2 Samuel 4:6 - Wuj Pa K'ubultzij

⁶ I ixoq chi kchajiw uchib'e ktijin te'eq chujos-ixik i trigo, xwiri xkos chichak rumali xwarik, are uri xe'ok b'i ma Recab xaq ma Baana ru' ja, mijun xeilawik.

2 Samuel 4:6 Referans Kwoze

2 Samuel 2:23

I ma Asael xumayij ti roqtaxik, rumali ma Abner xuch'ap b'i uche' chi o ch'ich' chutzam, xuch'ap b'i che upam xe'el k'a chel rij, chila xjab'i kan uch'akul pulew. Konojel i winaq ni'pa keik'aw chila ipa jab'al wi ma Asael, to' ketak'i chutaqexik.

2 Samuel 20:10

Xwiri ma Amasa xukoj ti retalil i ch'ich' chi rok'am ma Joab pu'ab'. Are uri ma Joab lik juntir xumin b'i i ch'ich' le che upam, ni'pa i rixkol ma Amasa le xet'ub'krij b'i pulew. I ma Joab xuk'is ti chik ukamsaxik ma Amasa le man su' xkamik. Te'uri ma Joab junam ru' ucha', chi ma Abisai, xe'e chik chuterb'exik ma Seba, chi uk'ojol ma Bicri.

2 Samuel 3:27

I ma Abner are xupon pa tinimit Hebrón, xk'am b'i rumal ma Joab putzal pan uchija, man kelapan kitukel. Are je o chik kitukel, i ma Joab le xujil b'i ch'ich' che upam ma Abner, are uri xkamik, elsab'al roywal che rumal ukamsaxik ucha' chi etz ma Asael.

2 Samuel 4:2

Je o keb' achiyab' chi kki'an kipatan chrij ma Is-boset, ike le je aj-atzil chke jutzob'aj ili'omab'. I jun are ma Baana xaq i jun chik are ma Recab; chekeb' je uk'ojol ma Rimón aj Beerot chi xaq umuq uxikin ma Benjamín. Man i winaq chi aj pa tinimit Beerot kb'ix chke chi je ukwenta utzob'ajil ma Benjamín.

Jueces 3:26

Tz'aqat ktijin kib'aytajik ike ru' i kamnaq, i ma Aod x-anmajik, xik'aw chila ipa je o wi tiox pa Gilgal, xupon k'a pa Seirat, chila xruwaj wi rib'.