NEHEMÍAS 8:3 - Wuj Pa K'ubultzij3 Xujeq rajlaxik saqirik xutzin chrajlaxik k'a are x-on pa'ij chkiwach konojel i winaq chi kimolom kib' chwach i k'ijib'al re i tinimit chi o chwach uchija re i Ya. Konojel i winaq le, lik xkiya kixikin che are x-ajlax uwach i wuj re u'atb'al tzij i Dios chke. Gade chapit la |
Kqamayij ti utioxixik che i Dios rumal wach i'anom, man yix, are xqab'ij utzij i Dios chiwe, xikoj retalil che, xich'ob' taj chi moqxa are ti utzij i Dios kqab'ij; lik xik'ulaj iwu', keje taj pacha i tzij chi xa ku' winaq petnaq wi. Qatzij, lik are utzij i Dios xqab'ij chiwe, xaq wo'or kchakun piwanima yix chi ikub'am ik'ux che i Ajwal.
Rumali chi xkich'ik jun ij chi kkimol kib' ru' ma Pablo. Are xuriq i ij, je k'i i winaq xemoltaj chila ipa o wi ma Pablo. I ma Pablo xujeq lapanik ku' are xsaqirik k'ate xumayij xqaj i ij; xub'ij chke wach usuk' i ajawinik re i Dios. Ire xutij u'ijol ub'ixkil chi chkikojo i Jesús, xub'ij usuk' chke ru' u'atb'al tzij i mam Moisés xaq ru' i tzij chi tz'ib'tal kan kumal i profeta.
Ni'pa i winaq chi je jeqel chila Jerusalén xaq i kaj-atzil, keta'am taj pachin i Jesús le xaq kkita ti ub'e ni'pa kib'im i profeta are kkajlaj uwach i wuj pa taq ja re molb'al ib' ke i judío che i ij sábado; keje uri ile chi lik je are ike xe'anaw ronojel ni'pa kub'ij i wuj le, man xkikamsaj i Jesús.
I tijonel chi ma Esdras tak'al puwi jun tak'ib'al re tz'alam chi naj rij antal che chi lik are uchak ile yijb'am. Xaq puwiqab'im je tak'al ma Matatías, ma Sema, ma Anías, ma Urías, ma Hilcías xaq ma Maasías. Pumoxim je tak'al ma Pedaías, ma Misael, ma Malquías, ma Hasum, ma Hasbadana, ma Zacarías xaq ma Mesulam.