TADUMPANYOMBA 16 - Tuntu i mPue ri Basa Taa

Sarita Mangkonong Paposia i mPue Yawe Resi i Harun

² Wali yako etu i Pue Yawe mampogomboka wo’u i Musa, to’oNya, “Pogomboka tukakamu, i Harun, pei patiendoka ia mangkonong songi to Mapasing Kojo. Songi etu semo to re’e ri sambali nu rindi ronto ri raya nTendangKu. Wali to’oka ia ne’e masua ngkewanya nja’u raya nsongi etu naka ne’e ia mate yau. Apa nja’u ria re’e peti to la’u parajanji i mPue Allah la’u rayanya. Peti etu, bombonginya semo to rato’oka tampa to napangabombong i mPue Allah dosa. Bombong mpeti etu re’e limu to maroo ri wawonya wali Aku semo to re’e ri raya nu limu etu, see naka taa masipato ane masua ngkewanya reria.

³ “Ewa si’i danaika ngkepala nto pampue to bae angganya, etu semo i Harun, tempo ia damasua ri raya nsongi to Mapasing Kojo etu. Wali re’e katawanya ia damasua, ia damansambale yau ruyu samba’a sapi to pongka to damangurawa. Roo see ia damampampueka sapi etu resi i Pue Allah see i Pue Allah tamo damangkitanaka dosanya. Yako etu i Harun damansambale yau seja samba’a domba to pongka to damawali pampue to ratunu yau.

⁴ Roo mansambale yau sapi pasi domba etu, ia damandiu. Roo mandiu, ia damamposunsuka pake Palaong nto Pampue to ojo to pampue semo mangampake. Wali uyunya kojo ia damamposunsuka selana podo to raika yako kain lena, roo see ia damamposunsuka wo’u baju to marade, pasi salipi, pasi songko. Wali samparia pake nto pampue to ia mamposunsuka etu paka raika yako kain lena.

⁵ “Wali yako etu, to’oka yunu ngkomi to Israel, kenika i Harun dua mba’a bembe to pongka pasi samba’a domba to pongka. Bembe to nakeni nsira etu darasambale yau mawali pampue see Aku tamo damangkitanaka dosa nsira. Panewa domba darasambale seja, pei domba etu damawali pampue to daratunu yau mampakasanang rayangKu.

¹⁴ “Wali yako etu i Harun damangoko sangkodi raa to yako ri sapi to ia roomo mangansambale yau ngena. Panewa ia damangkeni raa etu njo’u raya nsongi to Mapasing Kojo pei yau ri tango mpeti to la’u parajanji i mPue Allah la’u rayanya. Rata ri tangonya etu, ia damangajoloka tanujunya ri raya nu raa nsapi pei mampedasaka ri wawo mpeti etu see kono ri ba’anya to rato’oka tampa to napangabombong i mPue Allah dosa. Roo see ia damampedasaka wo’u pitu ngkani see raa kono seja ri woto mpeti etu.

¹⁵ Roo mangika palaong etu, ia dayau wo’u damansambale yau samba’a bembe to nakeni nu yununya to Israel darapampueka resi Aku see Aku tamo damangkitanaka dosa nsira. Roo rasimbale yau bembe etu, i Harun damangoko sangkodi raanya pei mangkeni seja ri sambali nu rindi ronto pei mampotango wo’u peti to la’u parajanji i mPue Allah. Rata ri tangonya, ia damangika seja sewaju ewa inikanya resi raa nsapi ngena. Wali ia damangajoloka wo’u tanujunya ri raa nu bembe etu pei mampedasaka ri tango mpeti etu see kono ri ba’anya pasi ri wotonya.” Etu semo gombo i mPue Yawe.