Are ulew chi re te'eq ma Og, chi ajawinel te'eq puwi i tinimit Basán; ronojel ulew Basán le kjeqan li uchi' pa Mahanaim, kumaj b'i oxwinaq (60) tinimit chi o chupam ulew Jair.
Xaq nik'aj che ulew Galaad, Astarot xaq i Edrei, chi ipa ku'at wi te'eq tzij ma Og, ile are xya' chke nik'aj je umuq uxikin ma Maquir chi rak'al ma Manasés, chrij pacha kik'iyal i kalk'uwal.
Keje u'anik ile chi utzob'ajil ma Manasés xya' chik lajuj setaj kulew, ile uwi chik i xya' chke chila Galaad xaq i Basán chi o prelb'al ij che i ya Jordán.
I nik'aj chke utzob'ajil ma Manasés, yatal chik kulew rumal etz mam Moisés chila pa Basán. Xwiri i nik'aj chik chke utzob'ajil ma Manasés, are chik mam Josué xyaw kulew chila puqajb'al ij che i Jordán. Chke i nab'e taq nik'aj tzob'aj xuya utzil chomal pkiwi xaq xeutaq b'i chi kachoch.