Miqueas 1:1 - Wuj Pa K'ubultzij

¹ Iri are i tzijonik chi Ajwal xub'ij che ma Miqueas re i tinimit Moreset chi xaq xuk'ut che puwach chrij i tinimit Samaria xaq i tinimit Jerusalén, che taq i ij chi ma Jotam, ma Acaz xaq ma Ezequías kerajawin pa tinimit Judá.

Miqueas 1:1 Referans Kwoze

JEREMÍAS 26:18

Che taq i ij re ma Ezequías, chi ajawinel re i tinimit Judá, ma Miqueas aj Moreset xub'ij pub'i i Ajwal chke konojel i winaq aj Judá: I Ajwal chi ronojel ktiki che, kub'ij: I tinimit Sion kkanaj na pacha jun ulew re ktuk uwach, i tinimit Jerusalén k-on na pacha jut'ub'aj ja wulijnaq, xaq uwi rachoch i Ajwal lik kpe ni es chwach.

ISAÍAS 1:1

Tzijonik re i Ajwal chi xub'ij ma Isaías uk'ojol ma Amoz, ile xb'ix che rumal i Dios chupam jun ilik pa wachij wach kuk'ulmaj i tinimit Judá xaq i Jerusalén che taq i ij re rajawinik ma Uzías, ma Jotam, ma Acaz xaq i ma Ezequías chila pa Judá.

Oseas 1:1

Iri are i tzijonik chi xub'ij i Ajwal che ma Oseas chi rak'al i ma Beeri che taq i ij re ajawinik re i ma Uzías, ma Jotam, ma Acaz xaq ma Ezequías, ajawinelab' re i tinimit Judá, xaq che taq i ij re ma Jeroboam, rak'al i ma Joás, ajawinel re i tinimit Israel.

AMÓS 1:1

Iri are i utzijonik ma Amós, ajyu'ul chij aj pa tinimit Tecoa, xya' che rumal i Dios chrij i tinimit Israel, che i keb' junab' chuxe'el kab'raqan, che rajawinik i ma Uzías, ajawinel re Judá, xaq re i ma Jeroboam, chi uk'ojol ma Joás, ajawinel re Israel.

Miqueas 1:5

Ronojel iri rumal uqelanik i tinimit re ma Jacob, rumal umak atzalal re i ajawinik Israel. ¿Ipa o wi uqelanik i ma Jacob? ¡Pa tinimit Samaria! ¿Ipa je o wi i lo'laj taq k'ijib'al ke i tiox chi xaril je antalik re i Judá? ¡Lik chila pa tinimit Jerusalén!

AMÓS 6:1

¡To' kiwach i jub'an chi to' utz kkina pkik'aslemal chila pa Sion! ¡To' kiwach i jub'an chi kul kik'ux che i Samaria, xaq to' kiwach i je aj-ok'al utzam i tinimit chi lik o u'ij, ipa kkito wi kib' aj Israel!

Oseas 8:14

I tinimit Israel kuyak ni nimaq taq ja ke ajawinelab', xwiri ksach ni chuk'ux i aj-anol re. I tinimit Judá kuyak ni nimaq taq tinimit chi lik sutim rij ru' tapial, xwiri yin kin-an ni chke chi kejar ni pa 'a i kk'is nu b'i kiwach i nimaq taq ja ke ajawinelab'.

Oseas 4:15

We yet, Israel, ka'an i ch'am taj, xwiri i tinimit Judá nti umak che ile. ¡Mix-e yix pa Gilgal xaq mixel b'i pa Bet-avén xaq mikuxtaj uk'aslemal i Ajwal puwi jun tzij! Man Ire lik k'aslik.

Habacuc 1:1

Iri are i tzijonik chi Ajwal xuya retamaxik che i profeta ma Habacuc.

2 Pédro 1:21

Man mijun profeta to' xutz'ib'aj wach unojb'al ire. Xwiri ni'pa i xkib'ij ike, lik are utzij i Dios, man ike lik xkiya kib' pu'ab' i Dios, xaq wach i xkib'ij, lik are Lo'laj Utewal i Dios xyaw chke.

2 Reyes 15:5

Rumali i Ajwal xuya jun tojb'al che i ajawinel le ru' jun itzel laj yob'il che tz'umalil, k'a xkam na. Chuxe'el ukamik i ajawinel le, xk'iji utukel che chik jun ja chila chupam i nim laj rachoch i ajawinel, ma Jotam chi uk'ojol, xkanaj chuk'amik utzam i tinimit Judá.

2 Reyes 15:32

Che i ukab' junab' rajawinik ma Peka, chi uk'ojol Remalías, ma Jotam, chi rak'al ma Uzías, xujeq ajawinik pa tinimit Judá.

2 Reyes 16:1

Che i wuqlajuj junab' re rajawinik ma Peka, chi uk'ojol ma Remalías, xujeq ajawinik ma Acaz, chi uk'ojol ma Jotam pa tinimit Judá.

2 Reyes 18:1

Che urox junab' rajawinik ma Oseas, chi uk'ojol ma Ela, chi ajawinel re i tinimit Israel, are uri xujeq ajawinik ma Ezequías, chi uk'ojol ma Acaz, chila pa tinimit Judá.

SEGUNDO LIBRO DE CR%D3NICAS 28:1

Ma Acaz o juwinaq junab' che are xujeq ajawinik. Xaq waqlajuj junab' xrajawin pa Jerusalén. Xwiri ronojel ni'pa xu'ano lik utz taj chwach i Ajwal, keje taj pacha xu'an i etz mam David, chi ratit umam.

SEGUNDO LIBRO DE CR%D3NICAS 29:1

Ma Ezequías o jo'ob' juwinaq (25) junab' che are xujeq ajawinik; b'elejeb' juwinaq (29) junab' xrajawin pa tinimit Jerusalén. I uchuch ati Abías ub'i, chi umi'al ma Zacarías.

ISAÍAS 7:1

I ajawinel re i tinimit Siria, chi are ma Rezín, xaq i ajawinel ke aj Israel, chi ma Peka ub'i, uk'ojol ma Remalías, xe'e chu'anik ch'oj chkij aj Jerusalén xaq xkaj umajik xwiri xetiki taj. Ile xuk'ulmaj are o ma Acaz pa ajawinel puwi i tinimit Judá, i ma Acaz le uk'ojol ma Jotam xaq ri umam ma Uzías.

Miqueas 3:9

Chita iri wo'or, aj-ok'al utzam xaq i aj-atzil re i tinimit Israel, yix chi tzel kiwil u'anik i utz xaq kijech'b'a b'i ronojel i suk'ulik,

ISAÍAS 1:2

I kaj xaq i ulew, chita wach kub'ij i Ajwal: “Xeink'itsaj wak'al k'a xenimaqirik, xwiri ike xewalij chu'anik ch'oj chwij.