AMÓS 9:8 - Wuj Pa K'ubultzij

⁸ I Ajwal kril i tinimit ajmakunel, i kub'ij: Kinsachsaj uwach chwach i ulew, xwiri kinsachsaj ti uwach ronojel i rachoch ma Jacob. Yin in Ajwal, kinb'ij.

AMÓS 9:8 Referans Kwoze

JEREMÍAS 30:11

Yin, chi in Ajwal kinb'ij, chi in o iwu' re kixinto. Kinsach ni kiwach konojel ni'pa i nimaq taq tinimit ipa xixinkichersaj wi b'ik. Xwiri yet kinsach ti awach; xwi kinya utojb'alil chawe chrij pacha kmajawik, Man lik to' ti ksach utojb'alil i amak.

AMÓS 9:4

i we ke'elsax b'i pa cho'ab' chwach kulew kumal i je ajch'oj chkij, kintaq nu b'i i ch'ich' chi k'ulala o uware re keukamsaj. ¡Ru' inb'a'wach keintaqej anb'al k'ax chke, yab'al ti utz pkiwi!”

JEREMÍAS 44:27

Man Yin lik kixintaqej re kintaq b'i k'ax laj taq yob'il piwi, keje uri ile lik kitij ti utz. Konojel aj Judá chi je jeqel pa Egipto lik ksach ni kiwach ru' nimaq taq ch'oj xaq ru' wa'jal.

JEREMÍAS 5:10

¡I je ajch'oj chkij lik che'okoq xaq chkisacha uwach ronojel i tikon chi o chila pa tikb'al uva, xwiri lik ronojel taj kkisach uwach. ¡Chki'oqij u'ab' taq i uva, man ile tikb'al ti chik in-uva!

Joel 2:32

Xwiri konojel ni'pa i kkikoj u'ij i Ajwal ketotaj ni chwach i kamik, man chila pa jyub' Sion, xaq pa Jerusalén, o ni totajik chwach i kamik, keje pacha ub'im i Ajwal. Ni'pa i je u'ulum ire kek'asi na.

Oseas 1:6

I ati Gomer xu'on tan chik raxwinaq, are uri xalax jun ralit, i Ajwal xub'ij che ma Oseas: “Chaya pub'i i ali le Lo-ruhama, man lik nti chik tob'al inwach che rajawinik i tinimit Israel. Lik kinkuy ti chik kimak.

Proverbios 15:3

Ub'a'wach i Ajwal o chwach ronojel i jyub' ta'aj, je utaqem i je utz laj taq winaq xaq je utz ti laj taq winaq.

Proverbios 5:21

I Ajwal lik arewi krilo wach u'anom i kik'aslemal i winaq, Ire lik kusach ti qataqexik che ronojel i kqa'ano.

1 Reyes 13:34

Rumal i xaqmanal xu'an i ma Jeroboam le puk'aslemal, lik xu'an chke i ralk'uwal chi xemakunik xaq lik xchupsax kiwach konojel.

Deuteronomio 6:15

Man Iwajwal Dios chi o iwu' yix, are jun Dios, chi lik nim u'ij xaq lik xwi Ire kmajawik koksax u'ij xaq lik kpe roywal chiwe, xaq o pu'ab' kusach iwach iwonojel.

Deuteronomio 4:31

ire lik utz uk'ux, kixro'taj taj, kuchup ti iwach xaq ksach ti utrat chuk'ux chi xu'an ku' iwatit imam, chi lik xub'ij chi ku'an na.

GÉNESIS 7:4

Man pa wuqub' ij panoq, kinpetsaj ni jun nim laj jab' chwach i jyub' ta'aj, kuch'ij ni kawinaq (40) ij xaq kawinaq (40) a'ab', chupb'al kiwach konojel ni'pa i winaq xaq i chikop chi o kik'aslemal chi je in-anom chwach i jyub' ta'aj”. Keje ile xub'ij i Dios che ma Noé.

GÉNESIS 6:7

Rumali xub'ij: “Kinchup ni kiwach konojel i winaq chwach i jyub' ta'aj chi je in-anom; xaq keje konojel i chikop je manxo, konojel i kejukmayik, konojel i tz'ikin chi kerupup chikaj, man lik xb'a'krij ink'ux chke chi xein-ano.” Xcha i Dios.

JEREMÍAS 46:28

Yin in Ajwal, kinb'ij: Maxij taq awib' tinimit re ma Jacob, wajtaqon, man Yin in o awu'. Kinsachsaj ni kiwach konojel i nimaq taq tinimit, chkixol ipa xatinkichersaj wi b'ik. Xwiri yet kinsachsaj ti awach; xwi kinsuk'b'a ak'aslemal pacha kmajaw chawe; ru' utojb'alil.

AMÓS 3:12

Keje iri kub'ij i Ajwal: “Keje pacha i ajyu'ul chij chi kresaj li keb' aqanij o we utzam jun xikinaj puchi' i koj, keje uri k-on i ki'anmajik i aj Israel ile chi je jeqel pa Samaria, ike le chi kki'ayb'a kib' che chomiq taq kotz'ib'al re i Damasco.”

AMÓS 7:17

Xwiri iri are kub'ij i Ajwal: I awixoqil kumin ni rib' ku' achiyab' chkiwach i winaq pa tinimit, i ak'ojol xaq i ami'al kekam ni ru' ch'ich' chi k'ulala o uware; awulew kkijach ni chkiwach ru' sakinik; yet lik katkam ni pkulew i winaq chi kkikoj ti Dios, i winaq aj Israel kechap nu b'ik, kek'am nu b'i naj che i kulew.

AMÓS 9:10

Konojel i je ajmakib' pintinimit, kekam ni ru' ch'ich' chi k'ulala o uware; konojel ni'pa i kkib'ij: Lik nti pich' che ile kqak'ulmaj; i utz taj lik kojumaj taj, kecha.

Oseas 1:4

Are uri i Ajwal xub'ij che ma Oseas: “Chaya pub'i i ak'al a Jezreel, man pa keb' oxib' ij panoq kink'ajsaj ni kiwach i je umuq uxikin ma ajawinel Jehú, rumal taq i kamsanik chi ire xu'an chila pa Jezreel, keje ile kink'is ni uwach i ajawinik pa tinimit Israel.