Oseas 8:8 - Wuj Pa K'ubultzij

⁸ ¡I tinimit Israel b'i'talik! I jub'an chik nimaq taq tinimit kkilo pacha taq jun b'iroxik chi nti kajwax wi,

Oseas 8:8 Referans Kwoze

JEREMÍAS 22:28

¿I ma Conías keje pacha jun xar tel chi lik nti uchak, jun yab'al chi lik nti jun kajwanik? ¿B'uchak xtaq b'i ire xaq i ralk'uwal che jun ulew chi keta'am taj ipa o wi?

JEREMÍAS 51:34

Kub'ij i Jerusalén, tinimit Sion: I ma Nabucodonosor, chi ajawinel re i tinimit Babilonia, xu'an ch'aqa taq chwe xaq xinutijo, xu'an kan chwe pacha jun laq chi nti chik upam. Xinub'i' b'ik pacha jun nim laj itzel chikop aj pa mar; lik xunojsaj upam che i chom laj tijawik re chwe. Ronojel i xk'is taj xuk'aq b'ik. ¡Wo'or chtzaq ni puwi i tinimit Babilonia uqajik in-ij xaq ronojel i k'ax chi xu'an chwe le! ¡Xaq lik chtzaq ni pkiwi i winaq aj Caldea kumal i winaq chi xinkikamsaj!

Romanos 9:22

Xaq keje i Dios ile o pu'ab' wach kraj ku'an chke i winaq, man keje ile konojel i winaq chi je o chwach i jyub' ta'aj kketamaj ucho'ab'. Rumali chi lik xuch'ij i roywal chke i winaq chi kmajaw te'eq kya' utojb'alil chke xaq ksachsax ni kiwach.

Ezequiel 36:3

Rumali, chatch'aw pinb'i i chab'ij chke: Iri are kub'ij i Ajwal: Lik k'ulala kpe ni ch'oj chiwij yix, xaq ksachsax ni iwach; konojel ni'pa taq i tinimit je aj naj, ix o chik pki'ab', i winaq kixkiyo'ya na xaq tzel ni kixkilo.

Lamentaciones 2:16

Konojel i je ajch'oj chawij kkijaq kichi' chawij yet. Ru' xub'anik xaq taqenik re tzel ilik, kkib'ij: “Lik ya xqachup uwach ronojel. Lik are ij iri chi qoy-em te'eq; ¡K'ate iri xqil uwach!”

Lamentaciones 2:5

I Ajwal xu'an pacha taq jun ajch'oj chqij: Lik xusachsaj uwach ronojel i tinimit Israel; xuwulijsaj ronojel i nimaq taq rachoch, xuwulijsaj kikowil, lik xuk'iyarsaj i uyej chrij i tinimit Judá.

Lamentaciones 2:2

I Ajwal lik mixatjun ja xuya kanoq re ma Jacob, ronojel xuwulijsaj; lik ru' jun jo'taj tan re roywal xuwulijsaj ukowil i chom laj tinimit Judá; lik xeuqajsaj pulew, uqajsam ki'ij i ajawinik xaq aj-ok'al utzam i jalajuj taq tinimit.

JEREMÍAS 50:17

I tinimit Israel keje pacha jun ral chij sachnaq, chi kiterb'em b'i koj. Nab'e xutij b'i ma ajawinel re Asiria; te'uri i ma Nabucodonosor chi ajawinel re Babilonia, xumutma ub'aqil.

JEREMÍAS 48:38

“Che ronojel uwi i ja re tinimit Moab xaq ronojel pa taq b'e lik xwi ktataj o'ej, man yin lik xinwulijsaj i tinimit Moab pacha jun ulew xar paxnaq. Yin in Ajwal, xinb'iw ile.”

ISAÍAS 30:14

Lik ksachsax ni iwach pacha k-an che jun xar ulew, chik lik ronojel k-on mutmut, chi nti chik jun ch'aqap kuriq taq uchak re elsab'al li a'al pa a', mitene kuriq uchak elsab'al li ya pa k'otom.”

2 Reyes 18:11

I ajawinel re i tinimit Asiria xeresaj b'i konojel aj Israel chi je o chila pa tinimit, xeuk'am b'i Asiria, xeuya chila pa tinimit Halah chi o chupam ulew Habor chi are i raqana chi kik'aw chila pa Gozán, xaq xeuya chila pa nimaq taq tinimit ke aj Media.

Deuteronomio 28:64

I Ajwal ku'an ni chawe chi katkicher nu b'i pa jalajuj taq tinimit, chila kakoj wi ki'ij jub'an chik dios chi je antal ru' che' xaq ru' ab'aj, chi yet xaq awatit amam xiwetamaj ti kiwach.

Deuteronomio 28:25

xaq kqajsax ni a'ij kumal i ajch'oj chawij. Lik kab'isoj enam chu'anik ch'oj chkij ike lik kixtususik xwiri i anmajik loq to' kichkich chik, lik kkib'isoj ni konojel i winaq chwach i jyub' ta'aj wach taq kak'ulmaj.

LEVÍTICO 26:33

Kixinkichersaj nu b'i chkixol i jalajuj taq tinimit, xaq ru' ch'ich' kixwoqtaj na, ronojel ulew re i tinimit kkanaj na pacha jun tz'inilik jyub' chaqij xaq ni'pa taq itinimit ksach ni uri uwach.

JEREMÍAS 25:34

¡Chixsik'inoq, ix, ajyu'ul chij, chixsik'in rumal uk'axk'ol! ¡Yix, chi je iwok'am i chij, chib'alk'atij iwib' pa taq ulew! Man ya xuriq i ij re i kamsanik, xaq yix kixkamsax na pacha kikamsaxik i ti'ojib' chij.

Lamentaciones 5:2

Ronojel wach o te'eq qu' wo'or is o pki'ab' aj naj; wo'or i qachoch o pki'ab' i winaq chi qeta'am ti kiwach.

Lamentaciones 4:2

I winaq re Sion, lik k'ax kena'ik, konojel ile chi o ki'ij pacha i an-o'oj, wo'or antal chke chi pacha taq je b'oj re ulew chi xa je anom rumal jun aj-anol b'iroxik re ulew.