Oseas 10:11 - Wuj Pa K'ubultzij

¹¹ I tinimit Efraín keje pacha te jun b'akil chi lik manxo chi lik qus kril te ujich'ik i trigo. Xwiri Yin wo'or inkojom jun yuku che i chom laj uqul, jek'b'al re i kareta; i Judá kujek' ab'ixb'al, i a Jacob kujukukej i jokb'al ulew.

Oseas 10:11 Referans Kwoze

Oseas 4:16

I tinimit Israel lik b'uy pacha ub'uyil jun ral b'akil ch'uj; keje ile, ¿I Ajwal keuchajij ni pa chomiq taq wayb'al, ku'an chke pacha je ral taq chij?

JEREMÍAS 50:11

Yix, aj Caldea, chi xiwel-aj b'i intinimit, ¡Chixkikotoq xaq chi'ana wach kiwaj! ¡Chixsak'linoq pacha taq jun ral b'akil pa taq es! ¡Chixsik'inoq pacha taq kaway!

Deuteronomio 25:4

Mikoj ub'osal i b'oyex are ketijin che i chak chub'iqik i trigo.

Romanos 16:18

Chijek'a iwib' ku' man ike ne te rajchak i Qajwal Jesucristo. To' kki'ano pacha urayijb'al i kinojb'al ike, xa je ajt'oronel ke i kanima i winaq chi nti qas kinojb'al, man qus taq kkita i kitzij ike.

Oseas 11:4

Ru' laso re ch'uch'anik, ru' k'am re k'axnab'al k'uxij, xeink'am li wu' Yin; xeintejeb'saj che k'ulala che inchi' chi pacha taq je noch' chi ketz'umanik; xinchaki chuya'ik kiwa,

Oseas 9:1

Matkikotik, tinimit Israel; matsak'lin rumal kikotemal pacha kki'an i jub'an chik tinimit, man xa'an i ch'am taj ru' ach'akul are xawo'taj kan a-Dios. Chila ipa kjich' wi uwach i trigo, qus kawil uk'amik rajil ni'pa taq i ch'am taj chi ka'an ru' ach'akul.

Oseas 3:1

I Ajwal xub'ij chik chwe: “Jat, k'ax chana jun ixoq chi k'ax kuna jun chik achi xaq xmakun ku' i achiyab' chu'anik i ch'am taj ru' uch'akul. Keje k'axnab'al uk'ux i Ajwal ile chke i aj Israel, tupu ike kkikoj ki'ij i dios chi etamam ti kiwach, xaq kkitij i lejom uva chaqij chi ksujux chke.”

Oseas 2:5

I kinan xuk'ayij rib'; lik xuk'aq b'i u'ij, are xub'ij: Kin-e chkitzukuxik i achiyab' chi je we ani'al, chi are keyaw inwa re trigo, inya', inchij, in-lino, in-aceite xaq i uwa'al uva muqb'am.

ISAÍAS 28:24

Jun ajchak are ktikanik, to' ti arewi ktijin b'i chutukik uwach rulew, to' ti arewi ktijin b'i chupa'ik xaq to' ti arewi ktijin b'i chuyijb'axik uwach.

JEREMÍAS 28:14

Man yin, chi in Ajwal, chi ronojel kintiki che, chi ki-Dios aj Israel, kinb'ij iri: Inkojom pacha jun yuku ch'ich' chkiqul konojel i winaq, man keje ile i winaq chi je o pa k'ax rumal i ma Nabucodonosor, chi ajawinel re i tinimit Babilonia. Xaq chikop aj pa taq es je inya'om pu'ab'.”

JEREMÍAS 46:20

I tinimit Egipto keje pacha jun chom laj b'akil, xwiri kk'un uch'opixik rumal jun iskatz re pa moxab'.

Miqueas 4:13

¡Chatwalijoq i chaya'ya uwi i trigo, tinimit Sion! Man i Ajwal kub'ij: “Yin kinya ni acho'ab' pacha re jun toro chi o rok'a' re ch'ich' xaq i rixk'aq re anch'ich', man keje ile ku'an ni k'ax chke uk'iyal taq tinimit. Yet kamaj ni kib'eyomal chke chi k'ax ti uch'akik ki'anom i kaya ni chwe Yin kojb'al re in-ij, Yin, chi in Ajwal re ronojel i jyub' ta'aj.”