JEREMÍAS 37:21 - Wuj Pa K'ubultzij

²¹ Are uri i ajawinel, chi ma Sedequías, xub'ij chi ma Jeremías kkanaj prexil chwaja ipa je o wi ajchajinelab' xaq ij ij kkik'am b'i jun ukaxlanwa chi kek'am chila che i b'e ke i aj-anol kaxlanwa. Keje iri x-antaj na tz'aqat lik o kaxlanwa pa tinimit le. Keje uri ile chi ma Jeremías xkanaj kan chwaja ipa je o wi i ajchajinelab'.

JEREMÍAS 37:21 Referans Kwoze

JEREMÍAS 38:28

I ma Jeremías xkanaj kan chwaja ipa je o wi i chajinelab' k'a che i ij chi xk'am kan i Jerusalén.

JEREMÍAS 38:13

Keje u'anik uri ile chi achiyab' xkik'aq b'i laso pa jul, are uri xkesaj li ma Jeremías chila. Chrijil chik ile i ma Jeremías xkanaj kan chwaja ipa je o wi ajchajinelab'.

JEREMÍAS 52:6

Che i b'elejeb' ij, re ukaj ik', che i junab' le xk'iyar i wa'jal pa tinimit, i winaq lik nti chik o ku' re kkitijo.

JEREMÍAS 38:9

—Nim laj ajawinel, i achiyab' le lik utz ti xki'an che ma Jeremías. Man xkimin chupam jun k'otom chaqij, xaq chila kkam ni rumal i numik man nti chik wa re trigo pa nim laj tinimit.

JEREMÍAS 32:2

Che taq i ij le i achiyab' chi je yij che i ch'oj re i ajawinel re i tinimit Babilonia ketijin chu'anik ch'oj chkij i winaq aj Jerusalén; ma Jeremías, chi profeta, tz'apim chwaja ipa je o wi i chajinelab' chila pa nim laj rachoch i ajawinel.

ISAÍAS 33:16

ile lik kk'asi na, kuriq ni tob'al rib' chupam jun nim laj ab'aj, lik arewi o ni uwa xaq i uya' lik kramtaj taj.

2 Reyes 25:3

Che i b'elejeb' ij re ukaj ik', che i junab' le, lik mas i numik xpe pa nim laj tinimit, i winaq lik nti chik o ku' re kkitijo.

Job 5:20

Che u'ijlal i wa'jal, kuya ti chawe chi katkamik xaq che u'ijlal i ch'oj, katresaj ni chwach i ch'ich' chi o uware k'ulala.

2 Timotéo 2:9

Rumal ub'ixkil i tzij k'ak' le, kintij uyej, xaq in ximtal ru' karena pacha taq jun aj-anol utz taj; xwiri i utzij i Dios ximtal taj, xaipa kupon wi.

2 Timotéo 1:8

Rumali, matk'ix chub'ixkil wach u'anom i Qajwal; xaq matk'ix chwe yin chi in o prexil xaq rumal re Ire. Are i cha'ana, chach'ija ni'pa i uyej kpe pawi xa rumal upaxsaxik i utz laj tzij k'ak' re i Dios. Chach'ija ru' i cho'ab' chi kuya i Dios chawe.

Efesios 6:20

I Dios in utaqom li yin puk'exel Ire chupaxsaxik i utz laj tzij le. Xwiri rumal ub'ixkil i tzij le wo'or yin in o prexil. Chitz'onoj che i Dios pinwi, man kintijin chub'ixkil utzij Ire, chuya ni ukowil ink'ux chub'ixkil pacha i kmajawik.

Efesios 4:1

Yin, chi in o prexil xa rumal uchak i Ajwal, lik kinb'ij chiwe: Chi'ana i utz i chom, man ix chatal rumal i Dios; ni'pa i je chatal rumal Ire, lik kmajaw chke kki'an i utz i chom.

Hechos 28:30

I ma Pablo xkanaj kan keb' junab' chila ipa utojom wi uposar, chila xeuk'ulaj wi ru' ni'pa i xeupon chusolixik.

Hechos 28:16

Are xojupon pa Roma, xya' che ma Pablo chi kk'iji che jun chik k'ijib'al junam taj ku' i rachi'il xaq xa jun achi chi yij che i ch'oj xchajiwik.

Hechos 24:27

Keb' junab' chik xik'awik chi ma Félix aj-ok'al utzam i jalajuj taq tinimit; te'uri xel che upatan, xok i ma Porcio Festo puk'exel. Xwiri i ma Félix kraj chi lik utz kkanaj chkiwach i aj Judío, rumali chi are xel che upatan xukanaj kan ma Pablo prexil.

Hechos 12:5

Keje uri ile chi ma Pedro o prexil xaq lik utz uchajixik antalik, xwiri i jutzob'aj chi je re i Dios lik xkimayij ti kilapanik ru' i Dios ru' ronojel kik'ux, tob'al re i ma Pedro.

Mateo 6:33

Rumali, chiya iwib' che i utz laj U'atb'al tzij i Dios aj Chikaj; chiya iwib' chu'ankil wach kraj Ire; te'uri Ire kuya ni chiwe wach taq i rajwaxik chiwe.

Lamentaciones 5:10

I qatz'umalil lik kjuluwik pacha jun orno, rumal i a' tew chqij chi are i numik k-anaw chqe.

JEREMÍAS 32:8

Lik pacha xub'ij i Ajwal chwe, keje ile x-antajik, man i ma Hanameel chi rak'al i wikan, xk'un wu' chwaja ipa je o wi i chajinelab', xaq xub'ij chwe chi kinlo' i ulew le che chi o pa Anatot, chi ukwenta utzob'ajil ma Benjamín; yin lik o we che i ulew le man lik je wachalal. Are xinnab'ej chi ile utaqanik i Ajwal,

Proverbios 21:1

Unojb'al i ajawinel pu'ab' i Ajwal, keje pacha i raqana, chi lik are ku'ano pacha kraj i Ajwal.

Proverbios 16:7

I Ajwal are utz kril unojb'al jun winaq, i je ajch'oj chrij ku'an ni chke chi kkichomaj kib' chwach i winaq le.

Salmos 37:19

Ketzaq ti chupam i k'ixb'alil che taq i ij are o wa'jal, man lik kramtaj ti kiwa.

Salmos 37:3

chakub'a ak'ux che i Ajwal, xaq cha'ana i utz; chat-ol chwach i jyub' ta'aj xaq chajikb'a ak'ux.

JEREMÍAS 33:1

Tz'aqat ma Jeremías k'a tz'apil chila chwaja ipa je o wi chajinelab', i Ajwal xlapan chik ru' ire ukamul:

JEREMÍAS 38:6

Are uri ike xkichap ma Jeremías, xkiya chupam i k'otom chaqij upam re ma Malquías, chi uk'ojol i ajawinel, chi o chila chwaja ipa je o wi i chajinelab'. Xkiqajsaj ru' jun laso nim upam chupam i k'otom, nti ya chupam, xa xo'ol upam, rumali chi ma Jeremías xmuqtaj b'i chupam.

JEREMÍAS 20:2

Are uri ma Pasur le xutaq u'anik k'ax che ma Jeremías xaq xutaq uya'ik pa che' chi o chila chwach Uchija Naj Rij re ma Benjamín chi o ajsik, chi o naqaj che rachoch i Ajwal.