Oseas 1:4 - Wuj Pa K'ubultzij

⁴ Are uri i Ajwal xub'ij che ma Oseas: “Chaya pub'i i ak'al a Jezreel, man pa keb' oxib' ij panoq kink'ajsaj ni kiwach i je umuq uxikin ma ajawinel Jehú, rumal taq i kamsanik chi ire xu'an chila pa Jezreel, keje ile kink'is ni uwach i ajawinik pa tinimit Israel.

Oseas 1:4 Referans Kwoze

Oseas 1:9

Are uri i Ajwal xub'ij che i ma Oseas: “Chaya pub'i i ak'al le a Lo-ammi, man yix ix intinimit ti chik, xaq Yin in i-Dios ti chik.”

Oseas 1:6

I ati Gomer xu'on tan chik raxwinaq, are uri xalax jun ralit, i Ajwal xub'ij che ma Oseas: “Chaya pub'i i ali le Lo-ruhama, man lik nti chik tob'al inwach che rajawinik i tinimit Israel. Lik kinkuy ti chik kimak.

Ezequiel 23:31

Xa xatterej chrij ni'pa xu'an awatz; rumali kinya ni utu'ik uk'axk'ol chawe chi pacha xinya che awatz.

Ezequiel 23:10

ike le xkiqajsaj u'ij; te'uri xekimaj i je ralab' xaq i je ralit che, te'uri ire xkikamsaj ru' ch'ich' chi k'ulala o uware, keje u'atik tzij ile xki'an che ixoq le. Ni'pa xu'ano le lik xel utzijol chkixol taq ixoqib'.

JEREMÍAS 23:2

I Ajwal, chi ki-Dios aj Israel, kub'ij chke i ajyu'ul chij chi kerajawin puwi utinimit: “Yix ikichersam b'i inchij, i'anom chke chi ke'anmaj b'ik, xaq lik je ichajim taj. B'ay, yin lik utz uya'ik utojb'alil kin-an chiwe rumal ni'pa i utz taj chi xi'ano. Yin in Ajwal, xinb'iw ile.

JEREMÍAS 3:8

Xaq xrilo chi yin xwesaj i qelqel laj tinimit Israel chinwach, xaq xinjacho rumal i xaqmanal xu'an ru' jun chik. Xwiri i tinimit Judá chi jik ti uk'ux chi ucha' i tinimit Israel, lik xuxij ti rib', xaq xane, xok ire chu'anik i utz taj chi kmajaw taj k-anik.

ISAÍAS 9:6

Man xalax jun ak'al chqaxol, i Dios xuya jun qak'al lik yatal pu'ab' chi are ire krajawinik. Chi are ub'i iri kb'ix na: B'isb'al ni'pa ku'ano, Dios nim ucho'ab', Qajawxel ronojel ij saq, Uk'ojol Ajawinel re chomb'al ib'.

ISAÍAS 7:14

Lik are ni i Ajwal kuya jun ilb'al re chiwe: I apoj ali k'aqtajnaq chik, kralaj ni jun rak'al ala chi kuya pub'i a Emanuel.

2 Reyes 15:29

Che taq ij re rajawinik ma Peka pa tinimit Israel, xupon ma Tiglat-pileser, chi ajawinel re i tinimit Asiria. I ajawinel le, xumaj i tinimit Ijón, Abel-bet-maaca, Janoa, Cedes, Hazor, Galaad, Galilea xaq ronojel ulew Neftalí; konojel i winaq xeuk'am b'i prexil pa tinimit Asiria.

2 Reyes 10:17

Are xok b'i pa tinimit Samaria, ma Jehú xeukamsaj konojel i umuq uxikin ma Acab chi k'a je k'as kanoq. Lik xuchup kiwach konojel, chrij pacha ub'im i Ajwal che ma Elías.

Juan 1:42

Are uri ma Andrés xuk'am b'i ma Simón chila ipa o wi i Jesús. I Jesús are xril uwach ma Simón, xub'ij che: —Yet at ma Simón chi at uk'ojol ma Wan, xwiri wo'or, yin kinya pab'i ma Cefas (chi ke'eloq ma Pedro).

Lucas 1:63

Are uri i uqajaw xutz'onoj ch'aqap tz'alam chke, te'uri xutz'ib'aj “A Wan”. Lik konojel xkib'isoj wach i kilom.

Lucas 1:31

Chata pe', lik katk'aqtaj na; i ak'al le kaya ni pub'i Jesús.

Lucas 1:13

Xwiri i ángel xub'ij che: —Mam Zacarías, maxij awib'. I Dios utom wach atz'onom che. Yet ru' awixoqil ati Elisabet kk'iji ni jun iwak'al chi kiya ni pub'i a Wan.

Mateo 1:21

I ak'al le chi kalax na, lik ala. Kaya ni pub'i a Jesús. Keje ni ub'i ile, man kresaj uwinaq chupam i kimak. Keje ile xub'ij i ángel che.

Oseas 9:17

I tinimiti kraj ti kkojon che in-Dios; rumali in-Dios kuxutuj na, xaq to' keb'in pa taq tinimit, nti kejeqi wi.

Oseas 2:22

i ulew kula' ni uwach che i trigo, che i uwa'al uva muqb'am xaq che i aceite, ike le kkila' ni uwach che a Jezreel.

Oseas 2:13

Kinya ni utojb'alil che rumal i ij chi xik'awik chi xusujuj pom chke taq i tiox, are kuwiq rib' ru' b'aq re uwi ab'aj xaq i uwaj, re kterej chkij achiyab' chi je re ani'al xwiri Yin lik xinusach puk'ux. Yin in Ajwal, xinb'ij.

2 Reyes 15:8

Che i wajxaqlajuj juwinaq (38) junab' rajawinik ma Azarías, pa tinimit Judá, are uri xujeq ajawinik ma Zacarías, chi uk'ojol ma Jeroboam, pa tinimit Israel. Waqib' ik' xrajawin pa tinimit Samaria.

JEREMÍAS 20:3

Te'uri chukab' ij xutaq relsaxik ma Jeremías pa che'. Are uri ma Jeremías xub'ij che: I Ajwal xujalwachij i ab'i, kub'ij ti chik ma Pasur chawe, are kub'ij chawe ma “Magor-misabib.”

JOSUÉ 19:18

I jalajuj taq tinimit chi o chupam ulew le are iri: Jezreel, Quesulot, Sunem,

2 Reyes 10:1

Ma Acab o lajuj oxwinaq (70) rak'al chila pa tinimit Samaria. Are uri ma Jehú xutz'ib'aj wuj chke i jalajuj taq atol tzij re i tinimit le, chke i rijab' xaq chke i kechajiw i rak'al ma Acab. Chupam i wuj le xutz'ib'aj keje iri:

ISAÍAS 8:3

Te'uri xink'iji ru' jun ixoq chi profeta, xin-an wixoqil che, ire xk'aqtajik rumali xralaj jun qak'al. Are uri i Ajwal xub'ij chwe: Chaya pub'i a Maher-salal-hasbaz.

AMÓS 9:8

I Ajwal kril i tinimit ajmakunel, i kub'ij: Kinsachsaj uwach chwach i ulew, xwiri kinsachsaj ti uwach ronojel i rachoch ma Jacob. Yin in Ajwal, kinb'ij.