ-iˇ-eu jeˬ keuˆ le ngeh bi sehꞈ-euˬ Kawˇzaˬbiˇ kʼoeˇ gʼaˬ baˇ neh kʼawꞈ, aˬ yawꞈ maꞈ naw maꞈ-ahˇ yaw doeˇ jahˇ-euˬ meh.”

Aˇ dahˬ 3:13

“Aˬ jeˬ miˇ neh nawˇ kʼoeˇ loꞈ-ehˇ mˇ teˬ” lehˇ, Miˬyehˇ pyeuꞈ-eu Sahˬpaˬ Miˬyehˇ zaˬ miˬ zaˬ gʼaˬ-ahˇ naˇ haˬ ngeh, “Aˇ siˬ kʼoeˇ pyaˆ dzaˬ-awˬ lehˇ aˇ lawˇ ngaˬ-ahˇ muˇ juˇ juˇ-eu miˇ neh pyaˆ dzaˬ-euˬ ma” lehˇ, zaˬ miˬ zaˬ gʼaˬ ehˇ kʼoꞈ nehˬ-euˬ meh.

Panmaeq 19:10

Mˬ taˆ gʼaˬ kʼehˇ kʼoeˇ gʼaˬ-euˬ mehˬ shi ngaˇ ga byaˆ-awˇ uˬ duˬ tahˬ-eu lehˇ gʼeh-euˬ ma. Ehˇ kʼawꞈ, aˬ yawꞈ ehˇ-eu, “Teu loꞈ-ehˇ taˬ gʼeh. Ngaˇ-aˬ, nawˬ loꞈ-ehˇ Miˬyehˇ-euˬ zaˬ kʼaˆ tiˬ gʼaˬ pyeuꞈ-eu nawˬ-euˬ cawˬ ma. Nawˬ-euˬ aˬ yuiꞈ aˬ nyiˇ Ka li zaˬ deuˬ hawˇ-eu Yeˬsuˇ neh pah mehˬ-euˬ yaw tsaˬ yaw dawˇ jeˬ-ahˇ kʼaˇ tuˆ tehˬ luꞈ-eu deuˬ-euˬ cawˬ pyeuꞈ-eu ma. Miˬyehˇ-ahˇ uˬ duˬ tahˬ-awˬ.” Aˬ jeˬ miˇ neh ehˇ naˇ, Yeˬsuˇ neh pah mehˬ-euˬ yaw tsaˬ yaw dawˇ kʼoeˇ-aˬ, Miˬyehˇ gʼaˇ duˬ ngehˬ dah-eu deuˬ-ahˇ Miˬyehˇ neh bi noeˬ doˆ-euˬ yaw tsaˬ yaw dawˇ kʼoeˇ meh.

Panmaeq 13:14

Jeˬ zaˬ yaw beh mawˇ-euˬ mehˬ shi zahˬ leˇ paˬ-ehˇ gʼeh-eu gʼawˬ mya jeˬ mˇ mehˬ-eu aˬ kawˬ-aˬ za taˬ-euˬ gaˇ gʼoe-awˇ, miˇ tsaˬ kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ-ahˇ aˬ yawꞈ sheuˬ bahˬ gʼeh-euˬ meh. Mi cehˇ neh bi deuˆ naˇ-awˇ, maˬ shiˇ-ehˇ dehꞈ luꞈ-eu jeˬ zaˬ kʼoeˇ mawˇ-ahˇ taˬ huiˬ taˬ mahˇ-eu laꞈ kʼoeˇ tahˬ pahˬ aˬ ma mawˇ kawˇ tehˆ-awˇ ka tuˇ-eu gʼaˇ duˬ, tsawˇ haˬ kʼoeˇ deuˬ-ahˇ aˬ yawꞈ dawˬ biꞈ-euˬ meh.

Panmaeq 13:8

Bi sehꞈ-euˬ Yawˇzaˬ-euˬ dehꞈ-eu saꞈ laˇ sahˬ boꞈ laꞈ kʼoeˇ, miˇ tsaˬ tahˬ kʼawˇ maˬ beh mi naˆ-ehˇ tsawˇ myahˇ bi boꞈ ahˇ taˬ-euˬ tsawˇ haˬ deuˬ maˬ ngeuˇ naˇ, miˇ tsaˬ kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ jeˬ zaˬ yaw haiˬ kʼoeˇ mawˇ-ahˇ uˬ duˬ tahˬ tehꞈ-a.

Panmaeq 12:9

Aˇ hu ba-euˬ aˇ lawˇ kʼoeˇ mawˇ pyeuꞈ-eu, Nehꞈ sahˬ paˬ hawˇ-eu nehꞈ Saˬ daˬ lehˇ kuˇ-eu, miˇ tsaˬ zaˬ dawˬ tawˆ luꞈ-ahˇ sheuˬ bahˬ-euˬ byaˆ yahˬ yahˬ ma kʼoeˇ mawˇ miˇ tsaˬ kʼoeˇ taˆ bi biˬ ka leꞈ-awˇ, aˬ yawꞈ-euˬ mˬ taˆ gʼaˬ kʼehˇ dawˬ tawˆ luꞈ kʼawꞈ, aˬ yawꞈ nehˬ-ehˇ bi biˬ ka leꞈ-euˬ meh.

2 Beˬtuˆluˆ 2:14

Aˬ yawꞈ maˬ-euˬ myaˆ nuiˆ-aˬ, aˬ cawˬ nehˬ-ehˇ joe mawꞈ-eu nui ma ahˇ-eu zaˬ miˬ zaˬ deuˬ-ahˇ tehꞈ-ehˇ haw mawꞈ-eu meh. Iˬ baˇ mˇ dehˆ-euˬ maˬ baw-a. Gʼaˬ baˬ-eu tsawˇ haˬ deuˬ-ahˇ lahˇ ju-ahˇ teh paꞈ-eu meh. Pyuˇ shuiˇ myawˬ gahˬ-ahˇ mehˇ juiˇ juiˇ dui dui-eu meh. Aˬ yawꞈ maꞈ-aˬ, Miˬyehˇ neh yaˬ kʼehˇ bi yaˬ-euˬ tsawˇ haˬ meh.

Gawˇlawˇsehˇ 2:4

Tsawˇ haˬ tiˬ gʼaˬ naw maꞈ mehˬ shi aˇ naˆ ni muiˬ gaˇ duˇ kʼawꞈ, naw maꞈ-ahˇ mehˇ shuiˇ shuiˇ tawˆ-awˇ gaˇ ma taˬ bi sheuˬ bahˬ lehˇ ngaˇ ehˇ-eu ma.

2 Gawˇliˬtu 12:20

Ngaˇ naw maꞈ jawˇ gaˇ oe keuˆ ngeh, ngaˇ bi dehꞈ mawꞈ-eu loꞈ-ehˇ naw maꞈ maˬ dehꞈ-ehˇ, naw maꞈ bi dehꞈ mawꞈ-eu loꞈ-ehˇ ngaˇ maˬ dehꞈ ni pyeuꞈ-iˇ gaˇ kʼahˬ lahˇ miˇ-a. Iˬ dehˬ iˬ ceh doˆ-eu, tiˬ gʼaˬ tiˇ gʼaˬ myaˆ naˆ-eu, nui ma pehˇ-eu, yawˬ ha gʼaˇ duˬ tehꞈ-ehˇ toˆ-eu, aˬ cawˬ-ahˇ dawˬ doeˇ ngehˬ daˆ-eu, aˬ cawˬ gaˇ kawˆ ja bu ja doeˇ-eu, nui ma huiˬ-eu mahˇ-eu, aˇ muˇ muˇ-awˇ suˬ saˬ-eu laꞈ kʼoeˇ lawꞈ gʼa-eu, heu deuˬ-ahˇ ya mawˇ-eu baw le lehˇ ngaˇ kʼahˬ lahˇ miˇ-a.

1 Gawˇliˬtu 13:4

Gʼoeˇ-eu gaˬ-eu jeˬ-aˬ, nui ma gʼawˬ mahˇ ni taˬ-awˇ, aˬ cawˬ-ahˇ gʼawˬ shaˬ gaˬ nya-eu meh. Myaˆ maˬ naˆ-a. Maˬ jahˇ gʼeh-a. Huiˬ mawꞈ mahˇ mawꞈ-eu nui ma maˬ ahˇ-a.

1 Gawˇliˬtu 9:24

Cehˆ ceh ceh ngeh tsawˇ haˬ gʼawˬ mya ni uˇ leˇ-awˇ cehˆ kʼawꞈ, tiˬ gʼaˬ tehꞈ-ehˇ laꞈ sawˬ za-eu maˬ ngeuˇ-a loˇ. Kʼoeˇ miˇ neh, laꞈ sawˬ za nya ni cehˆ-awˬ.

1 Gawˇliˬtu 4:18

Naw maꞈ jawˇ gaˇ ngaˇ maˬ oe-aˇ lehˇ noeˬ-awˇ, naw maꞈ tiˬ paˆ na deuˬ nui ma huiˬ luꞈ meh.

1 Gawˇliˬtu 3:3

Aˬ jeˬ miˇ neh ehˇ naˇ, miˇ tsaˬ zaˬ deuˬ dehꞈ-eu loꞈ-ehˇ naw ma dehꞈ luꞈ-a siˬ. Naw maꞈ yaw kaˬ myaˆ naˆ-awˇ iˬ dehˬ iˬ ceh jaˆ-eu kʼoeˇ-aˬ, naw maꞈ miˇ tsaˬ heu-ahˇ taꞈ-awˇ miˇ tsaˬ zaˬ deuˬ dehꞈ-eu aˇ tiˆ-ahˇ dehꞈ luꞈ-eu gaˇ kawˆ saˇ kiˇ pyeuꞈ-eu meh.

Lormav 16:18

Aˬ jeˬ miˇ neh ehˇ naˇ, kʼoeˇ loꞈ-ehˇ mˇ-eu tsawˇ haˬ deuˬ-aˬ, aˬ dui-euˬ Sahˬpaˬ Yeˬsuˇ Ka li-euˬ gaˇ mˇ-eu maˬ ngeuˇ-a. Yawˬ ha-euˬ uˬ maˆ gʼaˇ duˬ shaˇ noeˬ-awˇ mehˇ shuiˇ shuiˇ-eu laꞈ kʼoeˇ iˬ baˇ maˬ ahˇ-eu tsawˇ haˬ deuˬ-ahˇ sheuˬ bahˬ-eu meh.

Iˇsaˬyaˇ 57:9

Naw maꞈ tsiˇ yaw saw jeˬ lehꞈ-awˇ, Moˇlehˆ miˬ yehˇ jawˇ gaˇ uˬ duˬ tahˬ leˇ-euˬ meh. Miˇ kʼahˬ doe ni naw maꞈ tsawˇ haˬ pyehˬ-awˇ, shiˇ-eu miˇ kʼahˬ-ahˇ keuˆ ni bi iˇ-awˇ, uˬ duˬ tahˬ-eu gʼaˇ duˬ miˬ yehˇ bi poˆ-euˬ meh.

Yawˇbaˆ 38:2

“Tsawˇ gahˇ maˬ ahˇ-eu dawˬ ngehˬ-awˇ ngaˬ-euˬ zaˬ siˬ tsawˇ gahˇ gaˇ kawˆ naˇ haˬ-eu aˬ suˇ gʼaˬ te.

Dawˬmehˬ 29:29

“Aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ neh zaꞈ taˬ-euˬ jeˬ jaˆ-eu meh. Ehˇ kʼawꞈ, aˬ yawꞈ-euˬ Zahˇ dawˬ kʼoꞈ dawˬ deuˬ aˬ dui-ahˇ pah mehˬ laꞈ-euˬ loꞈ-ehˇ, aˬ dui hawˇ-eu aˬ dui-euˬ zaˬ deuˬ mˬ maˬ maˬ byaˆ zaˇ ziˇ ya naˇ haˬ geuꞈ tehꞈ-a.

1 Gawˇliˬtu 4:6

Aˬpawˇluˆ nga nyaꞈ-euˬ gaˇ kawˆ-ahˇ taꞈ leˇ-awˇ, naw maꞈ gʼaˇ duˬ shaˇ noeˬ-eu laꞈ kʼoeˇ ngaˇ heu loꞈ-ehˇ ehˇ-eu jeˬ pyeuꞈ-eu ma. Nga nyaꞈ-ahˇ haw-awˇ, Jaˇliꞈ laꞈ kʼoeˇ kʼaˇ boꞈ taˬ-euˬ loꞈ-ehˇ tehꞈ-ehˇ naw maꞈ caw teh-awˇ dehꞈ nya ni ehˇ-eu jeˬ pyeuꞈ-eu ma. Tiˬ gʼaˬ-ahˇ ja ceuˬ-awˇ tiˬ gʼaˬ-ahˇ ja doeˇ-eu jeˬ naw maꞈ jahˇ-eu maˬ tsaˬ-a.

Eˇpeˇsu 4:17

Lawˇ ciꞈ zaˬ loꞈ-ehˇ taˬ paˇ dehꞈ lehˇ, Sahˬ paˬ Yeˬsuˇ-euˬ tsawˇ myahˇ uˬ moˆ ngaˇ naw maꞈ-ahˇ yaw kʼaˆ kʼaˆ-ehˇ ehˇ-eu ma. Aˬ yawꞈ maꞈ-euˬ nui noeˬ gaˇ dahˇ maˬ tsoeˬ-a.