Pombilang 27 - Tuntu i mPue ri Basa Taa

Sarita Tempo i Yosua Napilis i mPue Yawe Damangabolos i Musa

^18-19 Wali yako etu, re’e seore i Pue Yawe mampogomboka wo’u i Musa pei manganto’o, “I Yosua, ana i Nun, ia tau to re’e Nosa i mPue Allah resi ia, wali masipato ia mangkapalang tau Israel damangabolos korom. Wali keni ia damampotango to pampue, i Eleasar, pasi mampotango tau Israel to boros. Yako etu, ri tango ntau boros etu, posaka palemu ndate wo’o i Yosua mangika tondong ia semo tau to rapilis damawali kepala nsira to bou.

²⁰ Waika ia sangga’a kuasamu see samparia yunumu to Israel manasa ia taa maya taa napolaika nsira.” Etu semo to nato’oka i mPue Yawe i Musa.

²¹ Wali yako etu i Pue Yawe manganto’oka wo’u i Musa, Ia manganto’o, “Ane ratamo temponya i Yosua mawali kepala ntau Israel, tempo etu ia dayau resi to pampuengKu, i Eleasar, ane rani mangansani ewa wimba pamporaningKu resi tau Israel. Wali ane rapanya i Yosua rani mangansani mangkonong temponya ia damangkeni to Israel dayau mamusu, bara mangkonong temponya damangkeni sira mawolili muni njo’u lipunya, ane ewa see ia damampotanaka resi i Eleasar ruyu panewa i Eleasar semo to damampotanaka resi Aku. Wali Aku damampakanasaka resi i Eleasar pamporaningKu etu. Aku damampakanasaka ia mangampake saga to napake nto pampue tempo mangika palaongingKu. Saga nto pampue to damampaponsanika resi ia mangkonong pamporaningKu etu, saga etu rato’oka Urim pasi Tumim. Wali ojo kanasanya i Eleasar pamporani to si Aku etu, panewa ia damamporataka resi i Yosua.” Etu semo gombo i mPue Yawe resi i Musa.

²² Wali i Musa mangika samparia to naporentangika i mPue Yawe ia. Ia mangkeni i Yosua mampotango to pampue, etu semo i Eleasar, pasi mampotango seja tau Israel to boros.

²³ Yako etu ia mamposaka palenya ndate wo’o i Yosua mangika tondong ia mangokotaka i Yosua mawali kepala to bou ewa to roo nato’oka i mPue Yawe ia.