Eˇpeˇsu 6:9 - Akha

⁹ Baw leˬ deuˬ-oˇ, kʼoeˇ loꞈ-ehˇ duˇ ni, naw maꞈ kʼawꞈ zaˬ kʼaˆ deuˬ gʼaˇ duˬ shaˇ noeˬ nehˬ-awˬ. Aˬ yawꞈ maꞈ-ahˇ guˆ tsiˬ taˬ nyehꞈ. Naw maꞈ maˬ ehˇ, naw maꞈ-euˬ zaˬ kʼaˆ deuˬ maˬ ehˇ, dawˬ tawˆ luꞈ tiˬ kawˆ loꞈ-ehˇ mˬ kʼoeˇ taˆ jawˇ-eu Baw leˬ kʼoeˇ gʼaˬ-euˬ zaˬ kʼaˆ pyeuꞈ-eu ma lehˇ siˬ nya-awˬ. Aˬ yawꞈ-aˬ, yawˬ gʼaˬ na luꞈ-ahˇ myaˆ pyawˬ huiˬ nyiˇ maˬ tseˇ-ehˇ tiˬ kawˆ di ni yaˇ kʼaˬ daˇ-eu meh.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁹ Yawsanr deuq-or! Nawmaf khawf, aqyawf maf-anr tiqkawv lof-aer durni janrnaeq-awr, aqyawf maf-anr guvtsiq taqnyaef. Nawmaf-euq Yawsanr ghaq khawf, mq-euq khoertav jawr-awr myavpyawq huiqnyir maqtser-a laer siqnya-awq.

Eˇpeˇsu 6:9 Referans Kwoze

Gawˇlawˇsehˇ 3:25

Maˬ muiˬ-eu jeˬ mˇ-eu tsawˇ haˬ-aˬ, yawˬ ha neh kʼaˇ mˇ-euˬ loꞈ-ehˇ kʼehˬ nehˬ kʼaˆ nehˬ gaˇ ya daˬ tehꞈ-a. Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬzaˬ-ahˇ myaˆ pyawˬ huiˬ nyiˇ maˬ tseˇ ni yaˇ kʼaˬ daˇ-eu meh.

Gʼaˬkʼehˇ 10:34

Kʼoeˇ ngeh, Beˬtuˆluˆ dawˬ ngehˬ-eu aˇ dahˬ beh-awˇ heu loꞈ-ehˇ ehˇ-eu meh. “Miˬyehˇ myaˆ pyawˬ huiˬ nyiˇ maˬ tseˇ-eu gaˇ kawˆ nymˬ-mˇ ngaˇ siˬ duˬ-eu ma.

Lormav 2:11

Aˬ jeˬ miˇ neh ehˇ naˇ, Miˬyehˇ-aˬ, tsawˇ haˬ yawˬ gʼaˬ na luꞈ-ahˇ myaˆ pyawˬ huiˬ nyiˇ maˬ tseˇ ni yaˇ kʼaˬ daˇ tehꞈ-a.

Luˇkaꞈ 6:31

Aˬ cawˬ neh naw maꞈ-ahˇ kʼaˇ bi mˇ nehˬ mawꞈ-eu loꞈ-ehˇ, naw maꞈ aˬ cawˬ-ahˇ mˇ nehˬ-awˬ.

Maꞈtehˬ 7:12

“Aˬ cawˬ neh yawˬ ha-ahˇ kʼaˇ bi mˇ nehˬ mawꞈ-eu loꞈ-ehˇ, aˬ cawˬ-ahˇ mˇ nehˬ-awˬ. Aˬ jeˬ miˇ neh ehˇ naˇ, dawˬ heu dawˬ-aˬ, Moˇseˬ-euˬ Zahˇ dawˬ kʼoꞈ dawˬ hawˇ-eu Miˬyehˇ gʼaˇ duˬ ngehˬ dah-eu deuˬ neh mehˬ taˬ tsoˆ taˬ-euˬ dawˬ deuˬ laꞈ kʼoeˇ, dawˬ ma yaw dzahˇ pyeuꞈ-eu meh.

Dawˬmehˬ 10:17

Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ-aˬ, miˬ yehˇ dawˬ tawˆ luꞈ hawˇ-eu baoˬ dawˬ tawˆ luꞈ kʼoeˇ taˆ huiˬ dzehˬ-eu meh. Aˬ yawꞈ-aˬ, baoˬ huiˬ dui dui -awˇ, guˆ laˇ paˬ-ehˇ gʼeh-eu meh. Aˬ yawꞈ-aˬ, myaˆ pyawˬ huiˬ nyiˇ maˬ tseˇ-ehˇ, laꞈ nmꞈ nmꞈ-eu jeˬ-ahˇ kʼawꞈ, maˬ ha geuꞈ-a.

Yaˬkoˆ 2:13

Aˬ cawˬ-ahˇ gʼawˬ shaˬ maˬ gaˬ nehˬ-eu tsawˇ haˬ-ahˇ Miˬyehˇ gʼawˬ shaˬ maˬ gaˬ ni yaˇ kʼaˬ daˇ tehꞈ-a. Ehˇ kʼawꞈ, gʼawˬ shaˬ gaˬ-eu jeˬ-aˬ, yaˇ kʼaˬ daˇ-eu jeˬ-ahˇ gʼaˬ leˇ nya-eu meh.

Yaˬkoˆ 2:8

“Yawˬ haˇ yawˬ ha gaˬ-eu loꞈ-ehˇ, yawˬ ha dawˬ peh jawˇ-eu tsawˇ haˬ-ahˇ gaˬ-awˬ” lehˇ Jaˇliꞈ laꞈ kʼoeˇ ehˇ taˬ-euˬ Miˬyehˇ Miˇkʼahˬ-ahˇ taꞈ-eu zahˇdawˬ kʼoꞈ dawˬ kʼoeˇ dawˬ-ahˇ naw maꞈ naˇ haˬ geuꞈ naˇ, tsaˬ-eu jeˬ-ahˇ naw maꞈ mˇ-eu meh.

1 Gawˇliˬtu 1:2

Miˬyehˇ-euˬ muiˬ-eu shawˇ-eu tsawˇ haˬ bi geuꞈ-eu gʼaˇ duˬ bi kuˇ doˆ-awˇ, aˬ dui-euˬ Sahˬpaˬ Yeˬsuˇ ka li-ahˇ uˬ duˬ kʼaˇ tahˬ-eu yawˬ gaˇ na luꞈ jawˇ-eu tsawˇ haˬ dawˬ tawˆ luꞈ nehˬ-ehˇ tiˬ kawˆ loꞈ-ehˇ, aˬ dui-euˬ Sahˬpaˬ hawˇ-eu aˬ yawꞈ maꞈ-euˬ Sahˬpaˬ pyeuꞈ-eu Yeˬsuˇ Ka li laꞈ kʼoeˇ Miˬyehˇ-euˬ tsawˇ haˬ pyeuꞈ laˇ-euˬ Gawˇliˬtu meuˬ-ahˇ jawˇ-eu Ka li zaˬ aˇ muˇ jawˇ gaˇ sahˬ boꞈ boꞈ ahˇ laꞈ-eu ma.

Yoˇhaˬ 13:13

Naw maꞈ ngaˬ-ahˇ ‘Saˬ laˬ-oˇ’, ‘Sahˬpaˬ-oˇ’ lehˇ kuˇ-eu meh. Naw maꞈ kʼoeˇ loꞈ-ehˇ kuˇ-eu tsaˬ meh. Aˬ jeˬ miˇ neh ehˇ naˇ, ngaˇ-aˬ, naw maꞈ kuˇ-eu loꞈ-ehˇ naw maꞈ-euˬ saˬ laˬ hawˇ-eu Sahˬpaˬ pyeuꞈ-eu ma.

Yaˬkoˆ 5:4

Naw maꞈ-euˬ deh yaˇ-ahˇ gaˇ bi mˇ-euˬ tsawˇ haˬ deuˬ-ahˇ naw maꞈ gʼaˬ gaˇ poeˬ maˬ biꞈ-a. Aˬ yawꞈ maꞈ toˇ gaˇ naˇ haˬ sheˇ. Naw maꞈ-euˬ cehˇ laˆ luiˆ nehˬ-euˬ tsawˇ haˬ kʼoeˇ deuˬ ngoeˇ ngoeˇ-ehˇ guˇ-eu teˇ saˇ kʼoeˇ, Baoˬ huiˬ-eu Sahˬpaˬ Miˬyehˇ-euˬ naˬ bawˇ-ahˇ gaˬ keuˆ leˇ-euˬ meh.

1 Gawˇliˬtu 7:22

Aˬ jeˬ miˇ neh ehˇ naˇ, Sahˬpaˬ Miˬyehˇ neh kuˇ-euˬ zaˬ kʼaˆ tiˬ gʼaˬ-aˬ, Sahˬpaˬ Miˬyehˇ-euˬ buˬ-iˇ-euˬ tsawˇ haˬ pyeuꞈ-eu meh. Kʼoeˇ loꞈ-ehˇ duˇ ni, Ka li neh bi kuˇ-euˬ buˬ-iˇ-euˬ tsawˇ haˬ tiˬ gʼaˬ-aˬ, Ka liˬ-euˬ zaˬ kʼaˆ pyeuꞈ-eu meh.

Maꞈtehˬ 24:51

Kʼoeˇ ngeh jawˇ, baw leˬ gʼaˬ neh zaˬ kʼaˆ kʼoeˇ gʼaˬ-ahˇ shiˇ taw tehˬ ni diˬ-awˇ, awꞈ-aˬ tahˬ kʼoˬ-ahˇ duˇ-eu tsawˇ haˬ deuˬ ya mˇ-eu shaˬ zahˬ aˬ yawꞈ-ahˇ bi mˇ tehꞈ-a. Kʼoeˇ gaˇ, aˬ yawꞈ ngoeˇ-awˇ seuˬ teuꞈ teuꞈ-ehˇ ya jawˇ tehꞈ-a.

Maꞈtehˬ 24:48

Ehˇ kʼawꞈ, aˬ yawꞈ maˬ muiˬ-eu zaˬ kʼaˆ pyeuꞈ lawˬ naˇ, ‘Ngaˬ-euˬ baw leˬ yaw awˬ awˬ-ehˇ maˬ gʼoꞈ le-aˇ’ lehˇ, yawˬ haˇ yawˬ ha ehˇ tehꞈ-a.

Maꞈtehˬ 22:10

Kʼoeˇ ngeh, zaˬ kʼaˆ deuˬ gaˇ jawˬ doe ni iˇ-awˇ, kʼaˇ tahˬ puˬ le-eu tsawˇ haˬ deuˬ-ahˇ, tsawˇ muiˬ tsawˇ doeˇ maˬ tseˇ ni, oeˇ mˇ baˇ-eu sehˬ gʼawˆ tiˬ byah ni kuˇ uiˬ laꞈ-euˬ meh.

Maꞈtehˬ 22:8

Kʼoeˇ naˇ, aˬ yawꞈ-euˬ zaˬ kʼaˆ deuˬ-ahˇ aˬ yawꞈ ehˇ nehˬ-eu, ‘Oeˇ mˇ baˇ-eu dah laˇ-euˬ meh. Ehˇ kʼawꞈ, kuˇ taˬ-euˬ tsawˇ haˬ deuˬ oeˇ mˇ baˇ-eu bawˬ-iˬ heu-ahˇ laˇ-eu maˬ geuˇ nga.

Maˬlaˬkiˇ 3:5

Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Yaˇ kʼaˬ daˇ-eu gʼaˇ duˬ naw maꞈ jawˇ gaˇ ngaˇ oe-awˇ, mah loˬ ja maw mˇ-euˬ deuˬ, aˬ cawˬ-euˬ miˬ zaˬ yo zaˬ-ahˇ bahˬ-euˬ deuˬ, maˬ tsaˬ maˬ dawˇ-eu saˇ kiˇ kamˬ-euˬ deuˬ, gʼaˬ gaˇ poeˬ maˬ biꞈ byah ni mehˇ shuiˇ shuiˇ dzaˬ-euˬ deuˬ, miˬ coeˬ miˬ ma, muˇ coeˬ aˬ nmˇ, aˬ cawˬ tsawˇ jeuˬ, heu deuˬ-ahˇ yehˬ bawˬ sehˇ lu-ehˇ gʼeh-euˬ deuˬ hawˇ-eu, ngaˬ-ahˇ yaw zeu maˬ baw-eu tsawˇ haˬ dawˬ tawˆ luꞈ-ahˇ, ngaˇ pyehˆ tseˇ duˬ ma.

Daˬyeˬlaˇ 3:15

Nymˬ-mˇ poˆ jawˇ, daˇ heh baw, bawˬ law baw, deuˇ-mˬ diˬ-eu teˇ saˇ hawˇ-eu, caˇ dawˬ caˇ gaˇ zmˬ-eu keu ka nui deuˬ-euˬ teˇ saˇ mahˇ doˆ laˇ gaˇ naw maꞈ ya gaˬ-eu nehˬ-ehˇ, shuiˇ mawˇ kawˇ kʼoeˇ kawˇ mehˬ shi awˆ byaˆ-awˇ uˬ duˬ tahˬ-awˬ. Naw maꞈ uˬ duˬ maˬ tahˬ de leˇ ngeuˇ naˇ, tiˬ poˆ tehꞈ-ehˇ miˬ dzaˬ doꞈ luꞈ-eu tsawˬ bu-ahˇ biˬ ahˇ ma. Naw maꞈ-ahˇ ka kʼoꞈ nya-eu miˬ yehˇ jawˇ tehꞈ-a lehˇ naw maꞈ noeˬ te loˇ.”

Daˬyeˬlaˇ 3:6

Awˆ byaˆ-awˇ uˬ duˬ maˬ tahˬ-eu tsawˇ haˬ aˬ geu gʼaˬ maˬ kaˬ, miˬ dzaˬ doꞈ luꞈ-eu tsawˬ bu bu ma-ahˇ biˬ ahˇ nehˬ gaˇ ya daˬ tehꞈ-a.”

Iˇsaˬyaˇ 47:6

Ngaˬ-euˬ tsawˇ jeuˬ-ahˇ ngaˇ nui ma pehˇ-awˇ, ngaˬ-euˬ tsawˇ haˬ maˬ paˇ sawˇ ni byehˇ dzeh nehˬ ngeh, nawˬ-euˬ baoˬ uˬ moˆ aˬ yawꞈ maꞈ-ahˇ ngaˇ bi jawˇ-euˬ ma. Kʼoeˇ ngeh aˬ yawꞈ maꞈ-ahˇ nawˇ gʼawˬ shaˬ maˬ gaˬ-ehˇ, tsawˇ mawˬ deuˬ-ahˇ kʼawꞈ yehˬ bawˬ-ehˇ jahˇ nehˬ-euˬ meh.

Dawˬ tsoˆ 5:8

Iˇ shaˬ zaˬ deuˬ-ahˇ sahˬ paˬ sahˬ ma deuˬ kʼehˬ-awˇ kʼaˆ-awˇ nawˬ dzaˬ kʼaˆ dzaˬ gaˇ ya mawˇ ngeh, taˬ zahˬ leˇ. Sahˬ paˬ sahˬ ma aˬ geu gʼaˬ maˬ kaˬ, aˬ yawꞈ taꞈ-ehˇ huiˬ dzehˬ-eu gʼaˬ jawˇ-awˇ, tiˬ gʼaˬ kʼoeˇ taˆ tiˬ gʼaˬ huiˬ daˆ leꞈ-eu meh.

Jaceuq 140:12

Sahˬpaˬ Miˬyehˇ-oˇ, shaˬ-eu zahˬ-eu deuˬ-ahˇ nawˇ haw piˇ-awˇ, mehꞈ-eu shuꞈ-eu deuˬ-ahˇ nawˇ ngehˬ gʼeh-eu gaˇ kawˆ ngaˇ siˬ nya ma.

Neˬhaˬmiˇ 5:5

Nga maꞈ kʼawꞈ aˬ cawˬ loꞈ-ehˇ Yuˇdaˆ tsawˇ haˬ pyeuꞈ-eu ma. Nga maꞈ-euˬ aˬ buˇ aˬ li deuˬ kʼawꞈ, aˬ yawꞈ maꞈ-euˬ aˬ buˇ aˬ li loꞈ-ehˇ muiˬ-eu ma. Ehˇ kʼawꞈ, nga maꞈ-euˬ zaˬ deuˬ-ahˇ aˬ cawˬ zaˬ kʼaˆ bi geuꞈ taˬ-euˬ ma. Nga maꞈ-euˬ aˬ buˇ tiˬ paˆ na deuˬ-ahˇ ahˬ dzaˬ-awˇ aˬ cawˬ zaˬ kʼaˆ bi geuꞈ taˬ-euˬ ma. Nga maꞈ-euˬ deh yaˇ deuˬ hawˇ-eu aˬ gaꞈ yaˇ kmˇ deuˬ aˬ cawˬ neh bi yuˇ geuꞈ jiˇ-euˬ miˇ neh tiˬ jeˬ-iˬ maˬ paˇ gʼeh nya miˇ-a.”

1 Saˬmeuˬlaˆ 15:17

Saˬmeuˬlaˆ ehˇ-eu, “Nawˇ-aˬ, huiˬ-eu tsawˇ haˬ tiˬ gʼaˬ maˬ ngeuˇ lehˇ yawˬ haˇ yaw ha noeˬ kʼawꞈ, Iˇsaˬleˬlaˆ tsawˇ jeuˬ tsawˇ ca heu myaˆ ni gʼeh-eu kʼoeˇ taˆ aˬ yuiꞈ geuꞈ-awˇ sheuˬ gʼeh luꞈ-eu tsawˇ haˬ tiˬ gʼaˬ meh. Iˇsaˬleˬlaˆ miˇ kʼahˬ-euˬ sahˬ paˬ bi geuꞈ-eu gʼaˇ duˬ, Sahˬpaˬ Miˬyehˇ neh nawˬ-ahˇ tsiˇ shehˆ daˆ taˬ-euˬ meh.

Uˬ duˬ 19:13

“Aˬ cawˬ kʼoeˇ taˆ mehˇ shuiˇ taˬ shuiˇ dzaˬ. Tahˇ joe taˬ joe dzaˬ. Yawˬ ha-ahˇ gʼaˬ mahˇ mahˇ dzaˬ-eu tsawˇ haˬ-ahˇ gʼaˬ gaˇ aˇ poeˬ maˬ biꞈ ni, tiˬ miˇ tehꞈ-ehˇ kʼawꞈ taˬ bi dzeuˇ-iˇ.

Yawˇbaˆ 34:19

Sahˬ paˬ sahˬ ma deuˬ-ahˇ aˬ yawꞈ gʼaˬ baꞈ maˬ baꞈ-ehˇ, yaw shaˬ zaˬ mehˬ shi smˇ muiˬ deuˬ jawˇ paw maˬ pyawˬ-a. Aˬ jeˬ miˇ neh ehˇ naˇ, yawˬ gʼaˬ na luꞈ-ahˇ aˬ yawꞈ neh beh taˬ-euˬ meh.

Gawˇlawˇsehˇ 4:1

Baw leˬ deuˬ-oˇ, yawˬ ha-euˬ zaˬ kʼaˆ deuˬ-ahˇ yawˬ tsaˬ yaw dawˇ dawˇ-ehˇ haw nehˬ-awˬ. Naw maꞈ kʼawꞈ, mˬ kʼoeˇ taˆ naw maꞈ-euˬ Baw leˬ jawˇ ma lehˇ nui ma laꞈ kʼoeˇ noeˬ taˬ-awˬ.