Yunus 1 - Tuntu i mPue ri Basa Taa

Sarita Tempo i Yunus Mangewa Songka i mPue Yawe

¹ Wali re’e seore i Pue Yawe magombo resi i Yunus, ana i Amitai. Ia manganto’o,

² “Pakajoli, inta njo’u Niniwe, kota to bae etu. Apa Aku roomo mangkita lengko to maja’a to naika ntau to maroo ri kota etu. Ane jela korom nja’u ria, pakaroso loomu mampatiendoka sira manganto’o, ‘Jagai kojo, apa Pue Yawe damangahuku komi!’” Etu semo gombo to nato’oka i mPue Yawe resi i Yunus to ia damamporata resi tau Niniwe.

³ Pei i Yunus ia taa kojo rani mangika palaong to etu, see naka ia miyai yau mampiyaika i Pue Yawe. Ia rani yau njo’u kota Tarsis apa ia mampobuuka ane yau njo’u Tarsis ia maya mampiyaika yau i Pue Yawe. Wali ia yau ruyu njo’u kota Yopa to ri wii ntasi pei mangaliwu bangka to damalayag njo’u kota Tarsis etu. Wali ojo pangaratanya bangka ia mangabayar ongkosnya see maya mapone ri bangka etu. Wali ojo karoonya ia mangabayar, i Yunus mapone ri bangka panewa ia yau lo’u rayanya pei maroo-roo la’u ria. Wali yako etu sira malayag mangampago kota Tarsis.

⁴ Pei yako etu, i Pue Yawe mangika ngoyu to marimbo kojo ri wawo ntasi see naka bose kojo bombang ri tasi etu. Wali bangka etu damaja’a yaumo naika nu bombang etu.

⁵ Wali tau to mapalaong ri bangka etu, sira meka kojo rayanya see naka sira maroso loonya makai-kai resi pue-pue nsira samba’a pei samba’a. Sira mangoko ngaya-ngaya to mabeu to re’e ri bangka etu pei mangantaji yau lo’u raya ntasi see manga’a wo’u bangka nsira etu naka ne’e datondu yau. Pei i Yunus ia taa mangansani bara re’e kesaa to mawali ri wawonya etu, apa ia la’uwa yore denat la’u raya bangka.

⁶ Wali tau to mangkeni bangka etu, ia yau lo’u raya nu bangka pei mangarata i Yunus ia la’u tongo ngkayorenya. Wali ia mangalike i Yunus, ia manganto’o, “Gete, ngkai to bayore si’i! Maka pei ojo yore yore ri tempo kita damalodong yau? Pambangu pei pokai-kai resi puemu see ia bara damamporayang pei mampalaes kita naka ne’e kita mate yau.” Etu semo to nato’oka ntau to mangkeni bangka resi i Yunus.

⁷ Roo see, sira dua mapone muni nto’u wawo nu bangka etu. Wali siromumo samparia tau to mapalaong ri bangka etu pei magombo-gombo bara wimba daraika. Sira manganto’o samba’a pei samba’a, to’onya, “Manasa re’e samba’a kita to mangika sala naka pei kita daselaka. Wali anu kita mabata’a see mampakanasa to imba kita to sala etu.” Wali sira mabata’a, roo see pas-pas kono resi i Yunus.

⁸ Wali sira mampotanaka resi i Yunus, sira manganto’o, “Gete korom! Wimba, bara saba yako palaong ngkorom semo naka pei kita daselaka? Yako imbare korom, pasi kesaa palaongimu? Imbare tanamu pasi kesaa bansamu?” Etu semo pampotanaka nsira resi i Yunus.

⁹ Wali i Yunus mangansono, ia manganto’o, “Aku si’i tau Ibrani. Pasi aku mampue mampakabae i Pue Yawe. I Pue Yawe semo to nampapowali yangi, pasi to nampapowali seja tasi pasi tana to mara.” Etu semo pasono i Yunus.

¹⁰ Roo see ia mangansaritaka sira mangkonong ewa wimba inikanya mampiyaika yau i Pue Yawe. Wali ojo pangandonge nsira sarita i Yunus etu, sira meka kojo rayanya. Sira manganto’oka ia, “Gete korom! Maka pei korom mangika palaong to taa masipato etu?”

¹¹ Wali tongo-tongonya sira mampogomboka i Yunus etu, bombang kanjo’u-njo’u tiduga-dugang kabosenya naika nu ngoyu to marimbo kojo. See naka tau to mapalaong ri bangka etu mampotanaka resi i Yunus, to’o nsira, “Kesaa to danaika mami resi korom see kami taa datondu yau? Kesaa to daraika see ngoyu si’i damandoo yau pasi tasi si’i dalindu muni seja?”

¹² Wali i Yunus mangansono, to’onya, “Manasa resi aku saba yako salangku semo naka pei ngoyu marimbo si’i rata resi kita. Wali taji yau aku lo’u raya ntasi see ngoyu damandoo pasi tasi dalindu muni seja.” Etu semo to nato’oka i Yunus resi tau to mapalaong ri bangka.

¹³ Pei sira taa mansaka mangaluluka gombo i Yunus etu. Kasimbalinya yako etu, sira ojo mampakaroso mangawose bangka rani mangkeni njo’u wii ntowo ntasi. Pei taa mawali apa kanjo’u-njo’u kabose-bose bombang to mangantara bangka nsira.

¹⁴ Wali tau to mapalaong ri bangka etu, sira maroso loonya makai-kai resi i Pue Yawe, Pue to napakabae i Yunus, sira manganto’o, “O Pue Yawe, kami mamporapika resi Komi naka ne’e Komi mangahuku mate kami ane kami mangantaji yau tau si’i lo’u raya ntasi pei roo see ia damate yau. Ne’e mampakasala kami ane rapanya tau si’i tare salanya pei kami mampopate yau ia. Apa samparia palaong to si’i naka pei mawali saba yako pamporani ngKomi semo, i Pue Yawe.” Etu semo pokai-kai nsira.

¹⁵ Wali ojo karoonya sira makai-kai sira mangoko i Yunus pei mangantaji yau ia lo’u raya ntasi. Ojo pangantaji yau nsira i Yunus lo’u raya ntasi, tasi etu mansaka lindu muni.

¹⁶ Wali tempo tau to mapalaong ri bangka mangkita kuasa i mPue Yawe etu, sira mawali meka kojo pasi manga’angga kojo Ia. Wali see naka sira mangkeni pampue resi Ia pasi mangika nia samba’a pei samba’a.

Sarita Tempo i Yunus Natungku Pei Naomo Yau nu Bau to Bae Kojo

¹⁷ Wali ojo pangantaji yau i Yunus lo’u raya ntasi etu, tempo etu re’e samba’a bau to bae kojo to napasilonga yami i mPue Yawe. Wali bau etu mangantungku pei mangomo yau i Yunus. Wali i Yunus ia togo mbengi pei togo eo kasaenya maroo la’u raya ngkompo nu bau to bae kojo etu.