ISAÍAS 22:2 - Wuj Pa K'ubultzij

² I tinimit lik nojnaq che i ch'oqowik xaq che i sik'inik, tinimit chi lik qus kril i kikotsanel ib', i kamnaq xetzaq ti rumal i ch'ich' chi o uware k'ulala, xekam ti rumal i ch'oj;

ISAÍAS 22:2 Referans Kwoze

ISAÍAS 32:13

K'ix xaq itzel taq es kek'i ni chwach wulew, pa ronojel taq ja chi kekikotik re i tinimit chi lik qus kril i kikotsab'al ib'.

Lamentaciones 2:20

Chawila Ajwal, chach'ob'o chi lik mijun a'anom keje ile che. ¿Xatab'a kkitij kak'al i chuchxelab' chi k'a ketz'umanik? ¿Xatab'a i je ajsujul sipon xaq i je profeta kekamsax taq chila pa lo'laj ak'ijib'al?

JEREMÍAS 14:18

Are kinel pa taq es keinriqa kich'akul i winaq chi je kamnaq pa ch'oj, are kinok b'i pa nim laj tinimit, kewil i winaq chi ktijin kikamik rumal i wa'jal, xaq keje i profeta, xaq i je ajsujul sipon ke'e che jun chik tinimit chi keta'am ti uwach.

ISAÍAS 23:7

¿Are tinimit ile chi ax o wi ujer, xaq lik qus kril i kikotsanel ib'? ¿Are tinimit ile chi to' k-e b'i che jun nim laj tinimit naj?

JEREMÍAS 52:6

Che i b'elejeb' ij, re ukaj ik', che i junab' le xk'iyar i wa'jal pa tinimit, i winaq lik nti chik o ku' re kkitijo.

JEREMÍAS 38:2

I Ajwal kub'ij: “Pachin jun kkanaj kan pa tinimit, kkam ni uri pa ch'oj, rumal wa'jal, rumal itzel laj taq yob'il. Xwiri pachin jun chi kel b'ik xaq kujach rib' pki'ab' aj Caldea, ktiki ni uri chuto'ik uk'aslemal.

ISAÍAS 37:36

Che i a'ab' le, i ángel re i Ajwal xeukamsaj lajujwinaq kamo' oxchiy jut'ub' (185,000) achiyab' aj Asiria chi je o chila che i k'ijib'al re molb'al ib'; che ukab' ij konojel lik je kamnaq chik.

ISAÍAS 37:33

I Ajwal kub'ij i tziji chrij i ajawinel aj Asiria: “Ire kok tu b'i pa tinimit Jerusalén, mijun ch'ab' kuk'aq na, xaq ku'an ti ch'oj chrij, tupu o utob'al, xaq ku'an ti ik'awb'al chrij chwach.

ISAÍAS 10:4

We kqajsax ti i'ij xaq we kixk'am tu b'i prexil, kixtzaq ni ku' ni'pa i kekamsaxik. Xwiri i roywal i Ajwal lik ik'awnaq taj, Ire k'a kuch'ach'a usachik iwach.

ISAÍAS 32:14

I nim laj rachoch i ajawinel ko'tax ni kanoq; i tinimit chi lik nim kek'is b'i uwinaq, kkanaj na pacha jun tz'inilik jyub' chaqij; i ukowib'al i tinimit ko'tax ni kanoq ronojel ij saq, chila na kejeqi wi i axna aj pa taq es xaq lik kekikotik, chila na kewa wi i jalajuj taq chikop.

Lamentaciones 1:1

¡Lik tz'inilik xkanaj kan i nim laj tinimit, chi ujer lik nojnaq te'eq uwach che i winaq! ¡I tinimit chi mas o te'eq u'ij wo'or xkanajik pacha jun malkan! ¡Xaq lik o chuqul u'anik i k'ax laj taq chak kumal jub'an chik tinimit chi ujer xrajawin te'eq ire pkiwi!

Ezequiel 22:5

Ni'pa i je o naj xaq i je o naqaj, katkiyo'ya na, at are jun tinimit chi nim a'ij kumal atiox chi je a'anom xaq rumal i xaqmanal ka'ano.

SOFONÍAS 2:15

Ile are i tinimit chi lik nim u'anom che rib' chi lik ukub'am te'eq uk'ux che, wach kkib'ij uwinaq chi lik nti chik jun chik xaqjun pacha Ire chwach i jyub' ta'aj. ¡Lik kanajnaq, nti chik winaq chupam xaq antal che chi are kiwarb'al itzel taq chikop! Konojel ni'pa keik'aw chutzal ire, kexub'an na xaq kki'an kipalaj che k'utb'al re chi o pa k'ixb'alil.