Pomulanya 41 - Tuntu i mPue ri Basa Taa

Sarita Mangkonong Pangipi i Makole

¹ Wali yako etu, ojo kagananya dua nto’u wo’u, i Makole Mesir ia mangipi. Ri raya mpangipinya etu ia makore ri wii nu ue to rato’oka ue Nil.

² Tempo ia makore nja’u ria, kodi majoli ia mangkita pitu mba’a sapi anu maboko pasi maroro ta’anya to masuwu yako ri raya nue etu. Ojo pasuwunya yako ri ue etu sapi to pitu mba’a etu mula mangkoni lee ri wii nue.

³ Yako etu i Makole mangkita wo’u pitu mba’a sapi to yusa to masuwu seja yako ri ue etu. Sapi to etu maja’a ta’anya pasi madusu kojo.

⁴ Wali sapi to madusu etu yau makore ri awe nu sapi to maboko ri towo nue. Panewa gete, sapi to maja’a pasi madusu kodi majoli mangkoni yau sapi to maboko etu! Wali ojo pangkita i Makole palaong to etu ia mansaka mangendo muni.

⁵ Pei roo see ia yore wo’u pei mangipi wo’u kadua ngkaninya. Pei ri raya mpangipinya to etu ia mangkita santoko liano to pitu wulinya to magaya kojo pasi mabonot kapa’inya.

⁶ Yako etu ia mangkita kodi majoli re’e wo’u pitu wulinya, pei to etu taa magaya. To etu pisa apa nangau yau tawuis nu ngoyu marimbo yako ri pada bone.

⁷ Wali wuli liano to pisa etu mangomo yau yununya to magaya kojo. Wali ojo pangkita i Makole palaong to etu, ia mansaka mangendo wo’u pei ia mangampobuuka, “Gete, ojo pangipi etu!”

⁸ Wali ojo ka’eonya rao i Makole ia masusa kojo rayanya mampobuuka bara kesaa batuanginya pangipinya to dua etu. See naka ia mampasiromunaka samparia tau to kapake pasi tau to yusa to re’e kapandenya. Ojo kasiromu ntau etu ia mangansaritaka sira pangipinya etu pei tare pasi samba’a sira to mangansani batuanginya pangipinya etu.

⁹ Pei ojo pangandonge ngkai to mampasilongaka i Makole anu to nainu mangkonong pangipi i Makole etu, panewa ia mangendo muni ewa wimba naika i Yusup mangansawang ia seore. Wali ia mampotango i Makole pei manganto’oka ia, to’onya, “Pa’a, seo si’i aku mangangendo muni salangku.

¹⁰ Seore komi maja’a rayamu resi kami dua tau to mampoapuka komi roti, see naka komi mangantarungku yau kami dua ri raya banua ngkepala ntentara to mangajagai banuamu.

¹¹ Wali ri rayanya kami ratarungku etu, re’e sambengi kami dua mangipi seja, pei pangipi mami dua etu taa sewaju batuanginya.

¹² Wali kami mangansaritaka pangipi mami etu resi samba’a tau to damangurawa to siwaka pei kami ri raya ntarungku etu. Ngkai etu tau Ibrani, to papolaong ngkepala ntentara semo. Wali ojo karoonya kami dua mangansaritaka ia mangkonong pangipi mami dua etu, ia mampakanasaka kami batuanginya.

¹³ Yako etu, ewa wimba pampobatuangikanya resi kami pangipi mami dua etu, mawali pu’u ewa see. Aku rawaika muni palaongingku, pei ngkai to mampoapu roti etu ia rapopate yau panewa raloe yau lembanya, singkonong ewa to ito’okanya kami dua.” Etu semo to nasaritaka ngkai etu resi i Makole.

¹⁴ Wali ojo pangandonge i Makole saritanya etu, ia manganto’oka to papolaonginya to yusa, to’onya, “Inta lo’a mai to Ibrani etu.” Wali sira majoli yau mangalapa muni i Yusup yako ri raya ntarungku. Roo see i Yusup mampakaroso damampotango i Makole. Ia rakosi ruyu wayuanya panewa mangawonsu yau pakenya to masae pei mamposunsuka muni pake to rawaika resi ia. Yako etu ia yau mampotango i Makole.

¹⁵ Ojo karata i Yusup nja’u ria, i Makole manganto’oka ia, “Naka pei aku mampokio korom apa mburi aku nangipi pei tare pasi samba’a tau to mangansani batuanginya. Pei aku re’e mangandonge korom ojo mandonge pangipi ntau panewa nunsanimo batuanginya.”

¹⁶ Wali i Yusup mangansono, ia manganto’o, “Si’anya aku. Kamonsonya ojo i Pue Allah semo to nakoto mampakanasa batuanginya pangipi ntau. Wali Ia semo damampakanasaka komi batuanginya pangipi ngkomi etu see re’e muni kasanang ndaya ngkomi.” Etu semo pasono i Yusup.

¹⁷ Wali i Makole mangansaritaka i Yusup pangipinya. Ia manganto’o, “Ewa si’i pangipingku mburi. Ri raya mpangipingku etu aku makore ri wii nu ue Nil.

¹⁸ Tempo aku makore nja’u ria, aku mangkita pitu mba’a sapi anu maboko pasi maroro ta’anya, sira masuwu yako ri raya nue etu. Ojo pasuwunya yako ri ue etu sapi to pitu mba’a etu mula mangkoni lee ri wii nue.

¹⁹ Yako etu aku mangkita wo’u pitu mba’a sapi to yusa to masuwu seja yako ri ue etu. Sapi to etu masiasi apa madusu kojo pasi maja’a ta’anya. Tawa re’e kukita sapi to ewa wetu ri tana Mesir si’i.

²⁰ Panewa gete, sapi to maja’a pasi madusu kodi majoli mangkoni yau sapi to maboko etu!

²¹ Pei roo mangkoni yau yununya etu, nempo ojo sangkodi, sapi to madusu etu tare pombalinya. Tiroowa madusu pasi maja’a ta’anya. Wali ojo pangkitangku palaong to etu aku mangendo muni yako yore.

²² Pei roo see aku yore muni pei mangipi wo’u kadua ngkaninya. Ri raya mpangipingku to etu aku mangkita santoko liano to pitu wulinya to magaya kojo pasi mabonot kapa’inya.

²³ Yako etu aku mangkita kodi majoli re’e wo’u pitu wulinya, pei to etu taa magaya. To etu pisa apa nangau yau tawuis nu ngoyu marimbo yako ri pada bone.

²⁴ Wali aku mangkita wuli nu liano to pisa etu mangomo yau yununya to magaya kojo. Etu semo pangipingku to kadua. Wali aku mansaritaka tau to kapake pasi tau to pande mangkonong pangipingku etu pei tare pasi samba’a sira to nakoto mampakanasaka aku batuanginya.” Etu semo to nato’oka i Makole resi i Yusup.

²⁵ Wali i Yusup manganto’oka i Makole, ia manganto’o, “Pangipi ngkomi dua njaya etu samba’aja batuanginya. I Pue Allah re’e mampaponsanika yami komi kesaa anu to daNaika.

²⁶ Wali pangipi ngkomi to dua njaya etu samba’aja batuanginya. Ane pangipi ngkomi mangkonong sapi pitu mba’a to maboko to masuwu yako ri ue Nil, batuanginya pitu nto’u. Pasi ane pangipimu mangkonong liano to pitu wulinya to mabonot kapa’inya, sewaju batuanginya, etu semo pitu nto’u to gana kojo pangkoni ri tana si’i.

²⁷ “Pasi sapi pitu mba’a to madusu to nukita ngkomi masuwu seja yako ri ue, to etu seja batuanginya pitu nto’u. Pasi ewa see seja batuanginya liano to pitu wulinya to pisa tawuis nu ngoyu yako ri pada bone. Wali batuanginya pitu nto’u to taa kojo gana pangkoni ri tana si’i. Oro semo.

²⁸ Wali ewa wetu batuanginya pangipi ngkomi. I Pue Allah re’e mampaponsanika yami resi komi anu to daNaika, wali palaong to etu damawali kojo ewa wimba aku roomo manganto’oka resi komi.

²⁹ “Wali ri rayanya pitu nto’u damawali kojo kalingaa juku ri tana Mesir si’i.

^30-31 Pei ojo karoonya temponya to gana kojo pangkoni etu, darata wo’u pitu nto’u to tamo kojo gana pangkoni. Mapari kojo oro to darata etu, see naka tau mangkalingan yau ewa wimba kagananya pangkoni tempo ruyu. Wali oro etu damampakaja’aka yau tana Mesir si’i.

³² “Wali naka pei dua ngkani nupangipika ngkomi apa i Pue Allah roomo mampakatantuka kojo palaong si’i damawali, pasi tamo masae Ia damampolengkoka.” Etu semo to nato’oka i Yusup mampakanasaka i Makole pangipinya etu.

³³ Roo see, ia manganto’oka wo’u i Makole, to’onya, “Wali apa saba palaong to damawali etu, see naka matao ane komi mangaliwu samba’a tau to pande pasi bae kanasanya, panewa okotaka tau etu damampansaruka komi pei damaporenta seja ri tana ngkomi si’i.

³⁴ Panewa matao seja ane komi mangokotaka bara sawei mba’a tau to damangansawang tau etu mampasilonga palaong to daraika. Wali ewa si’i, ane ri rayanya pitu nto’u to mawali kojo wua ngkalingaa, tau damamporomung samparia wua ngkalingaanya. Wali ponto tau ane roomo mamota, wua ngkalingaanya etu daraika lima ntila to sewaju kabaenya. Panewa opo ntila siraja puenya, pei santila danaoko ntau to mamporomung pangkoni etu.

³⁵ Wali tau etu damangampake kuasa to nuwaika ngkomi sira damamporomung pangkoni ri rayanya pitu nto’u to matao si’i. Wali pangkoni to naporomungi nsira etu, pangkoni etu darakalisoka ri raya ngkonda ri kota-kota panewa rapakaintika.

³⁶ Jagai kojo pangkoni etu naka ne’e rakoni yau ri rayanya pitu nto’u si’i. Wali ewa wetu raika see ane ratamo oro to pitu nto’u kasaenya ri tana Mesir si’i, re’e yami pangkoni rakalisoka naka ne’e tau ri tana si’i mate moro.” Etu semo pampobuuka i Yusup to ia manganto’oka i Makole.

Sarita Mangkonong Tau Mesir Mangkalisoka Pangkoni ri Katawanya Rata Oro

³⁷ Wali ojo pangandonge i Makole pasi to papolaonginya ewa wimba songka i Yusup etu, sira samparia singkonong.

³⁸ Wali i Makole manganto’oka to papolaonginya mangkonong i Yusup, ia manganto’o, “Gete, manasa kojo Nosa i mPue Allah re’e maroo ri raya ngkai si’i. Wali kita taa damangarata wo’u tau ewa i Yusup to masipato mampansaruka aku mampasilonga palaong etu.”

³⁹ Yako etu ia manganto’oka i Yusup, to’onya, “I Pue Allah semo to nampaponsanika korom samparia to si’i, see naka korom maya mangansani. Tare tau to yusa to sewaju kapandenya pasi kanasanya pei korom.

⁴⁰ Wali aku mansarumakaka korom mampasilonga banuangku si’i. Pasi samparia tau ri tanangku si’i damangaluluka porentamu. Jamo aku to bae-bae kuasangku pei korom.”

⁴¹ Wali yako etu i Makole manganto’oka wo’u i Yusup, “Si’i-si’i aku mangawaika korom pangka damawali gubernur ri tana Mesir.”

⁴² Yako etu i Makole mangawonsu yau sinsi yako ri tanujunya. Sinsi etu tondong ngkuasanya. Wali sinsinya etu ia mampaposunsuka ri tanuju i Yusup. Roo see ia mampaposunsuka seja i Yusup baju to magaya kojo pasi rante weyawa ri le’enya ewa masipato napake ntau to bae angganya.

⁴³ Panewa yako etu ia mangawaika i Yusup bendi to biasa napake ntau to mampansaruka i Makole ri tana Mesir. Wali ane i Yusup rani mako yau ia mapone ri bendi etu pasi re’e tentara to mampatiruyu pei ia ri jaya. Sira kaboo-boo, manganto’oka tau boros, “Tabemo ia, tabemo ia.” Ewa wetu naika i Makole mangawaika pangka resi i Yusup ri tana Mesir.

⁴⁴ Wali yako etu i Makole manganto’oka i Yusup, “Aku semo Makole, pei aku mangawaika korom mangkuasang tau ri tana si’i. Wali tare bara kesaa to maya naika nsira damangewa porenta ngkorom.” Etu semo to nato’oka i Makole i Yusup.

^45-46 Roo see ia mangawali sanga i Yusup, mangawaika ia sanga to basa Mesir. Wali sanga i Yusup to bou, etu semo i Sapnat-Paaneah. Roo mangansangaka ia etu, i Makole mampasiwaka ia pei tau we’a to sanganya i Asnat, ana i mPotipera. I Potipera etu ia to pampue ri kota On. Wali etu semo sarita ri tempo i Yusup mampotango i Makole ri tana Mesir etu. Yako etu ia masuwu muni yako ri banua i Makole panewa yau mangalinjak juku ri tana Mesir. Tempo etu ia togompuyumo to’unya.

⁴⁷ Wali yako etu, ri rayanya pitu nto’u, kalingaa mawali kojo juku ri tana Mesir, see naka yabi kojo wua ngkalingaa etu.

⁴⁸ Wali ri rayanya pitu nto’u etu ponto ngkani mamota, samparia yabinya pangkoni etu naporomung nto papolaong i Yusup panewa nakalisoka nsira ri raya ngkonda ri kota-kota. Ponto-ponto ri kota re’e konda to bae to rapake mangkalisoka pangkoni to rapota nja’u nawu-nawu ri lipu to etu.

⁴⁹ Wali tempo sira owo mula mamporomung pangkoni etu, sira mangantimbang see nansani ewa wimba kaborosinya, pei kanjo’u-njo’u kaboro-boros, see naka tamo ratimbang, jamo rakalisoka yau ri raya ngkonda apa ewa bone ri wii ntasi kaborosinya.

⁵⁰ Wali ri rayanya pitu nto’u to mawali kojo pangkoni etu, re’e katawanya rata tempo oro, tempo etu i Yusup ia riana. Dua mba’a ananya paka langkai to napoanaka i Asnat.

⁵¹ Wali ana i Yusup sira dua i Asnat etu, to tu’anginya nasangaka i Yusup i Manase, batuanginya “mangika mangkalingan yau”, apa to’onya, “I Pue Allah mangansawang aku see aku maya mangkalingan yau samparia kasusangku seore. Pasi Ia mangansawang seja aku see aku taa sangkani mangendo lipu mpa’angku.”

⁵² Yako etu ananya to kadua, ia mangansangaka i Epraim, batuanginya “mangarata dale”, apa to’onya, “I Pue Allah mangansawang aku see naka aku mangarata dale ri tana pangaratangku kasesa.” Etu semo to nato’o i Yusup tempo mangansanga ananya.

^53-54 Wali yako etu, ojo kaliunya pitu nto’u anu mawali kojo pangkoni ri tana Mesir etu, mulamo wo’u pitu nto’u to mawali oro ewa nato’o yami i Yusup tempo ruyu. Wali ri tempo etu juku ri lino si’i taa gana pangkoni. Pei ri tana Mesir re’e pangkoni.

^55-56 Wali kanjo’u-njo’u kapari-pari oro etu. Sambawo lino mapari kojo oro sampe ratamo temponya sakowa tau ri tana Mesir puramo seja pangkoni to re’e resi sira. Tempo etu sira yau mamporapi pangkoni resi i Makole. See naka i Makole manganto’oka sira, ia manganto’o, “Inta resi i Yusup, panewa kesaa to ito’okanya komi, ikam.” Wali tau Mesir etu yau mangampago i Yusup. Ojo karata nsira resi i Yusup, ia manguamo samparia konda to buke pangkoni etu panewa ia mampobalu pangkoni resi sira.

⁵⁷ Yako etu ma’i tau boros to yako ponto-ponto lipu ri sambawo lino, sira kangguyu-ngguyu ma’i ri tana Mesir damangoli seja pangkoni resi i Yusup apa sambawo lino oro etu mapari kojomo.