Are xupon ma Barac chutzukuxik ma Sísara, ati Jael xel la li chuk'ulaxik, xub'ij che: —Sa'aj man kink'ut chawe ipa o wi achi chi kattijin chutzukuxik. Are xok b'i ma Barac pa ja ru' ati Jael, are uri xrilo chi jab'al b'i ma Sísara chwach ulew kamnaq chik xaq ch'apal jun estaka che ujolom.
Are uri i Jesús xutz'onoj che: —Ixoq, ¿B'uchak kato'ik? ¿Pachin katzukuj? I ati Mariy xuch'ob'o chi are kchajiw i tikonb'al, rumali xub'ij che: —Ta, we yet xak'am b'i uch'akul i Jesús, chab'ij chwe ipa xaya wi man yin kink'am b'ik.
Are uri xeupon pan utijoxelab', ike lik xkib'isoj chi i Jesús klapan ru' i ixoq le. Xwiri mijun chke xukowij rib' chutz'onoxik che wach taq kraj i ixoq xaq wach taq kkilap ru'.
Are uri ma Eliseo xub'ij chke: —Are ti i b'e iri chi kitzukuj xaq are ti i nim laj tinimit. Chixterej b'i chwij man kixink'am b'i k'a chila ipa o wi achi chi kitzukuj. Are uri xeuk'am b'i pa tinimit Samaria.
Chukab' ij i mam Abraham lik we' xwalijik, xuk'am i lejom wa re trigo, xaq xuk'am jun tz'um chi o ya chupam, xuya che ati Agar. Xuya an xol uteleb' xaq xuya b'i ralab' che, are uri xutaq b'ik. Are u'ankil uri chi xel b'i ati Agar, to' x-e b'i pa taq tz'inilik jyub' chaqij chila Beerseba.
Te'uri mam Israel xub'ij che a José: —Jat, jeawila i awatz wach ki'anom xaq wach taq ki'anom i chij, te'uri kattzalij chali chub'ixkil chwe —xcha. I mam Israel le jeqel chila chwa ta'aj Hebrón are xutaq b'i a José; i a José le xupon chila pa Siquem,