Masmur 139 - Tuntu i mPue ri Basa Taa

Ipu Raya i Daud Mampobuuka i Pue Yawe

¹ O Pue Yawe, Komi roomo mamparesa rayangku, wali Komi mangansani kojo aku.

² Komi mangansani tempo aku matunda pasi tempo aku makore. Pasi nempo rapanya masilongko kita dua, nempo ewa see, tempo aku taware mampobuuka, Komi mangansani yami pampobuukangku etu!

³ Pasi Komi mangangkita katuwungku, wali Komi mangkita tempo aku malinja pasi tempo aku maturu. Wali tare to inikangku to taa nunsani ngKomi.

⁴ Pasi gombongku seja Komi mangansani yami. Apa ri katawanya aku manganto’o gombo etu, Komi mangansani yami, taa manto’o ane room aku manganto’o.

⁵ Wali Komi re’e siwaka pei aku, raporapaka ewa pampa to tiku resi aku. Pasi kuasa ngKomi mangararamaka aku.

⁶ O Pue Yawe, ipu kojo rayangku mampobuuka samparia to nunsani ngKomi etu! Naka pei ipu rayangku mampobuuka apa taa kojo re’e to Komi taa mangansani!

⁷ Wali tare jaya ane rapanya aku damampiyaika yau Komi, apa nempo imba kukanjo’u, nja’u seja Komi.

⁸ Wali ane rapanya aku yau nto’u yangi, ndate yami Komi. Pasi ane rapanya aku yau lo’u lipu ntau mate, la’u yami seja Komi!

⁹ Pasi ane rapanya aku mayoko ewa tonsi mangampago njo’u tondo mata nu eo, nja’umo yami Komi. Pei ane aku yau mangawote tasi damaroo ri suogi lino to nja’u tondo kasoyo nu eo,

¹⁰ nja’u yami seja Komi. Wali Komi damangkentar aku, pasi Komi damangararamaka aku mangampake kuasaMu.

¹¹ Wali nempo aku rani mamposayaka yau Komi, pei aku mangaliwu tampa to mawuni nja’u raya mburi, pei taa mawali. Apa nempo ri raya mburi, sewaju ewa ri raya nu reme.

¹² Tare pasisalanya resi Komi wuri pasi reme. Apa ane raya mburi, sewaju ewa bae eo, wali taa mawali aku mamposayaka yau Komi ri raya mburi etu.

¹³ Apa nempo aku damawuniwa ri raya ngkompo nu indongku seore, tempo etu Komi mangansani yami aku. Apa Komi semo to nangika ponto saga ngkorongku. Komi semo to nampapowali aku ri raya ngkompo nu indongku etu.

¹⁴ Wali tempo aku mampobuuka palaong to nuika ngKomi mampapowali aku etu, aku mangabarong Komi, apa palaong ngKomi etu masipato ra’angga pasi mampakaipu rayangku. Wali manasa kojo resi aku samparia palaong ngKomi paka taa rapobiasa.

¹⁵ Wali tempo aku la’uwa laraya ngkompo nu indongku, tampa to taa maya nakita ntau, tempo etu Komi re’e mangkita aku. Komi mangalo’aka kojo tempo wukungku rapapowali pasi tempo korongku rapasilonga la’u ria.

¹⁶ Komi mangkita aku tempo aku tawa rapoanaka, tempo tawa masilonga korongku. Pasi re’e katawanya saga ngkorongku rapapowali, Komi mangantulis yami ri bukuMu temponya saga ngkorongku etu darapasilonga samba’a pei samba’a.

¹⁷ O Pue Allah, ipu kojo rayangku mampobuuka pampobuuka ngKomi. Malagi kojo pampobuuka ngKomi etu,

¹⁸ ewa bone ri wii ntasi kaborosinya. Wali ane rapanya aku damangabilang pampobuuka ngKomi etu, taa kukurang apa malagi kojo. Pei nempo rapanya mawali aku mangabilang samparia pampobuuka ngKomi etu, nempo ewa wetu pei tiroo boros kojo mangkonong Komi to aku tawa mangansani.