Oseas 1:7 - Wuj Pa K'ubultzij

⁷ Xwiri, kwil ni tob'al uwach i rajawinik i tinimit Judá: Lik Yin in Ajwal, ki-Dios, keinto na. Xwiri Yin keinto ti pa ch'oj, Yin keinto ru' ti k'aqb'al ch'ab', ru' ti ch'ich' chi k'ulala o uware, ku' ti kaway, xaq mitene ku' achiyab' chi je ajrij taq kaway.”

Oseas 1:7 Referans Kwoze

ZACARÍAS 4:6

Ire xub'ij chik: “Iri are utzijonik i Ajwal che i ma Zorobabel: Kumal ti jutzob'aj winaq chi je yij che i ch'oj, mitene che i cho'ab', iri lik rumal Intewal, kub'ij i Ajwal chi ronojel ktiki che.

ISAÍAS 12:2

I Dios are kintowik, rumali kul ink'ux xaq kinxij ti wib'. I Ajwal are tob'al wib' xaq are incho'ab', are Ire tol we.”

2 Reyes 19:35

Che i a'ab' le, i ángel re i Ajwal, xeukamsaj lajujwinaq kamo' oxchiy jut'ub' (185,000) achiyab' aj Asiria chi je o chila che i k'ijib'al re molb'al ib'; che ukab' ij konojel is je kamnaq chik.

Oseas 11:12

I tinimit Efraín usutim wij ru' i t'oronik; xaq i tinimit Israel usutim wij ru' saqil ti laj tzij. I Judá xujek' rib' ru' i Dios, i wo'or lik uya'om uk'ux chke utiox chi xaril je antalik.

ISAÍAS 7:14

Lik are ni i Ajwal kuya jun ilb'al re chiwe: I apoj ali k'aqtajnaq chik, kralaj ni jun rak'al ala chi kuya pub'i a Emanuel.

ISAÍAS 49:6

Keje iri kub'ij: “Xwi ti at wajpatan, xaq re kakub'a tan chik utzob'ajil ma Jacob xaq keatzalijsaj tan chik ni'pa xek'asi kan chke aj Israel; Yin kin-an na chi lik at keje pacha i saq re i pa'ij chke i nimaq taq tinimit, man keje ile kak'am b'i intotajik k'a che taq i k'ijib'al chi lik k'a naj che uwach i jyub' ta'aj.”

Salmos 33:16

Mijun ajawinel ktotaj rumal kik'iyal uwinaq chi je yij che i ch'oj; mitene ketotaj i ko kiwach chu'anik i ch'oj tupu o kicho'ab'.

1 Samuel 17:47

Konojel ni'pa kimolom kib' warali, kketamaj na chi i Ajwal kojuto ti ru' jabalina, ru' ti che' ch'ich' utzam xaq ru' ti ch'ich' chi o uware k'ulala. I ch'oji re i Ajwal, are ire kixjachaw ni pqa'ab'.

2 Reyes 19:29

Are uri ma Isaías xub'ij che ma Ezequías: Are jun k'utb'al re iri che ronojel ni'pa kuk'ulmaj: Che i junab'i xaq i junab' chi kk'unik, kitij ni trigo chi kalax li utukel, xwiri che urox junab' yix kitik na xaq kimol na, xaq kitik ni i uva xaq kitij ni uwach.

ISAÍAS 30:18

Xwiri i Ajwal kixroy-ej re krilb'ej tob'al iwach yix; ire lik kkikot chik chuk'utik i k'axnab'al uk'ux chiwe, man i Ajwal lik are jun Dios chi ku'an i atb'al tzij suk'ulik. ¡Utz ke konojel ni'pa kkikub'a kik'ux che Ire!

JEREMÍAS 25:5

Ike kib'im chke: Chijalwachij u'anik i utz taj, chimayij xaqmanal ki'ano; keje ile kixk'iji ni chwach ulew chi xuya i Ajwal chiwe yix xaq chke iwatit imam ronojel ij saq.

JEREMÍAS 25:6

Mixterej chkij jub'an chik dios, mixxuki chkiwach xaq mikoj ki'ij. Mimi'saj roywal i Ajwal ru' ukojik ki'ij i tiox le chi xa yix ix anawnaq, man keje ile mijun k'ax kutaq li uri piwi.

JEREMÍAS 33:26

Lik kinxutuj ti kimuq kixikin i ma Jacob xaq ma David chi wajchak, xaq kinmayij ti relsaxik chkixol ike le, jun chi krajawin pkiwi umuq uxikin ma Abraham, ma Isaac xaq ma Jacob. Man Yin kwil ni tob'al kiwach ike le, xaq kin-an na chi ketzalij chal ni'pa i je k'amtal b'ik.”

Oseas 1:8

Are xmaj tz'um che al Lo-ruhama, i ati Gomer xu'on chik raxwinaq i xalax chik jun ralab'.

ÉXODO 14:13

Xwiri ma Moisés xub'ij chke aj Israel: —Mixij iwib'; chikowij ik'ux xaq chikojo retalil wach qato'ik ku'an i Ajwal wo'or. Man i je aj Egipto le chi kiwil kiwach wo'or, lik kiwil ti chik kiwach ile k-on panoq.

ÉXODO 14:30

Che i ij le i Ajwal xeuto aj Israel pki'ab' aj Egipto, xaq konojel xkilo chi je kamnaq chik aj Egipto man je jab'ernaq chi taq mar.

2 Reyes 6:18

I achiyab' chi je yij che i ch'oj aj Siria, are ya kkijeq u'anik ch'oj chrij ma Eliseo; are uri ma Eliseo xutz'onoj chik che i Ajwal: “Kintz'onoj chawe, Wajwal, chi cha'ana mawach chke konojel i winaqi.” Are uri i Ajwal x-on mawach chke konojel i winaq, chrij pacha xutz'onoj ma Eliseo che.

2 Reyes 19:34

Rumal k'axnab'al re i wajpatan ma David xaq rumal in-ij, Yin kinchajij ni i tinimit le xaq keinto na.” Xcha i Ajwal.

Salmos 44:7

Man yet xojawesaj pki'ab' i je ajch'oj chqij, xaq xeaya pa k'ixb'alil ni'pa i kojkiyo'ya.