TADULAKO 2 - Tuntu i mPue ri Basa Taa

Sarita Tempo i Pue Yawe Mangawaika Tau Israel to Pobotus Damangansawang Sira

^7-9 Wali yako etu, to papolaong i mPue Yawe etu semo i Yosua, ana i Nun, ia mate yaumo. Tempo ia mate etu, ia satumo pei sampuyu nto’u umurnya. Wali ojo kapatenya yaumo, ia rapongkeli yau nja’u lipu to si ia, etu semo Timnat-Serah. Lipunya etu re’e ri oyo ntongku-tongku to rato’oka tongku Epraim. Tongku etu tondo utara yako ri tongku Gaas. Wali tempo i Yosua tiroowa tuwu, tempo etu tau Israel mangalulu kojo songka i mPue Yawe. Pasi nempo roomo namate yau i Yosua, sira tiroo seja mangalulu songka i mPue Yawe apa tiroowa tuwu tau tu’a nsira. Wali tau tu’a nsira etu, etu semo tau to nangkita samparia palaong to taa rapobiasa to naika i mPue Yawe mangansawang sira to Israel nja’u pada bone seore.

¹⁰ Pei yako etu, kanjo’u-njo’u kasae-sae samparia tau tu’a nto Israel etu, sira puramo namate yau. Wali yako etu jamo tau Israel to taa mangkita palaong to taa rapobiasa to naika i mPue Yawe etu. Tau etu tamo mangansani Ia pasi tamo mangalulu Ia.

^11-13 Kasimbalinya yako etu, sira mangandolika yau tango nsira yako resi i Pue Yawe, Allah to napakabae nu bue-bue nsira tempo owi, pasi to roomo nangkeni muni sira to Israel yako la’u tana Mesir. Roo see sira mangika palaong to maja’a kojo ri pangkita i mPue Yawe, etu semo sira mula mangalulu pue-pue to taa monso to napue ntau ri bansa-bansa to maroo ri tana to singkenta pei tana nsira. Pue-pue to taa monso etu rato’oka Baal pasi Astoret. Wali tau Israel mula mampue mampakabae pue-pue to taa monso etu. Wali palaong etu mampakaja’a raya i mPue Yawe.

^14-15 Ia mapoi kojo rayaNya resi sira, see naka Ia mangahuku sira. Wali Ia mangabiaka see bali nsira to maroo ri tana to singkenta pei tana nsira etu, sira ma’i mangamusung tau Israel. Wali tempo sira ma’i mamusu etu, sira manganangi yau tau Israel panewa mangoko yau samparia to sira puenya. Wali tau Israel taa kojo nakoto manganangi bali nsira etu. Ponto ngkani sira yau mamusu, sira paka nangi yau apa i Pue Yawe taa mampasimbalika sira. Ia ojo mangabiaka see sira nangi yau apa palaong to etu singkonong kojo ewa to Ia roomo mamparajanjika pasi mampatiendoka sira seore mangkonong kesaa to damawali ane sira mampue mampakabae pue to yusa. Wali mandasai kojo nepe ntau Israel.

¹⁶ Pei yako etu i Pue Yawe mamporayang sira, see naka Ia mula mangampilis tau to mawali ketua nsira to damampalaes sira. Tau etu rato’oka to pobotus. Wali to pobotus etu, sira mangkeni yunu nsira to Israel yau mamangamusung balinya to roomo mampasiasika sira etu. Wali ane to pobotus semo to mangkeni sira, tempo etu sira maya manganangi balinya etu.

¹⁷ Wali tempo owi, bue-bue ntau Israel etu, sira mangalulu kojo porenta i mPue Yawe. Pei tempo si’i tau Israel si’amo ewa buenya tempo etu. Apa sira majoli kojo mangandolika yau tangonya yako resi i Pue Yawe. Pasi sira bo’onya seja mampodongeka to pobotus to mampalaes sira etu. Wali sira raporapaka ewa tau to masala apa sira mangandolika tangonya yako resi i Pue Yawe pei mangaluluka yau wo’u pue-pue to yusa pei mampue mampakabae pue-pue to etu.

¹⁸ Wali malagi ngkani bali nto Israel ma’i mangamusung pei mampasiasika sira. Pasi ponto ngkani palaong etu mawali, tau Israel sakaboo marapi sawang, see naka i Pue Yawe mamporayang sira pei mampokau wo’u samba’a ketua to rato’oka to pobotus damangansawang sira. Wali kasaenya to pobotus etu tuwu, i Pue Yawe mangansawang tau Israel see naka sira manganangi bali nsira, apa Ia re’e resi samparia to pobotus to ipilisiNya etu.

¹⁹ Pei ponto-ponto ngkani mate yau to pobotus to mangkapalang sira etu, to Israel mansaka mangandolika muni tango nsira yako resi i Pue Yawe pei mangika palaong to ja’a-ja’a wo’u pei palaong to naika nto tu’angi nsira. Sira mangalulu muni pue-pue to yusa pei mampue mampakabae pue-pue to etu. Mabukul kojo sira, wali tare pandoonya mangaluluka yau pamporani ndaya nsira.