Posuwunya 3 - Tuntu i mPue ri Basa Taa

Sarita Tempo i Musa Napokau i mPue Yawe Damampalaes TauNya

¹ Wali i Musa ia mangkampang bembe pasi domba ntemanuanya, i Yitro, to pampue ri tana Midian. Wali re'e seore i Musa mangkeni bembe pasi domba etu mangawote pada bone mosu nja’u wiinya, rata ri Sinai. Tongku Sinai etu rato'oka seja tongku to i Pue Allah puenya.

² Wali tempo i Musa nja'u nja'u ria, ma'i Pomakau i mPue Yawe yako ndate Saruga. Pomakau etu mampaporaoka i Musa koroNya ewa kaa nu apu ri raya njunju. Wali junju etu mawea pei taa mosi.

³ Wali tempo i Musa mangkita etu ia ipu rayanya mampobuuka, “Gete, maka pei junju etu taa mosi yau? Taa kojo rapobiasa! To tao-tao aku mampomosuk pei mangalo'a bara kesaa sabanya naka pei mawali palaong etu.”

⁴ Wali i Musa yau mangalo'a anu to taa rapobiasa etu. Pei tempo i Pue Yawe mangkita ia yau, Ia mampokio yako ri raya njunju etu, Ia manganto'o, “Musa! Musa!” Wali i Musa mangansono, ia manganto’o, “Kesaa danuto’oka ngKomi aku, i Pue?”

^5-6 Panewa i Pue Yawe manganto'oka ia, “Ne'e rapakamosu wo'u. Aku semo i Pue Allah anu to napakabae nu buemu, i Abraham, i Ishak pasi i Yakub. Pasi tana to nupakore ngkorom etu mapasing apa Aku puenya, wali wonsu yau sandalemu mangika tondong korom mampakabae Aku.” Wali ojo pangandonge i Musa gombo i mPue Allah etu, ia mangawonsu yau sandalenya panewa ia mangabombong yau lionya apa ia meka rayanya mangalo'aka i Pue Allah.

⁷ Wali yako etu i Pue Yawe manganto'oka wo’u i Musa, to’oNya, “Monsu pu’u Aku roomo mangkita kasesa to narata ntaungKu ri tana Mesir. Pasi Aku mangandonge seja loo nsira saka’ao mamporapi daralapa muni yako ri ara ngkuasa ntau to mangansesai sira etu. Wali manasa kojo resi Aku ewa wimba kaparinya kasesa nsira etu.

⁸ See naka Aku ma’i yako ndate Saruga damangampalaes sira yako ri ara ngkuasa nto Mesir. Aku damangkeni muni sira yako ri tana etu yau njo'u tana to bae. Tana etu maboko pasi magaya. Pasi tana etu tana to nakaroos nto Kana'an, to Het, to Amori, to Peris, to Hewi, pasi to Yebus.

⁹ Wali Aku mangandonge loo ntaungKu sakaboo pasi Aku mangkita ewa wimba naika nto Mesir mangansesai sira.

¹⁰ Wali inta muni lo’u tana Mesir pei potango i Makole Mesir. Apa Aku mampokau korom yau damangkeni muni taungKu, tau Israel semo, yako ri tana Mesir etu.” Etu semo to nato’oka i mPue Yawe resi i Musa.

Sarita Mangkonong Paposia i mPue Allah Resi i Musa Tempo Ia Dayau Muni Lo’u Tana Mesir

¹¹ Pei ojo karoonya i Pue Allah manganto’oka i Musa yau muni lo’u tana Mesir, tempo etu i Musa mangika anto. Ia manganto'oka i Pue Allah, to’onya, "Gete! Aku si'i taa bae anggangku. Taa masipato aku damampotango i Makole pasi damangkeni muni tau Israel yako ri tana Mesir."

¹² Wali i Pue Allah manganto'o, "Aku semo damangansawang korom. Pasi Aku damangika tondong resi korom see korom damanasa Aku semo to mampokau korom. Wali tondong etu, etu semo ane rata temponya korom roomo mangkeni muni tau Israel yako ri tana Mesir, tempo etu komi damampue manga’angga Aku ri Tongku Sinai si'i.” Etu semo tondong to nato’oka i mPue Allah i Musa.

¹³ Pei i Musa manganto'oka i Pue Allah, to’onya, “Ane rapanya aku yau resi tau Israel pei manganto'oka sira, ‘I Pue Allah to napakabae nu bue-bue ngkomi, Ia semo to nampokau aku ma’i resi komi’, ane ewa see sira bara damampotanaka resi aku. Sira damanganto'o, ‘I sema sanga i mPue Allah etu?’ Wali ane ewa see, wimba dakuika mangansono sira?”

¹⁴ Wali i Pue Allah manganto'oka i Musa, “Aku rato’oka, ‘I AKU SEMO AKU TO RE’EMO YAKO RI SINGKASAENYA’. Wali to'oka tau Israel etu, ‘I Pue Yawe to rato’oka i AKU TO RE’EMO, Ia semo to nampokau aku ma'i resi komi.’”

¹⁵ Wali roo see i Pue Allah manganto'oka wo'u i Musa, “To'oka tau Israel, 'I Pue Yawe, Allah to napakabae nu bue-bue ngkomi tempo owi, etu semo i Abraham, i Ishak, pasi i Yakub, Ia semo to nampokau aku ma'i resi komi.’ Ewa wetu to danato’oka ngkorom sira. Wali Aku i Pue Yawe. Etu semo sangangKu rataka ri singkasaenya. Pasi etu semo sangangKu to danato'oka ntau pasi samparia wiyaanya rataka ri singkasaenya.

¹⁶ “Wali inta lo’u tana Mesir pei ojo karatamu la’u ria pasiromunaka songonya to tu'angi nto Israel. Roo see to'oka sira, 'I Pue Yawe, Allah to napakabae nu bue ngkomi, etu semo i Abraham, i Ishak, pasi i Yakub, Ia roomo narata resi aku. Ia mampogomboka aku mangkonong komi, to’oNya, “Aku re'emo mangkita katuwu ntau Israel, wali Aku mangangkita palaong to naika nto Mesir resi sira.

¹⁷ Wali see naka Aku mamparajanjika damangalapa muni sira yako ri kasesa to narata nsira etu. Aku damangkeni muni sira yako ri tana Mesir etu dayau njo'u tana to magaya pasi maboko. Etu semo tana to nakaroos nto Kana'an, to Het, to Amori, to Peris, to Hewi pasi to Yebus.”’ Wali etu semo to danuto’oka ngkorom resi to tu’angi nto Israel.”

¹⁸ Wali ojo karoonya i Pue Allah manganto'oka i Musa gombo etu, Ia manganto’o wo’u, to’oNya, “Tempo korom yau mampogomboka to tu'angi nto Israel etu, sira damampodongeka gombomu. Wali korom dayau sindara-ndara pei to tu'angi nto Israel etu dayau mampotango i Makole Mesir. Komi damanganto'oka ia, ‘I Pue Yawe, Allah to napakabae nto Ibrani, Ia roomo simparata pei kami. Wali see naka biakamo kami dayau njo'u pada bone kalongkonya togo eo rapalinja panewa rata. Kami yau damampampueka pampue resi i Pue Yawe, Allah mami etu.’ Ewa wetu danuto’oka ngkorom resi i Makole.

¹⁹ Pei Aku Kunsani yami i Makole Mesir etu taa damangawaika komi dayau ane ia tawa manasanya Aku semo to bae-bae kuasanya pei ia.

²⁰ Wali see naka Aku damangampake kuasangKu damangika palaong to taa rapobiasa ri tana nsira. Wali yako palaongingKu to taa rapobiasa etu Aku damangahuku to Mesir. Wali roo see i Makole damangawaika komi yau.”

²¹ Yako etu i Pue Allah manganto’oka i Musa, to’oNya, “Wali tempo komi damampiyaika tana Mesir, komi si'a ojo yau ngkawasemonya. Apa Aku damangika see tau Mesir damanoto rayanya resi komi.

²² Wali Aku pokauka songonya to we'a ntau Israel dayau marapi resi to Mesir to maroo ri awenya, pasi damarapi seja resi tau we’a to Mesir to yusa to maroo ri raya banuanya. Sira damamporapi ngaya-ngaya ewamo pera, weyawa, pasi pake, panewa ngaya-ngaya etu komi damampaposunsuka ngana ngkomi to langkai pasi to we’a. Wali ewa wetu danuika ngkomi mangangkeni yau kasugi nto Mesir etu." Etu semo to nato’oka i mPue Allah i Musa.