Pombilang 13 - Tuntu i mPue ri Basa Taa

Sarita Tempo i Musa Mampokau to Pali’e

^1-3 Wali tempo tau Israel maroo nja'u pada bone ri lipu Paran, tempo etu i Pue Yawe mampogomboka i Musa. Ia manganto’o, “Pilis samba’a tau to bae pangkanya yako ponto ponto suku ntau to Israel. Wali ponto ponto suku raoko samba’a tau to bae pangkanya. Roo mampilis tau sampuyu pei dua etu, pokau sira yau damangali’e tana Kana’an, tana to daKuwaikamo resi komi to Israel.” Etu semo to nato’oka i mPue Yawe i Musa. Wali i Musa mangampilis tau to sampuyu pei dua etu panewa mampokau sira yau.

¹⁷ Tempo i Musa mampokau to pali’e etu, ia mampakanasaka yami sira anu to danaika nsira. Ia manganto'o, “Tempo komi yau njo’u tana Kana’an, lulu jaya to yau njo’u tondo utara liu ri tana Negeb. Panewa ane masua ri tana Kana’an etu, polas wo’u lulu jaya njo’u tondo utara rata ri tampa to malagi pantana.

^18-19 Wali rata reria, lo'aka kojo bara wimba tana etu see komi maya mampaponsanika resi kita samparia. Wali lo’aka tana etu bara matao bara taa matao. Pasi lo’aka tau to maroo ri tana etu, bara maroso sira bara taa, pasi bara malagi sira bara taa. Pasi lo’aka seja lipu-lipu to nakaroo ntau etu pei pakanasa lipu nsira etu bara kota-kota to re’e rindi watu maroso to mampakainti, bara ojo kampu-kampu to taa mainti.

²⁰ Pasi tempo mangali’e tana etu, pakanasa seja bara maboko tana etu bara taa maboko. Pasi lo’aka bara re’e kaju nja’u ria bara tare.” Etu semo patuu i Musa resi to pali’e. Wali ri tempo etu, kono kojo tempo napowua nu anggur nja’u tana Kana’an etu, see naka i Musa manganto’oka seja sira, to’onya, “Ri katawanya mawolili muni resi kami rire, pakaroso rayamu pei oko sangkodi wua ngkalingaa nja'u ria pei keni mai see kami maya mangkita seja ewa wimba wua ngkalingaa ri tana etu."

²¹ Wali ojo pangandonge nto poli'e gombo i Musa etu sira mayokomo. Sira mangalulu jaya to yau ri tondo utara njo’u tana Kana’an. Rata ri tana Kana’an etu, sira mangali’e mula yako ri pada bone to rato’oka Sin to re’e ri tondo selatan rataka ri kota sanganya Rehob ri tondo utara. Kota Rehob etu taa longko yako ri kota Hamat.

²² Wali ri raya mpalinja nsira etu, sira mula ri tondo selatan panewa rata ri kota Hebron. Wali pitu nto’umo yako pangawangu ntau kota Hebron etu, panewa kota Soan nawangu ntau Mesir la’u tana nsira. Wali kota Hebron etu, etu semo lipu nakaroo ntau togo to sanganya i Ahiman, i Sesai pasi i Talmai. Tau togo etu paka wiyaa i Enak.

^23-24 Wali yako etu to poli’e etu polas wo’u lo’u lemba to rato’oka lemba Eskol. Rata la’u ria sira mangarata nawu anggur, wali sira mangoko sambuli wua nu anggur etu. Pei gete, wua anggur etu mabeu kojo, see naka dua tau mangalempa. Wali apa saba sira mangoko sambuli nu anggur etu, see naka tampa etu nasangaka ntau lemba Eskol, apa Eskol batuanginya sambuli semo. Pasi sira mangoko seja wua ngkaju ara pasi wua ngkaju to rato’oka delima.

Sarita Tempo To Poli’e Rata Muni Resi Yunu nSira to Israel

^25-26 Wali ojo kagananya opo mpuyu mbengi kasaenya to poli’e etu mangali’e tana Kana’an panewa sira mawolili muni mangampago yununya to mangampeas sira nja’u lipu to rato’oka Kades ri pada bone Paran. Tempo sira rata muni nja’u ria sira mangansaritaka resi i Musa, i Harun pasi samparia yununya to Israel mangkonong samparia to nakita nsira nja’u tana Kana’an. Pasi sira mampaporaoka seja resi yunu nsira wua ngkalingaa to nakeni nsira yako ri tana etu.

²⁷ Wali si’i semo to nato’oka nto poli’e etu resi i Musa pasi yununya, sira manganto'o, “Seore kami yau njo’u tana Kana’an mangalulu to nupokauka ngkomi resi kami. Wali rata nja’u ria kami mangangkita tana etu magaya pasi maboko kojo! Lo’a, si'i sangkodi wua ngkalingaa to keni mami yako nja’u ria.

^28-29 Pei ane tau to maroo nja'u ria, sira tau bose malangan pasi sira maroso kojo. Pasi kota-kota to nakaroo nsira etu bose pasi re’e rindi watu to maroso to tiku ri kota-kota etu samba’a pei samba’a. Wali samparia kota etu ewa bente to mainti kojo. Wali re’e bara sawei suku ntau to maroo ri tana Kana’an. To Amalek sira maroo ri tondo selatan. To Het pasi to Yebus pasi to Amori, sira maroo ri tampa to boros pantana. Panewa to Kana'an sira maroo ri wii ntasi pasi ri wii ntowo Yordan. Pasi kami mangkita seja tau to wiyaa i Enak, tau etu gete, sira bose malangan!” Etu semo to nasaritaka nto poli’e resi i Musa pasi yununya to Israel.

³⁰ Wali ojo pangandonge nto Israel gombo nto poli’e etu, sira masusa rayanya mampobuuka kareba mangkonong tau to bose maroso etu. Sira sakambumbu mangkambumbuka i Musa. Pei samba’a to poli’e etu, sanganya i Kaleb, ia mampogomboka tau to masusa etu, ia manganto’oka sira, “Pakasanang raya ngkomi! Nempo ewa wetu tau ri tana Kana’an, taa mawei apa kita maya manganangi sira. Wali anu kita mansaka yau damangantundang tana etu." Etu semo to nato’o i ngKaleb.

³¹ Pei to poli’e to yusa to yau sinjaya pei i Kaleb etu, sira manganto'o, “Taa mawali kita mangamusung tau nja'u ria etu, apa sira semo to roso-roso pei kita.” Etu semo to nato’o nto poli’e to yunu i ngKaleb.

³² Wali yako etu sira mula mangawutis yununya to Israel mangangkonong tana to yau li'e nsira etu. Sira manganto'o, “Masipato kita mampomoruka maroo nja’u ria, apa tare tau to maya tuwu ri kasanang ndayanya. Kasimbalinya yako etu, tau to maroo nja’u tana etu ojo darapakaja’aka yau. Pasi samparia tau to kita mami etu sira paka bose koronya.

³³ Kami mangkita seja sawei mba’a tau to malangan kojo koro nsira, tau to wiyaa Enak semo. Wali ane ri pangkita mami, ane rapasiwajuka kabosenya koro ngkita pei koro nsira, gete, nangi kita! Kita ojo ewa mpa'o kabosenta! Pasi ewa see seja pampobuuka nsira mangkonong kita. Sira mampobuuka seja, ‘Tau si'i ewa mpa'o kabosenya!’” Wali etu semo gombo nto poli’e to kaborosinya etu manto’o maja’a tana Kana’an etu.