JEREMÍAS 34:1 - Wuj Pa K'ubultzij

¹ Ma Nabucodonosor, chi ajawinel re i Babilonia, junam ku' i achiyab' chi je yij che i ch'oj, chi je are i winaq ke konojel ni'pa i nimaq taq tinimit re i uwach i jyub' ta'aj chi je o pu'ab' ire, ketijin chu'anik ch'oj chrij i tinimit Jerusalén xaq chkij i tinimit chi je o naqaj chke, i Ajwal xlapan ru' ma Jeremías, xub'ij che:

JEREMÍAS 34:1 Referans Kwoze

JEREMÍAS 1:15

Yin, chi in Ajwal, lik kinsaqij chiwe chi keinsik'ij konojel i ajawinelab' pa moxab'. Kek'un ni i kajawinelab' xaq kkikub'a ni kikub'ib'al chi o u'ij pa okb'al che i tinimit Jerusalén, chwach ronojel ni'pa i tapial chi sutiwnaq rij xaq chkiwach konojel ni'pa i tinimit re i Judá.

JEREMÍAS 32:2

Che taq i ij le i achiyab' chi je yij che i ch'oj re i ajawinel re i tinimit Babilonia ketijin chu'anik ch'oj chkij i winaq aj Jerusalén; ma Jeremías, chi profeta, tz'apim chwaja ipa je o wi i chajinelab' chila pa nim laj rachoch i ajawinel.

Daniel 5:19

Ni'pa taq xya' che chi ktiki che, konojel ni'pa i winaq pa taq tinimit, nimaq taq tinimit xaq i ch'ab'al lik kekojon che xaq lik kesiksat chwach Ire. Ire kukamsaj xaq kuya uk'aslemal pachin che kraj Ire; o jujun kuyak ki'ij xaq jub'an chik kuqajsaj ki'ij.

Daniel 4:22

i che' le are yet, Nim laj Winaq, chi lik at k'iynaq xaq nim a'ij. I unimal a'ij yet, Nim laj Winaq, lik k'iynaq chi lik kupon unimal k'a chikaj, xaq i ajawinik lik enaq puwi ronojel i jyub' ta'aj.

Daniel 4:1

Yin in ajawinel ma Nabucodonosor, kwaj i chomb'al ib' xaq i elik chisaq chke i winaq ke konojel taq i tinimit, nimaq taq tinimit xaq i kich'ab'al konojel i je o chwach ronojel ulew.

JEREMÍAS 34:7

Are uri i achiyab' chi je yij che i ch'oj re i ajawinel aj Babilonia ketijin chu'anik ch'oj chrij i tinimit Jerusalén, Laquis xaq i Azeca, xwi i tinimit ile chi sutim kij ru' i tapial nim uwach re i tinimit Judá chi xewulij taj.

JEREMÍAS 32:1

I Ajwal xch'aw che ma Jeremías che i ulajuj junab' che rajawinik ma Sedequías pa tinimit Judá, chi are uwajxaqlajuj junab' rajawinik ma Nabucodonosor.