Bawˇtsahˬ 5:18 - Akha

¹⁸ Kʼoeˇ naˇ, zaˬ miˬ zaˬ kʼoeˇ gʼaˬ-euˬ uˬ duˬ tsehˇ kahˇ caˆ luˆ puiˇ-awˇ, lawˇ-eu cehˇ meu kʼoeˇ zaˬ miˬ zaˬ kʼoeˇ gʼaˬ-euˬ laꞈ kʼawˆ-ahˇ ya dawˆ ahˇ nehˬ meh. Piˇ ma gʼaˬ-aˬ, yaˬ kʼehˇ yaˬ-eu jeˬ hehˇ leꞈ-eu iˇ cuꞈ yaw kʼaˬ kʼoeˇ shehˆ ahˇ taˬ-euˬ naˬ bo ya yuˇ meh.

Bawˇtsahˬ 5:18 Referans Kwoze

HeˬByehˇ 13:4

Sheuˬ dahˬ dzaˬ taꞈ-eu jeˬ-ahˇ tsawˇ haˬ yawˬ gʼaˬ na luꞈ ya taˬ huiˬ-awˇ, miˬ zaˬ yo zaˬ tiˬ gʼaˬ tiˇ gʼaˬ saˇ jaˇ ya ziꞈ meh. Maˬ tsaˬ maˬ dawˇ-eu laꞈ kʼoeˇ kʼaˬ miˬ sheu-eu tsawˇ haˬ deuˬ hawˇ-eu, aˬ cawˬ nehˬ-ehˇ joe-eu tsawˇ ha deuˬ-ahˇ Miˬyehˇ yaˇ kʼaˬ daˇ tehꞈ-a.

1 Gawˇliˬtu 11:6

Zaˬ miˬ zaˬ-aˬ, uˬ boeˬ maˬ boeˬ ma lehˇ ngeuˇ naˇ, tsehˇ kahˇ tehˬ tsehˆ dzeh paˬ-ehˇ gʼeh-eu meh. Ehˇ kʼawꞈ, uˬ jehˆ jehˆ-eu hawˇ-eu uˬ duˬ tsehˇ kahˇ tehˬ tsehˆ dzeh-eu jeˬ-aˬ, zaˬ miˬ zaˬ gʼaˇ duˬ shaꞈ dawˇ dui dui paˬ-ehˇ gʼeh-eu tiˬ jeˬ pyeuꞈ-eu miˇ neh, uˬ boeˬ boeˬ-eu tsaˬ dzehˬ meh.

Yeˬlaˬmiˇ 2:19

Nawˬ-euˬ yaw lehˬ nawˬ-ahˇ kʼehˬ-awˇ, nawˇ saˇ jaˇ puiˬ-euˬ jeˬ nawˬ-ahˇ laˆ shaˬ tehꞈ-a. Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ byehˇ dzeh-awˇ, ngaˬ-ahˇ saˇ jaˇ maˬ ziꞈ ni dehꞈ-eu jeˬ, aˇ naˆ ni lehˬ-awˇ noeˬ shaˬ paˬ-ehˇ gʼeh nga lehˇ, nawˬ-ahˇ siˬ duˬ laˇ tehꞈ-a lehˇ, Baoˬ huiˬ-eu Sahˬpaˬ Miˬyehˇ pyeuꞈ-eu, Dawˬ tawˆ kʼoeˇ taˆ uˆ lahˇ-eu ngaˇ heu loꞈ-ehˇ ehˇ-eu ma.”

Iˇsaˬyaˇ 38:17

Ngaˇ nui ma naˇ luꞈ-eu saˇ laˇ miˇ-a. Guˆ-eu gaˆ-eu jeˬ dawˬ tawˆ luꞈ laꞈ kʼoeˇ, ngaˬ-euˬ saꞈ laˇ-ahˇ nawˇ ka kʼoꞈ doˆ nehˬ laꞈ-awˇ, ngaˬ-euˬ iˬ baˇ dawˬ tawˆ pyehˬ dzeh nehˬ laꞈ-euˬ meh.

Dawˬ tsoˆ 7:26

Shiˇ-eu jeˬ naˆ maˬ tseˇ doeˇ dui dui-eu tiˬ jeˬ ngaˇ mawˇ taˬ-euˬ ma. Kʼoeˇ-aˬ, zaˬ miˬ zaˬ meh. Aˬ yawꞈ-euˬ nui gaˬ lahˇ ju kʼmˇ gaˇ duˇ-awˇ, nawˬ-ahˇ byaˇ cuꞈ-eu aˬ yawꞈ-euˬ aˬ laꞈ shmˇ caˆ paꞈ gaˇ duˇ-eu meh. Miˬyehˇ-euˬ nui kʼahˇ poˆ-eu tsawˇ haˬ cehˆ dzeuˇ nya kʼawꞈ, iˬ baˇ mˇ-eu deuˬ paꞈ leˇ-eu meh.

Dawqdaq 5:4

Aˇ saˬ saˬ laˇ ngeh, doꞈ yawˇ loꞈ-ehˇ kʼaˬ-awˇ, mi seuˬ nyiˬ pyawˬ tsoꞈ-eu mi cehˇ loꞈ-ehˇ taˆ-eu meh.

1 Saˬmeuˬlaˆ 15:32

“Sahˬ paˬ Aˬgaˆ-ahˇ heu gaˇ sheuˬ laꞈ sheˇ” lehˇ, Saˬmeuˬlaˆ dawˬ biꞈ-euˬ meh. Aˬgaˆ yaw dzuˬ dzuˬ dzuˬ-ehˇ aˬ yawꞈ jawˇ gaˇ laˇ-eu laꞈ kʼoeˇ, “Shiˇ-eu jeˬ-ahˇ tahˬ puˬ leˇ-eu heu aˇ naˆ ni shaˬ zahˬ naꞈ law hawˇ maˬ siˬ miˇ-a” lehˇ, aˬ yawˇ yawꞈ noeˬ kʼoeˬ luꞈ-eu meh.

Dawˬmehˬ 29:18

Iˬ nah heu gaˇ yawꞈ luꞈ-eu kʼaˬ dzeˇ zaˬ hawˇ-eu zaˬ miˬ zaˬ aˬ geu gʼaˬ maˬ kaˬ, nymˇ jiˇ aˬ geu jiˇ maˬ kaˬ, tsawˇ jeuˬ aˬ geu jeuˬ maˬ kaˬ, aˬ dui-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ byehˇ dzeh-awˇ, aˬ cawˬ tsawˇ jeuˬ-euˬ miˬyehˇ deuˬ-ahˇ uˬ duˬ maˬ ya tahˬ ni, yaw kʼaˆ kʼaˆ-ehˇ yahˇ-awˬ. Kʼoeˇ loꞈ-ehˇ mˇ-eu jeˬ-aˬ, kʼaˬ jehꞈ ni gʼeh-awˇ doꞈ kʼaˆ dui dui-eu aˇ bawˇ bi bawˇ laˇ-eu duˬ ciˇ-ahˇ duˇ-eu meh.

Bawˇtsahˬ 5:22

Iˇ cuꞈ heu nawˬ-euˬ uˬ maˆ laꞈ kʼoeˇ uˇ keuˆ-iˇ-awˇ, nawˬ-eu uˬ maˆ puˬ laˇ-awˇ, nawˬ-euˬ pyaˬ kaˬ liˬ-iˇ koˆ-iˇ-eu jeˬ bi keuˆ le luꞈ-uˇ.” Zaˬ miˬ zaˬ kʼoeˇ gʼaˬ gʼeh, “Ngaˇ nui ma tsaˬ ma. Sahˬpaˬ Miˬyehˇ kʼoeˇ loꞈ-ehˇ mˇ nehˬ laꞈ luꞈ-uˇ” lehˇ ya ehˇ meh.

Bawˇtsahˬ 5:17

Miˇ tsaˬ naˬ bo laꞈ kʼoeˇ muiˬ-eu shawˇ-eu iˇ cuꞈ ui cuiˆ shehˆ ahˇ-awˇ, iˇ cuꞈ kʼoeˇ yaw kʼaˬ bi kʼaˬ-eu gʼaˇ duˬ Sahˬpaˬ Miˬyehˇ jawˇ-eu Sehˬ gʼawˆ laꞈ kʼoeˇ-euˬ miˇ tsaˬ ui cuiˆ yuˇ-awˇ ya dawˆ meh.

Bawˇtsahˬ 5:15

Heu loꞈ-ehˇ gʼeh-eu gaˇ kawˆ doˆ laˇ naˇ, kʼaˬ dzeˇ zaˬ gʼaˬ yawˬ ha-euˬ miˬ zaˬ-ahˇ piˇ ma jawˇ gaˇ ya sheuˬ gʼeh meh. Lawˇ-eu gʼaˇ duˬ loˬ-eu lawˬ loeˇ cehˇ meu tiˬ pehˬ kʼawꞈ aˬ yawꞈ ya yuˇ gʼeh meh. Ehˇ kʼawꞈ, kʼoeˇ-euˬ kʼoeˇ taˆ, saˬ loˬ tsiˇ maˬ ehˇ, yaw saw jeˬ maˬ ehˇ, maˬ ya dawˆ daˆ-a. Aˬ jeˬ miˇ neh ehˇ naˇ, kʼoeˇ-aˬ, yawˬ ha-euˬ miˬ zaˬ-ahˇ noeˬ bahˬ luꞈ-eu kʼaˬ dzeˇ zaˬ tiˬ gʼaˬ neh, yaw tsaˬ yaw dawˇ jeˬ bi doˆ laˇ-eu gʼaˇ duˬ lawˇ-euˬ jeˬ pyeuꞈ-eu meh.

Uˬ duˬ 13:45

Nyawˬ naˇ-eu tsawˇ haˬ-aˬ, mehˬ tsoeˬ yaw pyaˬ ya dm-awˇ, uˬ duˬ tsehˇ kahˇ maˬ kaˆ juˇ ni, yawˬ ha-euˬ myaˆ pyawˬ laꞈ oˆ dzaˬ-ahˇ dehˬ kaˬ-awˇ, “Maˬ shawˇ de. Maˬ shawˇ de” lehˇ ya guˇ meh.

1 Gawˇliˬtu 11:15

Ehˇ kʼawꞈ, zaˬ miˬ zaˬ uˬ duˬ tsehˇ kahˇ yaw mahˇ naˇ, aˬ yawꞈ-euˬ kʼahˬ sehˇ meh. Aˬ yawꞈ-euˬ uˬ duˬ tsehˇ kahˇ yaw mahˇ kʼoeˇ aˬ yawꞈ-ahˇ bi dehˬ kaˬ-eu gʼaˇ duˬ biꞈ taˬ-euˬ jeˬ pyeuꞈ-eu meh.

Bawˇtsahˬ 5:19

Kʼoeˇ naˇ, piˇ ma gʼaˬ zaˬ miˬ zaˬ kʼoeˇ gʼaˬ-ahˇ heu loꞈ-ehˇ ehˇ nehˬ-awˇ ya bi kamˬ meh. “Kʼaˬ dzeˇ zaˬ nui gʼaˬ-ahˇ nawˇ maˬ bahˬ lawˬ naˇ, iˇ cuꞈ heu neh hehˇ leꞈ-euˬ yaˬ kʼehˇ yaˬ-eu jeˬ nawˬ-euˬ kʼoeˇ taˆ maˬ keuˆ le-aˇ.