Pomulanya 5 - Tuntu i mPue ri Basa Taa

Sarita Mangkonong Wiyaa i Adam

¹ Wali si’i semo sarita to ratulis mangkonong wiyaa i Adam, ia semo tau to uyunya kojo napapowali i mPue Allah. Wali tempo i Pue Allah nampapowali tau, inikaNya sewaju ta’anya ewa lengke to si Ia semo.

² Pasi Ia nampapowali tau see re’e samba’a to langkai pasi re’e seja samba’a to we’a. Roo see Ia mampakasanang katuwu nsira pasi mangansangaka sira “Tau”.

³ Wali yako etu, ojo kagananya i Adam satu pei togo mpuyu nto’u, tempo etu ia re’e ana to langkai. Ananya etu sewaju kojo ta’anya ewa lengke mpa’anya. Wali i Adam mangansangaka ananya etu i Set.

⁴ Panewa yako ri pampoana i Set etu, i Adam wayu atu nto’u wo’u katuwunya. Pasi ri rayanya etu malagi wo’u ananya to langkai pasi to we’a.

⁵ Wali i Adam ia sio atu pei togo mpuyu nto’u panewa ia mate.

⁶ Wali i Set, ana i Adam etu, ia satu pei lima nto’u tempo ia re’e ana langkai to sanganya i Enos.

⁷ Panewa yako ri pampoana i Enos etu, i Set wayu atu pei pitu nto’u wo’u katuwunya. Pasi ri rayanya etu malagi wo’u ananya to langkai pasi to we’a.

⁸ Wali i Set ia sio atu sampuyu pei dua nto’u panewa ia mate.

⁹ Wali i Enos, ana i Set etu, ia sio mpuyu nto’u tempo ia re’e ana langkai to sanganya i Kenan.

¹⁰ Panewa yako ri pampoana i Kenan etu, i Enos wayu atu sampuyu pei lima nto’u wo’u katuwunya. Pasi ri rayanya etu malagi wo’u ananya to langkai pasi to we’a.

¹¹ Wali i Enos ia sio atu pei lima nto’u panewa ia mate.

¹² Wali i Kenan, ana i Enos etu, ia pitu mpuyu nto’u tempo ia re’e ana langkai to sanganya i Mahalaleel.

¹³ Panewa yako ri pampoana i Mahalaleel etu, i Kenan wayu atu pei opo mpuyu nto’u wo’u katuwunya. Pasi ri rayanya etu malagi wo’u ananya to langkai pasi to we’a.

¹⁴ Wali i Kenan ia sio atu pei sampuyu nto’u panewa ia mate.

¹⁵ Wali i Mahalaleel, ana i ngKenan etu, ia ono mpuyu pei lima nto’u tempo ia re’e ana langkai to sanganya i Yared.

¹⁶ Panewa yako ri pampoana i Yared etu, i Mahalaleel wayu atu pei togompuyu nto’u wo’u katuwunya. Pasi ri rayanya etu malagi wo’u ananya to langkai pasi to we’a.

¹⁷ Wali i Mahalaleel ia wayu atu sio mpuyu pei lima nto’u panewa ia mate.

¹⁸ Wali i Yared, ana i Mahalaleel etu, ia satu ono mpuyu pei dua nto’u tempo ia re’e ana langkai to sanganya i Henokh.

¹⁹ Panewa yako ri pampoana i Henokh etu, i Yared wayu atu nto’u wo’u katuwunya. Pasi ri rayanya etu malagi wo’u ananya to langkai pasi to we’a.

²⁰ Wali i Yared ia sio atu ono mpuyu pei dua nto’u panewa ia mate.

²¹ Wali i Henokh, ana i Yared etu, ia ono mpuyu pei lima nto’u tempo ia re’e ana langkai to sanganya i Metusala.

²² Panewa yako ri pampoana i Metusalah etu, i Henokh tuwu masingkatao pei i Pue Allah togo atu nto’u wo’u. Pasi ri rayanya etu malagi wo’u ananya to langkai pasi to we’a.

²³ Wali i Henokh tuwu togo atu ono mpuyu pei lima nto’u kasaenya,

²⁴ pasi ri raya ngkatuwunya etu ia tuwu masingkatao pei i Pue Allah. Wali kodi majoli ia tamo re’i ri lino si’i apa tempo ia tiroo tuwu i Pue Allah mangokotaka yau ia.

²⁵ Wali i Metusalah, ana i Henokh etu, ia satu wayu mpuyu pei pitu nto’u tempo ia re’e ana langkai to sanganya i Lamek.

²⁶ Panewa yako ri pampoana i Lamek etu, i Metusalah pitu atu pei wayu mpuyu dua nto’u wo’u katuwunya. Pasi ri rayanya etu malagi wo’u ananya to langkai pasi to we’a.

²⁷ Wali i Metusalah ia sio atu ono mpuyu pei sio nto’u panewa ia mate.

²⁸ Wali i Lamek, ana i Metusalah etu, ia satu wayu mpuyu pei dua nto’u tempo ia re’e ana langkai.

²⁹ Wali i Lamek mangansangaka ananya etu i Nuh. Ia manganto’o, “Ana si’i damampolindo raya ngkita ri raya ngkatuwu ngkita. Apa mandasai kojo kita mapalaong ri tana anu natanaa yau i mPue Yawe si’i.”

³⁰ Wali yako ri pampoana i Nuh etu, i Lamek lima atu sio mpuyu pei lima nto’u wo’u katuwunya. Pasi ri rayanya etu malagi wo’u ananya to langkai pasi to we’a.

³¹ Wali i Lamek ia pitu atu pitu mpuyu pei pitu nto’u panewa ia mate.

³² Wali i Nuh, ana i Lamek etu, ia lima atu nto’u panewa ia re’e togo mba’a ananya to langkai, sanga nsira togo i Sem, i Ham pasi i Yapet.