Pomulanya 10 - Tuntu i mPue ri Basa Taa

Sarita Mangkonong Wiyaa i Nuh

¹ Wali si’i semo sarita mangkonong wiyaa i Nuh. Wali ojo karoonya samal ue, ana i Nuh, etu semo i Sem, sira togo i Yapet pasi i Ham, sira samparia paka riana pasi ngana nsira togo etu boros to langkai.

Sarita Mangkonong Wiyaa i Yapet

² Wali ana i Yapet, etu semo i Gomer, i Magog, i Madai, i Yawan, i Tubal, i Mesekh, pasi i Tiras.

³ Wali ana i Gomer etu, etu semo i Askenas, i Ripat, pasi i Togarma seja.

⁴ Pasi ana i Yawan, etu semo i Elisa, pasi i Tarsis, i Kitim, pasi i Dodanim.

⁵ Wali wiyaa i Yawan etu, ri wii ntasi pasi pulo-pulo to nakaroos nsira. Wali samparia tau to etu paka wiyaa i Yapet. Wali kanjo’u-njo’u kasae sae sira mawali yau bansa-bansa pei suku-suku, pasi ponto suku nsira wungka yusa lipunya pasi wungka yusa seja basanya.

Sarita Mangkonong Wiyaa i Ham

⁶ Wali ana i Ham, etu semo i Kus, i Misraim, i Put, pasi i Kana’an.

⁷ Panewa ana i ngKus, etu semo i Seba, i Hawila, i Sabta, i Raema, pasi i Sabtekha. Wali ana i Raema etumo i Syeba pasi i Dedan.

⁸ Pasi i Kus re’e wo’u samba’a ana, sanganya i Nimrod. I Nimrod etu, ia semo tau to uyunya kojo mawali bae kuasanya ri lino.

⁹ Pasi ia pande kojo manjoyong apa nasawang i mPue Yawe. See naka rataka ri temponya aku mangantulis sarita si’i ane tau rani mangabarong yununya to pande seja manjoyong, ane ewa see ia manganto’oka yununya etu, “Korom pande seja manjoyong, ewa i Nimrod to nasawang i mPue Yawe tempo owi.”

¹⁰ Wali i Nimrod etu, uyu-uyunya ia mangkuasang kota-kota ri tana Babilonia. Kota-kota to nja’u Babilonia etu, etu semo kota Babel, kota Erek, pasi kota Akad.

¹¹ Yako etu ia yau wo’u ri tana Asyur pei mangawangu kota Niniwe, kota Rehobot-Ir, kota Kalah

¹² pasi kota Resen. Kota Resen etu re’e ri oyonya kota Niniwe pei kota Kalah to bae kojo. Wali etu semo sarita mangkonong i Nimrod.

¹³ Pasi re’e seja wiyaa i Misraim, ana i Ham. Wiyaa to si i Misraim etu, etu semo to Lidia, to Anam, to Lehab, to Naptuh,

¹⁴ to Patrus, to Kasluh pasi to Kaptor. To Kasluh etu, sira semo bue-bue ntau Pilistin.

¹⁵ Wali ane ana i Ham to rasangaka i Kana’an etu, ia seja re’e wiyaanya. Ananya to tu’anginya, etu semo i Sidon, panewa re’e seja i Het.

¹⁶ Pasi re’e wo’u wiyaa i ngKana’an to rato’oka to Yebusi, to Amori, to Girgasi,

¹⁷ to Hewi, to Arki, to Sini,

¹⁸ to Arwadi, to Semari pasi to Hamati. Wali yako etu suku-suku to wiyaa i ngKana’an etu mawali malagi kojo tau, see naka kanjo’u-njo’u kabae-bae tana to nakaroos nsira.

¹⁹ Wali tana to nakaroos nsira etu mula yako kota Sidon rata ri kota Gerar to mosu ri kota Gasa ri tondo selatan. Pasi rata ri kota Sodom, kota Gomora, kota Adma pasi kota Seboim to mosu ri kota Lasa ri tondo mata nu eo. Etu semo ungkanya tana nakaroo nsira. Wali bae kojo tana to nakaroos nsira.

²⁰ Wali ewa wetu wiyaa i Ham. Wali kanjo’u-njo’u kasae-sae sira mawali yau bansa-bansa pei suku suku, pasi ponto suku nsira wungka yusa lipunya pasi wungka yusa seja basanya.

Sarita Mangkonong Wiyaa i nSem

²¹ Wali ana i Nuh to tu’anginya, i Sem, ia tukaka i Yapet. Pasi i Sem seja bue i Eber pasi samparia wiyaanya, etu semo tau Ibrani. Wali i Sem etu re’e seja ananya.

²² Ana i nSem etu, etu semo i Elam, i Asyur, i Arpakhsad, i Lud, pasi i Aram.

²³ Panewa ana i Aram, etu semo i Us, i Hul, i Geter, pasi i Mas.

²⁴ Wali yako etu i Arpakhsad ia mawali pa’a i nSelah, panewa tempo baemo i Selah ia mawali pa’a i Eber.

²⁵ I Eber etu dua ananya. Samba’a sanganya i Peleg, batuanginya “Tiga’as”, apa tempo ia tuwu tempo owi, tempo etu semo to lino tiga’as yau. Pasi a’i i mPeleg etu, sanganya i Yoktan.

²⁶ Wali ana i Yoktan, etu semo i Almodad, i Selep, i Hasar-Mawet, i Yerah,

²⁷ i Hadoram, i Usal, i Dikla,

²⁸ i Obal, i Abimael, i Syeba,

²⁹ i Opir, i Hawila, pasi i Yobab. Samparia tau to etu paka ana i Yoktan.

³⁰ Wali tana to nakaroo ntau etu mula yako kota Mesa rata ri pantana-pantana nja’u Separ ri tondo mata nu eo. Wali etu semo ungkanya tana to nakaroo nsira.

³¹ Wali ewa wetu wiyaa i nSem. Wali kanjo’u-njo’u kasae-sae sira mawali yau bansa-bansa pei suku suku, pasi ponto suku nsira wungka yusa lipunya pasi wungka yusa seja basanya.

³² Wali samparia tau etu paka wiyaa i Nuh. Re’e suku-suku to wiyaa i nSem, re’e suku-suku to wiyaa i Yapet, pasi re’e seja suku-suku to wiyaa i Ham. Wali yako ri temponya samal ue, sira kasae-sae kaboro-boros panewa sira tiga’as yau njo’u sambawo lino. Wali samparia bansa ntau to re’e ri lino paka wiyaa nsira togo seja.